« ’Ei reira e fa’ariro vau i te mau mea paruparu ’ei mea ’eta’eta nō rātou »

’Oia mau, e mea maita’i ’ia ora iho ā i tō tātou huru mau, e ti’a rā ia tātou ’ia fa’atura i tō tātou iho huru mau, ’ei mau tamaiti ’e e mau tamāhine nā te Atua ma te nātura ’e te hope’ara’a hanahana, ’ia riro mai iāna te huru.² Mai te mea tā tātou fā ’ia riro mau mai teie nātura ’e mai teie hope’ara’a hanahana, e ti’a roa ia tātou pā’āto’a ’ia taui. Te ta’o o te pāpa’ira’a mo’a nō te taui, ’o te tātarahapa ïa. « E rave rahi ta’ata », tē ha’api’i nei te peresideni Russell M. Nelson, « e feruri nei i te tātarahapa ’ei utu’a—e ’ohipa e ti’a ’ia ’ape atu, ’eiaha rā nō te hape teimaha roa […] ’A ani ai Iesu ia ’outou ’e iā’u ’ia ‘tātarahapa’, tē ani nei ïa ’oia ia tātou ’ia taui ».³

E fa’a’ohipa te feiā hāmani rāve’a anotāireuira roro uira i te mau parau tītaura’a nō te parau i te mau mātini roro uira i te ’ohipa e rave. I te tahi taime teie taua mau fa’ahitira’a parau, mai te mea–nō reira. Mai teie, mai te mea ’ua ti’a x e rave ïa y.

Tē ’ohipa ato’a nei te Fatu nā roto i te mau tītaura’a : Mau tītaura’a nō te fa’aro’o, mau tītaura’a nō te parauti’a, mau tītaura’a nō te tātarahapa. E rave rahi mau hi’ora’a nō te mau fa’ahitira’a parau tītaura’a a te Atua ra ’oia ho’i :

« Mai te mea e ha’apa’o ’oe i tā’u mau fa’auera’a ’e e itoito noa e tae noa atu i te hope’a e noa’a [ïa] ia ’oe te ora mure ’ore, ’o te hōro’a hau a’e te reira i te mau hōro’a ato’a a te Atua ».⁴

’Aore rā, « ’ia ui atu ’outou ma te ’ā’au hina’aro mau, ma te mana’o pāpū, ’e ma te fa’aro’o i te Mesia, nāna [ïa] e fa’a’ite mai i te parau mau ia ’outou nā roto i te mana o te Vārua Maita’i ».⁵

’Oia ato’a te here o te Atua, noa atu e mea mure ’ore ’e te maita’i roa, tei raro a’e ato’a te reira i te mau tītaura’a.⁶ ’Ei hi’ora’a :

« I haʼapa’o ʼoutou i tā’u ra parau, [inaha] e vai herehia atu ā ’outou e au ; mai iā’u i haʼapa’o i te parau a tāʼu Metua ra, ʼe tē vai herehia nei ā vau e āna ».⁷

’Ua fa’ata’a pāpū mai ’o Elder D. Todd Christofferson i teie parau mau o te ’evanelia ’a ha’api’i ai ’oia : « ’Ua mātau vetahi i te parau ē, ‘’ua here te Fa’aora iā’u mai tā’u i riro mai, ’e e parau pāpū iho ā. Terā rā e’ita ’oia e nehenehe e ’āfa’i i te hō’ē o tātou i roto i tōna bāsileia mai tā tātou i riro mai, « ’aore ho’i te mea vi’ivi’i e pārahi i reira, ’e ’aore ato’a e pārahi i mua iāna » [Mose 6:57]. Tītauhia ’ia tātā’i nā mua i tā tātou mau hara ».⁸

Te ha’amaita’ira’a nō te fāri’i i te mana o te Atua nō te tauturu ia tātou ’ia taui, e tītaura’a ato’a. ’Ua ha’api’i, te Fa’aora, ’a paraparau ai nā roto i te peropheta Moroni i roto i te Buka a Moromona : « ’E ’ia tae mai te ta’ata iā’u nei, e fa’a’ite atu ai au ia rātou i tō rātou paruparu. Tē hōro’a noa ra vau i te paruparu i te ta’ata, ’ia tupu tō rātou ha’eha’a ; ’e e au maita’i tō’u aroha i te mau ta’ata ato’a i fa’aha’eha’a ia rātou iho i mua iā’u ra ; ’ia fa’aha’eha’a ho’i rātou ia rātou iho i mua iā’u ra, ’e ’ia fa’aro’o iā’u, ’ei reira e fa’ariro vau i te mau mea paruparu ’ei mea ’eta’eta nō rātou ».⁹

