’O te fa’afāriura’a tā tātou fā

’A feruri na i teie fa’ahitira’a hōhonu mau i roto i te Mai, pe’e mai :

« Te fā nō te ’apora’a mai ’e te ha’api’ira’a i te ’evanelia, ’o te fa’ahōhonura’a ïa i tō tātou fa’afāriura’a i te Metua i te ao ra ’e ia Iesu Mesia […]

« […] ’Aita te ’apora’a ’evanelia ’o tē ha’apūai i tō tātou fa’aro’o ’e ’o tē arata’i atu i te temeio nō te fa’afāriura’a e tupu i terā iho taime. E tupu te reira i rāpae atu i te piha ha’api’ira’a, i roto i tō tātou ’ā’au ’e i te fare. E tītau te reira i te tauto’ora’a tāmau i te mahana tāta’itahi ’ia māramarama ’e ’ia ora i te ’evanelia. E tītau te ha’api’ira’a ’evanelia e arata’i i te fa’afāriura’a mau, i te fa’aurura’a a te Vārua Maita’i. »¹

’O te semeio ïa tā tātou e tītau nei—te noa’ara’a te tāmatara’a i te mau pāpa’ira’a mo’a² ’e e ha’amaita’ihia terā tāmatara’a e te fa’aurura’a a te Vārua Maita’i. E mau ’ōfa’i niu tao’a rahi te reira mau ’ohipa ’ia tupu, nō tō tātou fa’afāriura’a i te Fa’aora. ’E mai tā te peresideni Russell M. Nelson i fa’aha’amana’o a’enei ia tātou, tītauhia ’ia ha’apūai-tāmau-hia tō tātou niu pae vārua.³ E ’ohipa nō te orara’a tā’āto’a te fa’afāriura’a vai maoro.⁴ ’O te fa’afāriura’a tā tātou fā.

’Ia manuia maita’i te reira, e tītauhia ’ia tupu tā ’outou iho mau ’ohipa i te mau pāpa’ira’a mo’a.⁵ E mea maita’i ’ia tai’o ’e ’ia fa’aro’o i te ’ohipa i tupu nō te tahi atu ta’ata, ’e tāna mau hi’ora’a, e’ita rā te reira e fa’atae mai i te hō’ē ā mana fa’afāriu. ’Aita e ’apera’a i te taime ’outou i roto i te mau pāpa’ira’a mo’a, i te fa’aro’ora’a i te Vārua Maita’i ’ia paraparau ’āfaro ia ’outou.

I te mau hepetoma ato’a ’ia fefeu vau i tā’u buka Mai, pe’e mai, e pāpa’i au i teie uira’a i ni’a roa i te ’api : « E aha tā te Vārua Maita’i e ha’api’i nei iā’u i teie hepetoma ’a tai’o ai i teie mau pene ? »

’A tuatāpapa ai au i te mau pāpa’ira’a mo’a, e feruri au i terā uira’a, fa’ahou ’e fa’ahou ā. ’E e’ita e hape, e tae mai te mau mana’o pae vārua, e tāpa’o ïa vau i te reira i roto i tā’u buka.

I teienei, e nāhea vau i te ’ite ē, tē ha’api’i ra te Vārua Maita’i iā’u ? ’Ia ’ite ’outou, e tae mai nei te reira ma te rāve’a ha’iha’i ’e te ’ōhie. I te tahi taime, mai te huru e pura roa mai te hō’ē tuha’a ’īrava o te ’api i ni’a i tō’u mata. I te tahi atu taime, mai te huru ē tē ha’amāramaramahia ra tō’u ferurira’a, e rahi atu ā tō’u māramarama i te hō’ē parau tumu o te ’evanelia. E putapū ato’a vau i te mana o te Vārua Maita’i ’ia paraparau ana’e māua ta’u vahine, ’o Anne Marie, nō ni’a i te mea tā māua e tai’o nei. E mea tītau manihini noa tāna huru hi’ora’a i te Vārua.

I teie matahiti tē tuatāpapa nei tātou i te Faufa’a Tahito—e pāpa’ira’a mo’a e fa’a’ī nei i tō tātou vairua i te māramarama. ’Ia tai’o vau i te Faufa’a Tahito, mai te huru ē tē ti’a ra vau i pīha’i iho i te tahi mau arata’i pāpū mau : ’o Adamu, ’o Eva, ’o Noa, ’o Aberahama ’e tē vai atu ra e rave rahi.

