Munʼed nga Dakeanmed Gelingmed, O Zion

“Miki non Jesus … bayay ngak e girdi’ u fithik’ e fanathin ni ga’ar,

“Gil’ilungun nu tharmiy e bod ba pilung ni ngongliy rogon e madnom ko mabgol rok fak ni pumo’on,

“Me l’oeg e pi tapigpig rok ngranod ra pininged e pi’in ke taw e pong ngorad ni ngarbad ko re madnom nem: machane daburad ni ngarbad.

“Me ere l’oeg yugu boch e tapigpig me ga’ar ngorad, Mogned ngak e pi’in ke taw e pong ngorad ni nge lungumed, ‘Mbad ko madnom, ya ke dum’madil e madnom; garbaw rog nge tin th’abi fel’ i pifak e garbaw rog e kan li’, ma kan fal’eg rogon urngin ban’en kan tay: ere mbad ko madnom ko mabgol.

“Machane fapi cha’ nike taw e pong ngorad ni ngarbad ko madnom e dar motoyilgad ko tin kanog ngorad mra bagayad me par ngi i ngongliy e tirok’.”⁷

Napan e kakrom, reb e ngiyal’ nth’abi gel e falfalaen’ riy e ngiyal’ ko madnom ko m’ag pa’ rok’ e Jewish—ba madnom ni yima ta’ ni reb e wik fa l’agruw e wik. Mitney e madnom e ba tu’uf ningan madilnag ni rib fel’ rogon, ma yima yoeg mornga’agen u mm’on ngay, ni karan pug oran ko rofen ni somm’on riy ko fare gran ko madnom. Mitney e mulwol nima yib ko pilung ngak e gidii’ rok’ e woed ba motochiyel ni thingarin rrin’. Darifan ni aram rogon, orran fapi gidii’ ko biney e fanathin e de yib.⁸

“En ni de un ko fare madnom ko fare pilung e [woed nike] togopuluw ko … mat’won fare pilung ma woed nike dag ni be’ ndabun dakean e nam rok’ nge fare fak fare pilung. … Mara bagayad me par ngi i [ngongliy e tirok’]”⁹ e ke dag nra bagyad ma dani nangfan fa dani a’dag fare muruwel rok’ fare pilung.¹⁰

Me u’lul’ fare fanathin:

“Me pining e pi tapigpig rok me ga’ar ngorad, Ke m’ay i fal’eg rogon e madnom ko mabgol ke par, machane fapi girdi’ nike taw e pong rog ngorad ni ngarbad e ke m’ayfan e pong ntay ngorad.

“Ere mmarod ko yu pa’ i kanawo’ ni ba ga’ ngam pininged urngin e girdi’ ni gimed ra pir’eg ngarbad ko re madnom ney.

“Ma aram me yan fapi tapigpig ngalan e yu pa’ i kanawo’ ngar kunuyed urngin e girdi’ nra pir’eged, ni yugu ta’reb rogon e tin ni bfel’ nge tin nib kireb e girdi’: me sug lan fare naun ko girdi’ ni ir e ngan ngongliy e madnom ko mabgol riy.”¹¹

Ngiyal’ nem ma yalen ko madnom ko mabgol—nrogon nibay ko biney e fananthin, e fare pilung—e nge pii’ madre madnom ngak fapi gidii’ nikar baed ko fare madnom. Mitney e mad e ta’areb ya’an, ndani thilthil ya’an ninge chuw fapi gidii’ ngay. Bachan e biney, e ngayag ni dariy be’ nib tolang ngak be’, ma gubin e gidii’ ko fare madnom nrayag ninge un ko sabathin ni gubin e gidii’ riy mab ta’ab thalraed.¹²

Gidii’ nin pire’eg min pining ninge un ko re mabgol ney e deyag ningar fal’aged rogonraed u mm’on ko fare madnom. Ya buch, ni fare pilung e pii’ e maad rok’ ngak fapi gidii’ nikar bad. Gubin e gidii’ niyag ni chuw ngareb e mad nib fel’ nifan e pilung.¹³

Napan ni yib fare pilung ngalan fare nu’un, me sap ngak fapi gidii’ nike yib ko fare mabgol me guy ni bay be’ u fithikraed ni dani chuw ko fare maad. Min fek fare mo’on nga mm’on, me fith fare pilung ngak, “Fager, i di’in ma ga thap ngaray ndariy madan e madnom ko mabgol u dakenam? Machane de yog fa’anem ban’en.”¹⁴ Me fith, fare pilung, “Mangfan ni dan mu chuw nga madan e madnom ko mabgol, nikan pii’ ngom?”¹⁵