’Ia hi’o maita’i ana’e tātou i te mea tā te Fatu i ha’api’i ia tātou i’ō nei, e ’ite tātou ē nā mua roa, tē parau nei ’oia ē, tē hōro’a nei ’oia i te paruparu i te tāne ’e te vahine, tei riro ’ei tuha’a nō tō tātou ’itera’a rau i te tāhuti nei ’ia riro ’ei ta’ata hi’a ’aore rā ’ei ta’ata tino. ’Ua riro mai tātou ’ei tāne ’e ’ei vahine tino nei nā roto i te hi’ara’a o Adamu. Nā roto rā i te tāra’ehara a Iesu Mesia, e nehenehe tātou e upo’oti’a i ni’a i tō tātou paruparu ’aore rā tō tātou nātura hi’a.

I muri iho tē parau nei ’oia ē, e au maita’i tōna aroha ’e ’ia fa’aha’eha’a tātou ia tātou iho ’e ’ia vai te fa’aro’o iāna, ’ei reira e « fa’ariro ’oia i te mau mea paruparu ’ei mea ’eta’eta nō [tātou] ». ’Oia ho’i, ’a taui ai tātou nā mua roa i tō tātou nātura hi’a, tō tātou mau paruparu, i reira e ti’a ai ia tātou ’ia taui i tō tātou huru ta’ata, tō tātou mau paruparu.

E hi’o ana’e i te mau tītaura’a nō te taui, ’ia au i te hōho’a a te Fatu :

’A tahi, e ti’a ia tātou ’ia fa’aha’eha’a ia tātou iho. Te tītaura’a a te Fatu nō te tauira’a ’o te ha’eha’a ïa. « ’Ia fa’aha’eha’a ho’i rātou ia rātou iho i mua iā’u », ¹⁰ tāna ïa i parau. Te parau pāto’i o te ha’eha’a ’o te te’ote’o ïa. Tē vai mau nei te te’ote’o ’ia mana’o ana’e tātou ē, e mea ’ite a’e tātou—’ia mana’o ’ana’e tātou ’aore rā ’ia putapū i te hō’ē mea ’ia nā ni’a a’e i te mea tā te Atua e mana’o ra ’aore ra e putapū ra.

’Ua ha’api’i te ari’i Beniamina ē, « nō te mea te ta’ata tino nei ’o te ’enemi ïa o te Atua […] ’e e ’enemi ho’i a muri ’e a’muri noa atu, ’āre’a […] ’ia fa’aru’e i te mau peu a te ta’ata tino nei, ’e ’ia riro ’ei ta’ata mo’a nā roto i te tāra’ehara a te Mesia ra te Fatu, ’e ’ia riro ho’i mai te tamari’i ra i te marū, ’e i te māmahu, ’e i te ha’eha’a ».¹¹

Nō te taui, e ti’a ia tātou ’ia fa’aru’e i te mau peu a te ta’ata tino nei, ’e ’ia ha’eha’a ’e ’ia marū. E ti’a ia tātou ’ia nava’i te ha’eha’a nō te pe’e i te hō’ē peropheta ora. ’Ia nava’i te ha’eha’a nō te rave ’e nō te ha’apa’o i te mau fafaura’a o te hiero. ’Ia nava’i te ha’eha’a nō te tātarahapa i te mau mahana ato’a. E ti’a ia tātou ’ia nava’i te ha’eha’a nō te hina’aro ’ia taui, ’ia « riro tō [tātou] ’ā’au i te Atua ».¹²

Te piti, e mea ti’a ’ia vai tō tātou fa’aro’o ia Iesu Mesia. Teie fa’ahou ā te mau parau a te Fa’aora : « ’Ia fa’aha’eha’a ho’i rātou ia rātou iho i mua iā’u ra, ’e ’ia fa’aro’o iā’u »,¹³ e hōro’a mai ’oia ia tātou i te mana nō te upo’oti’a i ni’a i tō tātou mau paruparu. ’Ia ’āpiti-ana’e-hia te ha’eha’a i te fa’aro’o ia Iesu Mesia, e ti’a ïa ia tātou ’ia fāri’i i te mana fa’atupu o tōna aroha ’e i te ’īra’a o te mau ha’amaita’ira’a e vai ra maoti tōna tāra’ehara.

