Tō tātou tā’amura’a i te Atua

Mai ia Ioba nō te Faufa’a Tahito ra, i te taime māuiui, e tupu paha te mana’o o vetahi ē, ’ua fa’aru’e te Atua ia rātou. Nō te mea ’ua ’ite tātou ē e mana tō te Atua nō te ārai ’aore rā nō te tātara i te mau ’ati ato’a, e tae mai paha te fa’ahemara’a e amuamu atu mai te mea ’aita ’oia e nā reira, ’e e uiui roa paha tātou : « Mai te mea ’aita te Atua e hōro’a mai i te tauturu tā’u i pure, nāhea pa’i e noa’a ai tō’u fa’aro’o iāna ? » I te hō’ē taime i roto i tōna fifi teimaha mau, ’ua nā ’ō ’o Ioba te parauti’a :

« ’Ia ’ite mai ’outou, ’o te Atua tei fa’ahapa iā’u, ’e nāna i ha’a’ati i tāna ’ūpe’a iā’u. »

« Noa atu tā’u pi’ira’a ē, ‘’Ua hapahia vau !’ ’Aita e pāhonora’a ; noa atu tā’u pi’ira’a i te tauturu, ’aita e atati’a. »¹

Nō te pāhono ia Ioba, ’ua ui te Atua : « E fa’a’ore mau ā tā ’oe i tā’u ra fa’aaura’a ? »² ’Oia ho’i : « E tu’u ato’a ’oe iā’u i roto i te hapa ? E fa’ahapa ānei ’oe iā’u ’ia ti’ahia ’oe ? »³ Tē fa’aha’amana’o ra Iehova ia Ioba i tōna pūai hope ’e tōna ’ite hope, ’ei reira Ioba i roto i te ha’eha’a hōhonu roa i te fā’ira’a ē, ’aita tāna e mea e piri i te ’ite, i te mana ’e i te parauti’a o te Atua ’e e’ita tāna e nehenehe e fa’ahapa i te Mana hope :

« ’Ua ’ite au ē, e pūai hope tō ’oe », tāna i parau, « ’e e ’ore tā ’oe i ’ōpua ra e ti’a ’ia fa’a’ore.

« […] ’Ua parau vau i tei ’ore i ’itea e au ra ; e parau ta’a ’ē, e ’ore e taea, e ’ore e ’itea e au […]

« E teie nei, tē fa’afaufau nei au iā’u iho. ’E tē tātarahapa nei au i raro i te repo ’e te rehu auahi. »⁴

I te hope’a, ’ua fāna’o Ioba i te ’ite i te Fatu ’e « Maita’i roa a’era tō Ioba hope’a i tei muta’a ihora ia Iehova. »⁵

E ’ohipa ma’ama’a mau nō tātou ’ia hi’o ma tō tātou mata tāhuti nei, ’ite ’ore i te ātea ’e ’ia fa’ahapa i te Atua ’e ’ia mana’o ’ei hi’ora’a ē : « E mea ’oa’oa ’ore tō’u orara’a, e mea hape paha ïa tā te Atua e rave ra. » Ia tātou nei, tāna mau tamari’i tāhuti i roto i te hō’ē ao hi’a, tātou tei ’ite ’aore re’a mea nō ni’a i tei ma’iri, nō ni’a i teienei ’e nō ni’a i te ananahi, ’ua parau ’oia : « Tei pīha’i iho te mau mea ato’a iā’u nei, nō te mea ’ua ’ite au i taua mau mea ato’a ra. »⁶ E parau pa’ari tā Iakoba i parau : « ’Eiaha ’outou e tītau ia a’o atu i te Fatu, ’ia fāri’i mai rā i te a’ora’a nō ’ō mai iāna ra. Inaha ho’i, ’ua ’ite na ho’i ’outou iho ē, tē a’o mai ra ’oia ma te pa’ari, ’e ma te parauti’a, ’e ma te aroha rahi, i ni’a iho i tāna ato’a ra mau ’ohipa. »⁷

