Na ki Momentu Risibí Bo Bendishon Patriarkal

Ayera mi kerido amigu Elder Randall K. Bennett a papia tokante bendishonnan patriarkal. E tabata un gran mensahe i a inspirá nos tur. Mi kerido rumannan, pèrmití mi papia tokante bendishonnan patriarkal mi tambe? Patriarkanan, segun e petishonnan pa bendishonnan patriarkal ta oumentá, mi ta hasi orashon pa Señor por bendishoná boso segun boso ta kontinuá pa magnifiká boso yamamentu.

Ora ku mi bai konferensianan di estaka, semper mi ta bishita e patriarkanan di estaka i nan kasa. Patriarkanan ta kariñoso, obediente, i lidernan inkreibel yama pa Dios. Nan ta konta mi hopi eksperensia spiritual maravioso. Mi ta puntra nan e edat di e persona di mas yòn i di mas grandi ku nan a yega di duna un bendishon. Te asina leu, esun di mas yòn tabatin 11 i e mas grandi tabatin 93.

Mi a risibí mi bendishon patriarkal komo un miembro nobo di e Iglesia, na edat di 19 aña, dos aña despues ku mi a boutisá. Mi patriarka tabata inkreiblemente bieu. El a uni na Iglesia den 1916 i tabata un pionero di Iglesia na Hapon. E tabata un gran honor pa mi pa risibí mi bendishon patriarkal for di e disípulo remarkabel di Señor aki. Su Hapones tabata un poko difísil pa mi komprondé, pero e tabata poderoso.

E patriarkanan ku mi a konosé a konta mi ku hopi individuonan ta risibí nan bendishon patriarkal djis promé ku nan sirbi un mishon. Mi kerido hóbennan, mayornan, i obispunan, bendishonnan patriarkal no ta solamente pa preparashon pa sirbi mishon. Miembronan digno ku a boutisá por risibí nan bendishon patriarkal ora ku ta e momentu adekuá pa nan.¹

Kerido miembronan adulto, algun di boso no a risibí boso bendishon patriarkal ainda. Kòrda, no tin un edat máksimo.

Mi suegra tabata un miembro di Iglesia hopi aktivo, sirbiendo komo un maestra di Sosiedat di Sokoro te na momentu ku el a fayesé na edat di 91 aña. Mi a haña tristu pa sa ku e no a risibí su bendishon patriarkal. El a eksperensiá hopi difikultatnan den su bida, i paso e no tabata tin un poseedor di saserdosio den su hogar, e no a risibí hopi bendishon di e saserdosio. Un bendishon patriarkal lo por a dun’é konsuelo ora ku e tabatin mas mester di dje.

Adultonan, si boso no a risibí un bendishon patriarkal ainda, por fabor no preokupá! Kada ken su liña di tempu spiritual ta diferente. Si bo tin 35 òf 85 i bo tin e deseo, papia ku bo obispu tokante risibí bo bendishon.

Miembronan nobo di Iglesia, bo a tende di bendishon patriarkal? Mi no tabata sa di e oportunidat pa risibí unu ora ku mi a uni na Iglesia, pero mi kerido obispu a konta mi tokante bendishonnan patriarkal i a enkurashá mi pa prepará pa risibí di mi despues ku mi a boutisá. Mi kerido miembronan nobo, bo tambe por risibí un bendishon patriarkal. Señor lo yuda bo prepará pa e oportunidat sagrado aki.

Laga nos konsiderá dos propósito di un bendishon patriarkal.

1. Un bendishon patriarkal ta kontené konsehonan personal di Señor na bo.²

2. Un bendishon patriarkal ta deklará bo linahe den e kas di Israel.

Bo bendishon patriarkal ta un mensahe di bo Tata Selestial i probablemente ta inkluí promesanan i konsehonan inspirá pa guia bo durante bo bida. Un bendishon patriarkal lo no indiká e ruta di bo bida òf kontesta tur bo preguntanan. Si e no ta menshoná un evento importante di bida, no intérprete komo algu ku lo bo no tin oportunidat. Meskos, no tin garantia ku tur kos den bo bendishon lo sosedé den e bida aki. Un bendishon patriarkal ta eterno, i si bo biba digno, promesanan ku no wòrdu kumpli den e bida aki lo wòrdu kumpli den e siguiente.³

Ora ku bo risibí un deklarashon di bo linahe, lo bo haña sa ku bo ta di e kas di Israel i di e simia di Abraham.⁴ Pa komprondé e nifikashon di esaki, enfoká riba e promesanan ku Señor a hasi ku e kas di Israel pa medio di Abraham.

