Ekilibrio Cristian
“I ora ku El a lanta, El a reprendé e bientu i a bisa e laman: Silensio, keda ketu. I e bientu a kai i a bira kompletamente kalmo.”(Marko 4:39).
E delaster biaha ku mi a papia den konferensia general, mi yerno Ryan a mustra mi un tweet ku a bisa, “Serio? E gai su nòmber ta Bragg”—ke men “broma”—“i e no ta papia tokante humildat? Esta un desperdisio!” Tristemente, e desepshon ta sigui.
Mi tata maravioso tabata un hungadó di basket All-America pa UCLA bou di e entrenadó legendario John Wooden. Nan a keda serka di otro durante bida di mi tata, i tin biaha Entrenadó i kasá. Wooden tabata bin nos kas pa kome. E tabata semper felis pa papia ku mi tokante basketbòl òf kualke otro kos na mi mente. Un biaha mi a puntr’é kua konseho e tabatin pa mi komo ku mi ta drentando mi delaster aña di skol sekundario. Semper e maestro el a bisa, “Bo tata a bisa mi ku bo a uni na e Iglesia di JesuCristo, asina ku mi sa ku bo tin fe den Señor. Ku e fe ei ta sòru pa bo tin ekilibrio den tur situashon. Sea un bon hòmber den tormenta.”
Durante añanan, e kombersashon aki a keda pegá den mi mente. E konseho pa ta trankil, i ku kòntròl den tur situashon, partikularmente den tempu di atversidat i preshon, a resoná ku mi. Mi por a komprondé kon e ekiponan di Entrenadó Wooden tabata hunga ku ekilibrio i e éksito grandi ku nan a eksperensiá ganando 10 kampionato nashonal.
Pero tokante ekilibrio no ta papia masha e dianan aki i ta praktik’é ménos ainda den tempunan turbulento i di divishon. E ta wòrdu referí hopi biaha den deportenan—un hungadó ku ekilibrio tin kontròl propio den un wega kompetitivo, òf un tim ta kai den otro pa falta di ekilibrio. Pero e kualidat maravioso aki ta bai muchu mas leu ku deporte so. Ekilibrio tin aplikashon mas amplio den bida i por bendishoná mayornan, lidernan, mishoneronan, maestronan, studiantenan, i tur otro ku ta enfrentá difikultatnan di bida.
Ekilibrio spirtual ta bendishoná nos pa keda kalmu i enfoká riba loke ta mas importante, spesialmente ora nos ta bou di preshon. Presidente Hugh B. Brown a siña, “Fe den Dios i den triunfo supremo di e bon ta kontribuí na ekilibrio mental i spiritual den difikultatnan.”1
Presidente Russell M. Nelson ta un ehèmpel maravioso di ekilibrio spiritual. Un biaha, komo e tempu ei-Dr. Nelson tabata realisá un bypass kuadruple di e ader di kurason, e preshon arterial dje pashènt a baha diripiente. Dr. Nelson ku trankilidat a huzga e situashon i a identifiká ku un klèm aksidentalmente a wòrdu kitá pa un di e miembronan di e tim. El a keda reemplasá inmediatamente, i Dr. Nelson a konsolá e miembro di e tim, bisando, “Ainda mi ta stima bo,” i den chansa a agregá, “Tin biaha mi ta stima bo mas ku otro biahanan!” El a demostrá kon mester atendé un emergensia—ku konfiansa, ku enfoke solamente riba lokual ta mas importante—atendé e emergensia. Presidente Nelson a bisa: “Ta asuntu di outo-disiplina ekstremo. Bo reakshon natural ta, ‘Saka mi afó, entrenadó! Mi ke bai kas.‘ Pero klaro bo no por bai. Un bida ta dependé kompletamente di henter e ekipo di siruhano. Pues bo tin ku keda mes kalmu i relahá i ta skèrpi manera nunka promé.”2
Klaro, e Salbador ta e ehèmpel supremo di ekilibrio.
