Muruwel uta’abong ngak Somoel

Tomuren la’agrew e pul ni kug mabgol, le’engiyeg nike weliy ke ba’adag ni nge fil musik. Kug guy rogon ni nggu ayuwegen, ere kug fal’eg e surprise nib ga’ ni fan ngak. Kug waen nge kanteen ko musik nge chuwi’iy e piano ko to’owath. Kug tay e babyor ko chuwi’iy ulan e kahol nibay e nunu nge pii’ ngak, ni kug lemnagra yib e falfalaen’ nib ga’ nifan e figirngin rok nib mangil.

Napan nike bing e kahol nib achigchig nge guy e ba’nen ulangin, nike sap ngog ufithik e t’uf nge ke yoeg, “Oh, t’uf rog, gab ni rib mangil! Machane gube fith ngom e duwer: Biney ir e to’owath fa malfith?” Tomuren kug non uta’abong marunga’agen biney, kug mel’egew ni nggu tal’eg e chuwi’iy. Kug fasgow udakaen e salpiy ko tafil, woed rogon bo’or e gidii’ ni kar tabab e mabgol. Binem nike ayuweg nigeg ni nggu nang e daf nib gaa’fan marunga’agen e muruwel’ uta’abong ulan a mabgol nge rogon ni nge ayuweg gag nge le’engiyeg ma ta’areb e tafnaey romow nge gum’ircha’ romw.¹

Fare gospel nike sulweg rok Yesus Kristus ma weliy e kenggin ko muruwel’ uta’abong ufithik e ppin nge pumo’on, ko yafos ney nge ulan e yafos ni manimus. Yow ma thapeg e pi’nen nib chag nib thothup nge wuruwel’, bay e muruwel’ nifan gubin e ppin nge pumo’on ulonging e tonom ko falfalaen nifan ngak pifak.² Rangam sap biney napan nike tabab napan e Somoel nike yoeg “dabi fel’ rogon fa’an ni kemus e pumo’on; ere [nike] sunmiy e help meet ni fan ngak.”³

Ulan e tanom ku Got, e “help meet” ir e bee’ ma muruwel’ uta’abong nge irma nib ta’ab ko Adam.⁴ Riyul’, Eve ir e to’owath ku tharmey ulan e yafos rok Adam. Udakaen e rogon nge tin nib saplip ko ya’el, nike pii’ athamgil ngak Adam ni nge muruwel’ uta’abong nifan e falfalaen’ rorad gubin e feylang.⁵

Gadad be lemnag marunga’agen la’agrew e yalen ni ra gelnag e wuruwel’ ufithik e pumo’on nge ppin. Bin sommon e yalen ir gadad gubin e chuchurgur Got.⁶ Nrogon e machib ko gospel, pi’nen nib thil u thilin pumo’on nge ppin dabi gathay e micheg nib manichubog rok Got nifan e pifak. Dariy’ bee’ ni be chaeg ko reb e bee’ nifan e thapeg ko gil’ilungun nib celestial ufithik e manichubog.⁷ Fare Somoel ma pinning gubin dad, pifak Got, “ni ngad dared Ngak, ni ngad thapeged falfalaen’ Rok, nge dabi fe yathin ngak demtrug e bee’ nima yib ngak.”⁸ Ere, u thin ney, gadad gubin e ta’abrogon u p’oewchen.

Napan e figirngiy nge le’engiy manang nge fol e yalen ney, dabi fal’eg ngoraed ni president fa vice president nifan e tabinaw. Dariy e bee nib tolang fa bachigchig ulan e tha’ ko mabgol, nge dabi waen u buut’ ni papay ko reb e bee’. Yow ma ranow nga buut’ uta’abang, nib ta’abrogon, pifak nib thothup rok’ Got. Yow ba mang ta’areb ko tafeny, ba’adag, nge fan ko Chitamangdad nu tharmiy nge Yesus Kristus,⁹ nima powi’iy e tabinaw uta’abang.

