Koniferedi Raraba
E Lewa Matau na Turaga Me Tiko Vei Keda na Vola i Momani
Koniferedi Raraba ni Epereli 2024

E Lewa Matau na Turaga Me Tiko Vei Keda na Vola i Momani

Mai vei Peresitedi Mark L. Pace

Peresitedi Raraba ni Matawilivola ni Sigatabu

Sa noqu masu nida wilika na iVola i Momani ena yabaki qo ena kauta mai na marau kei na veivakalougatataki vei keda yadua.

Kemuni na taciqu kei na ganequ, vinaka vakalevu na nomuni sasagataka tiko na wiliki ni volanikalou kei na Lako Mai, Mo Muri Au. Vinaka vakalevu na veika kece oni cakava tiko. Na kemu isema ni veisiga kei na Kalou kei na Nona Vosa ena vakavotukana. “O tara tiko na yavu ni dua na cakacaka cecere. Ia mai na veika lalai ena basika kina veika cecere.”1

Noda wilika na Nona ivakavuvuli na iVakabula ena ivolanikalou ena vukea na kena veisautaki na noda itikotiko me imamaroi ni vakabauta kei na ivatavata ni vuli kosipeli.2 Ena sureta na Yalotabu kina nomu loma ni vale. E vakasinaita na Yalo Tabu na yaloda ena marau3 ka veisautaki keda meda tisaipeli i Jisu Karisito.

Oti e vica vata na yabaki, noqu wilika voli na ivolanikalou vakatabui, keitou raica e dua na iyaloyalo balavu ni nona ivakavuvuli na Kalou vei ira na luvena ena vei tabagauna bibi ni wasei ni kosipeli.4

Ena veitabagauna, eda raica tiko mai e dua na ituvatuva tautauvata. E vakalesuia se vakaraitaka na Kalou na kosipeli i Jisu Karisito mai vei ira na Nona parofita. Nira muria na parofita na tamata era vakalougatataki. Ia, ni toso na gauna, eso na tamata e yaco koso tu na nodra rogoca tiko na vosa ni parofita ka vakayawaki ira tani mai vua na Turaga kei na Nona kosipeli. Oqo e vakatokai na vuki tani. A vakaraitaki taumada na kosipeli vei Atama, ia e so vei ira na luvei Atama kei Ivi a vuki tani mai vua na Turaga.5 Eda raica edua na ivakarau ni vakalesui mai kei na vuki tani me yaco tiko ena veitabagauna mai vei Inoke, Noa, Eparama, Mosese, kei eso tale.

Nikua, eda sa bula tiko ena tabagauna ni taucoko ni gauna.6 Oqo na itabagauna duadua koya na sega ni yalani ena vuki tani ni tamata.7 Sa ikoya na itabagauna oqo koya na lesu mai kina ena iKarua ni Lesu Mai na iVakabula o Jisu Karisito kei na Nona mai vakatulewa ena loma ni udolu na yabaki.

Na cava e duidui me baleta na itabagauna oqo? Na cava e vakarautaka na Turaga vei keda nikua, vakabibi ena gauna oqo, koya na vukea meda toro volekata na iVakabula ka sega ni laivi Koya?

Dua na isau ni taro e lako mai ena noqu vakasama oya na ivolanikalou—vakabibi na iVola i Momani: E Duatale na iVakadinadina kei Jisu Karisito.

Dina ni yalataka na Kalou ni na sega tale ni dua na vuki tani levu meda qaqarauna sara me kua ni yaco vakayadua vei keda na vuki tani—ka nanuma na veika e vakavulica o Peresitedi Russell M. Nelson, “Sa noda itavi yadua meda sasagataka noda tubu vakayalo.”8 Na vulici ni Vola i Momani, ni vaka eda cakava tiko ena yabaki oqo, e dau kauti keda vakavoleka vua na iVakabula—ka vukea me da tiko volekati Koya.

