Ayuweg e Gidiiʼ nibe Gafgow

Pi walageg, President Russell M. Nelson ba non ngodad taboch ko biney e mo’olun. Ke fith ngog ni gu ba non bin somm’on.

Nʼen ni nggu weliy morngaʼagen e dabaʼ e rogn e ayuw nima piiʼ Fare Galasia ku Yesus Kristus ni Fan ko Gidiiʼen Got ko Tin Tomur e Rran nge gidiiʼ riy ni yaed be piiʼ e ayuw ngak e gidiiʼ nibe gafgow. Ma ku baygu weliy morngaʼagen boech rogon nibe piiʼ e gidiiʼ e ayuw nib mangil. Ayuweg e gidiiʼ nibe gafgow e kaba yalen niʼi moy ko ngiyalʼ rokʼ Abraham nibay ko tiliw ni gubin.

In e pul ngay kafram, Fare Galasia ku Yesus Kristus ni Fan ko Gidiiʼen Got ko Tin Tomur e Rran e yibi yoeg gelingin e ayuw ni gadaed be piiʼ ko pi gafgow nibay u daken e nam ni irerray e yin sommʼon nike rrinʼ e galasia e biney.¹ Urngin e salpiy nikan piiʼ nike mʼug ulane babyor ko 2021 ngak e nam ni 188 u daken e fayleng e $906 million—ba chugur nge gaman e billion. Ngki chag ko, gidiiʼen e galasia nra muruwel gaed nib pag e 6 million e awa nifan e pi nʼey.

Tiney nibe mʼug ko gelingin e ayuw e ayuw ni yibe piiʼ, e riyulʼ, ni gathi kemus rogon aray. Ya dar mʼug urngin e ayuw ni gadaed be piiʼ ngodaed ulan e birodaed e galasia nge fapi liw nikan dugliyem ngay ni dariy pilwon. Ma biney e salpiy nikan piiʼ nike mʼug ulane babyor ko 2021 e kadar mʼug urngin e salpiy nibe piiʼ e gidiiʼ riy ngak boech e ulung nike tuʼuf e ayuw roraed ni dariy rogon ko Galasia. Nggu tabab ko tin baʼaray banʼan.

Napan e 1831, dawri gaman lʼagruw e duw ngay nike sulyarmen fare Galasia nikan ayliy rogon, me pii’ Somoel e bin baʼaray e yiʼiy ngak e chonggin e galasia ni, michuwunʼug ngay, ni gubin pifak u daken e fayelng:

“Ya musapgaed, gathi gubin ngiyalʼ ma nggu motochiyel nag ngom gubin ni ngam rrinʼ; ya enra un par ma yibe pug oren ngak e nʼen ni nge rrinʼ, era par nib malmal ma dabi mang e tapigpig nib pasig. …

“Arragon, en Tathapeg ke yoeg ni ngam rrin’ed tin fel’, ngam rrin’ e tin fel’ u laniyaen’daed, ni nge yoeg e tin mat’aw ngay;

“Ya bay gelinginrad, ni bay mat’wonraed ningar dugliyed. Ma fa’anra yaedra rrin’ e tin nib fel’ ma arram ndabra chuw fare tawa’ath roraed.”²

I gag ni ku mang reb e Apostle nike gaman 38 e duw nge muruwel rog nike pag e 30 e duw, e ku guy ni bo’or e mit ney e ayuw nibe pii’ e gidii’ nge boech e ulung ni woed rogon ere yi’iy ney nikan weliy “nifen e tin nib fel’” mara “fek[i yib] e tin nib mat’aw.” Bo’or e mit ney e pigpig u daken e fayleng, nib pag ko nam rodaed ni danda ninged mornga’agen. Napan ni gube tafney nag e biney, ke yib nganʼug fare profet/pilung Benjamin ulan fare Babyor ku Mormon, ni michib rokʼ e weliy e tin nib manechubog nib riyulʼ.”Napʼan ni gimed be pigpig ngakʼ beeʼ ma arame ri gimed be pigpig ngakʼ e Got romed.”³

Urngin e tiney e ayuw e bagaʼ ni gadaed be fil morngaʼagen ulan Fare Galasia ku Yesus Kristus ni Fan ko Gidiiʼen Got ko Tin Tomur e Rran nge fapi gidiiʼen e galasia. Woed, ni gadaed ma balaynag e abich rodaed ko bin sommʼon e ran ulan fare pul ma kagdaed ma piiʼ e salpiy ko ggan ninge ayuweg e gidiiʼ nibe gafgow ulan fare ulung rodaed. Galasia e kama piiʼ e ayuw ko salpiy nib gaʼ ngak e ulung nib tuʼuf e ayuw roraed u daken e fayleng.