Ulan e mabgol ni ta’abrogon, “adag ir gathi e chugum machane ir e ngongol … e yang ko e muruwel’ rok gubin gidii’.”¹⁰ “Ufithik e ngongol nib mangil, figirngiy nge le’engiy be mang ni ta’areb nifan e ‘suwey nib dabimus‘ bi’id nge ‘dabi t’uf e motochiyl’ ere yow ra thapeg e gelingin Ya’el nifan ngomow nge bitir ko ‘manimus.’”¹¹

Bin la’agruw e yalen ir e Motochiyl nib Gol, nike fil fare Somoel ulan e Machib u Burey: “Gubin ban’en ni gimed ba’adag ni nge rin’ e gidii’ ngomed, e ku’ir e ngam rin’ed ngoraed.”¹² Yalen ney bayip’ fan e thamey ko ta’abrogon nge ayuweg nge keyib bachane e bin la’agruw e motochiyl nib ga’, “Ngam t’ufeged e cha’ ni buguliyoror romed ni gowe gur.”¹³ Nima kunuy uta’abong ko reb e pi’nen nib Christian woed ni gum’aen, fel’ rogom, sobut’aen’, nge nib sumunguy.

Rogon ni ngad nanged e rogon ni ngad rrin’ e yalen ney, rangad sap nga mabgol nib thothup nge manechubog nike fal’eg Got ufithik e bin somm’on e galibthir, Adam nge Eve. Kar ta’ab gow,¹⁴ nike sunmiy e ta’abrogon nibe ayuwegrog ni ngar dared u buut’ uta’abong ufithik e liyor, ba’adag, nge t’uf, nira pagtalin ngorow nge piryeg e rogon ni nge ayuweg row ufithik e milekag nga manimus.

Thingarda ba’adag ta’abrogon e pi’ney ulan e mabgol rodad daba’. Ufithik e gam’ing ko temple, ppin nge pumo’on be ‘un ko mabgol nib thothup ko fare m’ag nib be’ech ma dabi ma’ay. Udakaen e rogon ko biney e priesthood, kar thapeged e to’owath nib manechubog nge gelngin nib thothup ni ngar powi’iy e tabinaw napan ni ngar fasgad ufithik’ e pi micheg ni kar fal’eged. Tomuren biney, kar ranow uta’abong ngak Somoel, ni rib ga’ nifan e ngognol rorow nib thothup ni ra e machathowol nge fonow.¹⁵ Machathowol nge fonow ma muruwel uta’abong nifan e pi muruwel’, ni bayip fan e chitinin nge chitamangiy “thingari ayuwegrow ni yow be ta’abrogon”¹⁶ nge share nag e fonow nifan e tabinaw.

“Machathowol bayip fan e duruw’iy, fil nge ayuw” fapi chon ko tabinaw, nima rrin’’ napan ningad ayuweg ngorad “mafil e tin nib riyul’ ko fare gospel nge gelnag e mich u Chitamangmed nu tharmiy nge Yesus Kristus” ufithik e t’uf. Fonow bayip fan e “wawliy e pichon ko tabinaw nga paer ko gin bay Got riy. Ngad rrin’ed biney napan ni ngam pigpig nge machib ufithik e sumunguy, sobut’aen’, nge t’uf nib falngin. Ni tay e bu’un “fonow e pichon ko tabinaw ulan e meybil gubin e rran, fil ko gospel, nge reb pi’nen ko liyor. Galibthir ma muruwel’ uta’abong,” nima fol e susun ok Yesus Kristus, “nira mugu’ul gali wuruwel’ [nib ga’].”¹⁷

Rib ga’fan ni ngam nang e am ulan e tabinaw ma fol e yalen ko patriarchal, machane be thilyeg boch ko e tapowi’iy ko priesthood ulan e Galasia.¹⁸ Yalen ko patriarchal ma weliy bay e muruwel nib thothup rorow e figirngiy nge le’engiy thingari rrin’ed nifan e tabinaw nge yow ba fulweg ngak Got. Bat’uf e ayuweg uta’agong—ni ba’adag ko gubin e yalen ko tin mangil nge rogon i pufthin—nge nima pii’ e rogon nima tugul ufithik e tafen ko t’uf nge ayuweg.¹⁹ Fapi ngongol nib ga’ dabi pii’ e rogon ko bulche’ nge rib ga’ ni dabi’ pii’ e rogon ko tug fa ga’ nag e matawon.

