Mi a Wòrdu Pordoná di Bèrdat?

Algun aña pasá, hermana Natress i ami a muda pa Idaho, kaminda nos a habri un negoshi nobo. Tabatin dianan i nochinan largu na ofisina. Afortunadamente, nos tabata biba djis un par di kuadra for di trabou. Tur siman, Shawna i nos tres yunan muhé—tur bou di e edat di seis— ta bin na ofisina pa kompartí almuerso huntu.

Un di e dianan ei despues di nos almuerso di famia, mi a ripará ku nos yu muhé di sinku aña, Michelle, a laga un mensahe personal pa mi, skirbí riba un “Post it” i pegá na mi telefòn di ofisina.

E tabata bisa simplemente, “Tata, kòrda pa stima mi. Ku amor, Michelle.” Esaki tabata un rekordatorio poderoso na un tata tokante e kosnan ku ta mas importante.

Rumannan, mi ta testifika ku nos Tata Selestial semper ta kòrda riba nos i ku E ta stima nos perfektamente. Mi pregunta ta: Nos ta kòrda riba djE? I nos ta Stim’E?

Hopi aña pasá, mi a sirbi komo un lider lokal di Iglesia. Un di nos hombres jovenes, Danny, tabata sobresalí den tur manera. E tabata obediente, amabel, bon, i tabatin un gran kurason. Sinembargo, ora ku el a gradua na skol avansá, el a kuminsá asosiá ku un grupo problemátiko. El a hañ’é embolbí ku droga, spesífikamente metamfetamina, i a kai den e bahada di adikshon i destrukshon. Den poko tempu, su aparensia a kambia kompletamente. Apénas por a rekonosé. E kambio di mas signifikativo tabata den su wowo—e lus den su wowo a baha. Diferente biaha mi a aserk’é, pero sin resultado. E no tabata interesá.

E tabata difísil pa wak e hóben inkreibel aki sufri i biba un bida ku no tabata e! E tabata kapas di muchu mas.

Riba un dia, su milager a kuminsá.

El a bin reunion sakramental kaminda su ruman hòmber chikí a kompartí su testimonio promé ku e bai ku un mishon. Durante e reunion, Danny a sinti algu ku e no a sinti pa hopi tempu. El a sinti e amor di Señor. Finalmente e tabata tin speransa.

Maske e tabata tin un deseo pa kambia, e tabata difísil pa Danny. Su adikshonnan i e kulpa ku a bin aserka tabata kasi mas di loke e por a soportá.

Un atardi partikular, ora ku mi tabata kòrta nos yerbanan, Danny a yega den su outo inesperá. E tabata luchando teribelmente. Mi a paga e mashin di kòrta yerba, i nos a sinta huntu den sombra di e balkon dilanti. Tabata e ora ei ku el a kompartí e sintimentunan di su kurason. Di bèrdat e kier a bin bèk. Sinembargo alehá for di su adikshonnan i su estilo di bida tabata ekstremadamente difísil. Banda di esaki, e tabata sinti asina kulpabel, asina bergonsá di a kai asina abou. El a puntra, “Mi por wòrdu pordoná di bèrdat? Di bèrdat tin un kaminda pa regresá?

Despues ku el a habri su kurason ku e preokupashonnan aki, nos a lesa Alma kapitulo 36 huntu:

“Si, Mi a kòrda ku riba tur mi pikánan i maldatnan …

“Si, … e solo pensamentu di bini den presensia di Mi Dios a tormenta mi alma ku un horor inekspresabel” (versíkulonan 13–14).

Despues di e versíkulonan aki, Danny a bisa, “Esaki ta eksaktamente kon mi ta sinti!”

Nos a kontinuá:

“Miéntras mi tabata den angustia pa rekuerdo di mi hopi pikánan, mi a kòrda tambe di a skucha mi tata profetisá na e hendenan tokante di e binida di un tal JesuCristo, un Yu di Dios, pa ekspiá pa e pikánan di e mundu. …

“I, ki goso, I ki lus maravioso mi a mira” (versíkulonan 17, 20).

Segun nos tabata lesa e pasashinan, lágrima a kuminsá kore. Alma su goso tabata e goso ku el atabata buska!

Nos a diskutí ku Alma tabata eksepshonalmente malu. Sinembargo, unabes ku el a arepentí, e no a wak patras nunka mas. El a bira un disípulo devoto di JesuCristo. El a bira un profeta! Danny su wowo nan a bira grandi. “Un profeta?” El a bisa.

Mi a respond’é simplemente,“Si, un profeta. Sin pone preshon riba abo!”

Nos a diskutí ku ounke su pikánan no a yega na e nivel di Alma, e mesun promesanan di pordon kompletu i perfekto ta wòrdu hasi na tur hende—den i pa medio di e Ekspiashon infinito di JesuCristo.

Danny a komprondé awor. E tabata sa kiko e mester a hasi: e mester a kuminsá su biahe dor di konfia den Señor i pordoná su mes!

Danny su poderoso kambio di kurason no tabata nada mas ku un milager. Ku tempu, su apariensia a kambia, i e klaridat den su wowonan a regresá. El a bira digno pa tèmpel! Porfin el a bin bek.