I teie hepetoma, ’a tuatāpapa ai tātou i te Exodo, te mau pene 7–13, tē ha’api’i nei tātou nō ni’a i te fa’ati’amāra’a te Fatu i te mau tamari’i a ’Īserā’ela i te tītīra’a e rave rahi tenetere i Aiphiti. Tē tai’o nei tātou i te parau nō e iva ma’i—e iva fa’a’itera’a rahi nō te mana o te Atua—tā Pharao i ’ite, ’aita rā i tāmarū i tōna ’ā’au.

Parau atu ra te Fatu i tāna peropheta, ia Mose, nō ni’a i te ’ahuru o te ma’i—’e nāhea te ’utuāfare tāta’itahi nō ’Īserā’ela e fa’aineine ai nō te reira. I roto i te hō’ē ’ōro’a tā rātou e pi’i [Pessah (’oia ho’i Nā ni’a)], e fa’atusia te mau tamariʼi a ’Īserā’ela i te hō’ē fanau’a māmoe oni ’ino ’ore. I muri iho e tu’u rātou i te hō’ē tāpa’o i ni’a i te pou ’ūputa ’e te te’a, i te toto o te fanau’a māmoe. ’Ua parau fafau te Fatu ē, te mau fare ato’a tei tu’uhia te tāpa’o i te toto, e pāruruhia rātou i te ma’i hāhano e tae mai.

Tē parau nei te mau pāpa’ira’a mo’a : « Haere atu ra te tamari’i a ’Īserā’ela, rave atu ra i tā Iehova i parau mai ia Mose » (Exodo 12:28). E ’ohipa mana rahi mau i roto i teie fa’ahitira’a ’ōhie nō tō rātou ha’apa’o.

Nō te mea ’ua pe’e te mau tamari’i a ’Īserā’ela i te parau a’o a Mose, ’e ’ua rave ma te fa’aro’o, ’ua fa’aorahia rātou i terā ma’i ’e, i muri mai, ’ua fa’aorahia i te tītīra’a.

E aha ïa tā te Vārua Maita’i i ha’api’i mai iā’u i roto i teie mau pene i teie hepetoma ?

Teie te tahi mau mana’o tei vai noa na i roto i tō’u ferurira’a :

• E ’ohipa te Fatu nā roto i tāna mau peropheta nō te pāruru ’e nō te fa’aora i tōna mau ta’ata.

• E nā mua te fa’aro’o ’e te ha’eha’a ’ia pe’e i te peropheta i te semeio nō te pārurura’a ’e te fa’aorara’a.

• E tāpa’o ’o rāpae te toto i ni’a i te mau pou ’ūputa ’e te te’a nō te fa’aro’o ’o roto, te fa’aro’o ia Iesu Mesia, te ’Ārenio a te Atua.

’Ua fa’ahiahia roa vau i te tu’atira’a te huru te Fatu i ha’amaita’i i tōna mau ta’ata i roto i teie fa’ati’ara’a nō te Faufa’a Tahito ’e tōna ha’amaita’ira’a i tōna mau ta’ata i teie mahana.

I te hōhorara’a te peropheta ora a te Fatu, te peresideni Nelson, i te Mai, pe’e mai ’ei rāve’a tuatāpapara’a i te mau pāpa’ira’a mo’a, ’ua tītau manihini ’oia ia tātou ’ia fa’ariro i tō tātou mau ’utuāfare ’ei vāhi mo’a nō te fa’aro’o ’e ’ei pū nō te ha’api’ira’a ’evanelia.

’Ua parau fafau a’era ’oia e maha ha’amaita’ira’a ta’a ’ē :

1. E riro mai tā ’outou mau mahana sābati ’ei mahana hina’arohia,

2. E ’ana’anatae roa mai tā ’outou mau tamari’i i te ha’api’i ’e i te ora i te mau ha’api’ira’a a te Fa’aora,

3. E iti noa mai te mana o te ’enemi i roto i tō ’outou orara’a ’e tō ’outou ’utuāfare, ’e

4. E taui roa mai teie mau mea i tō ’outou ’utuāfare ’e e vai noa mai te reira. »⁶

Teienei, ’aita tā tātou hō’ē a’e parau nō roto mai i te buka ’ā’amu o te feiā i ’ite i terā [’ōro’a Nā ni’a] ’e ’o Mose i Aiphiti. E mau ’itera’a rā tā tātou nō te feiā mo’a, ma te fa’aro’o ’aifāito, e pe’e nei i te parau a’o a te peresideni Nelson i teie mahana, ’e tē fāri’i nei i te mau ha’amaita’ira’a i parauhia mai.

