Hañando Pas Personal

Mi kerido rumannan, nos a wòrdu bendishoná pa e enseñansanan inspirá i músika bunita ku a toka nos den e seshon di apertura aki di konferensia general. Nos ta gradisí boso pa boso partisipashon i pa boso fe.

Awe lo mi papia di kiko mi a siña tokante e milager di haña pas personal, kualke sea nos sirkunstansia. E Salbador sa ku tur e yunan di Tata Selestial ta anhelá na pas, i El a bisa ku E por duné na nos. Por fabor kòrda e palabranan di JesuCristo registrá den e buki di Juan: “Pas Mi ta laga pa boso; mi pas ku Mi ta duna boso, no ta manera e mundu ta duna, mi ta duna boso. No laga boso kurason ta turdí, ni tampoko lag’é tin miedu.”¹

Loke e kier men ku pas i kon E por dun’é ta revelá dor di e sirkunstansianan di esnan ku a skuche‘E bisa e palabranan ei. Skucha na e relato den Juan di e kulminashon di Cristo Su ministerio. Forsanan feros di maldat tabata baha riba djE i tambe riba Su disípulonan.

Aki ta e palabranan di e Salbador:

“Si Bo Stima Mi, warda Mi mandamentunan.

“I lo mi hasi orashon na e Tata, i e lo duna bo un otro Konsolador, pa e lo por keda ku bo pa semper;

“Hasta e Spiritu di bèrdat; ku e mundu no por risibí, pasobra nan no ta mir’é, ni konosé: pero boso konosé; pasobra e ta keda serka boso, i lo ta den boso.”

“Lo mi no laga boso sin konsuelo: Lo mi bin serka boso.

“Djis poko tempu mas i mundu no ta mira Mi, ma boso sí lo mira Mi. Pasobra Mi ta biba, boso tambe lo biba.

“Ora e dia ei yega, boso lo sa ku Ami ta den Mi Tata i ku boso ta den Mi, meskos ku Ami ta den boso.

“Esun ku tin mi mandamentunan, i warda nan, e ta esun ku ta stima mi: i esun ku ta stima mi lo wòrdu stimá dor di mi Tata, i ami lo stim‘e, i lo manifestá mi mes na dje.

“Hudas a bisa na dje, no Iskariote, Señor, kon bini Bo ta mustra nos ken Bo ta i Bo no ta mustra e hendenan ku no konosé Dios, ken Bo ta?

“Jesus a kontesta i a bis’é, Si un hende ta stima mi, e ta obedesé mi palabra i mi Tata lo stim’é; nos lo bini serka dje i keda biba serka dje.

“Esun ku no ta stima mi no ta warda mi palabranan: i e palabranan ku boso a tende no ta di mi, ma di mi Tata ku a manda mi.

“Mi ta papia e kosnan akí ku boso, siendo ku mi ta ainda ku boso.

“Pero e Konsolador, ku ta e Spiritu Santu, kual mi Tata ta manda den mi nòmber, e lo siña bo tur kos, i trese tur kos na bo memoria, tur loke mi a bisa bo.

“Pas Mi ta laga ku boso, mi pas mi ta duna boso: no manera e mundu ta duna, ami ta duna boso. No laga boso kurason ta perturbá, tampoko tene miedu.”²

Mi a siña por lo ménos sinku bèrdat for di e enseñansa di e Salbador.

Promé, e don di pas ta duná despues ku nos tin fe pa warda Su mandamentunan. Pa esnan ku ta miembro di kombenio di Señor Su Iglesia, obedensia ta loke nos a primintí kaba pa hasi.

Di dos, e Spiritu Santu lo bin i keda serka nos. Señor a bisa ku, ora nos sigui pa ta fiel, e Spiritu Santu lo biba den nos. Esaki ta e promesa den e orashon sakramental ku e Spiritu lo ta nos kompaño i ku nos lo sinti, Su konsuelo den nos kurason i mente.

Di tres, E Salbador ta primintí ku ora nos warda nos kombenionan, nos por sinti e amor di e Tata i e Yu pa otro i pa nos. Nos por sinti Nan serkania den nos bida mortal, meskos ku nos lo sinti ora nos ta bendishoná pa ta ku Nan pa semper.

Di kuater, warda e mandamentunan di Señor ta rekerí mas ku obedensia. Nos mester stima Dios ku henter nos kurason, forsa, mente, i alma.³

Esnan ku no ta stim‘E no ta warda Su mandamentunan. I asina, nan lo no tin e don di pas den e bida aki i den e mundu benidero.

Di sinku, ta kla ku Señor ta stima nos sufisiente pa paga e preis di nos pikánan p‘asina nos por—pa medio di nos fe den DjE i nos arepentimentu, pa medio fi e efektonan di Su Ekspiashon—tin e don di pas ku “nos no por komprondé,”⁴den e bida aki i ku n‘E eternamente.