Despues di algun luna, mi a puntra Danny si e lo kier yena un aplikashon pa sirbi un mishon di tempu kompletu. Su reakshon tabata unu di shòk i asombro.

El a bisa, “Lo mi tin gana di sirbi un mishon, pero bo sa unda mi a yega di ta i e kosnan ku mi a hasi! Mi a pensa ku mi ta deskualifiká.”

Mi a respondé, “Bo por tin rason. Sinembargo, no tin nada ku ta impedí nos pa hasi un petishon. Si bo ta despensá, alo menos lo bo sa ku bo a ekspresá un deseo sinsero pa sirbi Señor.” Su wowonan a iluminá. E tabata entusiasmá ku e idea aki. Pa e esaki tabata un intento grandi, pero tabata un chèns ku e tabata dispuesto pa tuma.

Algun siman despues, i pa su asombro, un otro milager a sosodé. Danny a risibí un yamada pa sirbi un mishon di tempu kompletu.

Un par di luna despues ku Danny a yega na e kampo di mishon, mi a risibí un yamada di telefòn. Su presidente a simplemente bisa, “Kiko ta e kos ku e mucha hòmber yòn aki?” E ta e misionero di mas inkreibel ku hamas mi a yega di mira! Bo ta mira, e presidente aki a risibí un Alma yu moderno.

Dos aña despues, Danny a regresá kas ku honor, despues di a sirbi Señor ku tur su kurason, alma, mente, i forsa.

Despues di su informe di misionero den reunion sakramental, mi a regresá kas, djis pa tende un batimentu na e porta dilanti. Danny tabata pará ei ku lágrima den su wowonan. El a bisa, “Nos por papia pa un minüt?” Nos a bai pafó na e mesun stupi di balkon.

El a bisa, “Presidente, bo ta kere ku mi a wòrdu pordoná di bèrdat?”

Awor mi lagrimanan tabata kompaña esnan di dje. Dilanti mi tabata tin un disípulo devoto di JesuCristo ku a duna tur di su mes pa siña i testifiká tokante di e Salbador. E tabata e personifikashon di e sanashon i poder ku ta fortalesé di e Salbador Su Ekspiashon.

Mi a bisa, “Danny! Bo a wak den spil? Bo a wak bo wowonan? Nan ta yená ku lus, i bo ta bria ku e Spiritu di Señor. Naturalmente bo a wòrdu pordoná. Bo ta asombroso! Awor loke bo mester ta sigui pa dilanti ku bo bida. No wak patras! Wak pa dilanti ku fe na e siguiente ordenansa.”

Danny su milager ta sigui awendia. El a kasa den tèmpel i a regresá bèk na skol, kaminda el a risibí su diploma di nivel master. El a sigui sirbi Señor ku honor i dignidat den su yamamentunan. Mas importante, el a bira un kasá inkreibel i un tata fiel. E ta un disípulo fiel di JesuCristo.

Presidente Russell M. Nelson a siña, “Sin e [Salbador] Su Ekspiashon infinito henter e humanidat lo ta iremediabelmente pèrdí ”¹ Danny no tabata pèrdí, i nos tampoko no ta pa Señor. E ta para na porta pa halsa nos, pa fortalesé nos, i pa pordoná nos. Semper E ta kòrda pa stima nos!

Un demostrashon inkreibel di Señor Su amor pa e yunan di Dios ta registrá den e buki di Mormon: “Ora ku Jesus a bisa esaki, el a bolbe wak rondó na e multitut, i a mira ku nan tabata yorando, i nan a wak’e firmemente komo si fuera nan tabata pidiendo e pa e keda ku nan un poko mas” (3 Nefi 17:5).

E Salbador a pasa un dia kompletu kaba ministrando na e hendenan. Ainda E ta tin mas pa hasi—E tabata bai bishitá Su otro karnénan; E mester a bai serka Su Tata.

Apesar di e obligashonnan aki, El a diserní ku hende ta deseá pa E keda un tiki mas largu. E ora ei, ku e Salbador Su kurason yená di kompashon, un di e milagernan di mas grandi den historia di mundu a sosodé:

El a keda.

El a bendishoná nan.

El a ministrá na nan muchanan un pa un.

El a hasi orashon pa nan; El a yora ku nan.

I el a sana nan. (Wak 3 Nefi 17.)

Su promesa ta eterno; E lo sana nos.

Na esnan ku a dualdu for di e kaminda di kombenio, por fabor sa ku semper tin speransa, semper tin sanashon, i semper tin un kaminda pa regresá.

Su mensahe eterno di speransa ta e bálsamo sanador pa tur esnan ku ta biba den un mundu turbulento. E Salbador a bisa, “Ami ta e kaminda, e bèrdat, i e bida.”(Juan 14:6).

Rumannan, laga nos kòrda pa busk’E, pa stim’E, i semper rekord’E.

Mi ta testifiká ku Dios ta bibu i ku E ta stima nos. Mi ta testifiká tambe ku JesuCristo ta e Salbador i Redentor di mundu. E ta e sanador poderoso. Mi sa ku mi Redentor ta bibu! Den e nòmber di JesuCristo, amèn.