Chepin ko Pii’ Athamgil

Pi walageg nib t’uf rog, kug falfalaen’ ni kad mukungad nifan e general conference ney ko Fare Galasia ku Yesus Kristus ni fan ko gidii’en Got ko Tin Tomur e Rran. Kad thamiyed e mich romed nge t’uf romed ni demtrug ni ngam pared daba’. Kan tawa’ath nag dad ko fapi michib, ba gel e mich nge musik nib th’abi mangil.

Gube pii’ athamgil ngomed ni ngam ul’ul’ i guyed rogon romed ni ngam suloed ngak e Chitamangdad nu Tharmiy nge Yesus Kristus. Demtrug e tafen romed udakaen e konawo’en e motochiyel, gara sapgad e magawon nifan e sikeng ko dow ko yafos ney fa e magawon rok’ Satan.

Woed ke yog e nina rog napan ni kug nonnon bachan e pin’en ir rib mo’omew, “Oh, Hal, riyul’ ir mo’omaw’. Ya arram rogon. Ya yafos e woed e sikeng.”

Rayog ni nge yog e binem ni rib munguy, ni bay e sminmin, bachane ni ke nang l’agruw e pin’en. Demtrug e magawon, tin nib ga’fan ni ra sul nga na’un nge paer ngak e Chitimangdad nu Tharmiy. Nike nang ni rayog ni nge rrin’ ufithik e mich rok’ ngak Yesus Kristus.

Nike thamiy Ir ba paer chuchugur ngak. Ulan e pi rran u’mon nike yim’, nike non ngog marunga’agen e Tathapeg napan nike paer ulan e sengil rok’. Ba’ e mab nifan reb e sengil chuchugur e bet rok’. Nike sminmin nge sap ngak e mab ney napan nike yoeg ni ra guy ni de n’uw napan. Kug ma nang ni kug sap e mab ney nge lem nag marunga’agen e senggil u tangin.

Ir ba paer ulan e tafen e ya’el. Nike guy rogon ni guy fare tawa’ath ni ba’adag ufithik bo’or e duw ni bay e sikeng ko dow.

Fare chep ko pii’ athamgil rok’ ni ke rrin’ ir woed rogon e weliy ulan e Moroni 7, napan Mormon nike pii’ athamgil ngak fak ni Moroni nge gidii’ rok’. Ireray e chep ko pii’ athamgil ngak e gidii’ ni woed rogon nike rrin’ e matin rog ngak e tabinaw rok’. Mormon ni ke pii’ e chep ko pii’ athamgil ngak gubin pi’in ni ba’adag ni yaedra thapeged, u fithik gubin e pi sikeng u feylang, ni fan e yafos nib manimus.

Mormon ke tabab u lan bin somm’on verse ko Moroni 7 ni bay e mich rok’ ku Yesus Kristus, pi angel, nge fare Kan ni Thothup, ni ma ayuwegdad ni ngad nanged e tin nib fel’ nge tin kireb nge rogon ni ngad mel’eg e mat’aw.

Nike tay Yesus Kristus ni ir e bin somm’on, woed rogon gubin pi’in ni ma pii’ athamgil ngak e pi’in nibay a magawon udakaen e wo’ nga na’un u tharmiy:

“Ya dariy beeʼ ni rayog ni nge thap, ni boed ni yoeg Kristus, ma kemus ni faʼan ra michaenʼraed nga fithingan; ere, faʼanra ke tal e pinnʼey, ma arame ki tal e mich; ma rib gel e gafgow ko e gidiiʼ, ya ri gowa dariy e bayul ni kan falʼeg ni fan ngoraed.

“Machane musap gaed, pi walageg nib tʼuf rog, kug muʼ i dugliy laninʼug ngomed, ya kug dugliy ni bay e mich romed ngakʼ Kristus ni bachan e sobutʼaenʼ romed; ya faʼanra dariy e mich romed ngakʼ ma arame dabi bung rogmed ni ngan unegmed ko mathaʼeg nga fithikʼ fapi gidiiʼ ko galasia rokʼ.”¹

Mormon nikey guy e sobut’aen’ nima dag e gelngin ko mich rorad. Nike guy yad be lemnag ni ba t’uf ngak fare Tathapeg. Nike pii’ athamgil ngorad napan nike weliy marunga’agen e biney e mich. Mormon nike ul’ul’ nge pii’ e athamgil napan nike ayuwegrad ni sapgad e mich nge sobutaen’ rorad rayog ni nge ga’ nag e athap rorad nifan e rogon ni ngar gelnag e magawon:

“Ere bayay, pi walageg nib tʼuf rog, gu baʼadag ni nggu non ngomed ni morngaʼagen e athap. Buʼuw rogon me yog e mich ngomed, gathi kemus ni faʼanra bay e athap romed?

