Ia Teuteuina Ou Manatu i le Mama e le Aunoa

Ata

A’u tamaitai talavou pele, e maeu le matagofie o le vaai atu ia te outou i totonu o lenei fale tele. O loo outou faatasi mai ma o outou tina, o tinamatutua, ma faiaoga. I talaatu o lenei Maota Autu mo Konafesi o loo faapotopoto ai le fiaselau afe o isi i le salafa o le lalolagi. O le a latou faalogoina i matou i le silia ma le luasefulu gagana. O le a faaliliuina a matou tautalaga i a latou lava gagana. O le avanoa e tautala atu ai ia te outou o se tiutetauave e lofituina ai. Ae o se avanoa ofoofogia foi. Ou te tatalo mo le taitaiga a le Agaga Paia i mea o le a ou tautala atu ai.

Na mamana le fofogaina o le autu e isi i lenei afiafi. Na ona ou ta’ua lava. O le afioga faaalia a le Alii o loo maua i le vaega e 121 o le Mataupu Faavae ma Feagaiga. E faitauina faapenei:

“Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.

“E avea le Agaga Paia mau aumea tumau, a o lou tootoo ma tootoo le feliuliuai o le amiotonu ma le upumoni; o lou malo foi o le a faia ma malo faavavau, e aunoa foi ma faiga faamalosi o le a tafe ia te oe e faavavau faavavau lava” (f. 121:45–46).

Pe mafai ea ona i ai se isi folafolaga e sili atu i soo se tasi nai lo lenei afioga ofoofogia o le faaaliga mai le Alii? O afioga nei a le Atua, na tuuina atu i se faaaliga i le Perofeta o Iosefa. O loo tauaveina mai ai se folafolaga maoae ia i latou uma o e teuteuina o latou manatu i le mama e le aunoa.

O lenei o outou tamaitai talavou o loo outou i ai i le amataga o o outou olaga. Ua lava lo outou matutua e papatiso ai. Ua lava lo outou talavou aua o loo i o outou luma le lumanai o loo outou moemiti i ai. O outou taitoatasi o ni afafine o le Atua. O outou uma o ni tagata Faalelagi. O oe moni lava o se afafine o le Silisiliese. E leai se tapulaa i mea tou te mafaia. Afai o le a outou pulea o outou olaga, o loo tumu le lumanai i avanoa ma le fiafia. E le mafai ona outou faamaimauina a outou taleni po o outou taimi. O loo faatalitali mai mo outou ia avanoa ofoofogia.

Ou te fia ofoina atu nei se fua faigofie, lea afai e tausisia, o le a mautinoa ai lou fiafia. O se polokalama faigofie e fa ona vaega. E faapenei: (1) tatalo, (2) suesue, (3) totogi lau sefuluai, ma le (4) auai i au sauniga.

I le vaega muamua—tatalo faaletagata lava ia—o oe o se afafine o lou Tama Faalelagi. O Ia o lou matua faalelagi. Talanoa ma Ia. O po ma taeao uma ia e alu ifo i ou tulivae ma faailoa atu ia te Ia le faafetai o lou loto. Ia talanoa atu i faamanuiaga o loo e manao i ai ma moomia. Aua ne’i galo o lenei Ekalesia na amataina i le tatalo faamaulalo a le taulealea o Iosefa Samita i le togavao o le faatoaga a lona tama. Mai lena aafiaga ofoofogia, lea ua tatou ta’ua o le Uluai Faaaliga, ua faatupulaia ai lenei galuega seia oo mai i le taimi nei lea ua faavaeina i atunuu e 160, ma lona faitau aofai ua silia ma le 12 miliona. O le faataunuuga lea o le faaaliga na vaaia e Tanielu o se maa na tofia i le mauga ae lei tofia i lima ua taavale atu ma faatumulia ai le lalolagi (tagai Tanielu 2:44–45).

