Alang sa Labing Ikaayo sa Zion

Atol sa tingpamulak ug sa ting-init sa 1870, mikatap ang simpling pagpamuyo gikan sa Siyudad sa Salt Lake ngadto sa mga Relief Societies sa tibuok teritoryo—bisan sa rural nga mga kumunidad diin ang mga Santos nagpakabuhi na og yano. Matinguhaon nga makaapas sa ilang kaigsoonan diha sa siyudad, si Presidente Elizabeth Stickney ug ang kababayen-an sa Relief Society sa Santaquin mipahigayon og usa ka piknik diha sa ilang eskwelahan nga panimalay. Nag-andam sila og yanong pagkaon nga kapihon [brown] nga pan ug sinabaw nga monggos, nalingaw sa panag-uban sa usag usa, ug mirolyo og bayente ka bangan nga yarn alang sa hinimo sa balay nga panapton.¹

Ang panginahanglan sa pagpasayon sa pagpakabuhi nahimo nga mas kinahanglanon human ang paghugpa sa mga lukton nga mihasi sa mga pananom sa mga Santos sa daghang mga pinuy-anan. Diha sa usa ka tigum pagka-Mayo sa Tulunghaan sa mga Propeta sa Siyudad sa Salt Lake, si George A. Smith nagbangutan nga pipila ra ka mga tawo ang naminaw sa gibalik-balik nga tambag sa Unang Kapangulohan sa pagpundo og bugas. Gitandi dayon niya ang mga lukton ngadto sa mga kritiko sa Simbahan diha sa lokal ug nasyunal nga pangagamhanan.

“Adunay daghan kinsa nakapahimulos sa pagdaut ug pagkuha unsay naa sa mga Mormon,” matud pa niya. “Determinado sila nga mopadala og mga sundalo dinhi aron sa pagguba kanato, ug pagkatag kanato, ug hingpit nga laglagon ang atong mga pinuy-anan, apan dili kini makaprobar nga ang atong relihiyon dili tinuod.”

Uban sa Cullom Bill nga anaa ubos sa pagrepaso diha sa Senado, ang mga magbabalaod sa nasud nagtutok diha sa mga Santos. Mituo si George nga ang mga kritiko sa Siyudad sa Salt Lake naningkamot nga ang mga opinyon sa publiko mobatok sa Simbahan, busa mitambag siya sa mga kalalakin-an sa tulunghaan sa pagpailub ug magmaalamon ug dili mopasilo og tawo. Mipasidaan usab siya kanila sa dili pagpangita sa mga dautang tawo nga mangulo sa mga Santos.²

Bisan og wala mahisguti ni George ang mga ngalan nilang William Godbe ug Elias Harrison, sila ang usa sa mga kalalakin-an nga anaa sa iyang hunahuna. Human sa pag-organisar sa ilang Simbahan sa Zion, si William ug Elias namulong kabahin sa usa ka “Nagsingabut nga Tawo” kinsa mangulo sa ilang Bag-ong Kalihokan. Si William nakig-istorya ni Joseph Smith III, tingali aron sa pagkuha sa iyang pagkapangulo, apan wala moapil si Joseph sa ilang kawsa.³

Nianang tingpamulak, hinoon, si Amasa Lyman mipahibalo sa iyang desisyon sa pag-apil sa Simbahan sa Zion, diha-diha dayon nakamugna kini og hungihong nga siya ang mangulo niini. Si Amasa gi-release gikan sa Korum sa Napulog Duha niadtong 1867 tungod sa apostasiya, ug pipila ka mga tawo ang nasurprisa sa dihang mihangop siya sa Bag-ong Kalihokan. Apan ang iyang kinamagulangang anak, si Francis Lyman, walay masulti sa dihang nahibaloan niya ang desisyon sa iyang amahan. Misulay siya sa pagpakig-istorya kang Amasa apan wala madugay nawad-an gayud sa kadasig sa pagpakiglalis. Mipahawa siya sa kwarto ug mibakho sulod sa pila ka oras.⁴

Gidasig ni Brigham ang mga sakop sa Tulunghaan sa mga Propeta nga pasagdan ang mga samokan ug likayan ang pagpanaway kanila. Sa kasamtangan, nanumpa siya sa pagpadayon sa pagpalig-on sa gingharian sa Dios. “Akong tumong ang paggamit sa akong impluwensya sa pagpalig-on sa Israel hangtud si Jesus maghari kansang katungod mao ang paghari,” namahayag siya.

