E Kosecha Imperfekto

Komo mucha, mi a siña pa stima e kambionan dramátiko di e temporadanan di aña na sùit-wèst Montana, kaminda mi a krese. Mi temporada faborito tabata hèrfst—e tempu di kosecha. Nos famia tabata spera i hasi orashon pa nos lunanan di trabou duru wòrdu rekompensá ku un kosecha abundante. Mi mayornan tabata preokupá tokante e wer, e salu di animalnan i kosecha, i hopi otro kosnan mas riba kual nan ta tin tiki kontrol.

Segun mi ta krese, mi a bira mas konsiente di e urgensia enbolbí. Nos mantenshon di bida tabata dependé di e kosecha. Mi tata a siña mi tokante e ekiponan ku nos tabata usa pa kosecha grano. Mi tabata wak miéntras e tabata move e mashineria bai kuné na e fèlt, kòrta un pida chikí di un rei di grano pa despues wak e mashin pa kosecha patras pa sigurá ku mas tantu grano posibel ta bai kai den e tanki di almasenamentu i no wòrdu tira afó ku e bagas. E tabata ripití e ehersisio aki vários biaha, ahustando e mashin kada bes. Mi a kore banda di dje i bati na e bagas kuné i hasi manera mi sa kiko mi tabata hasiendo.

Despues ku e tabata satisfecho ku e ahustenan na e mashin, mi a haña algun pipita di grano den e bagas na suela i a presentá esaki na e ku un mirada kritiko. Mi no ta lubida kiko mi tata a bisa mi: “E ta sufisiente bon i e mihó ku e mashin aki por hasi.” No asina satisfecho ku su splikashon, mi a reflekshoná riba e imperfekshonnan di e kosecha aki.

Poko tempu despues, ora ku e wer bira friu anochi, mi a mira míles di sisne, gansnan i patu nan baha riba e fètnan pa nutri nan mes durante nan biahe largu pa bai sùit. Nan tabata kome e grano nan ku a keda di nos kosecha imperfekto. Dios a perfekshon’é. I ni un pipita a bai pèrdí.

Kada bes e ta un tentashon den nos mundu i inkluso den nos kultura di Iglesia pa opseshoná tokante perfekshon. Media sosial, espektativanan irealístiko, i kada bes nos outo krítika ta krea sintimentunan di no ta sufisiente—ku nos no ta sufisientemente bon i nunka lo ta. Tin asta ta mal komprondé e invitashon di e Salbador pa “pues boso sea perfekto.”¹

Kòrda ku perfekshonismo no ta meskos ku ser perfekto den Cristo.² Perfekshonismo ta rekerí un norma imposibel ku bo mes ta pone ku ta kompará nos ku otronan. Esaki ta kousa kulpa i ansiedat i por laga nos deseá di hala tras i isolá nos mes.

Bira perfekto den Cristo ta un otro kuestion. E ta e proseso—amorosamente guia pa e Spiritu Santu—pa ta mas manera e Salbador. E norma nan ta pone dor di un Tata Selestial bondadoso ku saber di tur kos i klaramente definí den e kombenionan ku nos ta wòrdu invitá pa brasa. E ta aliviá nos di e karga nan di kulpa i insufisiensia, semper enfatisando ken nos ta den e bista di Señor. Ounke e proseso aki ta alsa i pusha nos pa bira mihó, nos ta wòrdu midi pa nos deboshon personal na Dios ku nos ta manifestá den nos esfuerso nan pa sigui E den fe. Segun nos ta aseptá e invitashon di Señor pa bini na E, pronto nos ta realisá ku e mihó di nos ta bon sufisiente i ku e grasia di un Salbador lo hasi e diferensia di manera nan ku nos no por imaginá.

Nos por mira e prinsipio aki den práktika ora ku e Salbador a alimentá e sinku mil nan.

