Ena Vinaka Na Veika Kece Ena Vuku ni Veiyalayalati ni Valetabu

Kemuni na taciqu kei na ganequ lomani, na iwase ni koniferedi raraba oqo, vei au, e gauna tabu dina. Au marautaka na ilesilesi meu vosa vei ira na milioni na Yalododonu Edaidai kei ira noda itokani e vuravura taucoko. Au lomani kemuni, kau kila ni Turaga e lomani kemuni.

Ena 50 na yabaki sa oti, e noqu na madigi meu veiqaravi vaka peresitedi ni Ricks College e Rexburg, Idaho. Ena mataka ni ika 5 ni June, 1976, keirau a draiva yani kei watiqu, o Kathy mai Rexburg kina Valetabu e Idaho Falls me tiko ena nona vauci e dua na itokani voleka. E dina, e tiko e va na gonetane ena neirau vale ena gauna oya, na neirau ilakolako ivaletabu ena rawati walega ena nona veivuke e dua na daumeimei yaloqaqa! Keirau a biuti iratou tu mai na luvei keirau vakamareqeti vei koya, ka gole ena ilakolako 30 na miniti oya.

A talei sara na veika keirau a sotava ena valetabu ena siga oya, me vaka ga na kena ivakarau. Ia, ni oti na veivauci ni valetabu—ka vakavakarau me keirau lesu mai ivale—keirau raica e vuqa na liganicakacaka ni valetabu kei ira na petereni nira veitalanoa lo tiko ena olo ni icurucuru ituba ni valetabu. Sega ni dede, e tukuna vei keirau edua na liga ni cakacaka ni valetabu ni sa kasura na tobu ni wai vou na Teton Dam ena tokalau kei Idaho! E sivia na 80 na bilioni na qaloni (300 na milioni na kiubiki mita) na wai e drodro tiko mai na tobu ni wai kina 300 na maile vakarivirivi (775 na km vakarivirivi) ena veibuca voleka. E vuqa na yasa ni siti e Rexburg era sa luvu, era kuitaki ena ualuvu eso na vale kei na lori. E tolu-na-ikatolu ni 9,000 na lewe ni vanua sa sega na nodra vale.¹

Me vaka oni rawa ni vakasamataka, na neirau nanuma kei na kauwai a gole kina nodratou taqomaki na luvei keirau lomani, e drau na gonevuli kei na qasenivuli, kei na dua na itikotiko raraba keirau lomana. E volekata e 30 na maile (50 na km) na neirau yawa mai vale, ia ena siga oqo, se bera kina na talevoni veikauyaki kei na vakau itukutuku ena talevoni veikauyaki, e sega ni rawa na veitaratara vakatotolo kei iratou na luvei keirau, se keirau draiva mai Idaho Falls ki Rexburg, ni ra sogo kece tu na gaunisala.

E kena madigi ga me keirau moce ena dua otela ena bogi oya e Idaho Falls. Au tekiduru vata kei Kathy ena loma ni neirau rumu ni otela ka vakamamasu ena yalomalumalumu vua na Tamada Vakalomalagi me ratou taqomaki na luvei keirau lomani kei ira na udolu era vakaleqai ena leqa tubukoso ka yaco oqo. Au vakananuma na nona veilakoyaki tiko e loma ni rumu o Kathy me yacova na mataka caca ni siga oya ena nona lomaleqataki iratou na luvena. Dina ni tiko talega na noqu kauwai, ia au vakaceguya na noqu vakasama ka mani moce sara.

Sega ni dede mai na gauna oya e a vakayadrati au o noqu itokani tawamudu talei ka kaya, “Hal, e rawa vakacava nio moce ena dua na gauna vakaoqo?”

Na veivosa oqo a qai yaco mai vakamatata ilomaqu kei na noqu vakanananu. Au kaya vua na watiqu: “Kathy, se cava ena mani yaco, ena vinaka na veika kece ena vuku ni valetabu. E daru sa caka veiyalayalati oti vata kei na Kalou ka vauci oti me dua na matavuvale tawamudu.”

Ena gauna vata oya, a vaka me vakadeitaka na Yalo ni Turaga ena lomai keirau kei na neirau vakanananu na ka keirau sa kila oti tu ni dina: ni cakacaka vakalotu ni veivauci, ka kunei duadua ga ena vale ni Turaga ka vakayacori ena lewa dodonu ni matabete, a vauci keirau vata vaka veiwatini, ka ratou vauci kina vei keirau na luvei keirau. E sega ni dua na vuna me keirau taqaya kina, ka keirau vakavinavinaka me qai kila e muri na nodratou taqomaki na luvei keirau.