Tē hape ra vetahi i te mau parau fafau a te Atua ē, ’ia ha’apa’o ’oe i tāna parau, e matara mai ïa te mau fa’ahope’ara’a ta’a ’ē mai te au i te hō’ē tārena pāpū. E mana’o paha rātou ē : « ’Ia fa’aitoito vau i te tāvini i te hō’ē misiōni rave tāmau, e ha’amaita’i mai ïa te Atua iā’u i te fa’aipoipora’a ’oa’oa ’e te mau tamari’i », ’aore rā, « ’Ia ha’apae au i te rave i tā’u ’ohipa ha’api’ira’a i te Sābati, e ha’amaita’i mai ia te Atua iā’u i te mau nota maita’i », ’aore rā, « ’Ia ’aufau vau i te tuha’a ’ahuru, e ha’amaita’i mai ïa te Atua iā’u i terā ’ohipa tā’u i hina’aro. » ’E ’ia ’ore te orara’a e pe’e maita’i i terā fa’aterera’a ’aore rā terā tārena i mana’ohia, e tupu mai ïa te mana’o ē, ’ua ha’avare mai te Atua ia rātou. E ’ere ri’i rā mai te hō’ē mātini te terera’a faufa’a o te ra’i. ’Eiaha tātou e mana’o i te fa’anahora’a a te Atua mai te hō’ē mātini ho’oho’ora’a nō te ao teitei, ’e e (1) mā’iti tātou i te hō’ē ha’amaita’ira’a, (2) e pātia tātou i te tino ’ohipa tei tītauhia, ’e (3) i reira ra e topa mai ai te mea i poro’ihia.⁸

E fa’atura mau te Atua i tāna mau fafaura’a ’e tāna mau parau fafau ia tātou tāta’itahi. ’Eita e faufa’a e ha’ape’ape’a nō te reira.⁹ Nā te mana tāra’ehara a Iesu Mesia, tei pou i raro a’e i te mau mea ato’a ’e tei haere atu i ni’a¹⁰ ’e tei mau i te mau mana ato’a i te ra’i ’e i te fenua nei¹¹, e ha’apāpū ē e nehenehe te Atua e rave, ’e e rave ho’i ’oia i tāna i parau. E mea faufa’a roa ’ia fa’atura tātou ’e ’ia ha’apa’o ho’i i tāna mau ture, e ’ere rā te mau ha’amaita’ira’a ato’a i fa’atumuhia i ni’a i te ha’apa’ora’a i te ture¹² tei hāmanihia, tei mana’ohia ’e tei tārenahia i ni’a i tā tātou mau tītaura’a. E fa’aitoito roa tātou, terā rā e vaiiho tātou iāna ra te fa’anahora’a i te mau ha’amaita’ira’a, i te pae tino ’e i te pae vārua.

’Ua fa’ata’a te peresideni Brigham Young ē ’aita tōna fa’aro’o i ha’amauhia i ni’a i te tahi mau mea e tupu ’aore rā i ni’a i te tahi mau ha’amaita’ira’a, tei ni’a rā i tōna ’ite ’e tōna tā’amura’a ia Iesu Mesia. ’Ua nā ’ō ’oia : « ’Aita tō’u fa’aro’o i tu’uhia i ni’a i te mau ’ohipa a te Fatu i te mau motu o te moana, ’e i ni’a i te ’āfa’ira’a mai i te ta’ata i’ō nei […] ’e i ni’a i te mau maita’i tāna e tu’u nei i ni’a i teie mau ta’ata ’aore rā terā mau ta’ata, e ’ere ato’a i ni’a i te ’itera’a ē ’ua ha’amaita’ihia tātou ’aore rā ’aita, tei ni’a rā tō’u fa’aro’o i te Fatu Iesu Mesia, ’e i ni’a i tō’u ’ite tā’u i fāri’i nō ’ō mai iāna ra. »¹³

E mea faufa’a mau tā tātou tātarahapara’a ’e te ha’apa’ora’a i te parau, tā tātou tāvinira’a ’e te fa’atusiara’a. E ’imi tātou i te ti’a i rotopū i te feiā tā Etera i parau ē tei « tāmau noa i roto i te mau ’ohipa maitata’i. »¹⁴ E ’ere rā ho’i nō te mea e nūmerara’a tei ha’apa’ohia i roto i te tahi mau buka i te ra’i ra. E mea faufa’a te reira nō te mea e fa’aō te reira ia tātou i roto i te ’ohipa a te Atua ’e e rāve’a ho’i nō tātou nō te rave ’āmui ’e ana i tō tātou iho tauira’a mai te ta’ata tino nei ’ei ta’ata mo’a.¹⁵ Te mea tā tō tātou Metua i te ao ra e pūpū nei ia tātou ’o ’ōna iho ïa ’e tāna Tamaiti, e tā’amura’a piri mau ’e te tāmau ’e āna nā roto i te maita’i rahi ’e te āraira’a a tāna Tamaiti Iesu Mesia, tō tātou Tāra’ehara.