Pagka-Hulyo, mihangyo siya sa mga kalalakin-an diha sa Tulunghaan sa mga Propeta sa pagpaambit sa ilang panglantaw kabahin sa Pag-ula ni Jeuskristo. Human maminaw sa ilang mga pagpamatuod, mihatag siya og pagsaksi sa sakripisyo sa Manluluwas ug miila sa kakuyaw nga atubangon sa mga Santos, lakip sa pagkawala sa pagbati sa kanhing maunungong mga miyembro. “Atong naangkon ang ebanghelyo,” miingon siya, “apan kon kita nagpaabut sa mga benepisyo niini, kita kinahanglan gayud nga magpakabuhi sa mga pagtulun-an niini.”

Miawhag siya sa kalalakin-an sa pagsunod sa tambag sa mga sulugoon sa Ginoo, nagsaad nga ang Dios mopanalangin kanila kon buhaton nila.⁵

---

Nianang ting-init, si Martin Harris miabut ngadto sa Utah diha sa riles sa transcontinental. Human makahibalo sa tinguha ni Martin sa pag-adto sa kasadpan, si Brigham Young matinguhaon nga motabang sa tawo kinsa mihatag og dako kaayong panahon ug salapi ngadto sa Simbahan sa nangagi. Mihangyo siya ni Edward Stevenson, usa ka eksperensyado nga misyonaryo, sa pagkolekta og mga donasyon alang ni Martin ug dayon tabangan ang tigulang nga makahimo sa pagbiyahe og layo gikan sa Kirtland. “Pabiyahia siya,” misugo si Brigham, “bisan kon gikinahanglan kuhaon ang katapusan nakong dolyares.”⁶

Ang pag-abut ni Martin nakamugna og pag-ukyab diha sa Siyudad sa Salt Lake, bisan og dili siya ang unang kanhi miyembro sa Simbahan nga moabut sa teritoryo. Si Thomas Marsh, ang orihinal nga presidente sa Korum sa Napulog Duha, nabunyagan pag-usab ug miadto sa kasadpan sa nag-unang trese ka tuig , ang iyang kasingkasing napuno sa pagmahay tungod sa pagbiya sa Simbahan niadtong 1838. Ang kahimtang ni Martin isip usa ka saksi sa Basahon ni Mormon ang nakapalahi kaniya, bisan pa man. Sa edad nga otsintay siyete, siya ang usa sa katapusang buhi nga partisipante sa pipila sa nahaunang mga milagro sa bag-ong dispensasyon.⁷

Wala madugay human sa pag-abut diha sa siyudad, si Martin mibisita ni Brigham Young, ug ang propeta midapit kaniya sa pagpamulong sa tabernakulo niadtong Septyembre 4. Sa dihang miabut kanang adlawa, mibarug si Martin sa pulpito sulod sa traynta minutos ug hinayng namulong mahitungod sa iyang pagpangita sa kamatuoran atol sa mga relihiyusong pagpabalik sa ulahing bahin sa tuig 1810.⁸

“Ang Espiritu nagsulti kanako nga walay apilan sa mga simbahan, tungod kay walay usa nga adunay awtoridad gikan sa Ginoo,” mipamatuod siya. “Ang Espiritu misulti kanako nga mas baling ituslob nako ang akong kaugalingon sa tubig kay sa magpabunyag sa bisan unsa nga mga sekta, busa mipabilin ko hangtud ang Simbahan naorganisar ni Joseph Smith ang propeta.”⁹

Sa mga misunod nga semana, si Martin nahiusa pag-usab sa iyang asawa, mga anak, ug sa ubang mga sakop sa pamilya diha sa teritoryo. Ang Iyang magulang, si Emer, namatay sa miaging tuig didto sa Amihanang bahin sa Walog sa Cache Utah. Apan ang ilang nabyuda nga igsoon, si Naomi Bent, mipuyo sa Walog sa Utah. Niadtong Septyembre 17, miuban siya ni Martin ngadto sa Balay sa Pagtuga (Endowment House), diin si Edward Stevenson mibunyag pag-usab niya, pagkahuman si Orson Pratt, John Taylor, Wilford Woodruff, ug si Joseph F. Smith mikumpirmar kaniya pag-usab nga usa ka miyembro sa Simbahan. Si Martin ug Naomi gibunyagan dayon ug gikumpirmar alang sa pipila sa ilang mga katigulangan.¹⁰