Algun di boso, kisas hopi, no ta sintiendo e pas ku Señor a primintí. Lo bo por a hasi orashon pa pas personal i konsuelo spiritual. Sinembargo bo por sinti ku e shelunan ta silensioso pa bo ruego pa pas.

Tin un enemigu di bo alma ku no ke pa abo, i esnan ku bo ta stima, haña pas. E no por gosa di dje. E ta traha pa prevení bo di hasta ke pa haña pas ku e Salbador i nos Tata Selestial ta deseá pa bo tin.

Satanas su esfuersonan pa sembra odio i kontenshon tur rondó di nos ta parse di ta kresiendo. Nos ta mira evidensia ku e ta sosodé entre nashonnan i suidatnan, den bisendarionan, medionan elektróniko, i den henter mundu.

Sinembargo tin motibu pa optimismo: e ta ku e Lus di Cristo ta poné den kada yu resien nasé. Ku e don universal aki ta bin un sentido di kiko ta bon, un deseo pa stima i ta stimá. Tin un sentido inato di hustisia i bèrdat den tur yu di Dios ora e ta bin den mortalidat.

Nos optimismo pa pas personal pa e muchanan aki ta den e hendenan ku ta kuida nan. Si esnan ku ta krianan i sirbinan a traha pa risibí e don di pas for di e Salbador, nan lo, dor di ehèmpel i esfuerso personal, enkurashá e fe di e mucha pa kualifiká pa e don di pas divino.

Esei ta loke skritura ta primintí, “Trein un mucha e kaminda ku e tin ku bai; i ora ku e ta grandi, e lo no kita for di dje.”⁵ E lo rekerí ku esun na enkargo ku kuido i kriansa di e mucha lo ta digno di e don di pas.

Tristemente, nos tur a sinti e doló di muchanan lantá pa mayornan inspirá—tin bia un mayor so—ta skohe, despues di henter un bida di fe i pas, pa tuma e kaminda di aflikshon.

Hasta ora tristesa pasa, mi optimismo ta sosegá den un otro don di Señor. Ta esaki: ku El a lanta hopi pasifikadónan entre Su disípulonan di konfiansa. Nan a sinti e pas i e amor di Dios. Nan tin e Spiritu Santu den nan kurason, i Señor por guianan pa saka man na e karnénan ku a dualu.

Mi a mira esei durante mi bida i rònt mundu. Boso tambe a mira. Tin biaha, ora bo ta hibá pa reskatá, e por parse kasualidat.

Un biaha, mi a simplemente puntra un persona ku mi a konosé riba un biahe, “Lo bo ke konta mi algu di bo famia?” E kombersashon a hiba mi na puntra pa wak un potrèt di su yu muhé adulto, ku el a bisa tabata luchando. Mi a keda sorpá ku e bondat den kara di e mucha muhé riba e potrèt. Mi a sinti impreshon pa puntra si mi por a haña su email adres. E yu muhé tabata pèrdí e momentu ei, i puntrando su mes si Dios tabatin kualke mensahe p‘e. E tabatin. E tabata esaki: “Señor ta stima bo. Semper El a hasié. Señor ke pa bo bin bèk. Bo bendishonnan primintí ainda ta na nan lugá.”

Miembronan den henter Iglesia a sinti Señor Su don di pas personal. E ta enkurashando tur hende pa yuda otronan haña oportunidatnan pa bin na djE i kalifiká pa e mesun pas nan mes. Nan, na nan turno, lo skohe pa buska inspirashon pa sa kon nan por pasa e don aki pa otronan.

E generashon ku ta lantando lo bira kuidadónan di e generashon ku ta sigui. E efekto multiplikadó lo produsí un milager. E lo plama i krese ku tempu, i Señor Su reino riba tera lo ta preparái kla pa salud‘E ku gritunan di hosanna. Lo tin pas na tera.

Mi ta tèstifiká ku siguridat ku E Salbador ta bibu i ku E ta guia e Iglesia aki. Mi a sinti Su amor den mi bida i Su amor i prekupashon pa yunan di Tata Selestial. E invitashon di e Salbador pa bin na DjE ta un ofresementu di pas.

Presidente Russell M. Nelson ta e profeta bibiente di Dios riba henter mundu. El a bisa: “Mi ta sigurá boso ku sin importá kondishon di e mundu i boso sirkunstansia personal, boso por enfrentá e futuro ku optimismo i goso.⁶

Mi ta ekspresá mi amor na boso. Boso fe i amor grandi ta alkansando hende i ta permití Señor pa kambia nan kurason i asina gana e deseo pa ofresé otronan e don di pas ku ta pasa tur entendimentu.

Mi ta pidi den orashon ku boso por haña pas, yuda hopi otronan pa hañ’é, i sigui pas’é pa otronan. Lo bai tin un mil aña maravioso di pas ora Señor regresá. Asina mi ta tèstifiká den goso den nòmber di JesuCristo, amèn.