Re mo’on ney e de chuw ko maad nifan e biney e rran ko madnom, ma fare bugithin ni “Machane de yog fa’anem ban’en,” e be yip fan ni fare mo’on e dariy e fulweg rok’ ko biney.¹⁶

Elder James E. Talmage ke weliy ni fan e ga’fan marunga’agen e ngongol rok e pu’moon ney: “Re mo’on ney nde chuw nga madan e madnom ko mabgol e aw nib kireb rok’, ni dani tayfan, fa kari rrin’ ban’en ni dani fel’, ni arram rogon nibay nikan yoloey mornga’agen. Somm’on riy ma fare pilung e fith ngak u fithik’ e murnguy, nibe fith ko fare mo’on ko mang e rrin’ me yib ngalan fare madnom ko mabgol ni dani chuw nga madan. Fa’anra weliy fare mo’on fan salpen, fa weliy fan e biney nike buch, ma bay nra non; ma biney e deyog fa’anem ban’en. Fare pilung e pining urngin fapi gidii’ ngar bod ni urngin ni pire’eg fapi tapigpig rok’; machane yaed gubin ni ngar bad u langan ba mab; u mm’on ni ngar bod ko gin’em’ ni tigil’ e mabgol, ni’ir aram e rigin’en nra yib fare pilung riy, ma susun nikan mu’ i chuwegraed nga madan e mad ko madnom ko mabgol; machane facha’, ni yib u bang riy, nde yib u langan fare mab, e be’ ni susun ndabiyib ngaram.”¹⁷

Bay reb e mo’on nib Kristian, John O. Reid, e yoeg ni fare mo’on ni yib ma dani chuw nga madan e madnom ko mabgol e be’ nibe dag ni “dar tayfan fare pilung nge fare fak ni pumo’on.” Gathi kemus ni dani chuw nga madan e madnom ko mabgol; ya ke, mel’eg ni dabi chuw ngay. Ir e dubun ninge chuw nga madan ere rran ney ni yibe madnom nag. Ma rib pay ni dugliy fare pilung ko n’en ninge rrin’: “Mm’aged pa’ nge ay nga mon’ed nga wuru’ e naun nga fithik’ e lumor. Ya aram e gin ni bay i yor riy ma be chachafin nguwelen.”¹⁸

Pufthin rok’ fare pilung e gathi keyan ko rogon ni bachan e da chuw fare mo’on ko fare madan e madnom ko mabgol—ya “keyan u rogon, nibe m’ug, ni facha’ e dabun ninge chuw ko fare maad. Re mo’on ney … e ba’adag ninge un ko re madnom ney, machane … dabun ninge chuw ko maad ni woed rogon e yalen ko fare pilung. Ba’adag ninge rrin’ ni woed rogon ni’ir e nge dugliy rok’. Rogon ni dani chuw nga madan fare madnom e be dag ni be tagopuluw ngak fare pilung nge rogon nike mu’ i dugliy ningan rrin’.”¹⁹

Fare fanathin e ba’aray rogon nin weliy ulan e chep nib thothup, “Ya bo’or e girdi’ ni kan piningrad, machane ba lich e kan mel’eg.”²⁰

Machane, Joseph Smith e fal’eg rogon ere guruy ni ba’aray ko Mathew napan nin thogthognag ngak nibe pilyegthin fare Bible: “Ya bo’or e girdi’ ni kan piningrad, machane ba lich e kanmel’eg; ya arrow rogon ni yaed gubin ni dariy fare madan e madnom ko mabgol u dakeanraed.”²¹

Fare pong ko fare madnom ko mabgol nge fare nge fare mel’eg ningan un ko fare madnom ko mabgol e woed nib chuchugur rogon machane ba thil. Fare pong riy e fan ngak gubin e pumo’on nge bpin. Rayag nra yib be’ nge fanay fare pong nge yibi par nga but’ ko fare madnom—machane dabi un ko tin ni yibe rrin’ ni bachan e de chuw nga madan e madnom ko mabgol nibe yipfan ningan ninge michuwan’uy ngak Someol Yesus Kristus nge fare murunguy rok’ nib thothup. Aram fan, nike pong Got me rogon nikad fulweged, e bo’or e gidii’ nikan pining machane ba lich e kan mel’eg.²²

Ngan mang fa ngan boed e dar yipfan ni gadaed ba tolang ko boech ban’en. Ya, be yipfan ni gur nge gag e rayag ni ngaed mel’egnew ni ngan mel’egdow ko rogon e pi n’en nikad mel’egew ni mat’won dow.