E tamari’i tātou nā te Atua, tei fa’ata’ahia nō te tāhuti ’ore ’e te ora mure ’ore. Tō tātou hope’a, ’o te rirora’a ïa ’ei feiā ’āi’a nāna, « e feiā tufa’a tātou ’e te Mesia. »¹⁶ ’Ua ineine tō tātou Metua nō te arata’i ia tātou tāta’itahi i ni’a i tōna ’ē’a nō te fafaura’a ma te ta’ahira’a tei hāmanihia i ni’a tō tātou mau hina’aro ta’ata hō’ē ’e tei nirahia i ni’a i tāna fa’anahora’a nō tō tātou ’oa’oa rahi hope i pīha’i iho iāna. E nehenehe e mana’o ē, e rahi mai te ti’aturi ’e te fa’aro’o i te Metua ’e i te Tamaiti, e rahi ato’a mai te putapūra’a i tō rāua here ’e e vai tāmau mai te tāmarūra’a ’e te arata’ira’a a te Vārua Mo’a.

Noa atu rā, e’ita te reira ’ē’a e ’ōhie noa mai nō tātou, noa atu ā ’o vai tātou. Tītau-rahi-hia ho’i te tāmāra’a ia tātou, e’ita ïa e ’ōhie noa. ’Ua parau Iesu :

« ’O vau te vine mau, ’e ’o ta’u Metua te fa’a’apu.

« ’E te mau ’āma’a hotu ’ore ato’a i roto iā’u nei ra, [nā te Metua] ïa e tāpū ’ē atu ; ’e te mau ’āma’a hotu ato’a ra, nāna ïa e tope ’ia maita’i, ’ia rahi atu ā te hotu. »¹⁷

Te ’ohipa tau maoro a te Atua nō te topera’a ’e te tāmāra’a, e ’ohipa ’ume rahi ïa ’e te māuiui i te tahi taime, tītauhia ho’i te reira. E fa’aha’amana’ora’a i te parau a Paulo, e « feiā tufa’a tātou ’e te Mesia ; tē pohe ’āpipiti nei ho’i tātou ’e ’oia ato’a, ’ia ha’amaita’i ’āpipitihia tātou e ’oia ato’a. »¹⁸

Nō reira, i roto i teie auahi tāmāra’a, ’eiaha na tātou e riri i te Atua, e ha’afātata ra i te Atua. E pi’i i te Metua nā roto i te i’oa o te Tamaiti. E ’āpe’e ia rāua nā roto i te Vārua, terā mahana ’e terā mahana. E vaiiho i te taime hau ia rāua nō te fa’a’ite mai i tō rāua ha’apa’o ia ’outou. E ha’amātau mau ia rāua ’e ha’amātau mau ia ’outou iho.¹⁹ E vaiiho i te Atua ’ia upo’oti’a.²⁰ Tē tāmarū nei te Fa’aora i tō tātou ’ā’au :

« ’A fa’aro’o mai na iāna, ’o ’oia te ti’a i mua i te Metua, ’o tē ’imi nei i tō ’outou maita’i i mua iāna ra—

« I te nā-’ō-ra’a atu ē : E te Metua ē, ’a hi’o na i te mau mamae rahi ’e te pohe ho’i nōna ’o tei ’ore roa i rave i te hara ra, ’o tā ’oe i māuruuru roa ra ; ’a hi’o na i te toto ’o tā ’oe Tamaiti nei ’o tei ha’amani’ihia ra, e toto ho’i nōna nō tā ’oe iho i hōro’a atu ia fa’ahanahanahia ’oe ;

« Nō reira, e te Metua ē, ’a fa’aora na i tō’u nei mau taea’e [’e mau tuahine], i tei fa’aro’o mai i tō’u nei i’oa, ’ia haere mai rātou iā’u nei ’e ’ia noa’a ho’i te ora mure ’ore. »²¹

E hi’o na i te tahi mau hi’ora’a nō te mau tāne ha’apa’o maita’i ’e te mau vahine ha’apa’o maita’i tei ti’aturi i te Atua, ma te ti’aturi ē e tae mai i ni’a ia rātou tāna mau ha’amaita’ira’a i parauhia mai, i roto i teie orara’a ’aore rā i roto i te pohe. ’Aita tō rātou fa’aro’o i fa’atumuhia i ni’a i te mea tā te Atua i rave ’aore rā i ’ore i rave nō te hō’ē ’ohipa ta’a ’ē ’aore rā te hō’ē taime ta’a ’ē, tei ni’a rā i te mātaura’a iāna ’ei Metua ’ā’au maita’i nō rātou, ’e ’o Iesu Mesia ’ei Tāra’ehara tau’a hara nō rātou.