Den e hardin di Getsémani, den agonia inimaginabel, ora “el a soda manera ku tabata gotanan grandi di sanger,”3 E tabata ehèmpel di ekilibrio dibino ku e deklarashon simpel i tòg mahestuoso, “No mi boluntat, pero di abo, sea hasí.”4 Bou di e preshon inmenso pa realisá e salbashon di henter humanidat, Jesus a demostrá tres kondishon importante ku ta yuda nos komprondé Su gran ekilibrio. Promé, E tabata sa ken E tabata i tabata fiel na Su mishon dibino. Siguiente, E tabata sa ku tabatin un gran plan di felisidat. I finalmente, E tabata sa ku pa medio di Su Ekspiashon infinito, tur ku fielmente ta traha huntu ku n‘E dor di warda kombenionan sagrado risibí pa medio di ordenansanan di saserdosio lo ta salbá, manera siñá asina bunita awe pa Elder Dale G. Renlund.
Pa kompará e diferensia entre pèrdè i mantené ekilibrio, pensa tokante kiko a sosodé ora Cristo i Su Apòstelnan a bai for di e Hardin di Getsémani. Ora el a wòrdu konfrontá dor di e soldánan ku tabata buska pa arestá Jesus, Pedro su reakshon tabata pa pèrdè su ekilibrio i ataká violentamente dor di kòrta e orea di Malko, e sirbiente di e sumo saserdote. JesuCristo Su reakshon, al kontrario, tabata pa mantené Su ekilibrio i trese trankilidat den un situashon tenso dor di sana Malko.5
I pa esnan di nos ku ta lucha pa mantené nos ekilibrio spiritual i kisas a pèrdè kurashi, konsiderá e sobrá di Pedro su historia. Poko tempu despues di e insidente aki i e aflikshon di a nenga su asosiashon ku Cristo, 6 Pedro tabata pará dilanti di e mesun lidernan religioso ku a kondená e Salbador, i ku gran ekilibrio bou di e kuestionamentu intenso el a duna testimonio elokuente di e dibinidat di JesuCristo.7
Sa Ken Bo ta i Sea Fiel na Bo Identidat Dibino
Laga nos konsiderá elementonan di ekilibrio Cristian. Pa kuminsá, sa ken nos ta i ta fiel na nos identidat dibino ta trese trankilidat. Ekilibrio Cristian ta rekerí pa nos evitá di kompará nos mes ku otronan òf pretendé di ta un persona ku nos no ta.8 José Smith a siña, “Si los hombres no comprenden la naturaleza de Dios, no se comprenden a sí mismos.”9 No ta posibel di tin ekilibrio dibino sin sa ku nos ta yunan hòmber i yunan muhé dibino di un Tata Selestial amoroso.
Den su diskurso “Eskohonan pa Eternidat,” Presidente Nelson a siña e bèrdatnan eterno aki tokante ken nos ta: nos ta yunan di Dios, nos ta yunan di e kombenio, i nos ta disípulonan di Cristo. Despues el a primintí, “Ora boso brasa e bèrdatnan aki, nos Tata Selestial lo yuda bo alkansá bo meta final di biba eternamente den Su presensia santu.”10 Enbèrdat nos ta sernan spiritual dibino ku ta haña un eksperensia mortal. Sa ken nos ta i ta fiel na e identidat dibino aki ta fundamental pa e desaroyamentu di ekilibrio Cristian.
Sa Ku Tin un Plan Dibino
Siguiente, kòrda ku tin un plan grandioso ta engendrá kurashi i ekilibrio den kondishonnan desafiante. Nefi por a “bai i hasi”11 manera Señor a manda “sin sa adelantá”12 e kosnan ku e mester a hasi pasó e tabata sa ku e lo wòrdu guiá pa e Spiritu, den kumplimentu di e plan eterno di un Tata Selestial amoroso. Ekilibrio ta bin ora nos mira kosnan for di un perspektiva eterno. Señor a konsehá Su disípulonan pa “hisa kara wak”13 i pa “ y reposen en vuestra mente las solemnidades de la eternidad.“14 Pensando durante tempunan difísil ku un perspektiva eterno, preshon ta bira un privilegio pa stima, sirbi, siña , i bendishoná. Un bista eterno ta hasi ekilibrio Cristian posibel.