Demuturug urngin e pi ayuw nibe piiʼ e Galasia rodaed, ulung nima piiʼ e ayuw ko gidiiʼ nike gafgow ni fak Got e bugi ulung ni dariy rogon ko Galasia rodaed. Woed rogon ni par reb e Apostle rodaed me yaliy yaʼan: “Got e gathi ta beʼ e ke dugliy ninge rrinʼ e muruwel rokʼ u fayleng ni rib felʼ. Ya biney e muruwel e bagaʼ, ma ba alamrin, ma dabiyag rokʼ ta beʼ.”⁴ Gadaed gidiiʼen e Galasia nike sulyarmen, e ba tuʼuf ninge od orendaed ma gadaed og nag e magar ngak e gidiiʼ ko ayuw roraed.

Galasia ku Yesus Kristus e kar muʼgaed i dugliy ni ngar pigpig gaed ngak e gidiʼ nibe gafgow, ma kur dugliyed ni yaed ra muruwel u taʼabang ko gubin e gidii. Dawri nʼuw napan ngay ni kug piʼed reb a tawaʼath ni rib gaʼ ngak fare United Nations World Food Programme. Ufithik’ bukun e duw ko fare awyu rodad, la’agrew e ulung nima rrin’ bo’or: Fare Red Cross nge gidiiʼen e Red Crescent ni yow be piiʼ e ayuw ngak pi fak Got ko ngiyalʼ nike buch banʼen. Ku woed rogon, ni boʼor e ayuw ni gadaed ma piiʼ ngak e Catholic. Gali ulung ney e boʼor banʼen ni kar filed ngodaed ni morngaʼagen e piiʼ ayuw u daken e fayleng.

Ma kagdaed ma un ko boech e ulung ngaed puruyʼgaed, nib muʼun e Muslim Aid ngay, Water for People, nge IsraAID, nge ku boech e ulung. Ra reb e pi ulung ney ma bay e nʼen nib mudugil nima piiʼ e ayuw riy, machane gubin ni nʼen ni yaed be gay rogon i ngar rrinʼed e ngar piiʼed e ayuw ngak pifak Got nibe gafgow. Ya urngin e pi nʼey e kabang ko muruwel rokʼ Got nifan ngak pifak.

Yiʼiy ko tin tomur e rran e michib nag ni fare Tathaeg, Yesus Kristus, e ir “fare bin riyulʼ e tomilang nra gaelʼ ramaʼen kanawoʼen e gidiiʼ nra yib nga fayleng.”⁵ Bachan e biney, gubin pifak Got e lam tomilang nagraed ningar pigpig gaed ngak ma kiyaed pigpig ngoraed ko rogon ni yaed manang nib felʼ.

Fare Babyor ku Mormon e machib nag ngodaed ni, “gubin banʼen nibe piningey ma be miliyey ni ngan rinʼ e tin nib mangil, ma ngan tʼufeg Got, min pigpig ngakʼ, e thogthog ni yib rokʼ Got.”⁶

Ulʼulʼ ngay:

“Ya musap gaed, fare Kan ni Thothup rokʼ Kristus e ma piiʼ ngakʼ gubin e gidiiʼ, ni nge yog ni ngar nanged e felʼ ko kireb; ere, nggu dag ngomed rogon ni kiiʼeg u wunʼmed; ya gubin banʼen ni ma piningey ni ngan rinʼ e tin nib mangil, ma ma miliyey nge michanʼuy ngakʼ Kristus. …

“Ere chiney, pi walageg, … ni kug guy ni gimed manang fare tamilang niʼir e gimed ra kiiʼeg banʼen ngay u wunʼmed, niʼir fare tamilang rokʼ Kristus.”⁷

Baʼaray boech pi fak Got ni yaed be piiʼ e ayuw ngak boech pi fak Got ni yaed be piiʼ e ayuw ko ggan, taflay, nge machibnag.

Ragag e duw kafram, fare Kandharis, lʼagruw i mabgol u United Arab Emirates, e kar dugliyew ni ngar tabab gow i gay rogon ningar duruwiʼiyew e gidiiʼ nibe yimʼ ko mikiʼiy. Ko faregi temple u Guru Nanak Darbar Kilkh, e yow ma pigpig ngak e gidiiʼ ni pireʼ nib pag e 30,000 ni yow be pii e ggan ni faraed ko gubin e wikend ndemuturug ko miniʼ era yib, ndemuturug ni faʼanra ba thil e tiliw roraed. Dr. Kandhari e weliy, “Michuwaenʼmad ngay ni gubin e gidiiʼ e taʼab rogon; ni gadaed gubin ni pifak Got, ma gadaed bay u roy ni ngaed pigpigaed ngad piʼed e ayuw ngak e gidiiʼ nibe gafgow.”⁸

Piiʼ ayuw ko taflay nge nguweley e kureb e kanawoʼ ni gadaed ma un ngay ko piiʼ ayuw. U Chicago, ku madaʼ nag Syrian-American reb e togta ni rib chagnag, Dr. Zaher Sahloul. Ir e beʼ ni tabab nag fare ulung ko MedGlobal, nima yarmiy e togta ningar piiʼed e ayuw, nge tin ni yaed ba salap riy, lloweanʼ roraed, nge tin ni yaed ba chag riy ngar ayuwegned e gidiiʼ nibe gafgow, ni woed fare mal ni yib nga Syrian, ni chanʼey i Dr. Sahloul e chugur ni madʼad ni yaen nge piiʼ e ayuw ngak e gidiiʼ nike tuʼuf e ayuw roraed. MedGlobal nge ku boech e ulung nib chugur rogon ko biney (nib muʼun e Gidiiʼen Got ko tin Tomur e Rran ngay nib salap ko tinra sukul niged) e be dag ni Got e be piiʼ e athamgil ngak e gidiiʼnib thil e mich roraed ni ngar ayuweged e gidiiʼ nike tuʼuf e ayuw roraed u daken e nam.⁹