Eda tukuna na “vuli”ka vinaka oya baleta ni vakaraitaka tiko na noda sasaga. Ia eda sega ni dau vulica e veigauna eso na veika vou. Eso na gauna na wiliki ni Vola iVola i Momani e vakaraitaka tiko na noda via sema voleka tiko kei na Kalou nikua—vakani ni yalo, vakaqaqaco vakayalo ni bera ni da lako yani ki vuravura, se na noda vakasaqara na bula ni oti e dua na siga dredre eda sotava e vuravura.

Eda vulica na ivolanikalou me rawa kina Yalo Tabu, na qasenivuli levu, me vakatitobutaka na noda saumaki vua na Tamada Vakalomalagi kei Jisu Karisito ka vukei keda meda vakataki Koya vakalevu cake.9

Na veivakasama oqo, eda rawa ni taroga, “Na cava e vakatavulica vei au na Yalo Tabu na macawa oqo ena noqu vuli mai na iVola i Momani?” kei na “E rawa ni vakavolekati au vakacava na veika oqo vua na iVakabula?”

Era taro vinaka oqo meda na raica ena gauna ni vuli ivolanikalou e vale. Era taro vinaka talega ni tekitekivu ni kalasi e valenilotu ena Sigatabu. Ena vinaka cake na noda veivakavulici e valenilotu ena Sigatabu mai na noda vakavinakataka na noda vuli e vale ena loma ni macawa. Koya gona ena kalasi ni Sigatabu, “o koya e vunau kei koya sa ciqoma erau sa veivakatataki ka marau vata.”10

Oqo e vica na tikina e vakavotuia vei au na Yalotabu mai na noqu vuli tiko mai na iVola i Momani ena macawa qo:

  • O Nifai e vakavulici Jekope me “maroroi ira na peleti oqo ka vakadewataki ira sobu mai, na itabatamata kina itabatamata. Ia kevaka e so na ivunau tabu, se ivakatakila … se parofisai,” o Jekope me “ceuta, ena peleti oqo … ena vukudra na [nodra] tamata.”11

  • Qai vakadinadinataka o Jekope, “Keimami sa dauvakasaqara na [ivolanikalou], … sa tu vei keimami na ivakadinadina kece qo keimami sa rawata kina na inuinui, ka sa yaco me tawayavalati rawa na neimami vakabauta.”12

Na veitikina oqo e vakavuna meu nanuma mai na veika a tukuna o Nifai me baleta na peleti parasa:

“Ka keirau sa rawata mai na ivolatukutuku, ka vakawilika ka kunea ni sa talei sara; io, ka sa yaga vakalevu sara vei keimami, ka sa na rawa kina ni keimami maroroya na veivakaro ni Turaga vei ira na luvei keimami.

“O koya, a sa lewa yalomatua ni Turaga, me keimami kauta vata tiko kei keimami, ena neimami ilakolako ena lekutu ki na vanua yalataki.”13

Kevaka e yalomatua o Liai kei nona vuvale mera kauta voli na ivolanikalou, sa dodonu meda na yalomatua tale ga. Na talei kei na kaukauwa ni yalotabu e tiko ena ivolanikalou e tomani tiko ena rarama ni noda bula nikua.

Se sega ni dua na kawatamata mai na ivakatekivu me tu vakarawarawa vei ira na iVola i Momani kei na so tale na ivolanikalou eda sa marautaka tu nikua.14 Dina o Liai kei nona vuvale eratou vakalougatataki me ratou kauta tiko na peleti parasi ia e sega ni levu na kena lavetaki mera yadua kina valelaca! Na ilavelave bibi duadua ni iVola i Momani oya na nomu vaka iko. Na ilavetaki koya eda wilika.

Ena raivotu i Liai ni vunikau ni bula, vakavulica o Liai ni bibi na veika eda lakocuruma yadua vatakei na loloma ni Kalou. Ni oti na nona kania na vuanikau, a raici Saraia na watina o Liai, kei rau na luvena tagane o Nifai kei Semi, e rau tu yawa mai.

