Leaked Yesus Kristus ulan e Taawo’ ko Mich

Kammagar ngomed, choir, ni kam yon’ed e tang” Faith in Every Footstep.” Tang nge thin ko fare tang ney nikan yoloy ko 1996 rok’ Brother Newell Bayley¹ nifan e madnom ko fare 150th anniversary ko fare ngiyal’ ni taw fapi pioneer ni kakrom nra bad nga Salt Lake Valley ko 1847.

Biney e tang ni yoloy nifen e biney e madnam, mulwol riy e bay nifan ngak ga’angin e feylang.

Rigu ba’adag e thin riy ko chorus:

Pi walageg, gube micheg ni napan ni gadadra lek Yesus Kristus nibay e mich ko taawo’, ma arram nibay e athap. Bay e athap rok’ Somoel Yesus Kristus. Bay e athap nifan gubindad ulan e yafos ney. Bay e athap ni ngad gelgad ko ologoch rodad, pi kirban’ rodad, nge pi gafgow rodad, nge magawon rodad nge gubin e sikeng rodad. Bay e athap ulan e kalngan’ nge thapeg e n’agfan nge pii’ n’agfan. Guma nang ni bay e athap nge gapas ulan Kristus. Irma fekdad daba’ ufithik’ e ngiyal’ nib mo’omaw. Ke rrin’ nifan e pi pioneer nib kakrom, nge Ir ra rrin’ nifan gubin dad.

Biney e duw ko 175th anniversary napan ni yibi taw fapi pioneers nga Salt Lake Valley, nike puguran ngog mornga’agen e gidii’ rog ni kakrom, nra bad u but’ u Nauvoo nga mada’ nga Salt Lake Valley. Bay e thingtuw nge thingtaw rog ni kar ranoed u but’ napan ni kab fel’yangren. Henry Ballard ir 20 e duw rok’³ Margaret McNeil ir 13 e duw rok’⁴ nge Joseph F. Smith, nike mang bin nel’ e President ko fare Galasia, ir e 9 e duw rok’ napan ni taw ngalan u Salt Lake Valley.⁵

Kar feked pi magawon nib gubin miit u dakaen e wo’, woed e winter nib garbeb, m’ar, nge dariy e pi maad nib mangil. Woed, napan Henry Ballard ke yean nga Salt Lake, ke falfalan’ ni ke guy fare “Nam nin Micheg” machane ke rus ni bee’ e ba sap ngak bachane fare maad rok’ nike mogchod ma dar upnguy downgin ni ga’angin yang. Ke mithag u fithik a paan gubin e rran umon e lumar. Ke yean nga a tabinaw nge ke fith e maad ere rayog ni nge un milekag rok’ ni sap ko galabthir rok’. Ke ognag e magar ngak Got ni ke yean nga tabinaw rok’ u fithik e machubgil.⁶

Fapi titaw nge tutuw rog kar fol gad ku Yesus Kristus ko taawo’ rorad nib mich u fithik gubin e magaown rorad. Ri gub falfalaen’ ngorad ni dab tal’eg. Mich ko taawo’ rorad e ke yibliyeg nge tha’ rog’, ni woed e taawo’ ko mich romed e daba’ ra yibliy pi fakmed.

Fare thin ni pioneer ir e noun nge verb. Ir e noun bachane ir bayyip’ fan bee’ nib ta’abrogon ni nge yib nga nam reb e binaw. Ni woed e verb, rayog ni nge baypip’ fan e ning fa nima dag e kanawo’ ni nge lak bee’.⁷

