Na iNaki ni Kalou Me Kauti Iko Vua

Au via vakaraitaka na noqu vakavinavinaka ena nomuni masu niu sa tekivu ena iwalewale ni veisau ki na veikacivi, mai vei Peresitedi Nelson, meu veiqaravi me vaka e dua na Apositolo ni Turaga o Jisu Karisito. E rawa beka nio raitayaloyalotaka vakavinaka na yalomalumalumu e kauta mai ena veika oqo, ka sa gauna ni yalolailai vakasakiti kei na vakadikevi au vakai au. E dina, ia, sa dua na veidokai cecere dina na qarava na Kalou, ena ituvaki cava ga, ka veisemati vata kei kemuni ena wasei ni itukutuku vinaka ni Nona kosipeli ni inuinui.

Ena yasana kadua, e dau tukuni ni dakuni vei Apositolo vou e tu e dua na tinai watina ka kurabui sara vakalevu. Au sega ni kila kevaka e tukuni vakaidina, ia ena noqu kisi, e rawa ni vakakina. Au kilakasamataka ni dina ni sega nio o tinai watiqu e sega ni tiko vata kei keitou e sega ni vakalailaitaka na nona kurabui.

Vica na vula sa oti, keirau veisiko kei na watiqu ena dua tale na vanua ena vuku ni lesilesi ni lotu, au yadra vakamataka lailai ka rai yani ena daku ni katubaleka ni neirau otela. E na gaunisala osooso, au raica ni tara e dua na ilati ni gaunisala e dua na ovisa ka tu voleka me vakasuka na motoka ni yaco yani kina itatarovi. Taumada, e vica ga na motoka era lako ena gaunisala ka ra sa vakasukai lesu. Ia ni toso na gauna ka toso cake na osooso ni gaunisala, sa tekivu me toso cake na iwiliwili ni motoka.

Mai na katubaleka e cake, au sarava ni vaka me taleitaka na ovisa na nona kaukauwa me tarova na kena drodro na motoka ka vagolei ira tani na tamata. E dina, ni vaka me mama na nona ikalawa, me vaka ga e rawa ni tekivuna e dua na danisi lailai, ni sa voleka yani na motoka yadua kina itatarovi. Kevaka e vakaloboca e dua na draiva me baleta na vakalatilati ni gaunisala, na ovisa e sega ni rairai me veivuke se veinanumi. A kuretaka vakawasoma na uluna ka dusia na imua veibasai.

Noqu itokani, noqu itokani vakatisaipeli ena ilakolako ni bula oqo, na ituvatuva talei ni Tamada, na ituvatuva “totoka”,¹ e tuvai me kauti iko lesu tale ki vale, ka sega ni vakuai iko.² E sega ni dua e tara e dua na ilatilati ni gaunisala ka biuta e dua me vakasukai iko ka talai iko laivi. Na dina, e kena veibasai dina. Sa dau vakasaqarai iko tiko ga na Kalou. E “vinakata o Koya mera digitaka kece na Luvena mera lesu tale Vua,”³ ka vakayagataka na ivakarau kece sara e rawa me kauti iko lesu mai.

A raica na Tamada dauloloma na buli ni vuravura oqo me baleta na inaki vakaraitaki ni kena vakarautaki e dua na madigi vei iko kei au meda rawata na veivakatorocaketaki ka vakasavasavataki ni veika e sotavi ena bula oqo, na madigi meda vakayagataka na noda galala ni digidigi savasava sa solia na Kalou meda digitaki Koya,⁴ meda vuli, tubu, meda cala, meda veivutuni, meda lomana na Kalou kei ira na wekada, ka lesu tale ivale Vua ena dua na siga.

A tala mai na Luvena Daulomani kina vuravura lutu oqo me bulataka na veika taucoko era sa sotava na tamata, me vakarautaka e dua na ivakaraitaki vei ira na vo ni Luvena mera muria, ka me sorovaka ka vueti. Na isolisoli cecere ni veisorovaki i Karisito ena kauta laivi na veivakataotaki kece sara ni mate vakayago kei na mate vakayalo ka na tawasei keda mai na noda itikotiko tawamudu.