“Ma mang e ngam athapeged? Musap gaed gube yoeg ngomed ni ngam athapeged u dakean fare bayul rokʼ Kristus nge fare gelingin e foskoyamʼ ni tay, ni nge yog e yafos ni manechubog ngomed, ma biney e aray rogon ni bachan e mich romed ngakʼ ni boed ni michmicheg ngomed.

“Ere, faʼanra bay e mich rokʼ beeʼ ma thingar ni bay e athap rokʼ; ya faʼanra dariy e mich ma dariy e athap.

“Ere bayay, musap gaed gube yoeg ngomed ni dabiyog ni nge yog e mich nge athap ngakʼ, ma kemus ni faʼanra ba gumʼaenʼ, mab munguy gumʼirchaʼen.”²

Mormon ni pii’ athamgil ngorad napan nike machib nag ni yad ba chuchgur ni ngar thapeged e tawa’ath nira sug e gum’ircha’rad ko adag rok’ Kristus nib machalbog. Niba weliy ngorad marunga’agen e peth ko mich ngak Yesus Kristus, sobut’aen’, sobut’, fare Kan ni Thothup, nge athap nib gel’ nifan e thapeg ko yafos nib manimus. Nike pii’ athamgil aram rogon.

Faʼanra dangay, ma mich nge athap rokʼ e ba mʼay fan, ya dariy beeʼ ni aram rogon nib mʼag u mit Got, ma kemus ni piʼin nib gumʼaenʼ mab munguy gumʼirchaʼen; ma faʼanra bay beeʼ nib gumʼaenʼ mab munguy gumʼirchaʼen, ma be pogofay nag u gelingin fare Kan ni Thothup ni Yesus e ir Kristus, ma thingari dabisiy ni bay e tʼufeg rokʼ; ya faʼanra dariy e tʼufeg rokʼ ma ire dariy rogon; ere thingari dabisiy ni bay e tʼufeg rokʼ.”³

Gube sap kafram, rayog ni nggu nang u rogon e tawa’ath ko adag—adag rok’ Kristus nib machalbog—ke gelnag, powi’iy, ayuweg, nge thilyeg e nina rog nifan e magawon rok’ ufithik’ e milekag nga na’un rok’.

“Ere tʼufeg e ba gumʼaenʼ, mab gol, ma darma awaenʼ, ma de ʼufʼuf, ma de tolngaenʼ, ma de falʼ ngakʼ, ma de papay e damomuw ngakʼ, ma dar lem nag e tin nib kireb, ma dar falfalaenʼ ko tin nib kireb machane ma falfalaenʼ ko tin nib riyulʼ, ma ma athamgiliy gubin banʼen, mab michaenʼ ko gubin banʼen, ma athapeg gubin banʼen, ma lubeg gubin banʼen.

“Ere, pi walageg nib tʼuf rog, faʼanra dariy e tʼufeg romed, ma dariy rogmed, ya tʼufeg e darma mathmit. Ere, mu chichiʼiyed gimed ko tʼufeg, niʼir e thʼabi felʼ u fithikʼ e gabin, ya gubin banʼen mar ra mathmit—

“Machane tʼufeg e fare adag rokʼ Kristus nib machalbog, ni ma kʼadaenʼ ni gubinfen; ma chaʼ ni yira pirʼeg ni bay rokʼ ko bin tomur e rran, ma ir e ba felʼ rogon.

“Ere, pi walageg nib tʼuf rog, meybil gaed ngakʼ e en Chitamangiy u poloʼ i gelingin gumʼirchaʼmed, ni nge yog ni ngam sug gaed ko re adag ney, ni ke piiʼ nga dakean gubin e piʼin nib riyulʼ ni ma lek Fak, ni Yesus Kristus; ni nge yog ni ngam manged pifak Got; ni nge yog u napʼan ni nge yibi mʼug ma kad boeded ir, ya gadaed ra guy niʼir e aram rogon; ni nge yog ngodaed e re athap ney; ni nge yog nni machalbog nagdaed ni boed ir nib machalbog.”⁴

Falfalaen’ug ngay ni Mormon nike pii’ athamgil ufithik e susun rok’ nge machib rok’. Kug thapeg e tawa’ath ngog nifan e susun rok e nina’ rog. Pi profet ko Adam mada’ ko daba’, udakaen e machib nge susun, ni kar gel nigeg.

