Tucake! E Kacivi Iko o Koya

Ena dua na gauna sa oti au a tarogi watiqu, “E rawa beka nio tukuna vei au na vuna, me vaka au nanuma rawa, e sega vakadua ni dua na leqa levu ena nodaru bula?”

A raici au mai ka kaya, “Donu! Au na wasea na vuna e sega ni keitou dau sotava kina na dredre lelevu; baleta ni sa rui lekaleka na nomu vakananuma!”

Na nona isaunitaro totolo vuku oya a vakavuna meu qai kila tale kina ni bulataki ni kosipeli i Jisu Karisito e sega ni kauta laivi na mosi kei na veivakatovolei, ka ra sa gadrevi me rawa kina na tubu.

Na kosipeli e sega ni dua na sala me levei kina na bolebole kei na leqa ia e iwali ni kena vakalevutaki na noda vakabauta ka vulica na sala me da sotava kina.

Au vakila na dina oqo ena vica na vula sa oti niu taubale voli ena dua na siga ka vakasauri ga na kena buwawa, butobuto, ka veilecayaki mai na noqu rai. Au a rere. Oti, era qai tukuna vei au na vuniwai, “Kevaka o sega ni tekivu qaravi vakatotolo, ena rawa ni yali na nomu rai ena loma ga ni vica na macawa.” Au sa qai rere ga vakalevu.

Oti, era qai kaya, “O na gadreva na icula ni mata—me culai sara ga na yaloka ni mata—ni tadola levu tu—ena vei va na macawa, ena vo ni nomu bula.”

Oqori e dua na vei-vakayadrati ka sega sara ga ni logaloga vinaka.

A qai yaco mai e dua na vakasama ena dua na taro. Au a tarogi au, “ Sa vinaka! Sa sega ni vinaka na noqu rai vakayago, ia vakacava na noqu rai vakayalo? Au na gadreva beka kina e dua na veiqaravi? Ka cava na kena ibalebale me matata na noqu rai vakayalo?”

Au vakasamataka vakatitobu na italanoa ni dua na tamata mataboko, na yacana o Patimeo, ka vakamacalataki ena kosipeli i Marika. E kaya na ivolanikalou, “Ia ni sa rogoca ko koya ni sai Jisu na kai Nasareci, sa tekivu me kaci, ka kaya, i Jisu, na Luve i Tevita, ni lomani au mai.”¹

Vakararaba, e matadra na lewevuqa, o Jisu a luvei Josefa ga, ia na cava a qai kacivi Koya kina o Patimeo me “Luve i Tevita”? Baleta ga ni kila o koya ni o Jisu dina na Mesaia, ka a parofisaitaki me sucu mai vaka dua na kawa i Tevita.²

E ka taleitaki ni tamata mataboko oqo, ka sega ni rai rawa vakayago, a kilai Jisu mai. A raica vakayalo na veika e sega ni raica rawa vakayago, ni lewevuqa tale era rawa ni raici Jisu vakayago ia era mataboko sara tu vakayalo.

Eda vulica vakalevu cake mai na italanoa oqo na rai matata vakayalo.

Eda wilika, “A ra sa lewevuqa era vunauci koya me tiko lo: a sa qai kaci vakalevu cake kina ko koya, Na Luve i Tevita, ni lomani au mai.”³

Era a tukuna kecega na tu wavoliti koya me galu, ia a tagi cake baleta ni kila o koya se o cei dina o Jisu. A sega ni kauwaitaka na veidomo oqori ka kaila vakadomoilevu cake sara.

A cakacaka ga o koya ka sega ni laiva me cakacakataki. Dina ga ni a yalani tu na nona ituvaki, a vakayagataka na nona vakabauta me lako sivita kina na nona ituvaki.

Okoya gona, na imatai ni ivakavuvuli eda vulica oya Me da raica matua tiko ga na rai matata vakayalo nida vakanamata vei Jisu Karisito ka dina tikoga kina veika eda kila ni dina.

