’Eiaha e mata’u, e fa’aro’o noa mai !

Tā’u nei poro’i i teie mahana, nō te feiā ’āpī ïa o te ’Ēkālesia, ’oia ho’i te fāito matahiti o te peresideni Russel M. Nelson ’e raro mai. E mea varavara vau i te fa’a’ohipa i te mau hōho’a, e’ita rā e nehenehe e ’ore nō teie.

Hōho’a

E rata nā Marin Arnold i pāpa’i

Teie cri de coeur, nō tō’u hoa iti ïa ’o Marin Arnold, e va’u matahiti, tāna i pāpa’i i te hitura’a o tōna matahiti. Nā’ū e huri atu ia ’outou i tāna pāpa’ira’a ’Aiphiti fa’a’āpīhia :

’Ia ’ite ’oe Marin iti ē, e fiu ato’a paha ’oe i tā’u a’ora’a, pāpū roa. ’Ia pāpa’i atu ra ’oe i tō ’oe ’episekōpo nō te amuamu atu, ’a parau atu ē ’o « Kearon » tō’u i’oa. ’O Elder Patrick Kearon. »

Fātata e piti matahiti tō te pararera’a ma’i pe’e i pū’ohu i te paraneta, e au i te mau ma’i o te Bibilia, ’e ’a mau ai fātata te mau mea ato’a i te pae sōtiare, e au ē, ’aita ato’a te peu ’ino, te hāmani ’ino ’e tae noa atu te ’arora’a taehae i te pae poritita i fa’aea noa atu—i te fenua nei ’e nā te ara. ’E ’aita ato’a i nava’i, tē fa’aruru nei ā tātou i te mau fifi tahito i te pae sōtiare ’e i te pae nō te ta’ere, mai te ’erera’a te ta’ata i te pae nō te fa’arava’ira’a faufa’a ē tae roa atu i te fa’anoara’a o te arutaimāreva ’e i te ’aifāito-’ore-ra’a o te mau nūna’a ’e tē vai atu ra.

E mea fa’ataiā teie mau huru mata’i pa’a’ina ’e te mau mahana pōiri nō te feiā ’āpī i rotopū ia tātou, ’o rātou ho’i tā tātou e ti’aturi nei nō te hi’o i te ananahi ma te ’ana’anatae ’e te ’ā’au tae. ’Ua parauhia ē, « te mana o te feiā ’āpī ’āpī ’o te tao’a ’āmui ïa nō te ao tā’āto’a nei. ’O te… feiā ’āpī… te hōho’a o tō tātou… ananahi. »² Hau atu, ’o tā tātou mau tamari’i te mau ti’a’au faufa’a ’ei roto i tō rātou rima te hope’a o teie ’Ēkālesia e tu’uhia ai.

’Ia hi’ohia rā tō tātou nei tau, ’ua ta’a iho ā ïa ia tātou nō te aha tē topatopa ri’i ra te ’imira’a i te maita’i nui i roto i te taure’are’a. ’Aita i maoro a’enei, ’ua ha’amau te ’Orometua Laurie Santos, nō Yale University, i te hō’ē piha tāna i topa te i’oa Te ihi manava ’e te orara’a maita’i. « Te matahiti mātāmua o terā piha ha’api’ira’a, fātata ’o [te toata] o te [tā’āto’ara’a] o te mau pīahi tuha’a mātāmua o te ha’api’ira’a tuatoru tei tāpa’ohia i roto. »³ I muri iho, ’ua hau i te 64 mirioni ta’ata tei hi’o i tāna ha’apurorora’a natirara. Nō ni’a i teie ’ohipa māere, ’ua fa’a’ite te hō’ē pāpa’i ve’a i tōna māuiui i te ’itera’a teie mau pīahi ’āpī ’e te māramarama ’e te rave rahi—’e te feiā pa’ari ato’a—’ia « ’imi [ma te pūai hope’a] i te hō’ē mea tei mo’e ia rātou », ’e te mea ’ino atu ā, tē hia’ai nei rātou i te hō’ē mea ’aita a’enei tā rātou.⁴

