O Lea ou te Mama

O’u uso pele o le perisitua, o se musumusuga lava le vaai atu i foliga o le 21,000 o loo iinei i le Maota Autu o Konafesi, ma le iloa o loo faapotopoto i fale o le ekalesia ma isi nofoaga i le lalolagi atoa le fia miliona. Ou te faanoanoa ona ua ou toeaina i se taimi ua matua faateleina ai le sagisagi fiafia o le olaga.

E pei ona silafia e outou uma, sa faauuina au ma vaetofia o se Peresitene o le Ekalesia i le 12 tausaga talu ai, na faia tonu lava i le aso 12 o Mati, 1995. Na tuufaatasia e Elder Ballard nisi o fuainumera e faatatau i na tausaga e 12. Ou te sii maia mai lana faamatalaga:

• 387,750 faifeautalai na ulufale atu i le misiona, lea e toetoe lava o le 40 pasene o faifeautalai ua auauna atu i lenei tisipenisione— o lona uiga, o le 40 pasene i le 12 tausaga lea na tea atu nei o le 177 talu ona faatulaga le Ekalesia.

• 3,400,000 tagata liliu mai ua papatisoina, e tusa lea ma le tasi vaefa o le faitau aofai o tagata o le Ekalesia.

• O le aofai atoa o misiona i le Ekalesia na faateleina mai le 303 i le 344, ma le isi tolu o le a faaopoopo i se taimi lata mai.

• O le faatumauina o tagata liliu mai e pei ona fuaina ai i le auai i sauniga faamanatuga, faauuga i le perisitua, ma le faamaoni i le sefuluai ua matuai tulaga ese le faateleina.

O lenei, e ui o nei mea uma e matuai tulaga ese le taua, ae ou te matuai talitonu o le tuu teisi atu i ai o le agaga atoa, o le a avea ai mea matagofie ua tuanai ma amataga o se lumanai maoae.

Uuna’i atu ia ma tulei, fai lou tofi fiafia [ma] fai lelei. O le misiona a le Ekalesia e moomia ai le galue; aua ne’i i ai se tasi e sola ese mai le tiute. Tuu atu lou tauau i le uili ma tulei i luma. (“Manaomia o i Latou o e ua Filiga,” Viiga, nu. 163.)

O le taimi nei, ou te fia agai atu i se isi mataupu e ese ai. Sa ou tautala i le mea lava lea e tasi i le tele o tausaga ua mavae. O le a ou toe tautala ai foi aua ua leva ona galo ia i latou sa faalogo i ai, ae o i latou e le’i faalogo i ai e moomia ona faalogo i ai. E faatatau ia Peresitene Iosefa F. Samita, o le sa auauna atu o se Peresitene o le Ekalesia mai le 1901 e oo i le 1918, a tuufaatasi e 17 tausaga.

O Iosefa F. Samita o le atalii o Ailama Samita, le uso o le Perofeta o Iosefa o le sa faamaturoina faatasi ma ia i Karefasi. O Iosefa F. sa fanau i Sisifo Mamao, Misuri, i le aso 13 o Novema, 1838. Na alu ese o ia ma Misuri a o pepe. A o laitiiti o ia e le’i atoa lona ono tausaga, sa ia faalogoina se tuitui i le faamalama o le fale o lona tina i Navu. O se alii sa faanatinati mai Karefasi, ma logoina Tuafafine Samita ua maliufasia lona alii i lena aoauli.

Ina ua 9 ona tausaga sa la tietie ai ma lona tina i se taavale e toso e povi e agai mai i lenei vanu. I le 15 o ona tausaga sa valaauina ai o ia i se misiona i Hawaii. Sa ia malaga atu i San Francisco ma o iina sa faigaluega ai i se falelaupapa e saili ai se tupe e totogi ai lona pasese i le vaa e alu ai i le motu.

E le’i avea lena o Hawaii ma se taulaiga mo tagata tafafao maimoa. Sa ainā e tagatanuu Hawaii, o ē, mo le tele lava o vaega, sa matitiva ae sa loto foai i mea sa latou maua. Sa ia aoao e tautala i le latou gagana ma alofa ia i latou. A o auauna ai iina sa fai sana miti ofoofogia. Ou te sii maia mai lana tusitusiga e faatatau i lenei mea. Fai mai a ia:

“Sa ou matua mafatia lava, [a o o’u i ai] i se misiona. Na toetoe lava a ou le lavalava ma matua leai lava sa’u uo, sei vagana ai le faauo mai o ni tagata matitiva, ma pogisa. Sa ia te a’u se lagona e pei ua leai so’u aoga i lo’u tulaga le tagolima, leai se poto ma se malamalama, ua na o se tama, lea na faigata ai ona ou lototoa e … vaai ai i foliga o soo se tagata.

