Mera Marau ena Vukui Karisito

Ena Veiyalayalati Vou eda vulica kina me baleti Patimeo, ka kaci yani vei Jisu ni gadreva e dua na cakamana. “A sa kaya vua, Mo lako ga, sa vakabulai iko na nomu vakabauta. Ena gauna vata ga sa rai rawa ko koya.”¹

Ena dua tale na gauna, e dua na tamata mai Peciseita e gadreva na veivakabulai. Kena veibasai, na cakamana oqo a sega ni yaco tototlo mai. A vakalougatataki koya vakarua ko Jisu ni bera ni qai “rai vakavinaka.”²

Ena ikatolu ni ivakaraitaki, na iApositolo ko Paula “a masu vakatolu vua na Turaga” ena nona vakararawataki,³ ia eda kila, na nona vakatakekere bibi a sega ni soli.

Tolu na tamata duidui. Tolu na veika e sotavi.

Ia, na taro oqo: Na cava era dau ciqoma totolo kina eso na cakamana era gadreva, ka so era vosota nodra waraka tu na Turaga?⁴ Eda na sega beka ni kila na cava na vuna, ia ena vakavinavinaka eda kila ni o Koya ka dau “lomani [keda]”⁴ ka “[cakava] na ka kecega me baleta na [noda] tiko vinaka kei na marau tawamudu.”⁵

Na Kalou, o koya sa raica rawa na icavacava mai na ivakatekivu,⁷ sa veivakadeitaki, “Na nomu vakacacani kei na nomu vakararawataki ena vakalailai walega”⁸ ia ena yaga “mo vinaka kina.”⁹

E vakavulica o Elder Orson F. Whitney: “E sega ni maumau na mosi eda vakararawataki kina, se veivakatovolei eda sotava. E qarava na noda vuli. … Na … ka kece eda [vosota] vakadede … ena taracake na noda ivakarau, vakasavasavataka na yaloda, vakarabailevutaka na lomada, ka na vakavuna meda dauloloma ka yalololoma. … Ena yaluma kei na rarawa, cakacaka vakaukauwa ni sotavi na dredre, eda na rawata kina na vuli ka da lako mai kina eke meda mai vulica ka da na vaka vakalevu cake kina na [itubutubu vakalomalagi].”¹⁰

Ni kila ni na “tiko vua na kaukauwa i Karisito” ena nona vakararawataki, a kaya kina ena yalomalumalumu na iApositolo o Paula, “Niu sa malumalumu au sa qai kaukauwa mai.”¹¹

Na veivakatovolei ni bula ena vakadinadinataki keda.¹² Na iVakabula sara mada ga e “vulica … na talairawarawa ena” ka ”vakavinakataki sara ena nona vakararawataki.”¹³

Ena dua na siga ena cavuta kina ena yalololoma, “Ia, raica, au sa vakasavasavataki iko, au sa digitaki iko ena lovo bukawaqa ni veivakararawataki.”¹⁴

Nida vakanuinui ena inaki tabu ni Kalou sa solia na inuinui ena yalo oca ka susuga na yalodina ena gauna ni yaluma ena bula.¹⁵

Ena vica na yabaki sa oti, a wasea o-Elder Russell M. Nelson na rai yaga oqo: “Nida raica na ka kecega ena rai tawamudu, ena vakamamadataka sara vakalevu na noda icolacola.”¹⁶

iVakatakilakila

Holly kei Trey Porter.

Keirau a vakadinadinataka na dina oqo kei na watiqu o Jill, ena nodrau bula yalodina o Holly kei Rick Porter, ka a leqa na luvedrau tagane yabaki 12 o Trey, ena dua na kama. E muri, ni sa kama vakaca sara tu na ligana kei na yavana ena nona sasaga yaloqaqa me vakabula na luvena, a qai vakadinadinataka o Holly ena soqoni ni sakaramede na vakacegu kei na reki sa sovaraka na Turaga ena nodratou matavuvale ena gauna ni yaluma, ni vakayagataka na vosa me vaka na cakamana, vakasakiti, kei na veivakurabuitaki.

iVakatakilakila

Roqoti ni liga dauveivakabulai.

Na lolosi sega ni vosoti rawa ni tina talei oqo a vakaisosomitaki vakatotolo sara ena vakacegu veirawai ni yaco mai vua na vakasama oqo: “E sega ni ligaqu a veivakabulai, oya na ligana na iVakabula. E nona na iVakabula na liga oya! Au sega ni raica na we ni noqu mavoa me ivakananumi ni ka au a sega ni rawata, au nanuma na we ni nona mavoa na iVakabula.”