’Ua ha’api’i mai te peresideni Nelson ē, « e ha’amata te tātarahapara’a mau nā roto i te fa’aro’o ē, e mana tō Iesu Mesia ’ia tāmā, ’ia fa’aora, ’e ’ia ha’apūai ia tātou […] Nā tō tātou fa’aro’o e tātara i te mana o te Atua i roto i tō tātou orara’a ».¹⁴

Te toru, nā roto i tōna aroha e nehenehe tāna e fa’ariro i te mau mea paruparu ’ei mea ’eta’eta. Mai te mea e fa’aha’eha’a tātou ia tātou iho ’e e fa’aro’o ia Iesu Mesia, e tauturu ïa tōna aroha ia tātou ’ia taui. ’Oia ho’i, e ha’apūai ’oia ia tātou ’ia taui. E tupu mau te reira nō te mea, mai tāna i parau ra, « e au maita’i tō’u aroha i te mau ta’ata ato’a ».¹⁵ E hōro’a mai tōna aroha fa’aitoito ’e te fa’atupu ia tātou i te mana nō te upo’oti’a i ni’a i te mau fifi ato’a te mau tāmatara’a ato’a ’e te mau paruparu ato’a ’a ’imi ai tātou ’ia taui.

E nehenehe tō tātou paruparu rahi roa a’e e riro mai ’ei pūai rahi roa a’e nō tātou. E nehenehe tātou e tauihia ’e « e riro mai ’ei ta’ata fa’a’āpīhia ».¹⁶ E nehenehe te mau mea paruparu « e riro ’ei mea ’eta’eta nō [tātou] ».¹⁷

’Ua ha’a te Fa’aora i tōna tāra’ehara hope ’ore ’e te mure ’ore ’ia ti’a ia tātou ’ia taui, ’ia tātarahapa ’e ’ia riro ’ei ta’ata maita’i a’e. E nehenehe mau tātou e fānau-fa’ahou-hia. E nehenehe tātou e upo’oti’a i ni’a i te mau peu, te mau hia’ai maha ’ore, ’e ’oia ato’a te « hina’aro i te rave i te ’ino ».¹⁸ ’Ei mau tamaiti ’e ’ei mau tamāhine nā te hō’ē Metua here i te ao ra, tei roto ia tātou te mana nō te taui.

’Ua ’ī te mau pāpa’ira’a mo’a i te mau hi’ora’a nō te mau tāne ’e te mau vahine tei taui.

’O Saula, e ta’ata pharisea hāmani ’ino pūai i te ’ēkalesia keretetiano mātāmua,¹⁹ ’ua riro mai ’o Paulo, ’ei ’āpōsetolo nā te Fatu Iesu Mesia.

’Ua riro Alama ’ei tahu’a i roto i te aora’i o te ari’i ’ino ’o Noa. ’Ua fa’aro’o ’oia i te mau parau a Abinadi, ’ua tātarahapa hope roa, ’e ’ua riro mai ’ei hō’ē o te mau misiōnare rahi o te Buka a Moromona.

Tāna tamaiti o Alama, i tōna ’āpīra’a, ’ua ’imi ’oia ’ia ha’amou i te ’Ēkālesia. Tei rotopū ’oia i te « te mau ta’ata hara faufau roa »²⁰ tae roa i te taime ’a tupu ai te hō’ē tauira’a o te ’ā’au ’e ’ua riro mai ’ei misiōnare pūai hope roa.

’Ua fa’a’amuhia Mose i roto i te ’utuāfare o Phara’o ’e ’ua ora i roto i te hō’ē orara’a fana’o mai te hō’ē tamaiti huiari’i nō Aiphiti. Terā rā, i tōna ’itera’a ē ’o vai mau ’oia, ’e tōna ’itera’a i tōna hope’ara’a hanahana, ’ua taui ’oia, ’e ’ua riro mai ’ei peropheta auaha ture rahi o te faufa’a tahito.²¹

’Ua vai noa te māere rahi i roto iā’u nō ni’a i te pāpā rū’au o tā’u vahine, ’o James B. Keysor, nō ni’a i te tauira’a rahi o tōna ’ā’au.²² ’Ua fānauhia ’oia e te mau hua’ai pionie feiā mo’a i te mau mahana hope’a nei ha’apa’o maita’i, i roto i te peho nō Roto Miti i te matahiti 1906, ’ua pohe tōna metua vahine i tōna ’āpī-roa-ra’a, ’e ’ua tūtava pūai ’oia i te roara’a o tōna ’āpīra’a. I roto i tōna mau matahiti feiā ’āpī ’e te taure’are’a pa’ari ’āpī, ’ua vai ’oia i rāpae i te ’Ēkālesia ; e tau i reira tōna fāri’ira’a i te tahi mau peu ’ī’ino. Terā rā, ’ua fārerei ’oia ’e ’ua fa’aipoipo i te hō’ē vahine ha’apa’o maita’i ’e ’ua fānau mai rāua e pae tamari’i.