E le gata e mafai ona tuuina atu a outou tatalo taitoatasi, ae mafai ona outou uunaia o outou matua ina ia faia ni tatalo faaleaiga, pe afai latou te le o faia. O le tatalo o le auala lea tatou te faalatalata atu ai i lo tatou Tama o i le Lagi. E leai se tau. E moomia ai na o le faatuatua ma taumafaiga. E leai se isi mea e sili ona tauia ai nai lo le tootuli i le tatalo faamaulalo. E faailoa ai le alofa mo le Atua, o le Atua o mea lelei uma. E faailoa ai le faaaloalo o le tagata mo ia lava. E leai se mea e suitulaga ai. O se fesootaiga patino a le tagata ma le Atua.

O le vaega lona lua o loo i luga o la’u lisi o le suesue. O le a le mea o loo aofia ai i totonu o lenei upu faigofie? Muamua o le suesue i tusitusiga paia. Atonu e mafai ona e faitauina ni nai vaega o le Feagaiga Tuai, ae o loo aofia ai ni lesona maoae. O le Feagaiga Fou o loo tumu i aoaoga taua. O loo aofia ai Talalelei e fa—Mataio, Mareko, Luka, ma Ioane—e faapea foi i Galuega a Aposetolo ma isi tusitusiga. Taumafai e faitau na o se Talalelei e tasi—atonu o le tusi a Ioane. Afai e uma lena, ona e tago lea i le Tusi a Mamona.

I le lua tausaga talu ai sa ou tuuina atu ai se lu’i i le Ekalesia atoa ina ia faitauina le Tusi a Mamona a o le’i oo i le faaiuga o le tausaga. O se mea e maofa ai le toatele o i latou na ausia lena lu’i. O i latou uma na faia sa matuai faamanuiaina i a latou taumafaiga. A o latou matuai tautino atu i latou i lenei molimau faaopoopo i lo tatou Togiola, sa faaolaolaina o latou loto ma na ootia o latou agaga. O nisi o outou sa fai si laiti i lena taimi e faitau i ai, ae tou te le o laiti tele ina ia amata ai ona faitauina i le taimi nei.

E faaopoopo atu i suesuega faalelotu o loo i ai le luitau o aoaoga. Ia fai nei se faaiuga, a o e talavou, e faapea o le a e a’oga i le mea e gata ai lou mafai. O loo tatou ola i se augatupulaga sili ona maualuga le faatautava, ma o le a faatupulaia pea le leaga. O le a’oga o le ki lea o le a tatalaina le faitotoa o avanoa.

E mafai ona e fuafua e te faaipoipo, ma faamoemoe i ai, ae e te le o mautinoa pe oo mai. Ma e tusa lava pe e te faaipoipo, o le a’oga o le a matuai aoga lava ia te oe. Aua le na ona ola e leai se faamoemoega, i le ola ai i lea aso ma lea aso e aunoa ma le faaalualuina i luma o o outou olaga. O le a faamanuiaina outou e le Alii a o outou faia se taumafaiga. O le a faatamaoaigaina o outou olaga ma o le a faalauteleina lo outou iloa, a o tatalaina o outou mafaufau i aafiaga fou ma le malamalama.

O le isi vaega o le totogiina o le sefuluai. E ofoofogia le folafolaga a le Alii ia i latou o e totogi a latou sefuluai. Ua Ia fetalai mai i faaaliga i ona po nei e faapea “o le a le susunuina” i latou (tagai MFF 64:23).

O Lana folafolaga maoae o loo maua i upu a Malaki. Na fetalai o Ia: “Pe faoa e le tagata mea a le Atua? A o outou ua outou faoa a’u mea. A ua outou fai mai, Ni a ea au mea ua matou faoa? O sefuluai ma taulaga… .

“Ina aumaia mea e sefuluai ai a outou mea uma lava i le fale e tuu ai mea, ina ia i ai mea e ‘ai i lo’u fale, ma ia outou tofotofo mai ai ia te au i lenei mea, ua fetalai mai ai Ieova o ‘au, pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele” (Malaki 3:8, 10).