Musap ko fare bugithin ni mel’eg ko Doctrine and Covenants:

“Ya, bo’or e gidii’ ni kan piningrad, machane ba lich e kan mel’eg. Ere mangfan ni dani mel’egraed

Ya bachan gum’ircha’enraed e bay ko tin nu fayleng ban’en, ma yad be tayfan e n’en ni ba’adag e gidii’.”²³

Rib michuwun’ug ni gali verse ney e be non ni rib tolilang rogon ningan nangfan e thin riy. Ya Got e dariy e babyor rok’ ko mini’ e yibe athapeg ningan uneg ko biney. Ya dar siyeg ma dar lich nag ko mini’ e “ngan mel’eg”. Ya, gum’ircha’en daed tin ni gadaed ba’adag, tin ni gadaed be tayfan ko fapi m’ag ko gospel nib thothup nge fapi gam’ing, nge rogon ni gadaed be fol ko fapi motochiyel, nge, bin th’abi ga’fan, e fare murunguy nge wurngaen’ ko bayul rok’ fare Tathapeg e ir era dugliy e en ninge mel’eg Got.²⁴

“Ya kug muruwel gaed nib gel ni nggu yol gaed, ni nggu pingegedaenʼ pifakmaed, nge pi walagmaed, ni nge michaenʼraed ngakʼ Kristus, me felʼ thilraed Got; ya gadaed manang nu dakean e murnguy e gadaed rathap riy, u tomuren ni kad rinʼed gubin nra yog ni ngad rinʼed.”²⁵

Ko biney e yafos ni gadaed be par riy ulan e biney e fayleng, bay ni gadaed be pag e tin nde gaʼfan nibe palog nagdaed ko tin nib manechubog banʼen ni gadaed be tay e tin ni gadaed baʼadag, tin ningan monʼog riy, nge tin ni be rrinʼ e gidiiʼ nib boʼor nibe palog nagdaed ko tin thʼabi gaʼfan. Tin ni gadaed be sap ngay “ko tin nu fayleng banʼen” nge “tin nima tay e gidiiʼ fan” e bay nra fekdaed nge palog nagdaed ko matʼwondaed nib thothup.²⁶

Nggu sul u dakean e nʼen ni yoeg Somoel ngak fapi gidiiʼ rokʼ ni pagraed nibay ulan fare bin Kakrom e Mʼag ko fare profet Haggai: “Damur guyed e n’en ni be buch romed.”²⁷

Gadaed gubin e susun ni ngad sapgaed ko pi n’en nib tu’uf rodaed nib thothup nge tin nu fayleng ni gadaed be gay u fithik’ e yul’yul’ ma gadaed be meybil nag ni ngaed nanged e pi n’en ulan e yafos rodaed nra yo’or nag e tawa’ath rok’ e Chitamangiy nu Tharmiy nge fare Tathapeg ni yow ba’adag ningar pi’ew ngodaed. Nge riyul’ fare Kan ni Thothup era ayuwegdaed ngaed guyed ko gadaed mit i mang gidii’.²⁸

Napan ni gadaed ra gay fapi tawa’ath nib thothup ni ngeyag ni guy owchdaed ma rung’ag teldaed,²⁹ mari gube micheg nran tawa’ath nigem min pii’ gelngim ningam gelnag e m’ag rom ngak Somoel. Ma kagdaed ra thapeg gilngin Got ulan e yafos rodaed³⁰ma arram nran piningdow min mel’eg nagdow ko fare madnom rok’ Somoel.

“Muʼod gaed, muʼod gaed, munʼed nga dakeanmed gelingmed, O Zion.”³¹

“Ya thingari monʼog yu Zion nge felʼ yaʼan, nge tin nib thothup riy; nge mithil riy nra gaʼ; mara yib gelingin; arrogon, ni rigube yoeg ngom, ni Zion ere sakʼiy ngalang nge chuw nga maad ni rib felʼ yaʼan.”³²

Ri gube micheg u fithik e falfalaenʼ ko gubin banʼen rokʼ Got nib thothup mab riyulʼ, niʼir e Chitamangdaed nu Tharmiy nib manechubog, nge fare Fak, Yesus Kristus. Ri gube micheg ni Yesus Kristus e ir fare Thapeg nge Bayul rodaed ma bay nib fos. Ma kugbe micheg ni Chitamangiy nge fare fak era mʼug gow ngak fare pagal Joseph Smith, ni irerram rogon me tabab biyay fare gospel rokʼ fare Tathapeg ko tin tomur e rran. Athapeg nra bagdaed me gay min tawaʼathnag nga owchen ninge guy nge tel ninge rungʼag, pinʼey ni gube meybil nag u dakean fithingan Somoel Yesus Kristus, amen.