Dua na Reki Cecere Cake

E dredre me da vakabauta ni se qai oti ga e 120 na yabaki sa oti ena imatai ni gauna rau a talave cake yani kina o Wilbur kei Orville Wright ka vuka baleta yani na veinukunuku kei Kitty Hawk, ena Vualiku kei Carolina. E va na vuka leleka ena siga o ya ni Tiseba a veisautaka na vuravura ka dolava na katuba ki na dua na buli iyaya cecere duadua ena itukutuku kei vuravura.

A dau rerevaki na vuka ena veisiga taumada oya. Erau a kila vinaka na veitacini na ka oqo. Ka vakakina o tamadrau, o Milton. E ka dina, ni a rerevaka sara o koya de rau na leqa ruarua na luvena tagane ena dua na vakacalaka ni vuka ka rau a yalataka kina vua ni rau na sega vakadua ni rau vuka vata.

Ka rau a sega sara—vakavo ga vaka dua. Ni oti e vitu na yabaki mai na siga vakairogorogo oya e Kitty Hawk, a qai solia kina o Milton Wright na nona veivakadonui ka mai sarava yani na imatai ni gauna me rau vuka vata kina o Wilbur kei Orville. Ni ro oti ga mai, a vakauqeti tamana o Orville me vodo yani ka taura na imatai ni nona vuka me raica sara vakataki koya se vakaevei tu.

Ni talave cake ga na waqavuka mai na qele, a vesuki vakalevu sara o Milton yabaki 82 ena marau ni vuka ni oti vakadua kina na nona rere. A reki o Orville ni kailavaka yani ena marau o tamana, “Cecere cake, Orville, cecere cake!”²

Oqo e dua na tamata e vaka sara ga na yaloqu!

De dua na vuna au dau vosa kina me baleta na waqavuka ena so na gauna oya niu kila tiko e dua na ka me baleta na veika erau a vakila na Wrights. Oi au talega sa “cawadru laivi mai na ivesu ca kei Vuravura ka meketa yani na lomalagi ena ivukavuka-marautaki siliva.”³

Na imatai ni nodrau vuka na veitacini na Wright, e yaco ni vo e 37 na yabaki meu sucu, a dolava na katuba ni ilakolako talei, qoroqoro, kei na reki savasava ki na noqu bula.

Ia, me vaka ga na kena veivakurabuitaki na reki oya, e tiko e dua na mataqali reki cecere cake sara. Nikua, ena yalo ni kaila marautaki nei Milton Wright, “Cecere cake, Orville, cecere cake,” au vinakata meu vosa me baleta na reki cecere cake oqo—na vanua e lako mai kina, na sala e curuma kina na yaloda, kei na sala e rawa ni da vakila vakalevu cake kina.

E rairai sega beka ni dau tukuni ni tamata kece era vinakata me ra marau.⁴ Ia, e rairai sega talega ni dau tukuni ni sega ni tamata kece era marau tu. E ka ni rarawa, ni kena irairai vei ira e lewe vuqa na tamata, e dredre me kunei na marau.⁵

Na cava na vuna oya? Ke sa dua na ka eda dau vinakata vakalevu duadua oya na marau, na cava sa rui tawayaga kina noda sasaga me da kunea rawa? Me cavuqaqataki e dua na sere ni vanua, de dua eda sa vaqara tiko na reki ena veivanua cala kece sara.⁶

Ni bera nida veivosakitaka na sala me kunei kina na reki, meu vakadinadinataka mada ni yalolailai kei na bolebole dredre tale eso ni vakasama kei na lomada era sa ka dina, ka sega ni kena isau walega oya mo, “Tovolea mo marau vakalevu cake.” Na noqu inaki nikua oya meu kua ni vakalailaitaka se vakawaletaka na leqa ni vakasama. Kevaka o sotava tiko na bolebole vakaoqori, au rarawa vata voli ka tu e yasamu. Vei ira eso, na kunei ni reki e rawa ni oka kina na nodra vakasaqara na veivuke mai vei ira na kenadau ni bulabula ni vakasama era solia tu na nodra bula ena nodra vakatovotovotaka na nodra cakacaka ni veiqaravi vakavuniwai. E dodonu me da vakavinavinakataka na veivuke vaka oya.

Na bula e sega ni dua na veitaravi tawacava ni veika cecere ni lomada. “Ni sa dodonu kina me tu na veibasai ni ka kecega.”⁷ Ia kevaka sa tagi na Kalou Vakaikoya, me vaka e vakadeitaka vakakina na ivolanikalou,⁸ sa na qai dina sara vei iko kei au me tagi talega. Na yalorarawa e sega ni ivakatakilakila ni druka. Ena bula oqo, ke lailai sara, na reki kei na rarawa erau sa itokani sega ni tawasei rawa.⁹ Me vakataki kemuni kece, au sa vakila talega na noqu iwase ni vakalialiai, rarawa, lomabibi, kei na veivutuni.