I te taime ’a fa’atusiahia ai Aberahama e te mau tahu’a ’Aiphiti nō Elekena, ’ua ti’aoro ’oia i te Atua ’ia fa’aora mai iāna, ’e ’ua nā reira te Atua.²² ’E ora mai nei Aberahama ’e ’ua riro mai ’ei metua nō te feiā fa’aro’o, ’e nā roto i tōna huā’ai te mau ’utuāfare ato’a o te fenua nei e ha’amaita’ihia ai.²³ Nā mua atu rā i ni’a i terā iho fata, ’ua pūpū atu terā tahu’a nō Elekena e toru pāretenia « nō tō rātou parauti’a ; ’aore ho’i rātou i tīpapa i raro nō te ha’amori i te mau atua rā’au ’e ’aore rā i te mau atua ’ōfa’i. »²² ’Ua pohe rātou i reira ’ei maratiri.

I roto i tōna ’ā’au fāfati, ’ua fāriu ’o Iosepha i tahito ra, tei ho’ohia ’ei tītī i tōna ’āpīra’a e tōna iho mau taea’e, i ni’a i te Atua. Ē ’ua pa’uma marū noa mai ’oia i ni’a i te ti’ara’a teitei i roto i te fare o tōna fatu i Aiphiti, ’ua ’ino rā ho’i teie haerera’a i mua i te mau fa’ahapara’a hape a te vahine a Potiphara. E tupu paha ïa te mana’o o Iosepha ē : « ’O te fare tāpe’ara’a ïa tē noa’a mai nō te ha’apa’ora’a i te ture nō te vi’ivi’i ’ore. » ’Aita rā, ’ua tāmau ’oia i te fāriu i ni’a i te Atua ’e ’ua manuia ’oia, noa atu tei roto i te fare tāpe’ara’a. ’Ua tupu fa’ahou ā te mana’o hepohepo roa o Iosepha i te hō’ē mau ’āuri tāna i fa’ahoa, e parau fafau ho’i tāna ’ia tauturu ia Iosepha, ’ua mo’e-roa-hia rā iāna tōna parau i te fa’aho’ira’ahia ’oia i ni’a i te ti’ara’a i te aora’i o Pharao. Ē i tōna taime, mai tā ’outou i ’ite, ’ua mea te Fatu ’ia tu’uhia Iosepha i ni’a i te ti’ara’a teitei roa a’e ’e te mana rahi i raro a’e noa mai ia Pharao, i noa’a ai ia Iosepha ’ia fa’aora i te ’utuāfare o ’Īserā’ela. ’O Iosepha paha tē nehenehe e ha’apāpū ē « tē fa’atupu nei te mau mea ato’a i te maita’i nō te feiā hina’aro i te Atua. »²⁵

E mana’o pāpū tō Abinadi e rave i tāna fa’auera’a hanahana. ’Ua parau ’oia : « E fa’aoti au i tā’u nei parau, ’e i reira ’aita tō’u e pe’ape’a i te [mea e tupu i ni’a iā’u], mai te mea e fa’aorahia vau. »²⁶ ’Aita ’oia i fa’aorahia i te pohe maratiri, pāpū roa rā ē, ’ua fa’aorahia ’oia i roto i te bāsileia o te Atua, ’e maoti tāna fa’afāriu, ia Alama, i taui ai te terera’a o te ’ā’ai o te mau ’āti Nephi ē tae roa i te taera’a mai o te Mesia.