Sa misunod nga bulan, si Martin mipamatuod sa kamatuoran nga gigikanan sa Basahon ni Mormon atol sa Oktubre nga kinatibuk-ang komperensya sa Simbahan. Human niana, si George A. Smith mibarug sa pulpito. “Pagkatalagsaon nga makabaton sa pagpamatuod ni Martin Harris,” miingon siya. “Ang Basahon ni Mormon, hinoon, adunay ebidensya niini. Ang saad natuman nga kadtong kinsa mobuhat sa kabubut-on sa Dios kinahanglan makahibalo sa doktrina nga kini tinuod.”

“Sa ingon,” matud pa niya, “ang Basahon ni Mormon adunay liboan ka mga saksi.”¹¹

---

Sa ulahing bahin sa Nobyembre 1870, si Susie Young mikanta ug mikaskas sa sista samtang nagbiyahe sa habagatan diha sa usa ka karwahe paingon sa St. George, usa ka pinuy-anan sa mga Santos diha sa habagatang Utah. Ang kauban niya sa pagsakay mao ang iyang inahan, si Lucy, ug ang manghud nga si sister Mabel. Milabay ang mga katuigan nga pagpuyo diha sa Lion House nga daghang nagpuyo, mibalhin sila ngadto sa usa ka panimalay nga ilahang kaugalingon didto sa St. George. Ang amahan ni Susie, si Brigham Young, nagsingabut usab ngadto sa habagatang bahin sa Utah, bisan og dili permanente. Karon dul-an setenta anyos na, nag-antus sa arthritis ug mipili nga igahen ang panahon sa tingtugnaw didto sa mas init nga klima sa St. George.¹²

Si Susie mikanta panagsa aron magaan-gaan ang pamati diha sa karwahe. Pagka-Oktubre 3, pila ka adlaw sa wala pa ang komperensya sa Simbahan panahon sa tinglarag, siya ug ang iyang dise-otso anyos nga igsoon, si Dora, hilom nga mibiya gikan sa kasaulogan sa adlawng natawhan sa iyang inahan aron makigkita sa pamanhunon ni Dora, si Morley Dunford. Silang tulo miadto dayon sa usa ka ministro nga usa ka Protestante—usa sa daghan karon nagpuyo diha sa walog—kinsa mikasal ni Dora ug Morley samtang si Susie nagtan-aw.

Alang ni Susie, ang pagtaban mura og butang nga anaa sa kulba hinam nga nobela o drama sa intablado. Apan nakapahugno kini sa iyang mga ginikanan. Si Dora nahimong sinayuran [engage] ngadto ni Morley sulod sa duha ka tuig. Ambongan siya ug naggikan sa usa ka pamilya nga matinud-anon nga Santos sa Ulahing adlaw nga mga magpapatigayon. Duna siyay problema sa pagka-pala-inom, hinoon, ug sila si Brigham ug Lucy wala magdahum nga pareson siya sa ilang anak nga babaye. Gani, usa sa rason nga gusto nilang ibalhin ang ilang mga anak ngadto sa St. George aron magkalagyo og tresentos ka milya si Dora ug Morley.¹³

Apan ang kaminyoon ni Dora nagpasabut nga dili siya mobalhin sa kasadpan uban sa iyang pamilya. Makita karon ni Susie kon unsa kaguol ang gibati sa ilang inahan. Bisan pa og si Lucy mokanta ug magpasiaw sa uban diha sa karwahe, mihulma sa iyang panagway ang iyang kaguol. Naningkamot si Susie nga abibahon ang iyang inahan, apan ingon og wala magsilbi.¹⁴

Hinungdan sa walay riles tali sa Siyudad sa Salt Lake ug St. George, ang biyahe sa habagatan mikabat og katorse ka adlaw diha sa gansangon nga karsada.¹⁵ Ang St. George nahimutang diha sa usa ka dakong walog sa sapa nga giumbawan sa batoon, pula nga mga pangpang. Sa usa ka paglibot sa dapit sa nag-unang mga dekada , si Brigham mitan-aw ngadto sa walog og nanagna nga usa ka siyudad ang mosulbong gikan niini, mga panimalay ug mga gambalay sa simbahan. Usa ka mubo nga panahon ang milabay, mipadala siya og usa ka apostol nga si Erastus Snow ug kapin sa tres syentos ka pamilya diha sa usa ka misyon ngadto sa dapit aron sa pagpananom og gapas, usa ka pananom nga miani og daghang kalampusan didto sa ubang pinuy-anan sa habagatang Utah.