Na veika kece me baleta na ituvatuva ni Tamada vei ira na Luvena e tuvai me kauti ira taucoko i vale.

Na cava era dau kaciva kina na ituvutuva oqo na italai ni Kalou, Nona parofita, ena ivolanikalou Vakalesui? Era kaciva na yavu ni veivueti,⁵ na yavu ni loloma veivueti,⁶ na yavu levu ni marau,⁷ kei na yavu ni veivakabulai, ka sa baleti keda kece, “mai na nona dra na noqu Le Duabau Ga.”⁸

Na inaki levu ni yavu ni veivakabulai ni Tamada na nomu marau, eke, ena gauna oqo, kei na tawamudu. E sega me tarova na noda marau ka vakavuna meda lomaleqa ka rere.

Na inaki vakaidina ni yavu ni veivueti ni Tamada sa nomu vueti, nomu vueti mai na veivakalolomataki kei na mate nei Jisu Karisito,⁹ vakabulai mai na ivesu ni ivalavala ca kei na mate. E sega ni biuti iko tu vakai iko.

Na inaki ni yavu ni loloma veivueti ni Tamada me solia na loloma veivueti ni keda mua lesu ki Vua ka dinata na noda veiyalayalati ni yalodina Vua. E sega ni cakitaki na loloma veivueti ka vakavuna ga na mosi kei na rarawa.

Na inaki vakaidina ni yavu ni veivakabulai ni Tamada sa noda vakabulai ena matanitu lagilagi vakasilesitieli ni da ciqoma na “ivakadinadina ni Jisu”¹⁰ ka solia na yaloda taucoko Vua.¹¹ E sega ni tarovi iko kina.

Sa kena ibalebale beka oqo ni sa vakatarai na veika kece ena ivakarau ni noda bulataka na noda bula. Na sala eda digitaka me da vakayagataka kina na noda galala ni digidigi e sega ni bibi? Ni rawa nida taura se biuta na ivakaro ni Kalou? Sega, ka segai sara. E dina sara ni dua na veisureti kei na kerekere tudei nei Jisu ena Nona veiqaravi vakalotu e vuravura o ya meda veisau ka veivutuni ka lako mai Vua.¹² E vakamatatataki sara ga ena Nona ivakavuvuli kece sara na bula ena itutu cecere ni itovo savasava¹³ ka kaci ni toso i liu, kina veisautaki ni vakabauti Karisito, kina veisau levu ni yalo.¹⁴

E vinakata na Kalou vei keda e dua na veisau levu ni noda gagadre kocokoco kei na dokadoka, na kaliraki ni tamata vakayago,¹⁵ ka me da “lako, ka … kakua ni ivalavala ca tale.”¹⁶

Kevaka eda vakabauta na inaki ni yavu ni Kalou me vakabulai keda, vueti keda, solia vei keda na loloma veivueti, ka kauta mai vei keda na marau, na cava na inakinaki ni Luvena ka kauta vata mai na ituvatuva levu oqo?

E tukuna vei keda na Luvena: “Niu sa sega ni lako sobu mai lomalagi meu kitaka na lomaqu, meu kitaka ga na loma i koya sa talai au mai.”¹⁷

Na lomai Jisu sa i koya na loma i Tamada dauloloma! E vinakata o Koya me rawa vei ira kece na luvena na Tamada me ciqoma na takete ena icavacava ni yavu— na bula tawamudu vata kei Rau. E sega ni dua e tarovi mai na rawaka lagilagi oqo.