E promesanan aki ta inkluí:

• “Su posteridat lo ta numeroso (wak Génesis 17:5–6; Abraham 2:9; 3:14).

• “Su simia, òf desendientenan, lo risibí e evangelio i poseé e saserdosio (wak Abraham 2:9).

• “Pa medio di e ministerio di su simia, ‘tur e famianan di e tera [lo] wòrdu bendishoná, asta ku e bendishonnan di e Evangelio, kual ta e bendishonnan di salbashon, asta di bida eterno’ (Abraham 2:11).”⁵

Komo miembronan di Iglesia, nos ta yunan di kombenio.⁶ Nos ta risibí e bendishonnan di e kombenio Abrahamiko ora ku nos obedesé e leinan i ordenansanan di e evangelio.

Preparashon pa bo bendishon patriarkal lo yuda bo oumentá bo fe den Tata Selestial i JesuCristo. I ora ku bo risibí bo bendishon patriarkal i les’é i meditá riba e, bo por enfoká riba Nan mas tantu.

Presidente Thomas S. Monson a splika, “E mesun Señor ku a sòru pa un kompas pa Lehi ta sòru awendia pa un regalo eksepshonal i balioso pa duna direkshon na nos bida, pa señalá e peligernan pa nos seguridat, i pa marka e kaminda, asta un ruta sigur—no na un tera primintí, pero na nos kas Selestial.”⁷

Mi kerido obispunan, mayornan, presidentenan di quorum di eldernan i presidentenan di Sosiedat di Sokoro, lidernan mishonal di bario, rumannan ministrante, por fabor enkurashá e hóbennan, miembronan adulto, i miembronan nobo ku no a risibí nan bendishon patriarkal ainda pa buska Señor Su direkshon i yudansa pa prepará nan mes pa hasi esaki.

Mi ta lesa mi bendishon patriarkal ku frekuensia den orashon; semper e ta enkurashá mi. Mi ta rekonosé loke Señor ta spera di mi, i el a yuda mi pa arepentí i ta humilde. Ora ku mi lesa i meditá riba dje, ni ta deseá pa biba digno di risibí su bendishonnan primintí.

Meskos ku e skrituranan ku nos a lesa hopi biaha tin nifikashonnan nobo pa nos despues, nos bendishon patriarkal lo tin diferente nifikashon pa nos na diferente tempu. Di mi tin nifikashon diferente awor ku dia Mi tabata tin 30 i ora mi tabatin 50 [aña\. No ta e palabranan ta kambia, pero nos ta mira nan na un manera diferente.

Presidente Dallin H. Oaks a deklará ku un bendishon patriarkal “ta wòrdu duna bou di inspirashon di e Spiritu Santu i mester wòrdu lesa i interpretá bou di influensia di e mesun Spiritu ei. E nifikashon i importansia di un bendishon patriarkal lo wòrdu siña liña pa liña segun tempu pa e poder di e mesun Spiritu ku a inspirá [e].”⁸

Rumannan, mi ta duna mi testimonio ku Tata Selestial i Su Yu Stimá i Unigénito, Señor JesuCristo, ta bibu. Nan ta stima nos. Bendishonnan patriarkal ta donnan sagrado di Nan. Ora ku bo risibí bo bendishon, lo bo realisá i sinti kon nan ta stima bo i kon Nan ta enfoká riba bo individualmente.

E Buki di Mormon ta un otro testament di JesuCristo. I Mi ta agradesido di wòrdu guia pa un profeta bibu, Presidente Russell M. Nelson.

Mi ta asina agradesí pa nos Salbador, JesuCristo. E djadumingu di Pasku di Resurekshon aki lo mi enfoká riba djE i Su Resurekshon i ador’É i yama danki pa Su sakrifisio. Mi sa ku El a sufri asina profundo paso E stima nos asina profundo. Mi sa ku El a resusitá dor di Su amor pa nos. E ta real. Mi ta tèstifiká den nòmber di JesuCristo, amèn.