Sukad niadto, ang mga Santos sa St. George nagkugi og maayo aron matuman ang panagna ni Brigham. Ang rehiyon grabe ang kainit hapit tibuok tuig, ug panagsa ra kaayo nga mag-snow. Duha ka dug-ol nga sapa, human kini gibuhatan og dam, nakahatag og igong tubig aron makapatubo sa mga pananom ug mga punoan nga mamunga taliwala sa desyerto. Kon moulan, usahay mobunok, ibanlas ang mga dam sa mga namuyo. Pangitaon usab kaayo ang troso, mao nga ang mga Santos magtukod gamit ang bato ug beka [adobe]. Daghan ang miabut aron mopuyo sa walog wala madugay mibiya human sila miabut. Kadtong mipabilin nagmalig-on sa paghupot sa ilang hugot nga pagtuo, misalig nga ang Ginoo motabang kanila nga matukod ang usa ka panimalay.¹⁶

Ang mga lumulupyo nakatukod og lapad nga karsada, pipila ka maanindot nga mga panimalay, usa ka balay-hukmanan, ug usa ka galingan sa gapas sa duol. Sa tunga-tunga sa lungsod, gitukod usab nila ang usa ka maanindot kaayo nga sandstone nga tabernakulo diin magkapundok sila ug mosimba.¹⁷

Sa dihang miabut na si Susie ug ang iyang pamilya didto sa St. George, mipahimutang sila sa usa ka komportable nga panimalay sa siyudad ug nakighimamat sa bag-ong mga silingan. Ang iyang amahan, sa kasamtangan, migahin og panahon sa paghunahuna sa mga panginahanglan sa pinuy-anan ug sa mga Santos sa bisan asang dapit. Ang templo sa Siyudad sa Salt Lake nagkinahanglan pa og mga katuigan una makompleto, ug ang Balay sa Pagtuga(Endowment House) nga pangalagaran og pipila ka mga ordinansa sa templo, maoy temporaryo nga sulbad alang sa tagdugay nga panginahanglan. Ang mga Santos nagkinahanglan og usa ka templo nga magamit, diin makahimo sila og mga pakigsaad uban sa Langitnong Amahan ug mopahigayon sa tanang gikinahanglan nga mga ordinansa alang sa buhi ug sa patay.¹⁸

Niadtong Enero 1871, sa wala pa giplano ni Brigham ang pagbiyahe og balik ngadto sa Siyudad sa Salt Lake, mitambong siya og usa ka konseho sa lokal nga mga lider sa Simbahan diha sa panimalay ni Erastus Snow, kinsa midumala sa tibuok Simbahan diha sa rehiyon. Samtang nagkaduol na ang miting, nangutana si Brigham sa mga kalalakin-an kon unsa ang ilang hunahuna mahitungod sa pagtukod og usa ka templo sa St. Greorge.

Milukop ang kalipay diha sa kwarto. “Himaya! Aleluya!” Misinggit si Erastus.¹⁹

---

Pagkahuman nga nakabalik si Brigham ngadto sa Siyudad sa Salt Lake, misulat siya ni Erastus mahitungod sa iyang mga plano alang sa bag-ong templo. Mas gamay kini ug minus ang adorno kay sa templo sa Siyudad sa Salt Lake. Ipagama kini gikan sa bato ug gifinishing ang sulod ug gawas. Sama sa templo didto sa Nauvoo, aduna kini usa ka tore nga ipabarug sa usa ka tumoy sa atop ug usa ka bunyaganan [baptismal font] diha sa silong.

“Manghinaut mi nga hiusahon sa mga Santos diha sa habagatan ang ilang mga paningkamot inubanan sa paghiusa sa kasingkasing ug sa hunahuna alang sa paghimo niining buhat,” misulat siya.

