Te here hanahana i roto i te fa’anahora’a a te Metua

Hō’ē ta’a-’ore-ra’a mātarohia nō ni’a i te ha’avāra’a i muri a’e i te orara’a tāhuti nei maori rā, te mau ta’ata maita’i, e haere rātou i roto i te hō’ē vāhi tei parauhia e ra’i ’e te mau ta’ata ’ino, e haere rātou i roto i te hō’ē vāhi mure ’ore tei parauhia ’o hade. Teie mana’o hape i te ferurira’a ē, e piti ana’e vāhi hope’a, e fa’a’itera’a te reira ē, te feiā e’ita e nehenehe e ha’apa’o i te mau fa’auera’a ato’a i tītauhia nō te ra’i, ’ua fa’ata’ahia ïa rātou nō hade ē a muri noa atu.

E fa’anahora’a maita’i a’e tā te hō’ē Metua here i te ao ra nō tāna mau tamari’i. Tē ha’api’i nei te ha’api’ira’a tumu i heheuhia mai a te ’Ēkālesia a Iesu Mesia ē, te mau tamari’i ato’a a te Atua—’eiaha rā te tahi pae iti roa, e’ita e ferurihia i’ō nei—e vai rātou i roto i te hō’ē bāsileia hanahana.² « E rave rahi te pārahira’a mau i te fare o tā’u metua ra »,³ ’ua ha’api’i Iesu. Mai roto mai i te heheura’a ’āpī, tē ’ite nei tātou ē taua mau pārahira’a ra, tei roto ïa e toru hanahana ta’a ’ē. I roto i te ha’avāra’a hope’a e ha’avāhia tātou tāta’itahi ’ia au i tā tātou mau ’ohipa i rave ’e i te mau hia’ai o tō tātou ’ā’au.⁴ Hou rā te reira, e tītauhia ia tātou ’ia māuiui nō tā tātou mau hara i ’ore i tātarahapahia. E mea māramarama roa te mau pāpa’ira’a mo’a nō ni’a i te reira.⁵ ’Ei reira tō tātou ha’avā parauti’a e hōro’a mai ai ia tātou i te hō’ē pārahira’a i roto i te hō’ē o taua mau bāsileia hanahana ra. Nō reira, mai tā tātou i ’ite nā roto mai i te heheura’a ’āpī, « e ha’avāhia ho’i rātou […] ’e e fāri’i te ta’ata tāta’itahi mai te au i tāna iho mau ’ohipa, i tōna iho bāsileia, i roto i te mau aora’i ’o tei fa’aineinehia ».⁶

’Ua fa’aoti te Fatu ’ia heheu mai i te tahi noa mau mea ri’i nō ni’a i teie nā bāsileia hanahana e piti. ’Āre’a i te tahi a’e pae, ’ua heheu mai te Fatu e rave rahi mau mea nō ni’a i te bāsileia hanahana teitei a’e, tā te bibilia e fa’ata’a nei mai te « hanahana o te mahana ».⁷

I roto i te hanahana « tīrētiēra »⁸ tē vai nei e toru tuha’a ’aore rā fāito.⁹ Te mea teitei a’e ’o te fa’ateiteira’a ïa i roto i te bāsileia tīrētiēra, i reira ho’i tātou e riro ai mai tō tātou Metua ’e mai tāna tamaiti ’o Iesu Mesia. Nō te tauturu ia tātou ’ia fa’ahotu i te mau huru hanahana ’e i te tauira’a i te nātura ta’ata e tītauhia nō te fa’atupu i tō tātou pūai hanahana, ’ua heheu mai te Fatu i te ha’api’ira’a tumu ’e ’ua ha’amau i te mau fa’auera’a niuhia i ni’a i te ture mure ’ore. ’O tā tātou ïa e ha’api’i nei i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, nō te mea te fā o te ha’api’ira’a tumu ’e te mau ture a teie ’Ēkālesia i fa’aho’i-fa’ahou-hia mai ’o te fa’aineinera’a ïa i te mau tamari’i a te Atua nō te fa’aorara’a i roto i te hanahana tīrētiēra ’e, hau roa atu nō te fa’ateiteira’a i roto i tōna tuha’a teitei roa a’e.