“Ka ratou duri tu ka vaka me ratou sega ni kila na vanua me ratou lako kina.

“Niu sa yalovi iratou,” tukuna o Liai, “kau a kaya talega yani vei iratou ena domo levu me ratou lako mai vei au, ka mai kania na vuanikau, ka sa gadrevi vakalevu duadua vei ira na vuanikau kecega.

“Ka sa yaco ni ratou sa lako mai vei au me rau mai kania na vuanikau.”15

Au taleitaka na nona ivakaraitaki vinaka ni kauwai dina vakaitubutubu. O Saraia, Nifai kei Semi eratou dau caka vinaka, ka bula dodonu. Ia na Turaga e vakarautaka e dua na ka vinaka cake sara, dua na e kamica me nodratou Ratou sega ni kila na vanua me ratou kunea kina, ia e kila o Liai. Sa qai kacivi ratou, ena “domo levu,” me lako kina vunikau ni bula ka kania na vuanikau. E matata na nona veituberi. E sega tale ni dua e lomatarotaro taka.

O au e dua a susugi cake mai vei rua na itubutubuna e dau kauwai dina.16 Noqu se cauravou lailai, rauta niu yabaki 11 se 12, a tarogi au na tinaqu, “Mark, o sa kila tiko, mai vua na Yalo Tabu, ni dina na kosipeli?”

Au kurabui ena nona taro. Au dau saga meu dua na “gone tagane vinaka,” au dau nanuma ni sa rauta oya. Ia na tinaqu, me vakataki Liai, e kila niu gadreva e dua na ka levu cake. Au gadreva meu cakacakataka meu kila vakai au.

Au sauma vua niu se bera ni ako curuma e dua na ka vaka oya. E sega ni kurabui o koya ni rogoca na noqu sau ni taro.

E qai kaya e dua na ka au na sega ni guilecava. Au se nanuma tiko na nona vosa me yacova mai nikua: “E vinakata na Tamada Vakalomalagi mo kilai iko vakataki iko. Ia o iko mo sasagataka. E gadreva mo wilika na iVola i Momani ka masulaka mo kila mai vua na Yalo Tabu. Na Kalou ena sauma na nomu masu.”

Ia, sebera niu se wilika na iVola i Momani. Au sega ni vakasamataka niu sa yalomatua me cakava. Ia e kila vinaka o tinaqu na veika e vinaka vei au.

Na nona taro e vakavurea vei au na gagadre meu kila.

Veibogi, au dau waqaca na cina e dela ni noqu imocemoce ka wilika vei rau na taciqu, e dua na iwase mai na iVola i Momani. Ka qai bokoca na cina, tekiduru e yasani loga ka masu. Au dau masu ena yalodina kei na gagadre dina au se bera vakadua ni vakayacora e liu. Au dau kerea vua na Tamada Vakalomalagi me vakatakila vei au na dina ni Vola i Momani.

Mai na gauna au tekivu wilika kina na iVola i Momani, au vakila ni kila na Tamada Vakalomalagi na noqu sasaga. Au vakila niu bibi vei Koya. Niu dau wilika ka masu, na yaloqu e lomaloma vinaka ka kune vakacegu. Vei wase ni vola au wilika, e tubu talega na kena caudre na noqu vakabauta. Me yacova na gauna, au sa qai kila na veika au vakila tiko oya na veivakadeitaki ni dina mai vua na Yalo Tabu.17 Au kila vakaidina ni iVola i Momani e dina, ka noda iVakabula o Jisu Karisito e vuravura taucoko. Au vakavinavinakataka na nona veisureti veivakauqeti nei tinaqu.