Si Brigham naglaum sa pagbalik ngadto sa St. George sa tinglarag aron masugdan ang pagtukod sa templo,²⁰ apan ang Simbahan sa laing bahin sa teritoryo nagkinahanglan sa ilang pagtagad sa kasamtangan. Sa miaging tuig, si Amasa Lyman nagsangyaw alang sa Simbahan sa Zion ug nagtambong og seances diin ang mga ritwal sa Espiritista miangkon nga nakig-istorya nilang Joseph ug Hyrum Smith, ni Chief Walkara, ug sa ubang mga Santos nga nangamatay na. Mitaho ang mga tawo nga nadungog ang mga saba sa panag-istoryahanay o nakita ang usa ka lamisa nga milutaw atol sa mga miting.²¹

Samtang ang mga ritwal sa espiritista nakadani pa og pipila ka mga Santos ngadto sa Bag-ong Kalihokan, kadaghanan nabalaka niini, ug ang Simbahan sa Zion wala madugay nagduhaduha. Sa higayon nga nakabalik na si Brigham sa Siyudad sa Salt Lake niadtong Pebrero 1871, ang Bag-ong Kalihokan dili kaayo usa ka relihiyosong organisasyon kaysa usa ka grupo sa mga tawo nga dunay managsamang tumong sa pagpaundang sa impluwensya sa Simbahan diha sa dapit.

Niadtong Abril, ang mga lider sa Bag-ong Kalihokan miusab sa ngalan sa ilang pamantalaan gikan sa Mormon Tribune ngadto sa Salt Lake Tribune. Dayon, pagka Hulyo, ilang gipahinungod ang Liberal Institute, usa ka luag nga balay tigumanan diin maghatag sila og mga wali, mopahigayon og mga ritwal sa espiritista, ug magtudlo ug mga tigum sa politikanhong Partido Liberal. Ang Bag-ong Kalihokan milampos usab sa pagdani sa mga kanhing higala ni Brigham nga sila T. B. H. ug Fanny Stenhouse, kinsa nag-ungaw na sa pagbiya sa Simbahan sulod sa pipila ka bulan.²²

Ang Bag-ong Kalihokan, hinoon, nakapakitag gamayng hulga sa Simbahan kay sa gibuhat ni James McKean, ang bag-ong gipili nga labawng maghuhukom sa Korte Suprema sa Utah. Si Huwes McKean determinado sa pagwagtang sa giisip nga teyokrasya diha sa Utah. Panahon sa iyang pagkapili, ang Cullom nga kontra dinaghan nga asawa nga balaudnon napakyas sa pagpasar diha sa Senado ug ang presidente sa Estados Unidos nga si Ulysses Grant mipadala ni McKean ngadto sa Utah aron panghingusgan ang gipatuman nga balaod nga kontra sa dinaghan nga asawa.²³

“Dinhi niining nasud ang usa ka tawo mahimong mosagop og bisan unsang relihiyon nga ikahimuot niya,” pamahayag ni Huwes McKean human sa iyang pag-abut, “apan walay tawo nga kinahanglan molapas sa atong balaod ug relihiyon ang irason.”²⁴

Sa tinglarag sa 1871, mga usa ka bulan sa wala pa niya giplano ang pagbalik ngadto sa St. George, nahibaloan ni Brigham nga si Robert Baskin, ang abogado sa Estados Unidos alang sa Utah ug usa sa mga tagsulat sa Cullom Bill, nagplano sa pagpasaka kaniya ug sa ubang mga lider sa Simbahan uban sa nagkadaiyang mga kremin. Usa ka kanhing miyembro sa Simbahan nga ginganlan og Bill Hickman miuyon pa gani sa pagpalambigit ni Brigham ug sa ubang mga lider sa Simbahan sa usa ka kasong pagpatay nga nahimo ni Bill panahon sa Gubat sa Utah sa nag-unang katorse ka tuig.²⁵

Si Bill Hickman usa na karon ka dakpunon tungod sa laing pagpatay, ug nakigsabot siya sa korte sa mopasaylo kaniya agi og bugti sa iyang pagpamatuod. Usa siya ka tawo nga malapason sa balaod kansang pulong dili gayud madawat sa walay dinapigan nga balauranan, ilabi na nga daghan nang ilado nga mga tawo nasayud sa katinuod sa krimen ug wala tuohi ang kalambigitan ni Brigham. Bisan pa man, si John Taylor, kinsa uban ni Joseph Smith sa bilanggoan sa Carthage, miaghat kang Brigham nga dili ibutang ang ilang kinabuhi sa mga kamot sa korte. Wala motuo nga mahitabo niya ang gidangatan ni Joseph, miingon si Brigham, “Lahi na kaayo ang mga panghitabo kon itandi sa una.”²⁶

Ang unang mga pasangil miabut niadtong Oktubre 2, sa dihang ang usa ka marshal sa Estados Unidos midakop kang Brigham tungod sa pagpuyo og subra sa usa ka babaye isip iyang asawa. Si Daniel Wells ug George Q. Cannon gipangdakop usab gumikan sa samang pasangil.