Te mau fafaura’a i ravehia ’e te mau ha’amaita’ira’a i fafauhia i te feiā i ha’apa’o maita’i i roto i te mau hiero o te Atua, ’o te tāviri ïa. Tē fa’ata’a nei te reira i tā tātou patura’a i te mau hiero nā te ao nei, mai tā te pupu hīmene i hīmene nehenehe mai. Tē huru ’ē nei te tahi pae i teie huru onoonora’a, ma te ta’a ’ore ē, e arata’i te mau fafaura’a ’e te mau ’ōro’a ia tātou i te fa’ateiteira’a. E māramarama-noa-hia te reira i roto i te parau mau i heheuhia mai nō ni’a i nā tuha’a hanahana e toru. Nō te here rahi o tō tātou Metua i te ao ra nō tāna mau tamari’i ato’a, ’ua hōro’a mai ’oia i te tahi atu mau bāsileia hanahana—mai tā Elder Quentin L. Cook i fa’ata’a mai inanahi ra—e mau bāsileia nehenehe mau e’ita e roa’a ia tātou ’ia feruri.¹⁰

E fa’atupu te tāra’ehara a Iesu Mesia i teie mau mea ato’a. ’Ua heheu mai ’oia ē, « ’o tē fa’ahanahana nei i te Metua, ’e ’o tē fa’aora nei i te mau ’ohipa ato’a a tōna rima ».¹¹ ’Ua hōro’ahia te reira fa’aorara’a i roto i te mau bāsileia hanahana rau. ’Ua ’ite tātou nā roto mai i te mau heheura’a ’āpī ē, « ’ua hōro’ahia te ture i te mau bāsileia ato’a ra ».¹² Te vāhi faufa’a :

« ’O ’oia ’o tē ’ore e ti’a ’ia ha’apa’o i te ture nō te bāsileia tīrētiēra, e ’ore ato’a ïa e ti’a iāna ’ia fa’aea i roto i te hanahana tīrētiēra.

« ’E ’o ’oia ’o tē ’ore e ti’a ’ia ha’apa’o i te ture nō te bāsileia teretetiēra, e ’ore ato’a ïa e ti’a iāna ’ia fa’aea i roto i te hanahana teretetiēra.

« ’E ’o ’oia ’o tē ’ore e ti’a ’ia ha’apa’o i te ture nō te bāsileia tiretia, e ’ore ato’a ïa e ti’a iāna ’ia fa’aea i roto i te hanahana tiretia ».¹³

E parau ïa tātou, nā te mau ture tā tātou e mā’iti e ha’apa’o i roto i te fa’anahora’a here a tō tātou Metua i te ao ra e fa’ata’a i te bāsileia hanahana tā tātou e fāri’i i te ha’avāra’a hope’a. ’Ia au i te reira fa’anahora’a e rave rahi bāsileia e vai ra, ’ia ti’a i tāna mau tamari’i pā’āto’a ’ia tu’uhia i roto i te hō’ē bāsileia i reira e ti’a ia rātou « ’ia fa’aea ».

Tē fa’a’ohipa nei te mau ha’api’ira’a ’e te mau ture a te ’Ēkālesia a te Fatu tei fa’aho’i-fa’ahou-hia mai i teie mau parau mau mure ’ore, ’o tē hāro’aro’a-hope-hia i roto ana’e i te fa’anahonra’a a tō tātou Metua here i te ao ra nō te tā’āto’ara’a o tāna mau tamari’i.

Nō reira, tē fa’atura nei tātou i te ti’amāra’a o te ta’ata hō’ē. ’Ua ’ite te rahira’a o te ta’ata i te mau tauto’ora’a rahi a teie ’Ēkālesia nō te fa’atupu i te ti’amāra’a i te pae fa’aro’o. Nā teie mau tauto’ora’a e fa’ahaere i mua i te fa’anahora’a a tō tātou Metua i te ao ra. E ’imi tātou i te rāve’a nō te tauturu i te ta’ato’ara’a o tāna mau tamari’i—’eiaha tō tātou mau melo ana’e—’ia fana’o i te ti’amāra’a faufa’a rahi ’ia mā’iti.

I te tahi mau taime, tē ui-ato’a-hia mai nei ia tātou nō te aha tātou e tono ai i te mau misiōnare i roto i te mau fenua e rave rahi, tae noa atu i rotopū i te mau nūna’a keresetiano. Tē ui-ato’a-hia mai nei ia tātou nō te aha tātou e hōro’a ai i te tauturura’a i te ao nei i te ta’ata e ’ere i te melo nō te ’Ēkālesia, ma te ’ore e fa’atū’ati i te reira i tā tātou mau tauto’ora’a misiōnare. Tē rave nei tātou i te reira nō te mea ’ua ha’api’i mai te Fatu ia tātou ’ia fa’ariro i tāna mau tamari’i pā’āto’a ’ei mau taea’e ’e ’ei mau tuahine nō tātou, ’e tē hina’aro nei tātou e fa’a’ite i te mau ta’ata ato’a i tō tātou ’auhune i te pae vārua ’e i te pae tino nei.