Na malanivosa oqo mai vei Peresitedi Thomas S.Monson ena rairai vakamacalataka vakavinaka na ka keirau a vakila kei Kathy ena bogi tawaguilecavi rawa oya. “Nida gole ivaletabu, ena rawa ni yaco mai vei keda e dua na ivakarau ni ivakatagedegede vakayalo kei na vakilai ni vakacegu. … Eda na kila vinaka kina na ibalebale dina ni vosa ni iVakabula ena Nona a kaya: ‘Au sa laiva vei kemudou na vakacegu, au sa solia vei kemudou na noqu vakacegu. … Me kakua ni rarawa na yalomudou se rere [Joni 14:27].’”²

Au sa vakalougatataki meu vakila na vakacegu oya ena veigauna kece au curu kina ki na valetabu savasava. Au nanuma lesu na imatai ni gauna au a curuma kina na Valetabu e Salt Lake. Au se cauravou kina.

Au rai cake kina doka vulavula cere ni vale ka vakararamataka na rumu ka vaka sara ga e tadola tu ki lomalagi. Ia ena gauna oya, a basika mai kina kina noqu vakanananu ena vosa matata: “Niu a sa tiko oti ena vanua rarama oqo ena dua na gauna.” Ia lako mai vakatotolo kina noqu vakasama, ka sega ni domoqu, na veivosa oqo: “E sega, o se bera ni bau tiko eke ena dua na gauna. O vakasamataka tiko edua na gauna nio se bera ni sucu kina. O tiko ena dua na vanua tabu vakaoqo ka rawa ni lako mai kina na Turaga.”

Taciqu kei na ganequ, au vakadinadinataka ena yalomalumalumu nida gole i valetabu, eda na rawa ni vakananumi tale ena ituvaki tawamudu ni yaloda, na noda veiwekani kei Tamada kei na Luvena vakalou, kei na noda gagadre levu duadua meda lesu tale ki na noda itikotiko mai lomalagi.

Ena vuqa na vosa ni koniferedi raraba wale tiko ga oqo, sa vakavulica kina vei keda o Peresitedi Russell M. Nelson:

“Na vanua taqomaki vinaka duadua meda tiko kina vakayalo oya meda bula tiko ena loma ni noda veiyalayalati ni valetabu.”

“Na veika kece eda vakabauta kei na vei yalayala yadua sa cakava na Kalou vei ira na Nona tamata ni veiyalayalati sa umanaki vata ena loma ni valetabu.”³

“Na tamata yadua e caka veiyalayalati … ena valetabu—ka maroroi ira—ena vakalevutaki na nona rawata na kaukauwa i Jisu Karisito.”⁴

E vakatavulica talega o koya ni “gauna eda sa veiyalayalati kina kei na Kalou, eda sa vakanadakuya na itutu ni vakasavuliga me tawamudu. Ena sega ni vakanadakuya na Kalou na Nona veiwekani kei ira era bulia na ivau vakaoqo vata kei Koya. Sa ka dina, ni o ira kece era sa veiyalayalati kei na Kalou era na rawata e dua na mataqali loloma kei na yalololoma digitaki.”⁵

Ena ruku ni veiliutaki veivakauqeti nei Peresitedi Nelson, na Turaga sa vakatotolotaka, ka na tomani me vakatotolotaki, na tara ni veivaletabu e vuravura raraba. Oqo me rawa kina vei ira kecega na luve ni Kalou mera ciqoma na cakacaka vakalotu ni veivakabulai kei na bula vakacerecerei ka cakava ka maroroya na veiyalayalati tabu. Noda kilikili kaya na caka veiyalayalati tabu e sega ni sasaga ni dua ga na gauna ia e ivakarau ni dua na gauna taucoko ni bula. Na Turaga sa tukuna ni na taura na lomamu taucoko, igu taucoko, vakasama taucoko, kei na nomu kaukauwa taucoko.⁶

Na vakaitavi vakawasoma ena cakacaka vakalotu ni valetabu ena rawa ni bulia e dua na ivakarau ni veiqaravi ena yalodina vua na Turaga. Nio muria ka nanumi ira tiko na nomu veiyalayalati ni valetabu, o sureta tiko na veitokani ni Yalo Tabu me vaqaqacotaki iko ka vakasavasavataki iko.

Ona qai rawa ni vakila kina na rarama kei na inuinui ka rau vakadinadinataka ni ra sa dina na vosa ni yalayala. Ona mai kila kina ni veiyalayalati kece vata kei na Kalou edua na madigi mo toro voleka kina vei Koya, ena qai vakavuna e dua na gagadre e yalomu mo maroroya na veiyalayalati ni valetabu.

