Yesus Kristus e Ir Gelingin e Fal’yangren
Pagaen’um ngak Yesus Kristus. Ra powi’iyem ko bin mat’aw e kanawo’. I ir e gelingim.
Napan ni gube ngongliy e mulwol rog e daba’, ma kug thamiy ni rib gel ni nggu non nifan ngak e pi’in ni fel’yangren ni bpin nge pumo’on.
Makug be non nifan ngak e gidii’ ni’i moy nib fal’yangren, nib mo’on e gidii’ ngay ni sana ke pagtilin rogon e biney.
Makug be non nifan ngak e gidii’ ni gubin nib tu’uf e pi fal’yangren ney rok’ ma ba’adag ni ngar mon’oggaed.
Nifan e pi’in ni ra ilal gaed, ma ba’aray e mulwol nifan ngom nike yib rok’ e Tathapeg rom, Yesus Kristus.
Fare Mulwol Rok’ Fare Tathapeg Ngom
Pi tafagar rog nib yangren nib tu’uf rog, fa’anra bay fare Tathapeg u roy e chiney, ma mang era yoeg ngom?
Michuwun’ug ngak nra tabab ngeyog ngom gelngin ni ri gab t’uf rok’. Baynra yoeg ko thin, machane bay gelingin ni rib gel buguwan—bachan ni bay u chirey—dabiyag ni ngan mal’fath riy, nra chub u gum’ircha’em, nra suguy lane dogur rom!
Ma bachan, e gadaed bugi mow’ar ma dan polo’gaed, ma bay ni boech e tafney e rayag nra yib ngalan e maen’ay rodaed. Ma baynra yib ko tafney rom boech e mal’fath nikam rrin’, urngin ngiyal’ nikam pigem ko lumel, tin ni kam athapeg ni danum rrin’—fa tin ni kam athapeg ni kam rrin’ nib mangil.
Fare Tathapeg ere thamiy e biney, ma rib michuwun’uy ngay nra micheg nag ngom ni woed rogon e thin ni yoeg ulan e chep nib thothup:
“Dab mu tamdag.”1
“Dabi marwar ko tafney rom.”2
“Pagan’med.”3
“Dabi wagagey lanin’med.”4
Dagur lemnag nra yoeg ngom ni fapi mal’fath rom eke m’ay rogon. Dagur lemnag nra achignag. Danga’, machane ra fith ngon ngam kalngaen’um—ningam pag e denen rom, mag thil, ni ngeyag ni nge n’agfan rom. Ra pugoren ngom nigo napan e 2,000 e duw kafram ni fek nga dakean e pi denen ney ni ngeyag ni ngam kalangaen’um. Irerram bang ko fare tonom ni wa’an e tawa’ath ko falfalaen’ ni pii’ e Chitamangdaed nibay u Tharmiy ngodaed.
Baynra yoeg Yesus ngom fare m’ag rom ngak—nim fek nga dakeanem napan nin tawfe nigem ma gabe be’echnag gubin ngiyal’ napan ni gabe fek fare sakrament —nibay ba tha’ u thilim ngak. Ba tha’ nikan weliy rogon nibay ulan e chep nib thothup nike ta’areb e yok rom ngak, ni bachan e ayuw rok’, rayag ni ngam rrin’ demuturug ban’en.5
Rib michuwun’ug ngay ni ba’adag fare Tathpeg Yesus Kristus ninge guyem, maga nang ni’ir e gelingim. Ni bay e chag ko ayuw rok’, dariy ban’en nrayag ninge talegnem ko tin ni ngam rrin’. Ni tin nrayag rom e dariy e tomur riy. Ra adag ni ngam sap ngom ni woed rogon nibe guyem. Ni biney e rib thil rogon nibe guyem e fayleng.
Mare ga’ar fare Tathapeg, nra yoeg, ni gur e bpin nifak fa pagael nifak e Got ni Th’abi Tolang. Chitamangim nibay u Tharmiy e karimus e enth’abi tolang nibay u fithik e fayleng, nib sug ko t’ufeg, falfalaen’, tin nib be’ech ban’en, thothup, tomilang, murunguy, nge riyul’. Ba’adag nra boran ngay mag thapeg gubin ban’en nibay rok’.6
Karimus fan array ni gabay u roey u fayleng—ningam fil boech ban’en, ilal, mag mon’og i yean ni ngam mang gubin ban’en nike ngongliy e Chitamangim u Tharmiy nifan ngom.