“A o o’u i ai i lena tulaga sa faia sa’u miti [i le tasi po] sa ou alu i se faigamalaga, ma e sa uunaia a’u e tatau ona ou faanatinati—faanatinati i lo’u malosi uma, i lo’u fefe i te’i ua ou tuai tele. Sa ou faataalise i le saoasaoa sa mafai ona ou alu ai, ma e sa ou malamalama sa na o sina ta’ui laitiiti sa ia te a’u, o se solosolo sa afifi ai i totonu se ta’ui laitiiti. Sa ou le iloa … po o le a lena mea, a o o’u alu atu faanatinati i le vave sa ou mafaia; na iu ina ua ou taunuu atu i se maota matagofie, … Sa ou manatu ua ou iloa o iina ou te alu i ai. A o o’u agai atu i ai, i le saoasaoa sa ou mafaia, sa ou vaai i se faasilasilaga [e faitauina T-A-E-L-E]. ‘Taele.’ Sa ou faliu vave atu loa ma ou alu i totonu o le faletaele ma ou taele mama ai. Sa ou tatalaina le tama’i ta’ui sa ia te a’u, ma sa i ai [se seti] o ni [ofu] papae mama, o se mea lea ua leva ou te lei toe vaai i ai, aua o tagata sa matou faatasi sa le manatu tele i le matua faamamaina naua o ni mea. Ae sa mama o’u [ofu], ma sa ou faamauluina loa [le ofu]. Ona ou faataalise atu lea i se mea na foliga mai o se avanoa lautele, po o le faitotoa. Sa ou tuitui atu ma e na tatalaina mai le faitotoa, ma o le tagata sa tu mai ai iina o le Perofeta o Iosefa Samita. Sa ia tilotilo mai ia te au i ni foliga e tau faatonu mai, ma o upu muamua lava sa ia fai mai ai: ‘Iosefa, ua e tuai.’ Peitai sa ou [tali] atu ma le mautinoa:

“Ioe, ae o lea ou te mama—O lea ou te mama!’

“Sa ia uu lo’u lima ma avatu a’u i totonu, ona tapuni ai lea o le faitotoa tele. Sa ou lagonaina le moni o lona lima e pei lava ona ou faalogoina o le pa’i mai o le lima o se tagata. Sa ou iloa o ia, ma ina ua ou ulufale atu, sa ou vaai i lo’u tama, ma Polika [Iaga] ma Heber [C. Kimball], ma Uiliata [Risati], ma isi tagata lelei sa ou iloa, o tutu mai i se laina. Sa ou tilotilo atu e pei o le vaai atu i lenei vanu, ma na foliga mai na faatumuina i le motu tele o tagata, a o luga o le tulaga sa i ai tagata uma sa ou iloa. Sa i ai iina lo’u tina, ma sa nofo o ia ma sii se tamaitiiti i ona vae; ma sa mafai ona ou iloa igoa o le toatele o i latou, ma ou manatua o latou igoa, o e sa nonofo mai iina, o e na foliga mai sa i ai i e na filifilia, ma e ua faaeaina… .

[I le taimi na ou faia ai lenei miti,] sa na o a’u i luga o se fala, i luga o atumauga o Hawaii—e leai se isi sa ma faatasi. Ae i lenei faaaliga vaaia, sa pa’i atu ai lo’u lima i le lima o le Perofeta, ma ou vaai atu ai i lona laufofoga fiafia mai… .

“Ou te ala ae i le taeao ua avea a’u o se tamatane, e ui lava sa na o a’u [o] se tamaitiiti e tusa ma o’u tausaga. Sa leai se isi mea i le lalolagi sa ou toe fefe ai [talu mai lena mea]. Ua mafai ona ma feiloai ma soo se alii po o se tamaitai po o se tamaitiiti ma tilotilo atu i o latou foliga, ma lagona i totonu o lo’u agaga o a’u o se tamatane atoatoa lava. O lena faaaliga vaaia, lena faali’ali’a, o se molimau sa ou olioli ai i lena taimi, ua avea ai a’u ma tagata e pei ona ou i ai, pe afai o a’u o se tagata ua lelei, pe mama, pe amiosa’o i luma o le Alii, pe afai e i ai se mea lelei ia te a’u. O lena mea ua fesoasoani ia te a’u i tofotofoga ma mea faigata uma” (Gospel Doctrine, 5th ed. [1939], 542–43).

O le aano o lena miti taua o loo maua i le aoaiga na tuuina atu e Iosefa Samita i le talavou o Iosefa F. Samita. Sa faapea atu le Perofeta, “Iosefa, ua e tuai.”

Na tali Iosefa F., “Ioe, ae o lea ou te mama—O lea ou te mama!”

O le taunuuga o lena miti na suia ai se taulealea e avea ma se tamatane. O lana folafolaga “O lea ou te mama” na maua ai e ia le mautinoa ma le lototele e feagai ai ma soo se tasi po o soo se tulaga. Na ia maua le malosi lea e sau mai se malamalama manino na faamalosia e le faaviivii a le Perofeta o Iosefa.