Ufithik e sobut’aen’ ngak e pi’in ni guma nang nge tabinaw rorad, dabgu guy rogon ni nggu nang gubin e pi’nen nifan e pi magawon rorad fa non ngak bo’or e gidii’ marunga’agen e tawa’ath nib fel’. Machane e pin’en ni kug sap me pii’ athamgil ngog nge thilyegeg nib fel’ rogon.

Dabug ni nggu kirebnag e privacy rok’, gube weliy ni yigo buchuw marunga’agen e pii’ athamgil nike pii’ ngog e le’engig. Gube rrin’ nibay kol chiya’. Ir e bee’ ni dabun ni nge pir’eg fa thapeg e magar ngak.

Kug mabgol gow ko 60 e duw. Bachane biney ni gu manang e ba yip’fan ko pi thin ney ulan e babyor nib thothup: mich, athap, sobut’aen’, athamgil, kemus ni ir e ma leam nag ir, ba’adag e tin riyul’, de lem nag e tin nib kireb, nge th’abi ga’ e t’ufeg.⁵ Bachan e n’en ni buch ko biney, rayag ni nggu pii’ e mich rog ni gubin gidii’ ra thapeg e pi rogon nib mangil ulan e yafos rorad napan ni ngar ranoed ufithik e magawon ko yafos.

Yu miri’ay e biyu’ ngomed nibe motoyil ni ma nang e gidii’ woed biney. Bo’or i gimed e woed e biney. Gadad gubin ba t’uf e susun ney ko pii’ athamgil nge pi fagar nib t’uf.

Napan gamedra par nga buut’ ngak e ppin fa pumo’on ko ministering, ma arram ni gabe rrin’ nifan Somoel. Ngam lemniged mang Ir ra rrin’ fa yoeg. Ir era pinningmed ni ngar dared Ngak. Ir ra pii’ athamgil ngorad. Irma sap nge oge magar napan nira tabab e thilyeg ni ngar thingari fal’eg. Nge Ir e susun nib machalbog ni yad ra fol gad.

Dariy bee’ ni rayog ni ba rrin’ gubin pin’ey e chiney, machane ni kam motoyil ngak e mu’ulung ney, ra ngam nanged ni kam paer nga dakaen e wo’en. Fare Tathapeg manang gubin pin’en ko pi magawon romed. Ir ma nang e gelngin rom ni ngam tugul ulan e mich, athap, nge sobu’aen’.

Fapi motochiyel nge micheg nike pii’ ngomed ir gathi e sikeng ni ma gel nagmed. Yad e pi tawa’ath ni ma fekmed nga lang ere ni ngam thapeg gubin e pi tawa’ath rok’ Got nge sul nga na’un romed nga Chitimangem ni bay u Tharmiy nge fare Somoel, ni ma t’ufem.

Yesus nike pii’ puluw e pi denen rodad. Rayog ni ngad thapeg e tawa’ath ko yafos ni manimus ney fa’anra bay e mich Ngak ni ngad kalngaen’dad nge manged woed e bitir, machalbog nge ba’adag ni ngad thapeged bin thabi’ ga’ e tawa’ath rok’ Got.

Gube meybil ni gamed ra thapeged e pinning Rok’ nge gamedra pii’ed ngak reb e pi fak ko Chitimangdad nu Tharmiy.

Gube meybil nifan e pi missionary u dakean e feylang. Wenig mu pii’ e yi’iy ngorad ni ngar pii’ athamgil ngak gubin bee’ ni ngar ba’adag nge bay michaen’ e pinning rorad ma yib ku Yesus Kristus u dakaen e pigpig Rok’ ni ma fek e fithingan nga dakaenraed.

Gube pii’ e mich rog ni Ir ba fos ma be powi’iy e Galasia Rok’. I gag e m’ag Rok’. President Russell M. Nelson ir e profet nibay nib fos rok’ Got nifan gubin e feylang. Gu manang nib riyul’ e binem. U dakean fithngan Yesus Kristus nib thothup, amen.