Tā’u tāparura’a i teie mahana i te feiā ’āpī, ’e ia ’outou te mau metua ’e te feiā pa’ari e tauturu ia rātou, ’oia ho’i, e ha’amata i tā ’outou mā’imira’a i te ’oa’oa nā roto i te fāri’ira’a i te ’auhune tei fāri’i-a’ena-hia e tātou nō ’ō mai i te ta’ata hōro’a i te mau hōro’a maita’i ato’a.⁵ I te taime iho ā e rave rahi i roto i te ao nei e uiui ra i te mau uira’a hōhonu roa o te vairua, e pāhono atu tātou ma te « parau ’āpī »⁶ nō te ’evanelia a Iesu Mesia. Tē pūpū nei Te ’Ēkālesia a Iesu Mesia i te Feiā Mo’a i te mau Mahana Hope’a nei, ’o tē ’āfa’i i ni’a roa nei i te misiōni ’e te poro’i a te Fa’aora o te ao nei, i te rāve’a rahi roa a’e i te tau mure ’ore ra nō te ’ite mai i te maita’i ’e nō te rave i te maita’i i teie taime i hina’aro-roa-hia.

’Ua parau te peresideni Russell M. Nelson ē, tei teie u’i feiā ’āpī te ’aravihi nō te « [maita’i] rahi i ni’a i te ao nei, rahi atu i te tahi noa atu u’i i nā mua atu. »⁷ ’O tātou nei, i roto i te mau ta’ata ato’a, tei tano i te « hīmene i te hīmene nō te aroha fa’aora »,⁸ e tītauhia rā te tītī’aifaro—te « ti’ara’a pipi » mai te peu e mea au a’e nā ’outou terā parau—terā huru ti’ara’a pipi e pāruru ia tātou i te mau ’ohipa au ’ore ’e te mau peu vāvāhi e fa’ahape i tā tātou nota i te tāmatara’a i te hīmene i te hīmene nō te fa’aorara’a mure ’ore.

Noa atu ē tei « te pae ’oa’oa o te purūmu »⁹ tātou, i terā taime ’e terā taime, e ū iho ā atu tātou i ni’a i terā ta’ata tei fa’aoti roa e ’imi i te mea ’oa’oa ’ore ’e te ’oto o te mau mea. ’Ua ta’a ia tātou tāna parau : « E mea pōiri roa hou a’e te pōiri ta’ota’o. » ’Auē ïa hi’ora’a mana’o ’ino ’e ’auē ïa orara’a ’oto mau ! ’Oia, e hina’aro iho ā ïa paha tātou e horo ’ē atu mai te tahi mau vāhi tei reira tātou, e mea pāpū rā, ’eiaha roa atu tātou e hi’o ’ē atu ’o vai tātou—e mau tamari’i nā te Atua ora ’o tei here ia tātou, ’o tei ineine noa e fa’a’ore i tā tātou hara ’e ’o tē ’ore roa, ’e tē ’ore roa atu e fa’aru’e ia tātou. ’O ’outou tāna faufa’a tao’a rahi roa a’e. ’O ’outou tāna tamari’i, ’o tāna i hōro’a i te mau peropheta ’e te mau parau fafa’u, te mau hōro’a pae vārua ’e te mau heheura’a, te mau semeio ’e te mau poro’i, ’e te mau melahi i nā pae e piti o te pāruru.¹⁰