O lenei miti faavaloaga e i ai sona uiga taua mo alii ma taulelea o loo faapotopoto i lenei aofia tele i lenei afiafi. O se faaupuga ua leva ia i tatou e faapea o le “tumama e latalata atu i le amioatua.”

Fai mai le perofeta o Isaia:

“Ina fafano ia outou, ina faamama ia outou; faateaese ia a outou galuega leaga i o’u luma; soia tou te fai mea leaga;

“Ia outou faamasani i le amio lelei… .

“O mai ia, ina tatou filifili ia, e ui lava ina pei o ofu mumu a outou agasala, e sisina ia e pei o le kiona; e ui lava ina mumu ia e pei o le ie ulaula, e avea e pei o fulufulu mamoe” (Isaia 1:16–18).

I faaaliga i ona po nei ua fetalai mai ai le Alii: “Ia mama outou o e tauave ipu a le Alii” (MFF 133:5).

I se lalolagi ua fiafia i mea leaga, ia mama—i le gagana, i mafaufauga, i le tino, i laei.

Ou te faapea atu ia te outou uma, ia mama i lau gagana. Ua tele naua talanoaga leaga, ma le eleelea i nei aso. O le toilalo e faailoa atu lou lava tagata i le gagana e mama, e iloagofie ai o oe o se tagata e matuai tapulaa lava au upu. Ina ua tusia e Ieova ia papamaa, sa Ia fetalai atu i le fanauga a Isaraelu, “Aua e te ta’u fua le suafa o Ieova lou Atua; aua e le faasaoina e Ieova o le ta’u fua lona suafa” (Esoto 20:7).

Ua toe faamalosia e le Alii lena poloaiga i upu o faaaliga i ona po nei, “Ia manatua o mea mai luga e paia, e ao foi ona tautala i ai ma le faaeteete, ma le uunaiga a le Agaga” (MFF 63:64).

Ia mama i mafaufauga. Ua fetalai mai le Alii, “Ma ia faia mea uma ma le mama i o’u luma” (MFF 42:41).

O se mafaufau eleelea na te faailoa maia ia lava i le gagana eleelea ma le masoa. O se mafaufau mama e faailoa maia ia lava i le gagana e lelei ma faagaeetia, o galuega foi e aumaia ai le fiafia i le loto.

Ia mama i le tino ma laei ma amioga. Aua e te faatagaina ona ta ni pe’a i lou tino. Afai e te faia, o le a i ai se aso e te faanoanoa ai. E na o se auala e tiga ma taugata e mafai ona aveeseina ai le pe’a.

Ia mama ma tumama ma faatulaga lelei. O lavalava e eleelea e tau atu ai i amioga eleelea. Ou te le o popole tele i ofu tou te ofuina ae ia tumama ma mama. Manatua le miti a Iosefa F. Samita. A o ia faatalise atu agai i le maota matagofie, sa ia te ia se tama’i ta’ui o loo afifi i se solosolo. Ina ua taele o ia ma ua tago tatala, sa ia iloaina ai o loo i ai i totonu se ofu mama. Soo se taimi e te faamanuia pe tufa ai le faamanatuga, ia matuai sili atu ou foliga e i ai. Ia mautinoa lou lava tumama.

Ma o lea, o’u uso pele, e mafai ona alu ai pea lava. E mafai ona tatou talanoaina le mea o loo tupu i luga o le Initoneti ma le faaaogaina o komepiuta lea e tau atu ai i mafaufauga ma amioga mataga. Ua lava le faapea atu e matuai le talafeagai lava mo oe, o se tasi o loo umia le perisitua a le Atua. O oe o Lana auauna filifilia, ua faauuina oe i se mea e paia ma matagofie. E le mafai ona e ola i le lalolagi ma auai i ala o le lalolagi. E tatau ona e aloese ai mai na mea uma.

O lenei, o’u uso e ma tuafafine pele, ia faamanuia outou e le Alii. Ia te outou tama talavou ou te faapea atu, ia faaauau a outou a’oga. Afai e te faaipoipo, o le a avea ma au matafaioi le tausia o lou aiga. E anoanoai avanoa o loo i o outou luma, ma o le a’oga o le ki lea o le a tatalaina lena faitotoa. O le faitotoa o le maota matagofie lea na miti i ai Iosefa F. Samita a o laitiiti o ia a o moe i se mauga i Hawaii.

Ia faamanuia outou e le Atua, o’u uso pele. Ia talanoa ma le Alii i le tatalo. Ia atiina ae se sootaga ma Ia. O Ia o le Silisiliese, o le e i ai le mana e siitia ma fesoasoani ai. Ou te tatalo ina ia faapea ona fai, i le suafa o Iesu Keriso, amene.