Konosé e Poder Kapasitadó di JesuCristo i Su Ekspiashon.
I finalmente, e poder kapasitadó di Cristo, hasí posibel pa Su sakrifisio ekspiatorio, ta duna nos forsa pa perseverá i prevalesé. Pa motibu di JesuCristo nos por hasi kombenio ku Dios i haña forsa den warda e kombenio ei. Nos por ta mará na e Salbador den goso i trankilidat, apesar di nos sirkunstansianan temporal.15 Alma kapítulo 7 ta siña na manera bunita tokante Cristu Su poder kapasitadó. Ademas di redimí nos for di piká, e Salbador por fortalesé nos debilidatnan, temornan, i desafionan den e bida aki.
Ora nos ta enfoká riba Cristo, nos por kalma nos temornan, meskos ku Alma a hasi den Helam.16 Miéntras e ehérsitonan menasante tabata reuní, e disípulonan fiel di Cristo a demostrá ekilibrio. Elder David A. Bednar a siña: “Alma a a konsehá e kreyentenan pa kòrda riba Señor i e libertat ku E so por duna (wak 2 Nefi 2:8). I konosementu di e Salbador Su kuido protektor ta permití e hendenan pa kalma nan propio temornan.”17 Esaki ta hasi ekilibrio simpel.
E Gran Hòmber den e Tormenta
Noa a siña nos hopi tokante pasenshi den un tormenta, pero e Salbador tabata e maestro mas grandi di kon pa sobreviví un tormenta. E ta e gran hòmber den un tormenta. Despues di un dia largu di enseñansa ku Su Apòstelnan, e Salbador tabatin mester di poko sosiegu i a sugerí pa nan krusa ku boto pa e otro banda di e Laman di Galilea. Miéntras e Salbador tabata sosegá, un tormenta fuerte a lanta. Ora e bientu i olanan a menasá pa senk e boto, e Apòstelnan a kuminsá sinti temor pa nan bida. I kòrda, diferente di e Apòstelnan ei tabata piskadónan ku tabata hopi konosí ku tormentanan riba e laman ei! Tòg, prekupá,18 nan a spièrta Señor i a puntra, “[Señor], no ta importá bo ku nos ta bai muri?” E ora ei, ku ekilibrio spirtual simpel, e Salbador a “spièrta, i a papia severamente ku e bientu,, i a ordená e laman, Pas, kalma bo. I e bientu a kai, i tabatin … gran trankilidat.”19
I despues un gran lès den ekilibrio pa Su Apòstelan. El a puntra, “Pakiko boso tin tantu miedu asina? ainda boso no tin fe?”20 E tabata kòrda nan ku E ta e Salbador di e mundu, i ku E a wòrdu mandá pa e Tata pa trese e inmortalidat i bida eterno di Dios Su yunan. Sigur e Yu di Dios lo no muri riba un boto. El a hasi ekilibrio dibino simpel pasó E tabata sa di Su dibinidat i E tabata sa ku tabatin un plan di salbashon i eksaltashon i kon esensial Su Ekspiashon lo ta pa e éksito eterno di e plan aki.
Ta pa medio di Cristo i Su Ekspiashon ku tur kos bon ta bin den nos bida. Ora nos kòrda ken nos ta, sabiendo ku tin un plan dibino di misèrikordia i kurashi ku ta atraé den fortalesa di Señor, nos por hasi tur kos. Nos lo haña trankilidat. Nos lo ta bon muhénan i bon hòmbernan den kualke tormenta.
Ku nos por buska e bendishon di ekilibrio Cristian, no solamente pa yuda nos mes den tempunan desafiante pero pa bendishoná otronan i yuda nan durante e tormentanan den nan bida. Riba e anochi promé ku djadumingu di Rama, mi ta tèstifiká ku goso di JesuCristo. E ta resusitá. Mi ta tèstifiká di e pas, trankilidat, i ekilibrio selestial ku solamente E ta trese den nos bida i ta hasi asina den Su nòmber Santu, JesuCristo, amèn.