Ia, au sa sotava talega vakai au na mataka caca lagilagi ka dau vakasinaita na yalo ena reki bibi ka sega sara ni tabonaki rawa. Au sa raica vakai au ni yalodei veivakacegui oqo e dau lako mai ni da muria na iVakabula ka lako voli ena Nona sala.

Na vakacegu e solia vei keda o Koya e sega ni vaka na veika e solia o vuravura.¹⁰ E vinaka cake. E cecere ka savasava cake. A kaya o Jisu, “Au sa lako mai me rawa vei ira na bula, ia me rawa vakalevu sara.”¹¹

Na kosipeli i Jisu Karisito sa ikoya dina na “itukutuku vinaka mo dou reki vakalevu kina”!¹² E dua na itukutuku ni inuinui sega ni vakatauvatani rawa! E dua na itukutuku ni colati ni ivua kei na laveti ni icolacola.¹³ Ni vakasoqoni vata ni rarama. E vakadonui vakalomalagi, na kila‑ka cecere, veiyalayalati tabu, veitaqomaki tawamudu, kei na lagilagi tawamudu!

Na reki sa ikoya na inaki dina sara ni nona ituvatuva na Kalou me baleti ira na Luvena. Oqo na ka o a buli kina—“[mo] rawata na marau”!¹⁴ O a buli me baleta na ka oqo!

E sega ni vunitaka na Tamada Vakalomalagi na salatu ki na marau. E sega ni dua na ka vuni. Sa vakarautaki tu vei keda kece!¹⁵

Sa yalataki tu vei ira era lako ena salatu ni bula vakatisaipeli, muria na ivakavuvuli kei na ivakaraitaki ni iVakabula, muria na Nona ivakaro, cakava ka rokova na veiyalayalati era cakava vata kei na Kalou. Sa dua na iyalayala vakasakiti!

Eda kilai ira kece na tamata era kaya ni ra sega ni gadreva na Kalou me ra marau, ni sa rauti ira na marau ni sega na lotu.

Au ciqoma ka doka na veika oqori. E vinakata na Tamada Vakalomalagi lomani me ra rawata kece na Luvena na marau levu duadua e rawa, ka sa vakasinaita kina o Koya na vuravura oqo ena veika ni marau totoka, ka vakamatalau, “me reki kina na mata ka … marau kina na yalo.”¹⁶ Vei au, na vuka e dau kauta mai na marau levu. Eso tale era kunea ena ivakatagi, cakacaka ni liga, veika taleitaki, se veika bula.

Nida sureti ira kece ka wasea na itukutuku vinaka ni marau levu ni iVakabula, eda sega ni vakalailaitaka e dua vei ira na ivurevure ni reki oqo. Eda kaya wale tikoga ni sa tiko vua na Kalou e dua na ka me solia vakalevu cake. E dua na reki cecere ka bibi cake—e dua na reki ka uasivia na veika kecega e solia na vuravura oqo. Sa ikoya na reki e dau vosota na kavoro ni yalo, curu basikata na rarawa, ka vakalailaitaka na galili.

Na marau vakavuravura, ena kena veibasai, e sega ni dau dede. E sega ni rawa. Sa ikoya na ivakarau ni veika vakavuravura kecega me qase mai, vuca, madra, se yaco me makawa. Ia na reki vakalou e tawamudu, baleta ni sa tawamudu na Kalou. A lako mai o Jisu Karisito me laveti keda tani mai na veika vakayago ka sosomitaka na veika vuca ena veika tawavuca rawa. O Koya duadua ga e tu Vua na kaukauwa oya, ka sa tawamudu duadua ga na Nona reki.

Kevaka o vakila ni na rawa ni levu cake na mataqali reki vakaoqo ena nomu bula, au sureti iko mo gole yani ena ilakolako ni muri Jisu Karisito kei na Nona Sala. Oqo na ilakolako ni bula taucoko—ka sivita yani. Yalovinaka meu vakatura mada e vica na ikalawa ni itekitekivu ena ilakolako kilikili oqo me kunei kina na reki savasava.

O nanuma tiko na yalewa ena Veiyalayalati Vou ka a vosota tu na mate ni turidrabalavu me 12 na yabaki?¹⁸ A vakayalia kece na nona iyau vei ira na vuniwai, ia sa qai levu cake ga na mate. A rogoca o koya me baleti Jisu; A kilai levu na Nona kaukauwa me veivakabulai. Ia ena rawa beka ni vakabulai koya? Ka na rawa vakacava me toro voleka yani kina Vua? Na nona tauvimate a vakavuna me “dukadukali” me vaka na lawa i Mosese, o koya sa gadrevi kina me dau yawaki ira na tani.¹⁹

A vaka me sega ni na manata me torovi Koya yani e matanalevu me kerea na veivakabulai.

Ia, a sa nanuma o koya, “Kevaka ka’u na tara ga na nona isulu, au na vakabulai.”²⁰

A qai vakamalumalumutaka na nona rere na nona vakabauta. A vorata na nodra veidrigidrigi na tani ka sasaga yani vua na iVakabula.