Ang mga pagpangdakop nagpakatap og daghang mga tabi-tabi. Gawas sa teritoryo, gibana-bana diha sa mga pamantalaan nga ang sibil nga gubat moulbo diha sa Siyudad sa Salt Lake ug gisumbong nga ang mga Santos nagpundo og mga pusil ug nagpwesto og usa ka kanyon diha sa tiilan sa kabukiran.²⁷ Sa pagkatinuod, ang mga kadalanan sa Siyudad sa Salt Lake malinawon. Ang mga lider sa Simbahan nakigtambayayong sa mga magbabalaod, ug ang mga abogado misugod sa pagpangandam alang ni Brigham sa pagtubag sa mga pasangil diha sa korte sa mosunod nga semana.²⁸

Sa dihang miabut na kana nga adlaw, nagkaguliyang ang sala sa korte. Liboan ang nanagbarug diha sa kadalanan sa gawas sa gambalay sa siyudad. Miabut si Brigham kinse minutos sa wala pa ang huwes ug mapailubon nga milingkod, ang iyang kakalma mipatak-om sa iyang mga kritiko.²⁹

Human miabut si Huwes McKean, ang mga abogado ni Brigham misulay sa pagpahunong sa pagdungog, mipasangil nga ang mga opisyal wala misunod sa tukma nga kahimoan sa dihang nagpundok sila og usa ka dakong paghukom nga walay mga miyembro sa Simbahan. Sa dihang gibalibaran ni McKean kini nga hangyo, ang mga abogado naningkamot sa pagpangita og sayop sa mismong sumbong, sa panghinaut nga ibasura ang tanan. Sa makausa pa ang huwes mibalibad sa ilang hangyo.³⁰

Atol sa pagdungog, si McKean mipadayag nga iyang nakita nga ang kaso dili isip usa ka pagsuta sa kainusente o pagkasad-an ni Brigham apan usa ka gubat tali sa mga pagpadayag sa mga Santos ug sa federal nga balaod. “Samtang anaa sa paghusay Ang Katawhan batok Brigham Young,” siya namahayag, “sa uban ug ang tinuod nga ulohan niini mao ang Awtoridad sa Federal batok Dinaghan nga Asawa nga Teyokrasiya.” Dili siya interesado nga mahimong huwes nga dunay paboran. Sa iyang panglantaw, ang propeta sad-an na.³¹

Naghunahuna nga ang paghusay dili na ma-iskedyol hangtud sa Marso, atol sa sunod nga termino sa korte, si Brigham mibiya padulong sa St. George og dul-an sa duha ka semana ang milabay. Pila ka adlaw human niadto, mga mando sa pagdakop gipagawas alang kaniya ug sa ubang mga lider sa Simbahan—niining higayuna mga tumo-tumo nga mga pasangil sa pagpatay.³²

---

Pagka Nobyembre 9,1871, human sa mga adlaw sa katugnaw ug mga pag-ulan-ulan, ang kalangitan sa St George mitin-aw ug hamugaway. Sa habagatang bahin lang sa lungsod, si Susie Young mibarug diha sa dakong pundok sa katawhan diha sa usa ka bag-ohay lang gi-survey nga lote sa siyudad diin ang mga Santos mipundok aron mag-ground breaking diha sa templo.³³

Si Brigham mihimo og pipila ka pagpakita sa publiko sukad sa pag-abut sa St. George nianang tinglarag. Uban sa balatian ug usa ka pagdungog sa korte nga iyang gihunahuna, kinahanglan siya nga magmatngon. Daghang tawo ang nahadlok nga ang mga marshal mosulay sa pagdakop kaniya ug modala kaniya balik sa Siyudad sa Salt Lake. Sa gabii, mipuyo siya sa balay ni Erastus Snow, diin ang armadong kalalakin-na nagbantay sa pagpanalipod kaniya.³⁴