’Ua hōro’a ato’a mai ’oia ia ’outou i te hō’ē ’ēkālesia, ’ō tē ha’apūai i te mau ’utuāfare nō te orara’a tāhuti nei, ’e ’o tē ru’uru’u ’āmui ia tātou nō te tau mure ’ore. ’Ua hau i te 31 000 pāroita ’e ’āma’a tāna, i reira te ta’ata e putuputu nei, ’e e hīmene nei, ’e e ha’apae nei i te mā’a ’e e pure nei nō te tahi ’e te tahi, ’e e hōro’a nei i tā rātou nō tei veve. ’O te vāhi teie te mau ta’ata ato’a e mātauhia te i’oa, e ha’apa’ohia ’e e aupuruhia, ’e te vāhi te mau hoa ’e te ta’ata tupu tei hina’aro, e tāvini ai te tahi i te tahi i roto i te mau pi’ira’a, mai te pi’ira’a ha’apa’ora’a pu’e parau i te ’atu’atura’a fare, ma te tāmoni ’ore. Tē tāvini nei te feiā ’āpī pa’ari i te misiōni—nā reira ato’a nā ta’ata fa’aipoipo pa’ari—e rave rahi tauasini o rātou, ’e nā rātou iho e amo i te mau ha’amāu’ara’a, ’e ’aita tā rātou parau nō ni’a i te vāhi e tāvini ai rātou, ’e tē tere nei te mau melo pa’ari ’e te feiā ’āpī i te hiero nō te rave i te mau ’ōro’a mo’a e tītauhia nō te ru’uru’u ’āmui i te ’utuāfare ta’ata nei—e ’ohipa itoito i roto i teie ao ’āmahamaha, e parau rā ho’i te tahi ē, e ’āmahamaha tau poto noa. ’O te tahi ri’i ïa mau tumu tātou e pūpū nei « i te ti’aturi i roto ia [tātou nei]. »¹¹

E mea pāpū roa i tō tātou nei tau, e mau fifi iti rahi mau i mua i te hō’ē pipi nā Iesu Mesia. Tē hōro’a hua nei te feiā fa’atere nō teie ’Ēkālesia i tō rātou orara’a nō te ’imi i te arata’ira’a a te Fatu nō te fa’a’āfaro i teie mau fifi. E mau fifi ’aita i fa’a’āfarohia mai te au i te mau ta’ata ato’a ra, pēnei a’e ïa ’o te tuha’a o te sātauro tā Iesu i parau nā tātou iho e amo nō te pe’e iāna.¹² I te mea mau ho’i e mau mahana pōiri ’e te fifi te Atua i parau fafau ai ē, e arata’i ’oia i te mau peropheta, i te ao ra ’ua nā roto i te pou ata ’e i te ru’i ra u’a nā roto i te pou auahi, ’e e hōro’a ’oia i te ’āuri tāpe’ara’a, ’e e ha’amatara ’oia i te ’ūputa oaoa ’e ’ia haere nā te ’ē’a piriha’o ’e nā ni’a roa atu, e hōro’a mai ’oia i te mana nō te fa’aoti i te horora’a.¹³

Nō reira, e fa’aea na i te tā’āto’ara’a o te fa’a’amu’a noa atu e mea au ’ore nā ’outou te broccoli. ’A fa’aea i ni’a i tōna māramarama ’e ’a hōro’a i tā ’outou mōrī hinu nō terā tumu.¹⁴ ’Ua tano roa te Paraimere : ’Ua hina’aro mau Iesu « [’ia riro ’outou] ’ei hihi mahana. »¹⁵

I te tāparura’a te ti’a fa’atere ’āti Iuda, ’o Iaeiro, ia Iesu ’ia fa’aora i tāna tamāhine 12 matahiti tē tārava ’e te pohe ra i tōna fare, nō te tārere rahi te ta’ata i ni’a i te Fa’aora, tae mai nei te hō’ē tāvini nō te parau i teie metua tāne ahoaho ē : « ’Ua pohe roa tō tamāhine, ’ātīrē, ’a ha’a rahi te ’orometua. »

« Tē fa’aro’o atu ra rā Iesu i taua parau ra, ’e ’ua parau atu ra ia Iaeiro, nā ’ō atu ra, ’Eiaha e mata’u, e fa’aro’o noa mai, e ora ïa ’oia. »¹⁶

’E ’o te reira iho ā. ’E e ora ato’a mai ’outou. « ’Eiaha e mata’u, e fa’aro’o noa mai. »