Ra ngeyag e biney, arram fan ni pii’ Yesus Kristus nge yib ninge mang e Tathapeg rom. Array fan fare tonom ko falfalaen’, Galasia rok’, priesthood rok’, fapi chep nib thothup—nge gubin ban’en.
Irreram e milekag rom. Irreram e tin nga mm’on ni fanam. Irreram e me’eleg rom!
Tin Riyul’ nge fapi Me’eleg
Lukungun e tonom rok’ Got nifan e falfalaen’ rom e gelngim ningam me’eleg.7 Riyul’, ni Chitamangim nu Tharmiy e ba’adag ningam mel’eg e falfalaen’ nib manechubog ngam un ngak, mara ayuwegnem ngam thapeg e biney, machane dariy bi’idnra tawasor nigem.
Ere ke pagem ni gur rom e ngam mel’eg: Tamilnag fa lumor? Tin nib felʼ fa kireb;? Falfalaen’ fa kirbaen’? Yafos ni manechubog fa kalbus nge yam’?8
Woed lingan nib moem ni ngan mel’eg, fa danga’? Machane demuturug rogon, uroy u fayleng, woed nib momaw’ rogon ni ngan rrrin’ e biney.
N’en nibe momaw’nag e gathi gubin ngiyal’ ma gadaed be guy bugiban’en nib tomilang rogon. Apostle Paul e ta’areb nag e ran’ey nga ya’an bangi “thirek ni kab mathmath ya’an.”9 Bo’or e tin ni dani tamilang u fayleng ko tin nib mat’aw nge tin ndani mat’aw. Gimed be yog e kireb ko manigil ma gimed yog e manigil ko kireb.10
Machane fa’anra gabe gay e tin nib riyul’—tin nib manechubog, tin ni riyul’ ni darma thil—ma’arram ni mel’eg rom nra i tamilang i yean. Arrogon, ra yib e lumel nge mo’owar ngom. Tin nib kireb e kara buch. Tin nib momaw’ rogon i nangfan. Gafgow ni kara i yib. Machane rayag ni ngam rrin’ e pin’ey ni fa’anra ga manag ko gur mini’, nge fan ni gabay u roey, nge ngiyal’ nikam tay ninge pagaen’um ngak Got.
Ere uw e gin nrayag ni ngam pire’eg e tin nib riyul’ riy?
Bay ko fare gospel rok’ Yesus Kristus. Ma ga’angin fare gospel e yima fil ulan Fare Galasia ku Yesus Kristus ni Fan ko Gidiiʼen Got ko Tin Tomur e Rran.
Ga’ar Yesus Kristus, “I gag e kanawo’, me gag e tin riyul’, me gag e yafos: dariy be’ nrayag ni nge yan ngak e en ni Chitamangiy ya kemus ni gag e ra yan rog ngak.”11
Napan nibay e tin nib ga’fan ningam mel’eg, Yesus Kristus nge fare gospel rok’ e irreram fare bin th’abi fel’ e tin ni ngam mel’eg. Napan nibay e duwer rom, Yesus Kristus nge fare gospel rok’ e irreram e bin nib fel’ ko fulweg duwer. Napan ni gara thamiy ni gabe mo’owar, Yesus Kristus e ir gelingim.
Ir e ma pii’ gelingin ni pi’in nibe mo’owar; nge gelingin e pi’in ni dakriy gelingraed, ma ir e ma pii’ gelingiy.
Pi’in yad be toer ngak Somoel ni nge ayuwegrad e bay ra pir’eged nike yib gelngirad bayay.12
Fan ko Gelngin e Pi’in ni Fal’yangren
Ra ngan ayuwegnem ngam pire’eg e Kanawo’ min ayuwegnem ninge par ni michib rok’ Kristus e nge powi’iyem ulan e yafos rom, ma Fare Galasia ku Yesus Kristus ni Fan ko Gidiiʼen Got ko Tin Tomur e Rran e ke be’echnag biyay, fapi thin ko farke babyor ko Fan ko Gelngin e Pi’in ni Fal’yangren.