Teie vetahi ’itera’a :

’Ua parau te hō’ē metua vahine e tamari’i ’āpī tāna : « Tē paraparau nei mātou nō te Mesia ’e tē ’oa’oa nei mātou i te Mesia. Iā’u nei, ’o te ha’amaita’ira’a rahi roa a’e ïa—’oia ho’i e ti’a i tā’u mau tamari’i ’ia pa’ari nā roto i teie mau ’āparaura’a nō ni’a i te ’evanelia ’o tē ha’afātata atu ā nei ia rātou i te Fa’aora. »⁷

Tē parau nei te hō’ē taea’e pa’ari i tāna tuatāpapara’a pāpa’ira’a mo’a nā roto i te Mai, pe’e mai, « e fa’ahorora’a tei ’ī i te māramarama o te ra’i ’o tē tauturu ia tātou ’ia ’ite i te ha’api’ira’a tumu o te ’evanelia tei tītauhia nō tō tātou maita’i pae vārua. »⁸

Tē fa’a’ite ra te hō’ē vahine ’āpī i te mau ha’amaita’ira’a i roto i tōna fa’aipoipora’a : « ’Ua noa’a iā’u te hō’ē ’ite hōhonu a’e o te ’ā’au o ta’u tāne, ’e ’ua haere iā’u ’ia ha’amāhorahora atu ā i to’u ’ā’au iāna ’a tuatāpapa ’āmui ai māua. »⁹

’Ua ’ite te hō’ē metua vahine e rave rahi tamari’i i te tauira’a tāna mau tauto’ora’a nō te ha’api’i i tōna ’utuāfare. Tē parau ra ’oia : « ’Ia hi’o vau, mai te huru ē, i ha’uti na vau i te piana ma te rimarima hiona i ni’a i te rima. E mea ha’apa’o ha’uti noa, ’aita te pehe i tano roa. I teienei rā ’ua matara nā rimarima, ’e noa atu ’aita tā’u pehe i navenave roa ā, tē fa’aro’o ra vau i te vāhi ta’a ’ē. ’Ua noa’a mai i te Mai, pe’e mai te hi’ora’a ātea, te ’aravihi, te rōtahi ’e te fā. »¹⁰

’Ua parau mai te hō’ē tāne fa’aipoipo ’āpī : « ’Ua pāpū roa mai tā’u mau ’ohipa mātāmua roa i te fare mai te taime ’a fa’ariro ai au i te Mai, pe’e mai ’ei tuha’a tāmau i te mau po’ipo’i ato’a. Nā te tuatāpapara’a i fa’aferuri rahi a’e iā’u i te mau mea faufa’a a’e iā’u, mai te hiero, tō’u tā’amura’a i ta’u vahine, ’e tō’u pi’ira’a. ’Ua māuruuru roa vau e vāhi tō’u fare i reira te Atua e tu’uhia ai i mua roa.¹¹

’Ua fa’a’ite te hō’ē tuahine ē : « E rave au i te Mai, pe’e mai i te mau mahana ato’a, e mea varavara rā te ’ohipa ta’a ’ē e tupu, terā rā, ’ua ’ite au i te roara’a o te mau mahana i te tauira’a i ni’a iā’u maoti teie tuatāpapara’a pāpa’ira’a mo’a tāmau ’e te rōtahi. E tupu te mana’o ha’eha’a i teie huru tuatāpapara’a, e ha’api’i te reira iā’u ’e e taui iā’u ma’a vāhi iti i te taime hō’ē. »¹²

’Ua fa’a’ite mai te hō’ē misiōnare tei fa’aoti i tāna misiōni ē : « Nā roto i te fa’anahora’a Mai, pe’e mai ’ua ho’i ri’i au i ni’a i tā’u fāito tuatāpapara’a pāpa’ira’a mo’a i roto i te misiōni, ’e ’ua ti’a atu ra iā’u ’ia taui i tō’u ferurira’a tāpa’o noa i te tai’ora’a pāpa’ira’a mo’a ’ei taime tao’a rahi mau nō te mātau i te Atua. »¹³