I te matahiti 1943, i muri a’e i te mau matahiti o te topatarira’a rahi ’e i roto i te tama’i rahi piti o te ao nei, ’ua fa’aru’e Bud, te i’oa ïa tā tōna mau hoa ’e te ’utuāfare i pi’i iāna, ia Utaha ’e ’ua haere i Los Angeles, California, nō te ’imi i te ’ohipa. I taua taime ra ’a ātea ai ’oia i te ’utuāfare, ’ua ora ’oia i pīha’i iho i tōna tuahine ’e tāna tāne, e tāvini ra ’ei ’episekōpo nō tā rātou pāroita.

Ma te here ’e te fa’aurura’a a tōna tuahine ’e tōna taote ho’ovai, ’ua ha’amata ’oia i te fa’aoraora fa’ahou i tōna ’ana’anatae nō te ’Ēkālesia ’e ’ua ha’amata i te tai’o i te Buka a Moromona i te mau pō ato’a hou ’a ta’oto ai.

I te hō’ē pō, ’a tai’o ai ’oia i te Alama pene 34, ’ua putapū roa tōna ’ā’au i tōna tai’ora’a i teie mau parau :

« ’Oia ïa, ’ua hina’aro vau ’ia haere mai ʼoutou, ʼe ’ia ʼore ʼoutou ’ia faʼa’eta’eta ā i tō ʼoutou ʼāʼau […]

« Inaha ho’i, tei teie nei orara’a te taime ’ia fa’aineine te ta’ata ’ia fārerei i te Atua ; ’oia ïa, ’o te mahana ïa, te mahana o teie nei orara’a, ’ia rave te ta’ata i tā rātou ’ohipa ».²³

’A tai’o ai ’oia i teie nā ’īrava, ’ua tupu mai ra te hō’ē mana’o pūai i roto iāna, ’e ’ua ’ite a’era ’oia ē, ’ua tītauhia iāna ’ia taui, ’ia tātarahapa, ’e ’ua ’ite ’oia e aha tei tītauhia iāna ’ia rave. ’Ua ti’a mai ’oia nā ni’a mai i tōna ro’i ’e ’ua tūturi i raro ’e ’ua ha’amata a’era i te pure, ma te tāparu i te Fatu ’ia fa’a’ore mai i tāna hapa ’e ’ia hōro’a mai iāna i te pūai e tītauhia iāna, nō te rave i te mau tauira’a i roto i tōna orara’a. ’Ua pāhonohia mai tāna pure, ’e mai te reira taime ’aita roa ’oia i hi’o fa’ahou i muri. ’Ua tāmau noa Bud i te tāvini i roto i te ’Ēkālesia ’e ’ua vai noa ’ei feiā mo’a ha’apa’o maita’i ’e te fafau ē hope noa atu tōna orara’a. ’Ua tauihia ’oia i te mau vāhi ato’a. Tōna ferurira’a, tōna ’ā’au, tāna mau ’ohipa, tōna huru ta’ata ato’a ’ua tauihia.

E te mau taea’e ’e te mau tuahine, tō tātou hope’ara’a ’e te fā hanahana ’o te rirora’a ïa mai tō tātou Metua i te ao ra ’e te Fa’aora ’o Iesu Mesia. E rave tātou i te reira mai te mea e taui tātou ’aore rā e tātarahapa tātou. E « fāri’i [tātou] i te hōho’a [o te Fa’aora] i roto i [tō tātou] mata ».²⁴ E riro mai tātou ’ei mea ’āpī, ’ei mea mā, ’ei mea ta’a ’ē, ’e e tāmau noa tātou i te rave i te reira i te mau mahana ato’a. I te tahi taime e au ra ē, e piti ta’ahira’a i mua ’e hō’ē ta’ahira’a i muri, terā rā e tāmau noa tātou i te haere i mua ma te ha’eha’a i roto i te fa’aro’o.

’E mai te mea e fa’aha’eha’a tātou ia tātou iho ’e e fa’a’ohipa i te fa’aro’o ia Iesu Mesia, e fa’ati’a te aroha o te Mesia ’e tāna tusia tāra’ehara hope ’ore, ’ia taui ia tātou.

Tē fa’a’ite pāpū nei au ē, ’o Iesu Mesia mau tō tātou Fa’aora ’e tō tātou tāra’ehara. ’Oia mau, e nava’i noa tōna aroha. ’Ua parau ’oia ē ’o ’oia « te ’ē’a, ’e te parau mau, ’e te ora »²⁵ I te i’oa o Iesu Mesia, ’āmene.