Na veika au vakila ena wiliki ni iVola i Momani noqu se cauravou kina e tekivuna e dua na ivakarau ni vulici ni volanikalou ka vakalougatataki au tu me yacova mai na siga nikua. Au se dau wilika tiko ga na iVola i Momani ka tekiduru meu masu. Na Yalo Tabu e vakadeitaka tiko ga vei au ena veigauna na kena dina.

E cavuta donu o Nifai. E lewa yalomatua ni Turaga, meda kauta vata tiko kei keda na ivolanikalou ena noda bula kece. Na iVola i Momani e “vatudei” e cakava me duidui kina na itabagauna oqo mai na veitabagauna sa oti. Nida wilika na iVola i Momani ka muria na noda parofita bula, ena sega ni yaco na vuki tani ena noda bula.18

Na veisureti moni lako mai k na vunikau ni bula ka tautauri matua kina vosa ni Kalou e sega wale ga ni veisureti mai vei Liai kina nona vuvale, ka sega talega ni nona veisureti na tinaqu vei au meu wilika ka masulaka na dina ni Vola i Momani. E nona veisureti tale ga na noda parofita, o Peresitedi Russell M. Nelson, vei keda yadudua.

Au yalataka ni o ni vulica ena masumasu na iVola i Momani e veisiga o ni na dau vakatauca na lewa vinaka cake—e veisiga. Au yalataka ena nomuni vakasamataka vakatitobu na veika oni vulica, ena tadolavi na katubal ni lomalagi, ona ciqoma na isau ni nomu taro kei na idusidusi ena nomu bula. ”19

Sa noqu masu nida wilika na iVola i Momani ena yabaki qo ena kauta mai na marau kei na veivakalougatataki vei keda yadua ena vakavolekati keda vua na iVakabula.

E bula na Tamaqu Vakalomalagi. O Jisu Karisito e noda i Vakabula ka Dauveivueti. Na iVola i Momani e tiko kina na Nona vosa ka vakaraitaka na Nona loloma. O Peresitedi Russell M. Nelson e nona parofita bula na Turaga e vuravura edaidai. Au kila ni dina na veika oqo baleta ni vakadeitaka vei au na Yalo Tabu, na ivakadinadina oqo au ciqoma taumada ena noqu wilika na iVola I Momani niu se cauravou. Ena yacai Jisu Karisito, emeni.

iDusidusi

  1. Vunau kei na Veiyalayalati 64:33

  2. Na veilewenivuli vou tokona na Lotu e kena usutu na vuvale sa rawa me vakaukauwataka na matavuvale, ni ra muria vakayalomatua ena qaqarauni me vakavoutaki kina nodra itikotiko me vanua tabu ni vakabauta. Au yalataka ni ko cakacaka vagumatua mo vakatura vou nomuni itikotiko me vale ni vuli kosipeli, ena yaco na nomuni Siga ni Vakacecegu me ka rekitaki vakaidina. Era na nanamaki na luvemuni mera vulica ka bulataka na ivakavuvuli ni iVakabula, ka me na yaco na veiuqeti nei vu-ni-meca ena nomuni bula kei na nomuni itikotiko me malumalumu. Na veisau ena nomu vuvale ena yaco me gumatua ka veitokoni” (Russell M. Nelson, “Mo iVakaraitaki Uasivi ni Yalododonu Edaidai,” Liaona, Nov. 2018, 113).

  3. “E dina, e dina, au sa kaya vei iko, au sa solia vei iko na noqu Yalo Tabu, ia ena vakavukui iko ko koya ka vakasinaiti iko ena marau” (Vunau kei na Veiyalayalati11:13).

  4. “Oqo e dua na tabagauna ena digitaka ga kina na Turaga e dua na italai sa vakadonuya ena vuravura oqo sa tu vua na matabete tabu ka sa soli vua na ilesilesi vakalou me vakatakila, se kaburaka raraba, na kosipeli kivei ira na lewei vuravura.” (Topics and Questions, “Dispensations,” Gospel Library).