Kevaka o leqataka ena sega ni rawa nio vakatautauvatataki, se sa sega ni rawa ni ovigi iko na loloma ni Veisorovaki tawamudu, ka rawa ga vei ira na tani, io, o sega nio kila vinaka tiko. Tawamudu e kena ibalebale ni tawamudu. Tawamudu e ovigi iko kei ira ko lomana.¹⁸

E vakamacalataka o Nifai na dina totoka oqo: “Sa sega ni kitaka ko Koya e dua na ka, ka vakavo kevaka me na vinaka kina ko vuravura; ni sa lomani ira na kai vuravura, o koya ka sa solia kina na nona bula me vakayarayarataki ira kina na tamata kecega ki vua. Ia, sa sega ni vakarota e dua me kua ni vakaivotavota mai na nona veivakabulai.”¹⁹

Na iVakabula, na iVakatawa ni Sipi Vinaka, e lako me vakasaqarai ira na Nona sipi ka yali me yacova ni sa kunei ira tale ko Koya.²⁰ O Koya e “sega ni vinakata me rusa e dua.”.²¹

“Raica, sa dodo tu yani vei kemuni na liga ni noqu loloma cecere, ia ko koya yadua sa lako mai, au na ciqomi koya.”²²

“Sa tiko li e so era tauvimate? Moni kauti ira mai. Sa tiko li eso era sa lokiloki, na mataboko, na gera, na mudu, na vukavuka, ko ira sa malai, o ira na didivara kei ira kecega sa tauvimate tu? M ni kauti ira mai kau na vakabulai ira, niu sa yalololoma vei kemuni.”²³

A sega ni biuta laivi na yalewa ka tauvimate nona dra, a sega ni levea talega na vukavuka, a sega ni besetaka na yalewa a veibutakoci, a sega ni besetaka na veivutuni, veitalia na nodra ivalavala ca. Ka na sega ni besetaki iko o Koya se o ira o lomana ni ko kauta mai Vua na yalomu sa raramusumusu kei na yalo e bibivoro. Oqori e sega ni Nona inaki se Nona inakinaki, se Nona ituvatuva, yavu, gagadre, se inuinui.

Sega, e sega ni biuta na itatarovi kei na ilatilati; e vakagalalataka o Koya. E sega ni biuti iko e tautuba; e kidavaki iko i loma.²⁴ Sa dua dina na ivakadinadina bula ni Nona cakacaka taucoko vakalotu ni inaki oqo.

Sa qai dina sara ni tiko na Nona isoro ni veivakaduavatataki, ka dredre meda kila, ka sivia na noda rawa ni kila vakavinaka ena bula oqo. Ia, oqo e dua na “ia,” e bibi me keda kila, e rawa ni da kila, na inaki savasava, ni veivakabulai ni Nona isoro ni veisorovaki.

E kavida rua ni ilati ni valetabu ena gauna a mate kina o Jisu ena kauveilatai, e vakatakarakarataka ni sa tadola tu na sala lesu kina iserau ni Tamada—kivei ira kece era na vuki Vua, vakararavi Vua, biuta Vua na nodra icolacola, ka colata na Nona ivua mai na isema ni veiyalayalati.²⁵

Dua tale na kena itukutukuni, na ituvatuva ni Tamada e sega ni baleta na itatarovi. E sega vakadua; ka na sega vakadua ni vakakina. E tiko beka na veika e gadrevi meda cakava, vunau me mororoi, ivakarau ni noda ituvaki me veisau? Io. Ia ena Nona loloma soliwale, o ira oqori e rawa nida yacova yani, ka sega ni sivia mai na noda rawata.

Oqo na itukutuku vinaka! E sega ni tukuni rawa na noqu vakavinavinaka kina vei dina rawarawa oqo. Na inakinaki ni Tamada, Nona ituvatuva, Nona inaki, Nona gagadre, kei na Nona inuinui kece me vakabulai iko, me solia vei iko na vakacegu kece, me kauti iko, kei ira kece o lomana, i vale. Sa oqo na noqu ivakadinadina ena yaca i Jisu Karisito, na Luvena, emeni.