Sa qai yaco voleka yani o koya. A dodoka yani na ligana.

Ka sa vakabulai o koya.

Eda sega beka ni vaka kece na yalewa oqo?

E vuqa beka na vuna eda lomalomarua kina meda toro voleka vua na iVakabula. Eda na rairai vakalialiai se cudruvi mai vei ira tale eso. Ena noda viavialevu, eda na rairai biuta laivi na kena rawa ni yaco e dua na ka rawarawa walega me yaga vakalevu sara. Eda na nanuma beka ni noda ituvaki e vakuwai keda mai na Nona veivakabulai—ni sa rui yawa sara na vanua se sa rui levu na noda ivalavala ca.

Me vakataka na yalewa oqo, au sa vulica ni kevaka eda toro voleka vua na Kalou ka dodoliga yani meda tarai Koya, eda na kunea vakaidina na veivakabulai, vakacegu, kei na reki.

A vakavulica o Jisu, “Dou vakasaqara, ka dou na kunea.”²¹

Au vakabauta ni malanivosa rawarawa oqo e sega walega ni yalayala vakayalo; ia e dua na itukutuku dina.

Ke da vakasaqara na vuna me da cudru kina, vakatitiqa, me da yaloca se tu duadua, eda na kunei ira.

Ia, kevaka eda vakasaqara na reki—kevaka eda vakasaqara na vuna meda reki kina ka muria ena marau na iVakabula, eda na kunei ira.

E vakavudua sara meda dau kunea e dua na ka eda sega ni vaqara tiko.

O vaqara tiko beka na reki?

Vakasaqara, ko na kunea.

A vakavulica o Jisu, “A ka ni veivakalougatataki vakalevu me soli‑ka ka vakalailai ga me taura na ka.”²³

E rawa beka ena noda vakasaqara na reki, na sala vinaka duadua me da kunea kina oya me da kauta mai na reki vei ira na tani?

Kemuni na taciqu kei na ganequ, e sa ka dina! Na reki e vaka e dua na saqa falawa se dua na tavaya waiwai ka na sega ni oti rawa.²⁴ Na reki dina e dau vakalevutaki ni wasei.

E sega ni gadrevi kina e dua na ka cecere se verevereya.

E rawa ni da cakava na veika rawarawa.

Me vaka e dua o masulaka tiko ena yalomu taucoko.

Solia e dua na veivakacaucautaki dina.

Vukei koya e dua me vakila ni sa ciqomi, rokovi, vakamareqeti, ka lomani.

Wasea e dua na ivolanikalou taleitaki kei na kena ibalebale vei keda.

Se ena vakarorogo sara mada ga.

“Ko ni sa qarava tiko na nomuni Kalou ena gauna ko ni qaravi ira tiko kina na wekamuni,”²⁵ ka na sauma na Kalou na nomu yalovinaka.²⁶ Na reki o solia vei ira na tani ena lesu tale mai vei iko ena “ivakarau vinaka, ka tabaki sobu, ka kuretaki vata, ka vuabale.”²⁷

Ena veisiga, macawa, kei na vula ka tarava, meu sureti iko mo:

• Vakayagataka na gauna ena sasaga dina, ka taucoko mo toro voleka yani vua na Kalou.

• Vakasaqara vagumatua e veisiga na veigauna ni inuinui, vakacegu, kei na reki.

• Kauta mai na reki vei ira na tani era tu wavoliti iko.

Kemuni na taciqu kei na ganequ lomani, kei na itokani lomani, ni ko vakasaqara na vosa ni Kalou moni kila vakatitobu cake kina na ituvatuva tawamudu ni Kalou, ciqoma na veisureti oqo, ka segata moni lako ena Nona Sala, ko ni na sotava “na vakacegu ni Kalou, sa uasivia na ka kecega e kilai rawa,”²⁹ ena loma sara mada ga ni rarawa. Oni na vakila e dua na ivakarau cecere cake ni loloma tawalakosiviti rawa ni Kalou ni vure cake mai e lomamu. Na mataka caca ni rarama vakasilesitieli ena curuma na iyaloyalo ni nomuni veivakatovolei, ka oni na qai tekivu tovolea na lagilagi kei na veika veivakurabuitaki e sega ni vakamacalataki rawa ni veika tawalaurai, uasivi sara, ni vuravura vakalomalagi. Oni na vakila ni sa laveta tani na yalomuni mai na idre ni vuravura oqo.

Ka me vaka vinaka i Milton Wright, de dua o na tabalaka cake na domomu ena reki ka kailavaka, “Cecere cake, Tamaqu, cecere cake!”

Meda vakasaqara kece ka kunea na marau cecere e yaco mai ena noda solia na noda bula vua na Tamada Vakalomalagi kei na Luvena lomani. Oqo na noqu masu vagumatua ena yaca tabu i Jisu Karisito, emeni.