Ona Ia toe fetalai mai lea i se mea uiga ese. Faalogo foi i le vaega lenei:

“Ou te aoai atu, ona o outou, le na te ‘aina mea, na te le faaumatia le fua o lo outou laueleele; e fua mai foi vine i o outou fanua, ua fetalai mai ai Ieova o ‘au.

“E faaamuia foi ia te outou nuu uma lava; aua e fai outou ma nuu moomia” (Malaki 3:11–12).

E ui o le sefuluai e totogi i tupe, ae o le mea e sili atu ona taua o le totogiina lea i le faatuatua. Ou te le’i feiloai lava i se tagata e totogi se sefuluai faamaoni o loo faitio i ai. Ae, na te tuu lona faatuatuaga i le Alii, ma o le a le tuulafoaiina o ia e le Alii.

A o o’u laitiiti, o Tesema taitasi uma lava e ave ai matou uma e lo matou tama i le isi itu auala i le fale o Epikopo Duncan mo le faatalanoaga o le sefuluai. E le’i i ai se ofisa o le epikopo i le fale o le uarota, o lea sa faia ai ana mataupu i lona fale. Matou te nonofo uma lava i lona potu malolo, ona ia valaaulia taitoatasi atu lea o i matou i totonu o le potu ‘ai. O a matou sefuluai pe na o se ta’i 25 sene, po o le ta’i 50 sene, ae o se sefuluai atoa. Na te tusia se lisiti ma faamaumau le aofaiga i totonu o le faamaumauga a le uarota. O le aofaiga e mafai ona matuai laitiiti lava lea e sili atu ai le tau e faamaumau ai nai lo lona aoga. Ae na faavaeina ai se amioga sa faaauauina i nei tausaga uma. O le totogiina o le sefuluai ua oo mai ai faamanuiaga e le mafuatiaina e pei ona folafola mai e le Alii.

Sa ou faaipoipo i le taimi o le Pau o le Tamaoaiga, ina ua utiuti lena o tupe, ae sa totogi lava a matou sefuluai, ma e sa matou le fia aai lava pe faapea foi sa le maua soo se mea sa matou manaomia.

O le vaega lona fa—auai i au sauniga, i au sauniga faamanatuga. E leai se mea e suitulaga ai le ‘ai ma le inu i le faamanatuga o le Talisuaga a le Alii. O se avanoa mamalu, paia, ma le matagofie le mafai ona ‘ai i le areto ma inu i le vai e faamanatu ai le tino ma le toto o le Faaola o tagata.

E leai se isi mea na tupu i le talafaasolopito o le tagata e pei lona taua o le taulaga togiola a lo tatou Togiola paia. E leai se isi e faatusatusa i ai. A aunoa ma lea semanu e leai se uiga o le olaga. Semanu o se faigamalaga e leai se taunuuga.

Faatasi ai ma le togiola ua faamautinoa mai ai ia i tatou le ola faavavau. E le o le oti le mutaaga, ae o le laasia o se nofoaga sili atu ona mamalu.

O nei mea uma o loo faatusaina i le taumafa i le faamanatuga. O isi mea uma i a tatou sauniga e le taua tele pe a faatusatusa i le taumamafa i faailoga o le taulaga a lo tatou Alii.

Afai o le a outou faia nei mea e fa, ou te folafola atu ia te outou o le a faamanuiaina o outou olaga, o le a faateleina lo outou fiafia, ma o mea tou te ausia o le a ofoofogia ma faamalieina i soo se tulaga.

Ia faamanuia outou e le Alii, o’u tuafafine talavou pele; ia i ai Ana faamanuiaga ia te outou i taimi uma ma tulaga uma. Matou te alolofa ia te outou. Matou te tatalo mo outou. Ia sisila mai le lagi ia te outou, ou te ole ai ma le faamaulalo, i le suafa o Iesu Keriso, amene.