Na nona ivakadinadina bula o Holly sa vakayacori kina na nona yalayala na parofita: “Ni o vakasama vakaselesitieli, o na raica na veivakatovolei kei na veisaqasaqa ena dua na rarama vou.”¹⁷

E kaya o Elder D. Todd Christofferson: Au vakabauta ni bolebole meda qaqa ka tubu mai na veika dredre, e taleitaki vei keda ni vakaraitaka na Kalou na Nona ituvatuva ni veivueti ena vuravura taumada. E dodonu meda torova yani na bolebole oqori ni kua ena noda kila ni na tokoni keda na Tamada Vakalomalagi. Ia sa ka bibi sara meda golevi Koya. Ni sega na Kalou, na veika rarawa ka dredre eda sotava ena vakavuna na yalolailai, mosi, kei na yalorarawa.”¹⁸

Me levei na butobuto ni duiyaloyalo ka kunea na vakacegu, inuinui, kei na reki cecere sara mada ga ena gauna ni bolebole dredre ni bula, au wasea e tolu na ivakavuvuli vakalou ena veisureti.

E dua na—vakabauta kaukauwa cake e yaco mai ena noda vakaliuci Jisu Karisito.¹⁹ “Drau vakararavi tikoga mai vei au ena vakasama kece, kakua ni vakatitiqa, ka kakua ni rere.”²⁰ E vakavulica o Peresitedi Nelson:

“Na [noda] bula tawamudu e vakatau ena [noda] vakabauti [Karisito] kei na Nona Veisorovaki.”²¹

“Niu lako curuma tiko na mosi levu ka vu mai na noqu mavoa, au sa vakila na vakavinavinaka titobu vei Jisu Karisito kei na isolisoli tawavakamacalataki rawa ni Nona Veisorovaki. Vakasamataka mada! Na iVakabula a sotava na “mosi kei na veivakararawataki kei na veivakatovolei kecega” me rawa kina ni vakacegui keda, vakabulai keda, ka vueti keda ena gauna eda gadreva kina.”²²

Na noqu mavoa sa vakavuna meu dau vakananuma vakawasoma “na nona cecere na Yalosavasava ni Isireli.’ Ena noqu bula cake tiko mai, na Turaga sa vakaraitaka na Nona kaukauwa vakalou ena veisala e veivakacegui ka matata.”²³

“Dou na kunea e vuravura na rarawa: ia mo dou vakacegu; au sa vakamalumalumutaki vuravura.”²⁴

E Rua—na inuinui cecere e yaco mai ena noda raitayaloyalotaka na keda icavacava tawamudu.²⁵ Ni tukuni na kaukauwa e dau salavata kei na maroroi ni “dua na raivotu ni nona veivakalopugatataki yalataki na Tamada …ka tu e matada voleka ni veisiga kece,” e vakadinadinataka o Sister Linda S. Reeves: “Au sega ni kila na vuna e levu tu ga kina na noda vakatovolei, ia na noqu nanuma ni na cecere na kena isau, sa tawamudu ka tawayalani, sa ka rekitaki sara ka sega ni da kila rawa ni yaco mai noda siga ni veisaumi, eda na vakila meda kaya vua na Tamada dauveivueti ka dauloloma, ‘Sai koya kece beka ga o ya e a gadrevi?“ Me na vakacava kina … na veika eda sotava eke kevaka ni sa oti na veika kece, na veivakatovolei oya … eda na vakadonui kina ena bula tawamudu … ena matanitu ni Kalou?”²⁶

A wasea o Peresitedi Nelson na vakasama oqo: ”Vakasamataka mada na ka a tukuna na Turaga vei Josefa Simici ena nona a masuta na veivakacegui ena valeniveivesu e Lipati. Na Turaga a vakavulica vua na Parofita ni ivakarau voravora a sotava ena solia vua na yalomatua ka na vinaka cake kina. “Ia kevaka ko sa vosota rawa,” a yalataka na Turaga, “ena vakacerecerei iko cake na Kalou.” Na Turaga a vakavulici Josefa tiko me vakasama vakasilesitieli ka me raitayaloyalotaka tiko edua na icocovi tawamudu ka kua ni vakanamata ki na veika dredre e yaco tiko.”²⁷