Ke pag 50 e duw kafram, fare babyor ko Fan ko Gelngin e Pi’in ni Fal’yangren e ke par nibe powi’iy Gidiiʼen Got ko Tin Tomur e Rran ko gubin e mfen. Gubin ngiyal’ ma bay baken e rika babyor ney ulan e poket rog, ma guma weliy mornga’agen ngak e gidii’ nibay e duwer roraed ni mornga’agen e yalen rodaed. Kan update nag ni ngeyag ni nge ayuweg e pi mo’owar nge lumel nibe yib ngodaed ko tiney e rran. Biney nikan be’ech nag biyay ko fare Fan ko Gelngin e Pi’in ni Fal’yangren bay ulan 50 miit e thin nib thil udakaen e internet nge bay e babyor. Irma ayuwegmed nib ga’ napan ni ngam mel’ig e pin’ney u yafos romed. Wenig mu ba’adag biney nge pii’ reb e copy nifan e tafagar rom.
Biney nikan be’ech nag biyay ko fare Fan ko Gelngin e Pi’in ni Fal’yangren e kan yon’ loen ko Bugi Powi’iy nifan e Tin Ningan Mel’eg.
Machane, bin th’abi fel’ e powi’iy ningam thapeg ninge ayuwegnem ko tin ningam mel’eg e Yesus Kristus. Yesus Kristus e ir gelingin e fal’yangren.
Ere fan fare Fan ko Gelngin e Pi’in ni Fal’yangren e ngeyag ni powi’iyem ngak. Be michibnag ngom e tin nib riyul’ nib manechubog—tin nib riyul’ ni mornga’agem, nge mornga’agen, nge n’en nrayag ni ngam rrin’ u gelingin. Be michibnag ngom rogon nrayag ni ngam mel’eg e tin nib mat’aw ko rogon nibay ko tin nib riyul’ nib manechubog.13
Makab ga’fan ningam nang e pi n’en ni farke Fan ko Gelngin e Pi’in ni Fal’yangren e darma rrin’. Dabi turguy e n’en ni ngam rrin’ nifan ngom. Dabi pii’ ngom e “arrogon” fa “danga’” ko gubin e pi n’en nra tu’uf ningam mel’eg. Fan ko Gelngin e Pi’in ni Fal’yangren ba ayuwegem u daf ko mel’eg rom. Ya biney e ma sap ko rogon e tin nib ga’fan, boech e yalen, nge michib ma gathi be sap ko rogon mit e ngongol ni yibe rrin’.
Somoel, u dakean fapi profet rok’, e gubin ngiyal’ nima powi’iydaed ko biney e kanawo’. Be wenig nag ngodaed ni ngaed “gel niged e thothup [rodaed] ngan thapeg e yi’iy.”14 Ma be piningdaed ningaed “motoyilgaed ngak.”15 Ma be piningdaed ningaed laked ir ko gin nib tolang nge gin ni th’abi thothup.16 Ma gadaed be fil e biney ni gubin e wik ko fare Come, Follow Me.
Rayag ni rake babyor ney e rayag ninge yoeg ngom ko miti mang mad e ngam chuwngay fa tin ndabiyag ni ngam chuwngay, thin ndamog, nge pii kachido ndabiyag ni ngam yaliy ya’an. Gabe lemnag ma biney e rayag ninge ayuweg e galasia ni ga’angin yang u fayleng? Biney e kanawo’ e rayag nra ayuwegnem ulan e yafos rom ngam par ni woed Kristus?