Pi’nen ni ke buch Adam nge Eva, tomuren nikar pag fare Miley nu Eden, be weliy nib fel’ rogon e machib ko t’uf ayuw uthil e chitinin nge chitamangiy marunga’agen e machathowol nge fonow e tabinaw. Woed a machib ulan e babyor nu Moses, kar muruweliy uta’abong ya thangri yib e athuw u dakenam ma ga maruwel nib gel ni kar pii’ e pi’nen ko fare tabinaw rorow;²⁰ kar fakew e bitir;²¹ kar meybil ngak uta’abong u fithingan’ Somoel nge kar rung’an e lamen “keyib ko e Milay’ ku Eden”;²² kar thapgow e pi motochiyel rok Somoel nge guyrogon ni ngar folgow.²³ Me tomoren kar “weliy [pi’nem] ngak fapi bitir nib pumo’on nge ppin”²⁴ nge “dabda taleg ni ngar pinning ngak Got” uta’abong nifan e pi’nen nima bat’uf.²⁵

Pi walageg nib t’uf rog, machathowol nge fonow yow ma pii’ e rogon, gathi taleg ngomed. Ta’areb e bee’ ni bay e muruwel’ rok machane ir gathi e bee’ rayog ni nge rrin’ binir. Napan e galibthir nib t’uf ni manang gali ngongol ney nib ga’, yow ra guyrogon nib gel uta’abong ni ngar damiiteg nge ayuweg e dowen nge tafney rorad e pifak. Yow ma ayuweg ngorad nifan e magawon ko ya’el daba’ napan ni ngar pii’ e thin nib fel’ rok Somoel napan e pi profet rok.

Figirngiy nge le’engiy ma ayuweg rorow nifan e ngongol nib thothup machane, “magawon ko dow, yam’, fa reb e magawon ma t’uf e thilyeg ko rogom.”²⁶ Bochi yay e figirngiy nge le’engiy thingari rrin’ e ngongol nifan gali cha’ u ta’abrong e yay, ko bochi e duw fa gubin rran.

Kug mada’ e walagen nib ppin nge pumo’on de n’ew napan ni be fas gow ulan e magawon ney. Bachane dakiry e figirngiy fa le’engiy, kar, ulan e tabinaw rorow nge udakaen e ayuw rok Somoel, mel’eg ni ngar guy rogon e rayog rorow ni ra ayuweg e bitir rorow marunga’agen gubin e pi’nen ko ya’el nge yafos ko bitir. Dabi pagtalin e micheg ko temple rorow ni kar fal’eg ngak e Somoel nge micheg nib manichubog ni darifan e divorce rorow. Kar pinning e Somoel nifan e ayuw rok napan ni guy rogon a rayog rorow ni ngar athamgil nge ranow udakaen e kanawo’ ko micheg. Yow ma pagaen’ ngak Somoel ni ra pii’ e pi’nen ni b’tuf, gathi kemus ulan e yafos ney, machane ufithik e manimus. Yow ma machathowol e pitir rorow napan ningar fil nag ufithik e sumunguy, sobut’aen’, nge t’uf nib falngin napan bay e magawon ulan e yafos. Nifan e tin ni guma nang, gali galibthir ney dabi puwaen ngak Got nifan e magawon rorow. Kar sap nga reb e rran ni bay e machalbog laniyaen’med ko athap nge ba’adag ni fan e pi to’owath fare Somoel ni ra pii’ ngorow.²⁷

Pi walageg, fare Taathapeg ke pii’ e wo’en nib tha’bi mangil ko ta’areb nge machib u ta’abang Chitamangiy nu Tharmiy. Ke meybil ko gachalpen Rok, be ga’ar “ngar pired ni yad gubin ni karta’rebgad; Chitamagiy, mu ayuwegrad ngar pired u fithik’dow ni bod rogon ni ga bay u fithik’ag ma gu bay u fithik’am: ni kar ta’rebgad ni bod rogodow ni gadow ba ta’reb.”²⁸

Pi walageg, gube pii’ e micheg rog ni—ppin’ nge pumo’on—muruwel’ uta’abong, ra ngad ba’adaged e ta’abrogon ni ke fil Somoel napan ni ngad rrin’ed e muruwel’ rodad ulan a mabgol rodad. Gube micheg ngomed, ulan e fithingan Kristus, e gum’ircha’dad ra “u ta’abang ngo fithik’ e t’ufeg roraed ngoraed,”²⁹ rangad thapeg bo’or e falfalaen’ ulan e milekag nga yafos nib manimus, nge e rogon rodad ni ngad pigpig ra ga’nag.³⁰ Gube pii’ e m’ag mornga’agen fatin nib riyul’ u dakean fithingan Yesus Kristus, amen.