“Ora ku Jesus a hisa su wowo nan, i a mira un gran multitut a bin serka dje, el a bisa Felipe, kaminda nos lo kumpra pan, pa esakinan por kome? …

“Felipe a kontest’é, Dos shen baló di un sèn na pan no ta sufisiente pa nan, pa kada un di nan por kue un tiki.

“Un di su disípulonan, Andres, ruman di Simon Pedro, a bisé.

“Tin un mucha hòmber aki, ku tin sinku pan di puspas i dos piska chikí; pero pa kiko esaki lo yega?”³

Bo a yega di puntra bo mes kon e Salbador lo a sinti tokante e mucha hòmbu yòn aki, ken ku e fe di un mucha a ofresé loke e mester tabata ku lamentablemente lo e no a yega pa e tarea ku tabata tin su dilanti.

“Y Jesus a tuma e pannan; i ora ku el a yama danki, el a partié pa su disípulonan, i e disípulonan na esnan ku tabata sinta; i meskos di e piskánan kuantu ku nan tabata kier.

“Ora ku nan a yena, el a bisa su disípulonan, piki e pida nan ku a keda, pa nada no bai pèrdí.”⁴

E Salbador a perfekshoná e ofrenda humilde aki.

Poko despues di e eksperensia aki, Jesus a manda Su disípulonan bai dilanti riba un barku. Nan a haña nan mes den un laman ku tormenta mei mei di anochi. Nan a spanta ora ku nan a mira un figura fantasma kanando ta bin serka nan riba awa.

“Pero Jesus a papia ku nan direktamente, bisando, Ta di bon ánimo; ta Ami; no tene miedu.

“I Pedro a kontest’é i bisa, Señor, si ta Abo, mi ta roga bo pa laga mi bin serka bo riba e awa.

“I el a bisa, Bin. I ora Pedro a sali for di e boto, el a kana riba awa i pa bai serka Jesus.

“Pero ora el a mira e bientu fuerte, e tabata tin temor, i a kuminsá senk,el a yora, bisando, Señor.

“I inmediatamente Jesus a ekstendé su man, i a gar’é, i a bis’é, O abo di poko fe, dikon bo a duda?”⁵

Rumannan, kisas esei no tabata e final di e kombersashon. Mi ta kere ku miéntras ku Pedro i e Salbador tabata kana bai bek na e barku man den man, Pedro tur muha i kisas sintiendo su mes hopi kèns, E Salbador por a bisa algu manera esaki: “O, Pedro, no tene miedu ni preokupá. Si bo por a mira bo mes manera Ami ta mira bo, bo duda lo a bai i bo fe lo a krese. Mi stima bo, kerido Pedro, bo a sali di e boto. Bo ofrenda ta aseptabel, i ounke bo a duda, lo Mi ta semper ei nan pa alsa bo di profundidatnan, i bo ofrenda lo bira perfekto.

Elder Dieter F. Uchtdorf a siña:

“Mi ta kere ku e Salbador JesuCristo lo ke pa bo mira, sinti, i sa ku E ta bo fortalesa. Ku Su yudansa, no tin límitenan pa loke bo por logra. Ku bo potensial ta sin límite. E lo ke pa bo mira bo mes manera E ta mira bo. I esei ta hopi diferente for di e manera ku e mundu ta mira bo. …

“E ta duna poder na esun ku ta kansá; i na esnan ku ta sinti debil, E ta oumentá forsa.”⁶

Nos mester kòrda ku kiko ku nos mihó ofrenda imperfekto ta, e Salbador por hasié perfekto. No ta importá kon insignifikante nos esfuerso nan por ta, nunka nos no mester balotá e Salbador su poder. Un simpel palabra di bondat, un bishita di maestra bishitante kòrtiku pero sinsero, òf un lès di primaria siña ku amor,por, ku e Salbador su yudansa, brinda konsuelo, suavisa kurasonnan, i kambia bida nan eterno. Nos esfuersonan kèns por hiba nos na milagernan, i den e proseso, nos por partisipá den e kosecha perfekto.