Joseph Smith e ga’ar, “Kug fil ngoraed e yalen nib mat’aw, ma yaed be gagiyeg nagraed.”17
Nge Pilung Benjamin ni yoeg ngak fapi gidii’ rok’ ualn farke Babyor ku Mormon, “Dabiyog ni ngog ngomed gubin banʼen u rogon e gin ni gimed ra denen riy; ya bay nib thilthil woʼen nge rarogon, ni rib yoʼor ni dabiyog i thiʼeg rog.”18
Pilung Benjamin e ul’ul’ ngeyog, “Machane baʼaray chirogon ni rayog ni nggog ngomed, … mu kol ayuw gaed ngomednge pi tafnaey romed, nge pi thin romed, nge pi ngongol romed, mi gimed fol ko fapi motochiyel rokʼ Got, mi gimed ʼulʼul ko paer u fithikʼ e mich … rokʼ Somoel rodaed, ni aram rogon iyaen nge madaʼ nga tomuren e yafos romed.”19
Ba kireb nibay e motochiyel? Danga’. Motochiyel e btu’uf rodaed ni gubin e rran. Machane dani mangil ninge par ntafney rodaed e ba’ ko motochiyel ma gathi ngak fare Tathapeg. Btu’uf ningam nangfan nge rogon nge mu’ mag tafney nag rogon e n’en nra buch ko n’en ni gara mel’eg. Btu’uf ninge pagaen’um ngak Yesus Kristus. Ra powi’iyem ko bin mat’aw e kanawo’. I ir e gelingim.20
Fare Gelingin e bin Riyul’ e Machib
Fan ko Gelngin e Pi’in ni Fal’yangren e rib tomilang rogon nibe micheg nag e michib rok’ Yesus Kristus. Rib tomilang rogon nibe piningem ningam mel’eg ko rogon e michib rok’ Kristus. Ma rib tomilang rogon nibe weliy mornga’agen fapi tawa’ath ni micheg nag Yesus Kristus ngak e pi’inra leak wo’en.21
President Russell M. Nelson e michibnag: “Napan ni gara adag ni rib gel ni ngam pag Got nge gagiyeg [nag e yafos rom], … ma arram ni tin ni ngam turuguy ere moem ngom. … Ma tin ni um magagawon riy e dabki magagawon nigem! Ma gara nang rogon ni ngam ayuweg nem. Ma gara nang ko mang kachido e ngam yaliy ya’an fa bin ngan e babyor ni ngam be’eg, fa gin ni ngam pii’ e tym rom ngay, nge cha’en ni ngam ayuweg. Ma gara nang ko mang e ga ba’adag ni ngam rrin’. Ma gara nang ko mit i mang gidii’ e … ga ba’adag ni ngam mang.”21
Yalen nib Tolang
Yesus Kristus e ba tolang e yalen rok’ nifan ngak e pi’in nibe leak. Fare poeng ningan nib ngan un ngak min fol ko tin nib riyul’ rok’ e irreram e bin th’abi tolang e yalen nibay!
Tin nib ga’fan i mel’eg u fayleng nge tin nib thothup e susun ni gathi kemus nibe yaen u rogon e tin ni gadaed ba’aded, fa n’en nib moem ngodaed fa tin nibe rrin’ e gidii’ ni bor’or.23 Somoel e dar ga’ar, “Mu rrin’ e tin ni lan’in’um.”
Ya be ga’ar, “Mpag Got nge gagiyeg nigem.”
Ya be ga’ar, “Moey, ngam lakedgag.”24
Ya be ga’ar, “Mu pired ni gamed ba thothup, gamed ba tolang, mab pil’al e tafney romed.”
Ya be ga’ara, “Folgaed ko fapi motochiyel rog.”
Yesus Kristus e bin polo’ e kanawo’ rodaed, ma gadaed be gay rogon u gelngindaed ni ngaed laked ir.
Pi tafagar rog, nggu sul biyay u dakean, fa’anra bay fare Tathapeg u roy e daba’, mara yoeg ngom gelingin fani gab t’uf rok’, mara micheg ngom nib pagaen’ ngom. Mara yoeg ngom nrayag rom e biney. Rayag ni ngam ngongliy e yafos rom ko falflalaen’, ni bachan nibay gelingin Yesus Kristus rom. Rayag ni gara pire’eg gelingim, gapas, nge falfalaen’, mag un ko biney e chiney nge mada’ ko ngiyal’ ni manemus, ni bachan e gara pire’eg ni gubin ban’en riy e be yib rok’ Yesus Kristus, nga lan fare gospel rok’, nge lan fare Galasia rok’.
Pin’ey ni gube micheg ni gag reb fapi Apostle rok’ Somoel Yesus Kristus nge tawa’ath rog nge t’ufeg rog ngomed, u dakean fithingan Yesus Kristus, amen.