Tē hōro’a ato’a mai nei te ha’api’ira’a tumu mure ’ore i te hō’ē hi’ora’a ātea i ni’a i te mau tamari’i. Nā roto i teie hi’ora’a e hi’o tātou i te fānaura’a ’e te ’atu’atura’a i te mau tamari’i ’ei tuha’a nō te fa’anahora’a hanahana. E ’ohipa ’oa’oa ’e te mo’a nā te feiā tei hōro’ahia te mana nō te rave i te reira. Nō reira, ’ua tītauhia ia tātou ’ia ha’api’i ’e ’ia pāruru i te mau parau tumu ’e te mau peu, ’o tē fa’atupu i te mau huru maita’i roa a’e nō te tupura’a ’e te ’oa’oa o te mau tamari’i, ’ia au i te fa’anahora’a a te Atua.

I te pae hope’a, ’ua ’ite-mau-hia Te ’Ēkālesia a Iesu Mesia i te Feiā Mo’a i te mau Mahana Hope’a nei ’ei ’Ēkālesia tei fa’atumuhia i ni’a i te ’utuāfare. Te mea rā ’aita i māramarama-maita’i-hia, maori rā ’o tā tātou ïa fa’atumura’a i ni’a i te ’utuāfare e ’ere noa nō te mau natira’a tāhuti nei. ’Ua riro ato’a te mau natira’a mure ’ore ’ei mea faufa’a ato’a nō tā tātou ha’api’ira’a fa’aro’o. Te ’ohipa a te ’Ēkālesia tei fa’aho’i-fa’ahou-hia mai, ’o te tauturura’a ïa i te mau tamari’i ato’a a te Atua ’ia rātere i te vāhi tāpaera’a hope’a tā te Atua e hina’aro nō rātou. Nā roto i te fa’aorara’a e tai mai maoti te Tāra’ehara a te Mesia, e ti’a i te tā’āto’ara’a ia roa’a i te ora mure ’ore (fa’ateiteira’a i roto i te bāsileia tiretiera), ’o tā « te Atua e hōro’a ia rātou ato’a ’o tē ha’apa’o », te parau ïa a te Metua vahine Eva.¹⁴ ’Ua hau atu te reira i te fa’aorara’a. ’Ua fa’aha’amana’o mai te peresideni Russell M. Nelson ia tātou ē, « i roto i te fa’anahora’a mure ’ore a te Atua, e ’ohipa te fa’aorara’a nā te ta’ata tāta’itahi ; [’āre’a] te fa’ateiteira’a e ’ohipa ïa nā te ’utuāfare ».¹⁵

E mea faufa’a rahi nō tātou te heheura’a a te Atua ē, te rāve’a e tae’ahia ai te fa’ateiteira’a maori rā nā roto noa i te ha’apa’o-maita’i-ra’a i te mau fafaura’a o te hō’ē fa’aipoipora’a mure ’ore, i rotopū i te hō’ē tāne ’e te hō’ē vahine.¹⁶ Taua ha’api’ira’a tumu hanahana ra ’o te tumu ïa e ha’api’i ai tātou ē, « ’ua riro te ’āpenira’a ’ei tuha’a faufa’a rahi roa nō te ihota’ata hou te tāhuti nei, i te tāhuti nei, ’e te mure ’ore ’e te fā a te ta’ata tāta’itahi ».¹⁷

Terā ato’a te tumu i tītau ai te Fatu i tāna ’Ēkālesia tei fa’aho’i-fa’ahou-hia mai ’ia pāto’i i te mau fa’ahepora’a i te pae tōtiare ’e i te pae o te ture, ’ia ha’apae i tāna ha’api’ira’a tumu o te fa’aipoipora’a i rotopū i te hō’ē tāne ’e te hō’ē vahine, ’ia pāto’i i te mau tauira’a nō tē fa’atano i te mau ta’a-’ē-ra’a i rotopū i te mau tāne ’e te mau vahine ’aore rā ’o tē fa’atapitapi ’aore rā ’o tē taui i te ’āpenira’a.