Diha sa lote sa templo, naggunit si Susie og lapis ug notebook, andam sa pagsulat sa seremonya. Sa wala pa mobalhin sa St. George, nahimo siyang kinamaayohan nga estudyante sa usa sa mga stenographer sa iyang amahan, ug gipasigarbo niya ang pagkahimong tigbalita. Gikan sa iyang nahimutangan diha sa katawhan, makasulat siya sa tanang butang nga nanghitabo. Makakita ra kaayo siya sa iyang amahan ug inahan nga dug-ol kaayo nga nagbarug ug ang iyang igsoon nga si Mabel naggunit sa kamot sa iyang inahan.³⁵

Pagkahuman gikanta sa choir ang pangbukas nga himno, si George A. Smith miluhod og mihalad sa pagpahinungod nga pag-ampo, naghangyo sa Ginoo sa pagpanalipod sa propeta gikan sa iyang mga kaaway ug lugwayan pa ang iyang mga adlaw. Dayon mitan-aw si Susie sa iyang amahan ug sa ubang mga lider sa Simbahan nga nagsugod sa konstruksyon [ground breaking] nga nag-atubang sa habagatang silangan nga suok sa bloki.

Ang mga Santos miawit sa “Ang Espiritu sa Dios,” ug si Brigham mitungtong sa usa ka lingkuranan aron nga ang tanan makadungog kaniya nga mohatag og mga instruksyon alang sa “Singgit sa Hosana,” usa ka solemni nga abiba gihatag atol sa seremonya sa pagpahinungod ug sa pampublikong kalihokan sukad pa sa templo sa Kirtland.

Nagsunod sa iyang pagpangulo, ang mga Santos mipataas sa ilang tuo nga kamot ug misinggit og katulo ka higayon, “Hosana, hosana, hosana sa Dios ug sa Kordero!”³⁶

---

Pipila ka semana ang milabay, si Brigham nakadawat og pahibalo nga giiskedyul ni Huwes McKean ang iyang petsa sa korte alang sa Disyembre 4 bisan og nasayud siya nga ang propeta layo gikan sa Siyudad sa Salt Lake. Nagpanuko si Brigham sa pagbiya sa St George, hinoon, ug gisibog sa huwes ang petsa sa korte ngadto sa sayo nga bahin sa Enero. Sa kasamtangan, si Brigham mikonsulta sa iyang mga abogado ug mga tigtambag mahitungod sa unsay angay niyang buhaton. Nasayud siya nga siya dakpon sa higayon nga makabalik siya sa Siyudad sa Salt Lake, ug karon siya mas nabalaka mahitungod sa iyang siguridad kay sa una. Gusto siya og kasiguroan nga siya dili patyon samtang anaa sa kustodiya.³⁷

Mentras tanto, naghunahuna siya nga motago, sama sa gibuhat ni Joseph Smith didto sa Nauvoo. Ang pagpatay usa ka dakong sala, ug kon ang mapihigon nga hurado mosuta kaniya nga sad-an, mahimo siya nga patyon. Apan sa tunga-tungang bahin sa Disyembre ang iyang mga abogado miawhag kaniya sa pagbalik sa siyudad, masaligon nga luwas ra siya. Ang mga sakop sa Korum sa Napulog Duha ug ang ubang mga higala nagkabahin-bahin mahitugod sa maong butang, apan nagkauyon sila nga siya kinahanglan mobuhat kon unsay angay buhaton.³⁸

Usa ka gabii, nagdamgo si Brigham nga ang duha ka lalaki misulay sa pagdumala sa dakong panagtigum sa mga Santos. Sa iyang pagmata, nasayud na siya unsay kinahanglan niyang buhaton. “Murag akong gibati nga mopauli ug mopahigayon og tigum, uban sa tabang sa Dios ug sa akong mga kaigsoonan!” misulti siya sa iyang mga higala.³⁹

Sa iyang pagpadulong ngadto sa Siyudad sa Salt Lake, mihapit si Brigham diha sa usa ka gamay nga pinuy-anan aron magpalabay sa gabii. Ang mga Santos didto nangasuko tungod sa iyang pagpili nga moadto sa husay, nasayud nga siya hukman lang ni Huwes McKean nga sad-an. Gani dihay usa ka tawo nga mibakho sa dihang nahibaloan niya unsay tumong nga buhaton ni Brigham. Ang propeta nakasabut sa iyang gikahadlokan, apan nasayud siya sa hustong dalan nga iyang subayon.

“Ang Dios mopatigbabaw sa tanan alang sa labing ikaayo sa Zion,” miingon siya.⁴⁰