  5. Raica na Mosese 6:12–16

  6. Na parofita o Taniela a raica na gauna oqo, na noda tabagauna, nona a vakadewataka kina na tadra nei Tui Naibukanesa. Na Lotu i Jisu Karisito ni Yalododonu Edaidai sa ikoya na vatu ena tadra oya, na vatu a kavida mai na ulunivanua sega ni ta ena liga sa qiqi yani me vakasinaita na vuravura taucoko (raica na Taniela 2:34-35, 44–45; Doctrine and Covenants 65:2).

  7. “Erau sa qai lesia na Kalou na Tamada kei Jisu Karisito na Parofita o Josefa Simici me parofita ni itabagauna oqo. Sa vakalesui kece mai vua na kaukauwa vakalou ni veitabagauna sa oti. Na itabagauna oqo ni taucoko ni gauna ena sega ni yalani ena gauna se vanua. “Ena sega ni tini ena vuki tani, ia ena roboti vuravura,” (Russell M. Nelson, “The Gathering of Scattered Israel,” Liaona, Nov. 2006, 79–80).

  8. Russell M. Nelson, “Vosa iDola,” Liaona, Nove. 2018, 8.

  9. Raica na “Sa Noda Lalawa na Saumaki,” Lako Mai, Mo Muri Au—Me Baleta na iTikotiko kei na Lotu: iVola i Momani 2024, v.

  10. Vunau kei na Veiyalayalati 50:22raica talega na tikina e 17–21

  11. Jekope 1:3–4.

  12. Jekope 4:6.

  13. 1 Nifai 5:21–22.

  14. A kacivaki tiko ga oqo ni 200 na milioni ni Vola i Momani e sa lavetaki ka veisoliyaki ena loma ni tabagauna oqo. Sa dua dina na ka vakasakiti. Sa vakadewataki na iVola i Momani ki na 113 na veimataqali vosa, ka sa sivia e 17 tale na vakavakadewa vou e sa vakarau tiko me tekivu. Sa dua na veivakalougatataki ni sa tabaki tu na iVola i Momani, tiko ena biau livaliva, katoni me vakarogoci, saravi, kei na vei sala tale eso. (Raica na Ryan Jensen, “Church Distributes 200 Millionth Copy of the Book of Mormon,” Church News, Dec. 29, 2023, thechurchnews.com.)

  15. 1 Nifai 8:14–16; vakamatatataki.

  16. “Na veiuqeti kaukauwa vakayalo ena bula ni dua na gonelailai sa ivakaraitaki dodonu ni itubutubu kei na budra kei na tukadra na gone era maroroya ena yalodina na nodra dui veiyalayalati tabu. O ira na itubutubu sa nakita mera vakavulica na luvedra mera vakabauta na Turaga o Jisu Karisito mera na “kila kina na ivurevure me ra rai kina me bokoci kina na nodra ivalavala ca” [2 Nephi 25:26]. Na maroroi tu vakawelewele ka vakaveitalia na veiyalayalati ena mua ki na vakawelewele vakayalo. Na vakacacani vakayalo oqo sa dau yaco vakavuqa vei ira na luveda kei na makubuda. ” (Kevin W. Pearson, “ [Are You Still Waiting],” Liaona, Nov. 2022, 69).

  17. Raica na Vunau kei na Veiyalayalati 6:22–24.

  18. Me baleta na iVola i Momani, e a kaya na parofita ko Josefa Simici: “Au a tukuna vei ira na veitacini ni iVola i Momani e ivola dodonu duadua e vuravura, ka vatu ivakadei ni noda lotu, ka na toro voleka cake vua na Kalou e dua na tamata ena nona muria na kena ivakavuvuli mai na dua tale na ivola.” (ena introduction to the Book of Mormon).

  19. Raica na Russell M. Nelson, “Na iVola i Momani: Ena Vakaivei Beka na Nomu Bula Kevaka e SegaLiaonaNove. 2017, 60.