Na veisau ni ivakarau ni rai e kauta mai na savasava titobu cake vei Josefa, ka vakaraitaki ena ivola oqo vua e dua na itokani: “Ni oti na noqu sogo tu ena lalaga ni dua na valeniveivesu me lima na vula sa vaka vei au ni na malumalumu vakalevu cake tiko ga na yaloqu mai na kena ituvaki i liu. Au kila au na sega beka ni vakila me vaka ena gauna oqo kevaka au a sega ni sotava na veivakacalai au sa sotava.”²⁸

iKatolu—na kaukauwa cecere e yaco mai ena noda vakanamata ena reki.²⁹ Ena veiauwa bibi duadua na kena mosi ena tawamudu, a sega ni soreva na iVakabula a gunuva ga na bilo wiwi.³⁰ A cakava li vakacava? Eda vulica kina, “ena vuku ni reki sa tu e matana, a vosota na [Karisito] na kauveilatai,”³¹ na Lomana “sa tilomi ena Lomai Tamana.”³²

iVakatakilakila

Na Karisito e Kecisemani.

Na malanivosa oqo “tilomi” e tarai au vakalevu. A vakalevutaki na noqu taleitaka ena noqu kila ni vosa vaka-Sipeni, na “tilomi” e kena ibalebale na “laukana.” ena vosa vaka-Jamani, “lubata”; kei na vaka-Jaina, me virikovuti. Niu sa uabaleti ena bolebole ni bula, au a nanuma na yalayala vakasakiti ni Turaga--e “sega ni dodonu me da kune rarawa, vakavo me da tilomi, laukana, lubati, ka virikovuti ena rekitaki Karisito.”³³

Au raica vua e vuqa vei kemuni na reki oqo, ka “[uabaleta] … na kila ka vakatamata,”³⁴ e dina mada ni se bera ni kau tani na nomu bilo wiwi. Vinaka vakalevu na nomuni maroroya tiko na nomuni veiyalayalati ka tu me ivakadinadina ni Kalou.³⁵ Vinaka vakalevu na nomuni dolele mo ni vakalougatataki keimami kece, ena gauna e tu kina e “[lomamuni] na veika e tawa kilai.”³⁶ Ni gauna o kauta mai kina na veisereki ni iVakabula vei ira tale eso, o na kunea me baleti iko, e vakavuvulitaka o Peresitedi Camille Johnson.³⁷

Oqo ni mai lesu tale vata kei au ki na soqoni ni sakaramede eda vakadinadinataka kina na cakamana ni nona vakamareqeta na Turaga na matavuvale nei Holly Porter.³⁸ Niu vakananuma tiko vakatitobu mai na itutu ni vunau na cava meu tukuna meu vakaceguya kina na matavuvale yalodina oqo kei na nodratou itokani, a yaco mai na vakasama oqo: “Vakayagataka na nona vosa na iVakabula.”³⁹ Au na tinia nikua me vaka ena siga ni Vakacecegu oya, ena Nona vosa, ka vakabula na yalo mavoa oya.”⁴⁰

“Dou lako mai vei au koi kemudou vakaaduaga sa oca ka colata nai colacola bibi, ia kau na vakacegui kemudou.”⁴¹

“Ia au na vakamamadataka na icolacola dou sa vakacolati kina, mo dou kakua ni vakila e dakumudou, ena nomudou tiko vakabobula; … ia au na kitaka oqo mo dou kena ivakadinadina ka lako yani mo dou kila, ni koi Au na Turaga na Kalou, au sa dau sikovi ira na noqu tamata ena nodra vakararawataki.”⁴²

“Au na sega ni laivi kemudou mo dou luveniyali: au na lako mai vei kemudou.”⁴³

Ena reki vakarokoroko, au vakadinadinataka ni bula na iVakabula ka dei na Nona yalayala.⁴⁴ Vei kemuni o ni vakaleqai tu se “kune rarawa ena kena ivakarau cava ga,”⁴⁵ Au vakadinadinataka ni rogoca na Tamada Vakalomalagi na nomu vakatakekere⁴⁶ ena wai ni matamu ka na dau sauma ena vuku uasivi sara.⁴⁷ “Me qai solia tikoga vei iko na Kalou,” me vaka sa vakayacora kina neitou matavuvale ena veigauna keitou gadreva vakalevu kina, “that your burdens may be light,”⁴⁸ mo “vosota rawa na veika rarawa, ia meda marau ga ena vuku i Karisito.”³⁷ Ena yaca lagilagi i Jisu Karisito, emeni.