Ma ku boʼor pifak Got ni yaed be un ngar piʼed e ayuw, u daken e fayleng. Kureb e biney, ni gadaed manang ko rogon i piiʼ e ayuw, e morngaʼagen fare moʼon ni kanoeg i Mr. Gabriel ngak, nibeʼ ni chuw ko nam rokʼ ni bachan boech e kireb ni dani felʼ. Ke guy ni boʼor e bitir u Africa nib tuʼuf ningan piiʼ e athamgil ngoraeed ni nge par e tafney roraed nib gel. Ere yarmiy boech e sensey ngar falʼagned reb e sukul ni kar rogned e “sukul u tan e gakiʼiy ngay,” ni gin nima gak e bitir ngay ni ngan sukulnag raed riy u tan e gakiʼiy nib toglulʼ. Dani soen nag beʼ fa reb fapi ulung nima yarmiy rogon e tiney e banʼen nifan e fil sukul ko bitir ko ngiyalʼ nib gel e gafgow.

Machane, gathi dalip e ranʼey ni kanoeg fa ke rrinʼ e pi gidiiʼ ney fa pi ulung ney e be dag nib sor ko tin nib felʼ rokʼ Got makemus rogon aray. Ya tiney e be dag ni Got e ma thothog nag ngak e gidiiʼ nge ulung ni ngan rrinʼ e tin nib mangil. Ma kaba dag ngodad e thingara guyed e pi nʼey nib felʼ nibe rrinʼ e gidiiʼ mi yaed piiʼ e ayuw ni faʼanra rayag roraed.

Baʼaray boech e ayuw nima piiʼ e Galasia e ayuw riy ni bagaʼ ni gidiiʼen e galasia rodaed nge ku boech e gidiiʼ nib mangil e yaed ma piiʼ e ayuw riy ko chugum nge salpiy:

Nggu tabab ko bin baʼaray ni melʼeg rom ko tiliw. Gadaed be rrinʼ e biney ni fan ngodaed nge fan e tiliw ko boech e gidiiʼ. Bin sommʼon e President rodaed, Joseph Smith, e michib nag, “Gamad be yog nib puf matʼawon e liyor ngak Got ni gubin ma rayog rok ni wod rogon ni be yiluy laniyanʼ mad ngomad, nge kuʼer ngak gubin e gidii ni taareb rogon matawrod, yad rorad ko rogon e liyor rorad ko pinen ara rogon fa gin ni ngar liyor gad ngay.”¹⁰

Ku boech e ayuw ni kuma piiʼ e Galasia ngak e chonggin e galasia e woed e sukul ni gadaed manang morngaʼagen, college, nge universities nge ku boech ni gathi yi manang fithingan machane ki yima piiʼ e salpiy nifen e ayuw ninge ayuweg e gidiiʼ nike gafgow ko yikoʼ fa duruq.

Ku boʼor boech banʼen nima piiʼ gathon e galasia e ayuw riy, machane baʼaray in ni nggu weliy nge fan ni rib gaʼfan: ayuwegey ko fananikan nge tolngaenʼ, gay morngaʼagen rogon ni ngan pireʼeg e falay ko mʼar, ayuweg e gidiiʼ nib mʼar, ayuw pi tafen ko musik, nge ayuw ko fan e fayleng ni ngan falʼag rogon nge monʼog.

Gubin mit e ayuw ko Fare Galasia ku Yesus Kristus ni Fan ko Gidiiʼen Got ko Tin Tomur e Rran e be gay rogon i yean u woʼen fapi gidiiʼ nib yulʼyulʼ ulan fare Babyor ku Mormon: “Ere aray rogon, nra monʼog gaed iyaen, ma darpaged ni piʼin ni dariy e mad roraed e nga ranoed ngar chuw gaed, ara piʼin ni kar mʼaed ko bilig, ara piʼin ni kar mʼaed ko balel, ara piʼin nib mʼar, … ma dar … tayed gumʼirchaʼraed nga dakean e falaʼab; ere ba thumʼ paʼraed ngakʼ gubin e gidiiʼ, ni pilibthir nge bitir, ni tin kalbus nge tin ni de kalbus, ni pumoʼon nge ppin, ni demutrug ko yaed buʼun ko galasia fa dangay.”¹¹

Gube micheg nibay Yesus Kristus, ni tomilang rokʼ nge ya’el nibe gagiyeg urngin e bitir ku Got ni ngaed ayuwegned e gidiiʼ nibe gafgow u daken e fayleng. U dakean fithngan Yesus Kristus, amen.