E yalataki vei keda, ni “Ena vuku ni noda veiyalayalati kei na Kalou, ena sega vakadua ni oca ena Nona sasaga me vukei keda, ka da na sega vakadua ni vakaotia rawa na Nona dauvosota vakayalololoma ki vei keda.”⁷

Ena veiyalayalati ni veivauci e loma ni valetabu sa rawa kina meda ciqoma na veivakadeitaki ni isema lomani ni matavuvale ka na tomani tiko ni oti na mate ka na tu ga me tawamudu. Na rokovi tiko ni veiyalayalati ni vakawati kei na matavuvale e caka ena valetabu ni Turaga ena sabaya tani na veika ca ka dau yaco mai na nanumi koya vakataki koya kei na dokadoka.

Na nodra dau veivukei vakai ira na veitacini ena yaco ga ena sasaga vagumatua me liutaki na nomu matavuvale ena sala ni Turaga. Solia vei ira na gone na madigi me ra veimasulaki vakai ira. Mo kila vakatotolo na itekitekivu ni duiyaloyalo, ka vakavinavinakataka na veiqaravi ka vakayacori ena sala ni sega ni nanumi koya vakaikoya, vakabibi vei ira vakai ira. Nira veimasulaki ka veiqaravi vakai ira na veitacini, ena vakamalumutaki na yalodra era na veilomani vakai ira ka ra lomani vakakina na nodra itubutubu.

Oya e dua na tiki ni ka a vakamacalataka o Malakai ena nona tukuna na lako mai i Ilaija na parofita: “Ka na tea ko koya e lomadra na gone na yalayala a caka vei ira na qase, ka na gole na lomadra na gone vei ira na nodra qase. Kevaka e sega ni vakakina, sa na vakarusai sara na vuravura taucoko ena nona lako mai ko koya.”⁸

Na veivakatovolei, na bolebole, kei na mosi ni yalo ena yaco mai vakaidina vei keda kece sara. E sega ni dua vei keda ena vakuwai mai na “voto [ni] kau sa vakalauti kina na leweda.”⁹ Ia, nida gole ivaletabu ka nanuma na noda veiyalayalati, eda rawa ni vakavakarau me ciqoma na veidusimaki yadua maivua na Turaga.

Ena neirau vakamau kei Kathy ka vauci ena valetabu na Logan Utah Temple, o Elder Spencer W. Kimball a vakayacora na neirau vauci. Ena vica na vosa leleka a cavuta, e a solia kina na ivakasala oqo: “Hal kei Kathy, drau bula me rawa kina ni gauna e yaco mai kina na kaci, mo drau biubiu vakarawarawa.”

Taumada, keirau sega ni kila na ibalebale ni ivakasala oya vei keirau, ia keirau a tovolea ena neirau igu me bula ena dua na bula me keirau na vakarau tu me qarava na Turaga ni yaco mai na veikacivi. Ni oti e 10 na yabaki ni neirau vakamau, e a yaco dina mai e dua na kaci namaki mai vua na Komisina ni Vuli ni Lotu, o Neil A. Maxwell.

Na ivakasala ni loloma ka a solia o Peresitedi Kimball mai na valetabu me rawa ni keirau “biubiu vakarawarawa” e sa mai vakavotukana. Keirau a ciqoma kei Kathy e dua na kaci me keirau biubiu mai na dua na ituvaki totoka vakamatavuvale mai California me veiqaravi ena dua na ilesilesi kei na vanua kau sega ni kila kina edua na ka. Ia, na neirau matavuvale a vakarau tu me biubiu baleta e dua na parofita, ena dua na valetabu savasava, na vanua ni ivakatakila, a raica e dua na ka ena yaco mai muri ka keirau vakavakarau tu mai kina.

Taciqu kei na ganequ lomani, au vakadinadinataka ni sega tale ni dua na ka e bibi cake mai na nomu rokova na veiyalayalati o cakava se ona cakava ena valetabu. Se vanua cava ga o tiko kina ena salatu ni veiyalayalati, au uqeti iko mo bula kilikili mo rawa ni gole kina valetabu. Gole kina vakawasoma ni vakatara na ituvaki. Cakava ka maroroya na veiyalayalati tabu vata kei na Kalou. Au rawa ni vakadeitaka vei iko na dina vata ga au wasea vei Kathy ena lomaloma ni bogi ena loma ni dua na rumu ni otela e Idaho Falls rauta ni limasagavulu na yabaki sa oti: “Se mani vakacava na ka ena yaco, ena vinaka na veika kece ena vuku ni veiyalayalati ni valetabu.”

Au solia vei kemuni na noqu ivakadinadina dei ni Karisito o Jisu. E bula o Koya ka liutaka tiko na Nona Lotu. Na valetabu era vale ni Turaga. Sa parofita bula ni Kalou e vuravura nikua o Peresitedi Russell M. Nelson. Au lomani Koya, kau lomani kemuni vakayadua. Ena yaca tabu i Jisu Karisito, emeni.