Kemuni na taciqu kei na ganequ, me dei tiko ga na noda rai vakayalo, e dodonu me da vakatulewataka meda kua ni vakarorogo kina veidomo ni vuravura e wavoliti keda tu. Ena vuravura veilecayaki oqo sa dodonu meda yalodina tikoga kina veika eda kila, yalodina kina noda veiyalayalati, yalodina ena kena maroroi na ivakaro, ka vakadeitaka na noda vakabauta, vakaukauwa cake sara, me vaka a cakava na tamata oqo. E gadrevi meda kacivaka vakadomoilevu cake sara na noda ivakadinadina ni Turaga i vuravura. Na tamata oqo a kilai Jisu, yalodina tu ga ena nona vakabauta, ka sega ni vagolei tani mai na veidomo a wavoliti koya tu.

E vuqa tu na domo nikua era tovolea tiko mera tabonaka na domoda ni da tisaipeli i Jisu Karisito. Era tovolea tiko na domo ni vuravura me ra vagalui keda, ia oqori sara ga na vuna e dodonu meda vakaraitaka kina na noda ivakadinadina me baleta na iVakabula ena domo levu ka vakaukauwa cake. Ena kedra maliwa na domo kecega ni vuravura, sa vakararavi tiko na Turaga vei iko kei au meda kacivaka na noda ivakadinadina, laveta cake na domoda, ka yaco meda sa Domona. Kevaka eda sega ni cakava oqori, o cei ena qai vakadinadinataki Jisu Karisito? O cei ena cavuta na Yacana ka kacivaka na Nona ilesilesi vakalou?

E tiko e dua na noda itavi vakayalo e lako mai na noda kilaka me baleti Jisu Karisito.

Ia na cava a qai cakava o Patimeo ni oti oya?

Ena ivakaro ni Turaga me tucake, a cakacaka tale o koya ena vakabauta.

E kaya na ivolanikalou, “A sa biuta na nona itutuvi ko koya, ka tucake, ka lako vei Jisu.”⁴

Na tamata yalomalumalumu ka yalodina oqo a kila ni rawa ni tucake kina dua na bula vinaka cake ena ivakaro nei Jisu. A kila tu ni vinaka cake o koya mai na ituvaki ni nona bula, ka imatai sara ga ni ka a cakava ena nona rogoca ni kacivi koya o Jisu oya me biuta laivi na nona kote ni daukerekere.

Vakadua tale a cakacaka ga o koya ka sega ni laiva me cakacakataki.

A rairai vakasamataka beka, “Au sa sega tale ni qai gadreva na ka oqo, ni sa lako mai oqo o Jisu ki na noqu bula. Oqo e dua na siga vou. Au sa oti ena bula ni rarawa oqo. Vata kei Jisu sa rawa meu tekivuna e dua na bula vou ni marau kei na reki Vua, vata kei Koya, ka ena Vukuna. Au sega ni kauwaitaka na ka e nanuma o vuravura me baleti au. Sa kacivi au tiko o Jisu, ka na vukei au o Koya meu bulataka e dua na bula vou.”

Sa dua dina na veisau vakasakiti!

Ni sa biuta laivi na nona kote ni daukerekere, a kauta laivi kina o koya na iulubale kece sara.

Ka sa ikoya oqo na ikarua ni ivakavuvuli: Eda maroroya e dua na rai matata vakayalo nida biuta tu mai na tamata vakayago, veivutuni, ka tekivuna e dua na bula vou vei Karisito.

Na sala me caka kina oya ena noda cakava ka maroroya na veiyalayalati me da tucake kina dua na bula vinaka cake ena vukui Jisu Karisito.

Kevaka eda dau vakaiulubale me da lomalomani keda, lomalomana na noda ituvaki kei na leqa kei na veika ca kece e yaco tiko ena noda bula, kei ira kece sara mada ga na tamata ca eda nanuma ni vakararawataki keda, eda se taubena tikoga na kote ni daukerekere e tabada. E ka dina ni so na gauna era dau vakararawataki keda na tamata, ni ra nakita se sega. Ia e dodonu meda vakatulewataka meda cakacakataka noda vakabauti Karisito ena noda kauta laivi na kote ni vakasama kei na lomada ka se tu vei keda meda vunitaka kina na ulubale se ivalavala ca ka biuta laivi, nida kila tiko ni na rawa ka na vakabulai keda o Koya.

E sega sara ni dua na iulubale vinaka me da kaya, “Oi au sai au tu ga baleta eso na ituvaki rarawa ka sega ni vinaka. Kau sega ni rawa ni veisau, kau sa vakadonui kina.”

