Bo Bendishon Patriarkal—Direkshon Inspirá di Tata Selestial

Mi a wòrdu lantá pa mayornan maravioso ku a stima mi i ku fe e siña nos, nan yunan e evangelio. Tristemente, mi mayornan stimá tabata tin konflikto den nan matrimonio pa añanan largu. Mi tabata un mucha di Primaria ora mi a haña sa ku probabèlmente nan lo divorsiá algun dia i mi rumannan i ami lo mester di skohe ku kua mayor tin ku bai biba. Komo resultado, pa hopi tempu mi a eksperensiá ansiedat signifikativo; sinembargo, un regalo di mi Tata Selestial finalmente a yuda kambia tur kos pa mi—mi bendishon patriarkal.

Na e edat di 11, kada bes mas preokupá pa e relashon di mi mayornan, mi tabata deseá mi bendishon patriarkal profundamente . Mi tabata sa ku mi Tata Selestia tabata konosé mi perfektamente i tabta konosé mi sirkunstansianan spesífiko. I tambe mi tabata sa ku lo mi risibí direkshon di djE. Inmediatamente despues di mi diesdos hasimentu di aña, mi a risibí mi bendishon patriarkal. Esei tabata mas ku mitar siglo pasá, pero mi ta kòrda intensamente e detayenan di e eksperiensia sagrado ei.

Afortunadamente, nos tin direkshon inspirá tokante bendishonnan patriarkal den e Manual General di Iglesia:

“Tur miembro digno, i ku a wòrdu boutisá tin derechi di haña un bendishon patriarkal, kual ta proveé direkshon inspirá di nos Tata Selestial.”

E miembro mester ta “sufisiente madurá pa komprondé e nifikashon i naturalesa sagrado di e bendishon” i “komprondé doktrina basiko di e evangelio.”

“Ideal ta ku e miembro mester ta hóben sufisiente ku hopi desishonnan importante den bida ku tin ku tuma lugá ahinda. … E lidernan di Saserdosio no mester establesé un edat minimo pa un miembro haña su bendishon patriarkal. …

“Kada bendishon patriarkal ta sagrado, konfidensial, i personal. …

“Un persona ku risibí un bendishon patriarkal mester atesorá su palabranan, reflekshoná riba nan, i biba pa ta digno di risibí e bendishonnan primintí den e bida aki i den eternidat.”¹

Nos kerido Presidente Russell M. Nelson hopi biaha a siña e importansia di e bendishon patriarkal,² ku ta duna esun ku risibie ”un deklarashon di linahe bèk na Abraham, Isaac, i Jakob”³ i ku “ta un eskritura personal pa abo.”⁴

Mi bendishon patriarkal tabata kritikamente importante pami ora mi tabata hobèn pa hopi motibunan. Promé, dor di e poder di e Spiritu Santu, mi bendishon patriarkal lo yudami komprondé mi berdadero identidat eterno—ken mi tabata realmente i ken lo mi por bira. E a yuda mi haña sá, manera Presidente Nelson a siña, ku mi tabata “un yu di Dios,” ““un [yu di e kombenio,” i “un disípulo di JesuCristo.”⁵ Mi tabata sa ku mi tabata konosí i stimá pa mi Tata Selestial i mi Salbador i ku Nan tabata personalmente envolví den mi bida. Esaki a yudami tin e deseo di ta mas serka di Nan i oumentá mi fe i konfiansa den Nan.

Un amigu stimá ku a djòin e Iglesia komo un hóben adulto a kompartí: “Ora e patriarka a buta su mannan riba mi kabes i a bisa mi nombèr, tur kos a kambia, … no e ora ei só, pero pa e restu di mi bida. Ami inmediatamente a sinti ku—pa medio di e poder ku el a papia—mi a wòrdu konosé intimamente i profundamente. E palabranan ku el a bisa a penetrá hinter mi ser. Mi tabata sa ku Tata Selestia tabata konosé mi paden i pafó.”

Sabiendo ken mi tabata realmente a yuda mi komprondé i tin e deseo di hasi lo kual ku Dios tabata spera di mi.⁶

Esaki a guia mi pa studia e kombenionan ku mi a hasi i e bendishonnan primití den e kombenio di Dios ku Abraham.⁷ El a duna mi un perspektiva eterno ku a inspirá mi pa warda mi kombenionan mas kompletamente.