Hopi bes nos ta wòrdu pone den situashonnan ku lo kousa ku nos mester rèk. Nos no ta sinti nos sufisiente pa e tarea. Nos por wak esnan ku nos ta sirbi kuné i sinti ku nunka nos lo bai bon. Rumannan, si bo ta sinti e manera aki, wak e hòmber i muhénan ekstraordinario sinta patras di mi kual mi ta sirbi kuné.

Mi ta sinti bo dolo.

Sinembargo, mi a siña, ku meskos ku perfekshonismo no ta meskos ku ta perfekto den Cristo, outo komparashon no ta meskos ku imitashon. Ora ku nos kompará nos mes ku otronan, por solamente tin dos resultado. Sea nos ta mira nos mes komo mihó ku otronan i yega na husga i bira kritiko riba nan, òf nos lo mira nos mes komo ménos ku otronan i bira angustioso,outo kritiko, i deskurashá. Kompará nos mes ku otronan masha poko ta produktivo, no edifikante, i tin bes frankamente ta deprimí. En realidat, e komparashonnan aki por ta spiritualmente destruktivo,strobando nos di risibí e yudansa spiritual ku nos mester. Di otro banda, imitá esnan ku nos ta respetá ku ta demostrá atributonan manera Cristo por ta instruktivo, edifikante i por yuda nos bira mihó disípulonan di JesuCristo.

E Salbador a duna nos un modèl pa sigui ora El a imitá su Tata. El a instruí Su disípulo Felipe: “Asina tantu tempu Mi ta ku boso, i bo no ta rekonosé mi Felipe? Esun ku a mira mi, a mira e Tata; i kon bo ta bisa e ora ei, Mustra nos e Tata?”⁷

Y despues El a siña, “di Bèrdat, di bèrdat, Mi ta bisa boso, Esun ku kere den mi, e obra nan ku Mi ta hasi, e tambe lo hasi nan.”⁸

No opstante kon signifikante nos esfuerso nan por mustra, si nos ta sinsero, e Salbador lo usa nos pa logra Su trabou. Si simplemente nos hasi mas mihó posibel ku nos por i konfia E pa hasi e diferensia, nos por bira parti di su milagernan ku ta rondó di nos.

Elder Dale G. Renlund a bisa, “Bo no mester ta perfekto,, pero nos mester di bo, pasó tur ku ta dispuesto por hasi algu.⁹

I Presidente Russell M. Nelson a siña nos, “Señor ta stima esfuersonan.”¹⁰

E Salbador ta para kla pa aseptá nos humilde ofrenda i perfekshoná nan pa medio di Su grasia. Ku Cristo, no tin kosecha imperfekto. Nos mester tin e kurashi pa kere ku Su grasia ta pa nos—ku El lo yuda nos, reskatá nos for di e profundidatnan ora ku nos basila, i perfekshoná nos esfuerso nan imperfekto.

Den e parabol di e sembradó, e Salbador ta deskribí e simianan ku ta planta den bon tera. Tin ta produsi mas di shen, algun sesenta, i otronan trinta. Tur ta parti di Su kosecha perfekto.¹¹

E profeta moroni a invitá tur, “Si, bini na Cristo, i sea perfekto den E, … i si boso nenga boso mes di tur ireverensia i stima Dios ku hinter boso alma, mente i forsa, e ora ei su grasia ta sufisiente pa boso, ku pa medio di Su grasia boso por ta perfekto den Cristo.”¹²

Rumannan, mi ta testifiká di JesuCristo, ku tin e poder pa hasi perfekto asta e ofrenda di mas humilde. Laga nos hasi lo mihó ku nos por, trese loke nos por, i ku fe, pone nos ofrenda imperfekto na Su pia. Den e nòmber djE kende ta e Maestro di e kosecha perfekto, hasta, JesuCristo, amèn.