Nō te mea e mea tao’a rahi ’outou tāta’itahi i roto i teie nei feiā e fa’aro’o mai ra, nō te Atua ’e nō tāna ’Ēkālesia, e ’ōpani au ma teie parau ’āpōsetolo ta’a ’ē. Hou ’outou ’a fāri’i ai i te hōro’a nō te Vārua Maita’i, tei roto ia ’outou te Māramarama nō te Mesia tei tanuhia i roto i tō ’outou vairua,¹⁷ terā « māramarama ’o tē vai nei i roto i te mau mea ato’a, ’o tē hōro’a […] i te ora i te mau mea ato’a »,¹⁸ ’e ’o te fa’auru ho’i o te maita’i i roto i te ’ā’au o te mau ta’ata ato’a tei ora na ’e ’o tē ora noa atu. ’Ua hōro’ahia mai terā māramarama nō te pāruru ia ’outou ’e nō te ha’api’i ia ’outou. Hō’ē o tāna mau poro’i rahi, ’oia ho’i ïa, te ora, ’o te hō’ē ïa o te mau hōro’a tao’a rahi roa a’e, e hōro’a ho’i e noa’a mai ē a muri noa atu nā roto noa i te tāra’ehara a te Fatu Iesu Mesia. ’Ōna te Māramarama ’e te Ora o te ao nei,¹⁹ ’ua tae mai te Tamaiti fānau tahi a te Atua nō te hōro’a i te ora ia tātou nā roto i te upo’oti’ara’a i ni’a i te pohe.

E mea tītau-roa-hia ia tātou ’ia fafau hope ia tātou iho i terā hōro’a nō te ora, ’e ’ia horo e tauturu i te feiā e riro i te fa’aru’e i te reira hōro’a mo’a. E te feiā fa’atere, te feiā tauturu, te mau hoa, te ’utuāfare—’a hi’o maita’i i te mau fa’a’itera’a nō te fa’aturumara’a, te mana’o tapineva, ’aore rā te mau fa’a’itera’a ato’a nō te ha’amāuiuira’a iāna iho. ’A pūpū atu i tō ’outou tauturu. ’A fa’aro’o. ’A rave i te hō’ē mea nō te ārai i te fifi mai te mea e tano.

I tā tātou feiā ’āpī e tāfifi ra i reira, noa atu ā te mau māna’ona’ora’a ’e te mau fifi, e eremau te pohe ’ōnohi te pāhonora’a. E’ita te reira e tāmarū i te māuiui i roto ia ’outou ’e ’o tā ’outou paha e fa’atupu a’ena ra. I roto i te hō’ē ao tei hina’aro roa ’ino i te māramarama ato’a e noa’a iāna, ’eiaha na e fa’aiti i te māramarama mure ’ore tā te Atua i tu’u i roto i tō ’outou vairua hou teie nei ao. ’A paraparau i te hō’ē ta’ata. ’A ani i te tauturu. ’Eiaha e vāvāhi i te hō’ē ora tā te Mesia i hōro’a i tōna ora nō te fa’aherehere. E nehenehe tā ’outou e fa’a’oroma’i i te mau fifi o teie nei orara’a tāhuti nō te mea e tauturu mātou ia ’outou ’ia amo i te reira. E rahi a’e tō ’outou pūai i tā ’outou e mana’o ra. Tē vai nei te tauturu, tā te ta’ata ’e tā te Atua iho ā rā. E ta’ata herehia ’outou ’e te hina’arohia, ’e ’ua rahi tō mātou fa’ahiahia ia ’outou. Tē hina’aro nei mātou ia ’outou ! « ’Eiaha e mata’u, e fa’aro’o noa mai. »

’Ua ti’aoro te hō’ē tei fa’aruru i te vaira’a tapineva rahi a’e i tā ’outou ’e tā’u nei e fa’aruru noa atu, i te nā-’ō-ra’a : « ’A haere i mua [e au mau hoa feiā ’āpī here] ē. ’A rohi… ’a haere ā ē tae noa atu i te taime e upo’oti’a ai ra ! ’Ia ’oa’oa tō ’outou ’ā’au, ’e ’ia ’oa’oa rahi roa. »²⁰ Ua rahi ho’i te mau mea e pōpou atu. Tē vai ra tātou te tahi ’e te tahi, ’e tē vai ra ’oia. ’Eiaha e fa’a’ere ia mātou i te fāna’ora’a ia ’outou, ’o tā’u nei tāparu, nā roto i te i’oa mo’a o te Fatu Iesu Mesia, tō tātou ’Orometua, ’āmene.