Napan ni gube lemnag mornga’agen e pi pioneer ney nikar daged e kanawo’ nifan reb e bee’, gube lemnag ni bin m’on e fare Profet Joseph Smith. Joseph e ir reb e pioneer ni bachan e taawo’ ko mich rok’ nike fek ngalan fare luway nib sug ko gaki’iy, ko gin ni ragbug riy nga dakaen e but’ nge meybil ni bing rogon ngodad ni ngad thapeged gubin e machib rok’ Yesus Kristus. Mich rok’ Joseph nike “fith ngak Got”⁸ulan ere kadabul nem ko 1820 e bing wo’en rogon fare Sulyarmen ko fare gospel rok’ Yesus Kristus, nib mu’un fapi profet nge fapi apostle nikan pinningrad ni ngar pigpiggad u dakean e feyleng.⁹ Mich u wunug ni Joseph Smith e ir reb e profet ku Got. Guma nang ni mich ko taawo’ rok’ nike powi’iy ngak ni nge ragbug nga dakaen e buut’ nga p’oewchen ni Got ni’ir e Chitamangiy nge far Fak nib Tu’uf Rok’, Yesus Kristus.

Taawo’ rok fare profet Joseph nib mich nike pii’ ngak e rogon ni nge mang e talin e muruwel rok’ Somoel ninge thapeg fare Babyor ku Mormon, ni’ir e reb e m’ag rok’ Yesus Kristus nge bayul ni thapeg Rok’.

U dakaen e mich rok’ Joseph Smith nge udakaen e magawon nib ga’ nge togopuluw, nike mang e talin e muruwel utan pa’ Got nike fulweg fare Galasia rok’ Yesus Kristus bayay nga dakaen e feylang.

Bin tomour e general conference, kug non ko mornga’agen e pigpig ko mission rog nike tawa’ath nigeg. Kug thapeg e tawa’ath napan ni kug michib nag mornga’agen e kanawo’ nib thap rok’ e Chitamangdad nu Tharmiy, Bin Somm’on e Lik’ay rok’ Joseph Smith, nge pilyeg rok’ ko fare Babyor ku Mormon. Pi machib ney nib fulweg nike powi’iy e mich ko taawo’ rok’ napan in kug sap e pi’in ni ba’adag ni ngar rungan’ e mulwol ko fare Sulyarmen ko fare machib.

Pi missionary e daba’ e ir e pi pioneer e daba’ ni bachan ni yad ba pii’ e mulwol nib ma’ang’ang ngak e gidii’ u langab e feylang, ba’aray rogon ni ma bing e wo’en ko pi fak e Chitamangdad nu Tharmiy nira nanged mornga’agen nge Fak, ni Yesus Kristus. Ma thapeg e machib rok’ Yesus Kristus ma bing a wo’en gubin e gidii’ ma ta’ermadliy nge thapeg e pi gam’ing nge tawa’ath rok’ e Galasia nge temple.

Bin tomor e conference, President Russell M. Nelson nike weliy “fare Somoel nike fith gubin e pumo’on nib mat’aw ni ngar ta’ermadliydad nifan nge rrin’ e pigpig ko mission” nge “mission e ir e rogon nib fel’, machane de thingarda rrin’ed” nifan “pi bpin nib fal’yangren.”¹⁰

Pi pumo’on nge ppin nib fel’yangren, pi taawo’ romed nib mich ra ayuwegmed ni ngam leked e pinning rok Somoel ni ngam pigpig ko mission—ningam manged e pi pioneer ko daba’—napan ni ngam bing e wo’en nifan e bitir rok Got ni ngar piryeged nge fol e kanawo’en e motochiyel nga p’oewchen nib fel’ngin Rok’.

President Nelson nike manag e pioneer ulan e Galasia. Napan ir e apostle nike milekag nge bing bo’or e pi nam nifan e michib ko fare gospel. De n’uw napan nike mang e profet nge President ko fare Galasia, nike wenig nag ngodaed ni “ngaed gel [niged] e thothup rodaed ngan thapeg e yi’iy.”¹¹ Kube ul’ul’ nibe michib ngodad ko rogon ni ngad ga’ niged ma gadad gel nag e mich rodad. Ulan e machib nifan e picha’ fel’yangraed, nike yoeg:

“Gube wenig nag ngomaed ni ngam thapeged e mich romed. Muruwel ni fan. Mu thapeged. Ayuweg ni fan. Ngam machathowol ngak ere ninge tugul. …

“[Me tomur] mu sapgad nifan e ma’ang’ang nira buch ulan e yafos romed.”¹²

Nike michib ngodad ko rogon ni ngar mag ayuweg-nem. Nike yog “Fapi rran ni bay yib, dabiyoeg ni nge fos e ya’el rok bee’ ni fa’anra dariy e powi’iy, fa fanow, fa golnag, fa ayuw ko fare Kan Thothup.”¹³

Guba micheg ni President Russell M. Nelson e fare profet ku Got u dakean e fayleng daba’.