Mi tabata studia mi bendishon patriarkal frekuentemente i, komo hoben, hopi bes diariamente, kual a yudami sinti e guia i influensia konfortante di e Spiritu Santu, kual a yuda redusí mi ansiedat ora mi sigui Su indikashonnan. Esaki a oumentá mi deseo di aktivamente invita lus, berdat, i e Spiritu Santu dor di studia mi skrituranan i resa diariamente, i purba di mas diligentemente studia i sigui e enseñansanan di e profetanan i apostèlnan di Dios. Mi bendishon patriarkal tambe a yuda mi deseá di ta mas sumiso na e boluntat di mi Tata Selestial, i e enfoke ei a yuda mi eksperimentá hopi alegria, a pesar di mi sirkunstansianan personal.⁸

Mi a risibí forsa spiritual kada biaha ku mi a studia mi bendishon patriarkal. Ora mi mayornan finalmente a divorsiá, mi bendishon patriarkal, manera Presidente Thomas S. Monson a siña, a bira pami “un tesoro personal presioso i sin preis,” hasta “un Liahona personal.”⁹

Awor, por fabor no komprondé robes. Mi no tabata perfekto. Mi a hasi tur sorto di fayonan. Mi kompañero eterno lo konfirmá ku mi ta hasie te ahinda. Pero mi bendishon patriarkal a yuda mi i ta sigui yudami tin e deseo di hasi mihó i ta mihó.¹⁰ Studia mi bendishon patriarkal frekuentemente a oumentá mi deseo pa resistí tentashon. A yuda mi tin e deseo i kurashi di arepentí, i arepentimentu a bira kada biaha mas un proseso di goso.

Tabata vital pa ami risibí mi bendishon patriarkal miéntras mi tabata hóben i miéntras mi testimonio tabata kresiendo ahinda. I mi ta pa semper gradisí ku mi mayornan i mi obispo a komprondé ku mi deseo a indiká ku mi tabata klá.

Ora mi tabatin 12 aña, e mundu tabata ménos konfuso i ku ménos distraishon ku e mundu awe. Presidente Nelson a deskribí awe manera “e tempu di mas kompliká den e historia di e mundu,” un mundu ku ta “saturá-di piká” i “egoista.”¹¹ Afortunadamente nos hóbennan awe ta hopi mas madurá ku dia mi tabatin 12 aña, i nan tambe tin desishonnan krítiko i importante pa hasi tanten nan ta hóben! Nan tambe mester sá ken nan ta realmente i ku Dios ta stima nan i ta perfektamente konsiente di nan!

No tur hende lo ta deseá nan bendishon patriarkal ora ami a hasie. Pero ta mi orashon pa e miembronan ku no a risibí ahinda nan bendishon patriarkal lo buska ku orashon pa sa ora nan ta kla. Mi ta primintí ku si bo prepará spiritualmente, bo eksperiensia, manera esun di mi, lo ta sagrado pa bo. Mi tambe ta pidi pa esnan ku a risibí nan bendishon patriarkal kaba, pa nan studié i atesor’é. Balorá mi bendishon patriarkal ora mi tabata yòn a bendishoná mi ku kurashi ora mi tabata deskurashá, konsuelo ora mi tabatin miedu, pas ora mi tabata sinti ansioso, speransa ora mi tabata sinti sin speransa, i alegria ora tabata tin mas mester di dje. Mi bendishin patriarkal a yuda mi oumentá mi fe i konfiansa den mi Tata Selestial i mi Salbador. Tambe el a oumentá mi amor pa Nan—i te ainda e ta hasi esaki.¹²

Mi ta tèstifiká ku bendishonnan patriarkal ta proveé direkshon inspirá di Tata Selestial. Mi ta duna mi testimonio di e realidat bibiente di nos Tata na Shelu i Su Yu, JesuCristo, ku konosé nos, stima nos, i ta deseá pa bendishoná nos. Mi tambe sá ku sertesa ku Presidente Russell M. Nelson ta e profeta di Dios na tera awe. Den e nòmber di JesuCristo, amèn.