’Ua nā ’ō te hō’ē taea’e : « Tē ’ite ra vau i tō’u fāri’i-rahi-atu-ā-ra’a i te Vārua Maita’i i roto i tō’u orara’a, ’e tē putapū nei au i te arata’ira’a ’e te heheura’a a te Atua nō te rave i te mau fa’aotira’a. E mea hōhonu atu ā tā’u mau ’āparaura’a nō ni’a i te nehenehe i roto i te ha’api’ira’a tumu a te Mesia ’e tāna tāra’ehara. »¹⁴

’Ua fa’a’ite mai te hō’ē tama hitu matahiti ē : « Fātata vau i te bāpetizohia, ’e nā te Mai, pe’e mai e fa’aineine nei iā’u. E paraparau mātou tō’u ’utuāfare nō ni’a i te bāpetizora’a, ’e ’aita tō’u taiā ’ia bāpetizo i teienei. Tē tauturu nei te Mai, pe’e mai i te Vārua Maita’i ’ia tae i roto i tō’u ’ā’au, ’e e māhanahana i roto iā’u ’ia tai’o vau i te mau pāpa’ira’a mo’a.¹⁵

’E teie te hope’a nā te hō’ē metua vahine e rave rahi tamari’i : « ’A tuatāpapa ai mātou i te parau a te Atua, ’ua tauturu mai ’oia i tō’u ’utuāfare ’ia haere mai te ha’ape’ape’ara’a i te ha’apūaira’a ; mai te tāmatara’a ’e te fifi i te fa’aorara’a ; mai te mārōra’a ’e te fa’ahapara’a i te here ’e te hau ; ’e mai te mana a te ’enemi i te mana a te Atua. »¹⁶

Mai te hō’ē fa’ahōho’ara’a, ’ua tu’u teie nau feiā ’āpe’e ha’apa’o maita’i nō te Mesia, ’e tē vai fa’ahou ra e rave rahi, i te toto o te ’Ārenio a te Atua i ni’a i te tomora’a o tō rātou fare. Tē fa’a’ite nei rātou i tō rātou fafaura’a ’o roto ’ia pe’e i te Fa’aora. E nā mua tō rātou fa’aro’o i te temeio. ’O te semeio ïa nō te hō’ē ta’ata tē noa’a ra te tāmatara’a i te mau pāpa’ira’a mo’a ’e e ha’amaita’ihia terā tāmatara’a e te fa’aurura’a a te Vārua Maita’i.

’Ia tuatāpapa tātou i te mau pāpa’ira’a mo’a, ’aita e o’e pae vārua i te fenua nei. Mai tā Nephi i parau : « Te ta’ata ato’a ’o tē ha’apa’o i te parau a te Atua ’e ’o tē mau māite i te reira, e ’ore ïa rātou e pohe, e ’ore ho’i te mau fa’ahemara’a ’e te mau ihe auahi a te enemi ra e ha’apōiri ia rātou, nō te arata’i ia rātou i te pohe. » (1 Nephi 15:24).

I tahito ra, ’ia pe’e te mau tamari’i a ’Īserā’ela i te arata’ira’a a te Fatu tei hōro’ahia mai nā roto i te peropheta Mose, ’ua ha’amaita’ihia rātou i te pāruru ’e te ti’amāra’a. I teie mahana, ’ia pe’e tātou i te arata’ira’a a te Fatu tei hōro’ahia mai nā roto i tō tātou peropheta ora, te peresideni Nelson, e ’aifāito ato’a tātou i te ha’amaita’ihia i te fa’afāriura’a tō tātou ’ā’au ’e te pārurura’a tō tātou mau ’utuāfare.

Tē parau pāpū nei au ē, tē ora nei Iesu Mesia. ’O teie tāna ’Ēkālesia, tei fa’aho’i-fa’ahou-hia mai i te fenua nei, nā roto i te peropheta Iosepha Semita. ’O te peresideni Russell M. Nelson te peropheta a te Fatu i teie mahana. ’Ua here au iāna ’e tē pāturu nei au iāna. I te i’oa o Iesu Mesia, ’āmene.