Keda vakasama va oqori, eda sa lewa kina meda na cakacakataki.

Eda maroroya tiko ga kina na kote ni daukerekere.

Na cakacaka ena vakabauta e kena ibalebale meda vakararavi vua na noda iVakabula, ka vakabauta ni mai na Nona Veisorovaki, eda na rawa ni ulabaleta na veika kecega, ena Nona ivakaro.

Na ikatolu ni ivakavuvuli e tiko ena iotioti ni va na vosa: “a lako [o koya] vei Jisu.”

E rawa vakacava ni lako vei Jisu ni mataboko tu? Na sala duadua ga oya me lako vei Jisu me rogoca na Domona.

Ka sa ikoya oqo na ikatolu ni ivakavuvuli: Eda maroroya e dua na rai matata vakayalo nida rogoca na domo ni Turaga, ka vakatara Vua me tuberi keda.

Me vaka ga na nona kaci ulabaleta na veidomo era wavoliti koya tu, a rawa vua na tamata oqo me vakarorogo ki na domo ni Turaga ena maliwa ni veidomo tale eso.

Oqo na vakabauta vata ga a vakatarai Pita me lako e dela ni wai kevaka e vakanamata tikoga vakayalo vua na Turaga ka sega ni vagolei tani mai na cagi ka wavoliti koya tu.

Sa qai mai cava na italanoa ni tamata mataboko oqo ena vosa “sa rai rawa sara ko koya, ka sa muri Jisu ena gaunisala.”⁵

E dua na lesoni bibi duadua ena italanoa oqo oya ni vakayagataka na tamata oqo na vakabauti Jisu Karisito dina ka ciqoma kina e dua na cakamana baleta ni a kerea ena inaki dina, na inaki dina me muri Koya.

Ka sa ikoya oqo na inaki cecere duadua ni veivakalougatataki eda ciqoma ena noda bula, o ya meda muri Jisu Karisito. E sa baleta na noda kilai Koya, cakava ka maroroya na veiyalayalati kei na Kalou baleti Koya, veisautaka na keda ituvaki sara ga ena Vukuna, ka vosota me yacova na ivakataotioti ena noda muri Koya.

Vei au, na maroroi ni dua na rai matata vakayalo e sa baleta kecega na vakanamata vei Jisu Karisito.

E vaka kina na makare ni mataqu vakayalo ni culai na mataqu?? Ia, ocei o au meu vosa kina? Ia au vakavinavinakataka na ka au raica.

Au raica vakamatata na liga ni Turaga ena cakacaka tabu oqo vakakina ena noqu bula.

Au raica na nodra vakabauta e lewevuqa ena vanua cava ga au lakova kina e vaqaqacotaka na noqu vakabauta.

Au raici ira na agilosi era wavoliti au tu.

Au raica na nodra vakabauta e lewevuqa era sega ni raica vakayago na Turaga ia era kilai Koya vakayalo, baleta ni ra kilai Koya vakavoleka sara.

Au vakadinadinataka ni kosipeli oqo sa isau ni veika kecega, baleta ni o Jisu Karisito sa isau ni tamata kecega. Au vakavinavinakataka na veika au raica rawa niu muria na noqu iVakabula.

Au yalataka ni da rogoca na domo ni Turaga ka vakatarai Koya me dusimaki keda kina ena sala ni veiyalayalati kei na iVakabula, eda na vakalougatataki ena rai makare, kilaka vakayalo, kei na veivakacegui ni yalo kei na vakasama ena noda bula taucoko.

Meda qai kacivaka na noda ivakadinadina me baleti Koya, me rogo levu cake mai na domo e wavoliti keda, ena dua na vuravura e gadreva tu me rogoca vakalevu cake na veika baleti Jisu Karisito ka sega ni vakalailai ga. Meda sa qai kauta laivi na kote ni daukerekere eda se dara tiko beka, ka tucake ulabaleti vuravura kina dua na bula vinaka cake ena vukui Karisito. Meda sa biuta laivi na iulubale kece sara meda kakua ni muri Jisu Karisito ka kunea na vuna vinaka kece meda muri Koya kina nida rogoca na Domona. Sa noqu masu oqo ena yaca i Jisu Karisito, emeni.