’Ua matara mai ’o Alama ’e Amuleka i rāpae i te fare tāpe’ara’a i Amoniha ’ei pāhonora’a i tā rāua tāparura’a, ’e ’ua pohe te feiā i hāmani ’ino ia rāua.²⁷ Nā mua atu rā, ’ua huri teie nau ta’ata hāmani ’ino i te mau vahine ’e tā rātou mau tamari’i tei ti’aturi ia rāua i roto i te auahi ura. ’Ua hi’o umunaro te mata o Alama i teie ’ohipa ri’ari’a, ’ua fa’ahepo rā te Vārua iāna ’eiaha e fa’a’ohipa i te mana o te Atua nō te « fa’aora ia rātou i te auahi »²⁸ ’ia fāri’ihia rātou ma te hanahana i pīha’i iho i te Atua.²⁹

’Ua mihimihi noa te peropheta Iosepha Semita i roto i te fare tāpe’ara’a nō Liberty, i Missouri, ma te rāve’a ’ore nō te tauturu i te feiā mo’a tei ’eiāhia ’e tei a’ua’uhia i rāpae i tō rātou mau fare i roto i te tau to’eto’e hōhoni mau. « E te Atua, tei hea roa ’oe ? » tā Iosepha i ti’aoro. « E aha te maorora’a ’oe e tāpe’a ai i tō ’oe rima ? »³⁰ Nō te pāhono, ’ua parau fafau te Fatu : « E vai poto noa tō ’oe fifi ’e tō ’oe mau ’ati ; ’ei reira, mai te mea e fa’a’oroma’i māite ’oe i te reira, e fa’ateitei te Atua ia ’oe i te vāhi teitei roa […] ’Aita ā ’oe i riro mai ia Ioba. »³¹

I te hope’a, e nehenehe roa tā Iosepha e parau mai ia Ioba ē : « E pohe ā ho’i au [i te Atua], e ti’aturi ā rā vau iāna. »³²

’Ua fa’ati’a mai Elder Brook P. Hales i te ’ā’amu nō te tuahine Patricia Parkinson tei fānauhia ma te mata maita’i ē i te 11ra’a o te matahiti ’ua matapōhia.

Tē parau ra Elder Hales : « E rave rahi matahiti tō’u mātaura’a ia Pat, ’e ’aita i maoro a’e nei ’ua parau atu vau iāna ē, tē fa’ahiahia nei au i tōna huru maita’i ’e te ’oa’oa i te mau taime ato’a. ’Ua pāhono mai ’oia, ‘’Ā, ’aita ’oe tō te fare i pīhai iho iā’u, e ’ere ānei ? Tē vai ra iho ā tō’u mau taime fifi. ’Ua fa’aruru vau i te mau hepohepo ’ū’ana, ’e ’ua ta’i rahi au’. Terā rā, ’ua parau fa’ahou mai ’oia : ‘Mai te taime ’a ha’amata ai tō’u mata i te pō, ’ua huru ’ē roa, ’ua ’ite rā vau ē, tei pīha’i iho te Metua i te ao ra ’e te Fa’aora i tō’u ’utuāfare ’e iā’u […] I te feiā e ui mai iā’u ē, e riri ānei au i te mea ē, e mata pō tō’u, tē pāhono nei au : « ’O vai tā’u e riri ? Tei pīha’i iho te Metua i te ao ra iā’u i roto i teie ’ohipa ; ’aita vau i vai ’ōtahi noa. Tei pīha’i iho ’oia iā’u i te mau taime ato’a’. »³³

I te hope’a, ’o te ha’amaita’ira’a nō te tā’amura’a piri ’e te tāmau i te Metua ’e i tāna Tamaiti tā tātou e ’imi nei. Nā te reira e fa’atupu i te vāhi ta’a ’ē ’e e fa’aho’ona i te ho’o ē a muri noa atu. E parau pāpū atu tātou mai ia Paulo ē « e ’ore teie nei mau pohe [tāhuti] e au ’ia fāito i te maita’i ’e fa’a’itehia mai ia tātou nei. »³⁴ Tē hōro’a nei au i tō’u ’itera’a pāpū ē, noa atu ā te mea e tupu i roto i tō tātou orara’a tāhuti nei, e nehenehe e tu’u i tō tātou ti’aturi i ni’a i te Atua ’e e ’ite mai i te ’oa’oa i roto iāna.

« E ti’aturi ia Iehova mā tō ’ā’au ato’a ra ; ’eiaha rā e ti’aturi i tō ’oe iho ra ha’apa’o.

« ’Eiaha e ha’amo’e iāna i tō ’oe ato’a ra mau haere’a, e nāna e fa’a’ite ia ’oe i tō ’oe ra mau haere’a ».³⁵

I te i’oa o Iesu Mesia, ’āmene.