Tathapegdad, Yesus Kristus, e ir e pioneer nib ga’ ni nge ta’ermadliy e wo’en. Riyul’, Ir ewo’en”¹⁴nira fulweg e kanawo’ ko thap ere rayog ni ngad kalngan’dad nge, ufithik e mich ulangin, suloed ngak e Chitamangdad nu Tharmiy.

Ga’ar Yesus, “I gag e kanawo’, me gag e tin riyul’, me gag e yafos: dariy be’ nrayag ni nge yan ngak e en ni Chitamangiy ya kemus ni gag e ra yan rog ngak.”¹⁵ Nike micheg ngodad ni dabiyog ni nge chewdad fa’an dariy e gapas; Irma yib ngodad ufithik e magawon rodad.¹⁶ Nike pinningdad ni ngad “baed [Ngak] u polo’ i gum’ircha’med, nge [Ir] ra golnag [dad].”¹⁷

Gube pii’ e micheg rog ni Yesus Kristus ir e Tathapeg nge Tabiyul rodaed, ni Cha’an nima wenig nag dad ngak e Chitamangdaed. Chitamangdad nu Tharmiy nike bing e wo’en ni ngad suloed ngak napan ni ngad leked Fak nib T’uf rok’, Yesus Kristus, udakaen e mich ko gubin e taawo’.

Thingtuw nge thingtaw rog nge boch fapi pioneer nib kakrom e kar feked ni bo’or e magawon napan nikar ranoed ko fapi wagon, pi handcart, nge ranoed u but’ nga mada’ nga Salt Lake Valley. Gadad ra feked e pi magawon ulan e milekag rodad ufithik e yafos rodad. Dabi thingarda fek e handcart fa powi’iy e wagon udakaen e burey nib ga’ nge ufithik’ e snow nib to’aer; gadad be guy rogon ni woed ngorad ni ngad gelnag e lumel nge magawon ko tin nib ya’el rodad. Bay e sikeng thingarda feked; pi burey rodad—nge bochinyal’ e burey nib ga’—thingarda dared nga lang. Ba thil e sikeng daba’ ko pi’nen rorad e pi pioneer nib kakarom, ir gathi e magawon nib achgchig.

Rib ga’fan ni ngad fol e profet nge tayed nib gel e rifrifan’dad nga dakaen e kanawo’en e motochiyel, ta’ab rogon nikar rrin’ed e pi pioneer nib kakrom.

Ngad leaked Yesus Kristus ko gubin e mich ko taawo’. Thingarda pigpig ngad ngak Somoel ma gaed ayuweg dad. Thingarda gelnag dad ko tin nib thothup udakaen e fol nge liyor ngak e pi micheg rodad. Dabda pagtalined nib ga’fan ningan fol ko fapi motochiyel. Mo’oniyan’ ma guy rogon ni nge kirebnag e t’uf rodad ngak Got nge Somoel ni Yesus Kristus. Wenig mu pugurangad fa’anra demtrug e bee’ kar ranoed nga wuru’ e wo’, Tathapegdad dabiyog ninge malog ngorad. Ni bay e tawa’ath ko kalngan’uy, rayag ni ngad sapgaed Ngak. Irma ayuwegdad ni ngad fil’ed, tugul, nge thilyeg napan ni ngad pared ko kanawo’en e motochiyel.

Athamgil gad ngad leked e taawo’ rok’ Yesus Kristus nge, nibay e mich ko taawo’ rodad, tafney rodad nib sap ngak, rifrifan’ aydad ninge par nga dakaen kanawo’en e motochiyel, ni ireray e meybil rog u fithik’ e murnguy u dakean fittingen Yesus Kristus, amen.