Pinepine te mau ti’ara’a o te ’Ēkālesia tei fa’aho’i-fa’ahou-hia mai nō ni’a i teie mau parau tumu, i te fa’atupu i te pāto’ito’ira’a. ’Ua ’ite tātou i te reira. Tē vai ra nā « pae e piti i te mau mea ato’a » i roto i te fa’anahora’a a tō tātou Metua i te ao ra,¹⁸ ’e te pāto’ira’a ’ū’ana roa a’e a Sātane, tei ni’a ïa i te mea faufa’a roa a’e nō te reira fa’anahora’a. Nō reira, tē ’imi nei ’oia i te pāto’i i te haerera’a i mua e tae atu ai i te fa’ateiteira’a, ma te fa’ahuru-’ē-ra’a i te fa’aipoipora’a, ’e te ha’aparuparura’a i te mana’o nō ni’a i te fānaura’a i te tamari’i ’aore rā te fa’atapitapira’a i te ’āpenira’a. Terā rā, ’ua ’ite tātou ē i roto i te hō’ē taime roa, e’ita te fā ’e te fa’anahora’a hanahana a tō tātou Metua here i te ao ra e fa’ahuru-’ē-hia. E taui te huru o te orara’a a te ta’ata nei, ’e tē ha’apāpū mai nei te fa’anahora’a a te Atua ē, i te pae hope’a, e ti’a i te feiā fa’aro’o ’o tei ha’apa’o maita’i i tā rātou mau fafaura’a, ’ia ’oa’oa i te mau ha’amaita’ira’a tāta’itahi tei parauhia.¹⁹

Hō’ē ha’api’ira’a faufa’a rahi nō te tauturu ia tātou ’ia fa’aineine nō te ora mure ’ore, « ’o te hōro’a hau a’e ïa i te mau hōro’a ato’a a te Atua »,²⁰ ’o te poro’i ïa nō te matahiti 1995 nō ni’a i te ’utuāfare.²¹ Te mau fa’a’itera’a i roto, e mea huru ta’a ’ē ïa i te mau ture, te mau ravera’a ’e te fa’atianira’a, mai te fa’aera’a i te ta’ata ma te fa’aipoipo ’ore ’e te fa’aipoipora’a i te ta’ata nō tōna iho ’āpeni. Te feiā ’aita e hāro’aro’a hope nei i te fa’anahora’a here a te Metua nō tāna mau tamari’i, tē hi’o nei ïa rātou i teie poro’i nō ni’a i te ’utuāfare mai te hō’ē fa’ahitira’a ture e nehenehe e tāuiui noa. I te tahi pae, tē ha’apāpū nei tātou ē, te poro’i nō ni’a i te ’utuāfare tei niuhia i ni’a i te ha’api’ira’a tumu, tē fa’ata’a nei i te huru aura’a ’utuāfare i reira e tupu ai te tuha’a faufa’a roa a’e o tō tātou hotura’a mure ’ore.

Terā te vaira’a nō te ha’api’ira’a tumu ’e te mau ture hō’ē roa a Te ’Ēkālesia a Iesu Mesia i te Feiā Mo’a i te mau Mahana Hope’a nei tei fa’aho’i-fa’ahou-hia mai.

I roto i te mau autā’atira’a ’e i te mau huru e rave rahi i roto i te orara’a tāhuti nei, e tītauhia ia tātou tāta’itahi ’ia ora ’e te mau ta’a-’ē-ra’a. ’Ei mau pipi nā te Mesia tei tītauhia ’ia here i tō tātou ta’ata tupu, e ti’a ia tātou ’ia ora ma te hau i pīha’i iho i te feiā ’aita e ti’aturi nei mai ia tātou. E mau tamari’i tātou pā’āto’a nā te hō’ē Metua here i te ao ra. Nō tātou pā’āto’a, ’ua fa’ata’a ’oia i te hō’ē orara’a i muri a’e i te pohe, ’e hō’ē bāsileia hanahana i te pae hope’a. Tē hina’aro nei te Atua ’ia tūtava tātou pā’āto’a ’ia fāri’i i tāna mau ha’amaita’ira’a teitei roa a’e, nā roto i te ha’apa’ora’a i tāna mau fa’auera’a, te mau fafaura’a ’e te mau ’ōro’a teitei roa a’e, ’o te fa’ata’e atu i te patura’a i tōna mau hiero mo’a nā te ao ato’a nei. E mea ti’a ia tātou ’ia ’imi i te rāve’a nō te fa’a’ite i teie mau parau mau mure ’ore ia vetahi ’ē. Nā roto rā i te here i tītauhia ia tātou nō tō tātou mau ta’ata tupu, e fāri’i noa tātou i tā rātou mau fa’aotira’a. Mai tā te hō’ē peropheta nō te Buka a Moromona i ha’api’i, ’ia haere māite tātou i mua, ma te « here i te Atua ’e te ta’ata ato’a ».²²

’Aita i ’ite-noa-hia a’e hō’ē taime i roto i te ’ā’amu o te ao nei, ’a riro ai te ’itera’a i tō tātou Fa’aora ’ei ’ohipa faufa’a ’e te tītauhia nō te vārua ta’ata tāta’itahi … E pūai rahi tō te ha’api’ira’a tumu vi’ivi’i ’ore a te Mesia. E taui te reira i te orara’a o te feiā ato’a e hāro’aro’a i te reira ’e e ’imi ’ia fa’a’ohipa i te reira i roto i tōna orara’a ».²³