O Gagana a Agelu

Sa faalolotoina e le Perofeta o Iosefa Samita lo tatou malamalama i le mana o le tautala ina ua ia aoao mai, “E ala i le upu … [e faapea ona] galue ai mea uma pe a galue i le faatuatua. Na fetalai le Atua, ‘Ia malamalama, ona malamalama ai lea.’ Na tautala foi Iosua, ona tumau ai lea i luga o le la ma le masina sa faia e le Atua. Sa poloai atu Elia, ona punitia lea o le lagi mo le umi e tolu tausaga ma masina e ono, ina ia le toe i ai se timu… . Na faia nei mea uma i le faatuatua… . O lona uiga, o le faatuatua, e galue i upu; ma o [upu] foi na faataunuuina ai ana galuega mamana, ma o le a faataunuuina ai pea lava.”¹ E faapei o meaalofa uma “o mea mai luga,” o upu e “paia, e ao foi ina tautala i ai ma le faaeteete, ma le uunaiga a le Agaga.”²

O lo’u iloaina o le mana ma le paia o upu ua ou manao ai e lapata’ia i tatou, pe afai e manaomia le lapataiga, e tusa ai ma le auala tatou te tautala atu ai le tasi i le isi ma pe faapefea foi ona tatou tautala e uiga ia i tatou lava.

O loo i ai se laina mai le Apokalifa o loo ta’ua ai le matuia o lenei mataupu e sili atu nai lo’u mafaia. O loo faitauina faapea, “O le ta a le sasa e mailaila ai le tino: ae o le ta a le laulaufaiva e gaui ai ponaivi.”³ O le mafaufau i lena ata matuitui, sa matua uunaia ai lava au e faitau le tusi a Iakopo faapea o loo i ai se auala e mafai ai ona avea au ma “se tagata atoatoa.”

Fai mai Iakopo: “Aua o mea e tele e sese ai i tatou uma, [Peitai] a le sese se tasi i le upu, o le tagata lea ua sao, na te mafaia foi ona taofi i le tino uma.”

Na faaauau i le faatusa o le faagutu, na ia tusia ai: “Faauta, ua tatou avane faagutu i gutu o solofanua, ia latou usiusitai mai ia te i tatou, ua tatou liliu ai foi o latou tino uma.

“Faauta mai foi … o vaa, e ui lava ina tetele … ma faalelelelea i matagi tetele, e liua i le foeuli itiiti lava.”

Ona ta’ua ai lea e Iakopo o le itu lenei: “O le laulaufaiva [foi] o le mea itiiti lea … [Peitai] faauta, o le afi itiiti e [mafai ona] mu ai se vaomatua [Eleni].

“… O le laulaufaiva [o se afi] i o tatou tagata … o loo leaga ai le tino atoa, … ua faamuina foi lena afi o seoli.

“Ua uma foi ona faalataina i le poto o tagata … o manu eseese o manu feai ma manu felelei, o mea fetolofi ma meaola i le sami:

“Peitai e le mafai e se tasi tagata ona faalata i le laulaufaiva; o le mea leaga, e le mataofia, ua tumu i le mea oona e oti ai.

“O lea ua tatou vivii ai i le Atua le Tama, o lea foi ua tatou fetuu a’i i tagata ua faia e foliga i le Atua.

“E luai mai i le gutu e tasi le vivii ma le fetuu. O’u uso e, e le tusa ona faia faapea o na mea.”⁴

Ia e matuai manino lava lena mea! E iloagofie lava e le o faapea mai Iakopo o o tatou laulaufaiva e tumu i le agasala i taimi uma, e le o mea uma foi tatou te tautala atu ai e “tumu i le mea oona e oti ai.” Ae e manino lava lona uiga, o nisi mea tatou te tautala atu ai e faataumaoi, e oona—ma o se tuua’iga matuia lena mea mo se Au Paia o Aso e Gata Ai! O le leo e tuuina atu ai le molimau faamaoni, e momoli atu ai le tatalo naunautai, ma lagiina ai viiga o Siona e mafai ona avea ma leo lava e tasi e otegia ma faitio ai, faamaasiasi ma faamamasagia ai, faatiga ma faatamaia ai le agaga o oe lava faapea foi isi i le gasologa. “E luai mai i le gutu e tasi le vivii ma le fetuu,” na ta’ua ai ma le faanoanoa e Iakopo. “O’u uso e [ma tuafafine], e le tusa ona faia faapea o na mea.”

Pe o se vaega ea lea o i tatou e mafai ona tatou galulue uma ai teisi? Pe o se itu lea e tatau ona taitasi i tatou ma avea teisi atu ma se alii po o se tamaitai “atoatoa”?

Tane, ua faatuatuaina outou i se meaalofa e aupito sili ona paia e mafai e le Atua ona avatu ia te oe—o se ava, se afafine o le Atua, o le tina o lau fanau o se na ofoina atu ma le loto ia lava ia te oe mo le alofa ma se mafutaga fiafia. Mafaufau i mea lelei sa e tautala atu ai ia te ia ao e faamanaia i ai ma taumafai ia e malo i lona alofa, mafaufau i faamanuiaga na e tuuina atu ma ou lima na faaee i luga o lona ulu, mafaufau ia te oe lava ma ia o se atua ma se atua tamaitai aua o oulua natura lava na, ona mafaufau lea i isi taimi e faamatalaina e ni upu lē mafaufau, faatausuai, ma le soona lafo. Ona o le manatu i le faatama’iga e mafai ona faia e o tatou laulaufaiva, e leitioa ona fetalai le Faaola, “E le o le mea ua tuu i le gutu e leaga ai le tagata, a o le mea e sau mai le gutu, o lea ua leaga ai le tagata.”⁵ O se tane e le moemiti lava na te fasia faaletino lana ava, e mafai ona gauia, afai e le o ona ponaivi o le mea moni o lona loto, e ala i le matautia o le lē mafaufau po o le agaleaga o tala e fai i ai. O le faasaunoa po o le faia faatautala faaletino, e tutusa lelei lava ma e matua ta’usalaina i le Ekalesia a Iesu Keriso o le Au Paia o Aso e Gata Ai. Afai e tatau ai ona sili atu ona ta’usalaina nai lo lena, e sili atu ona matou talanoa atu ma le malosi e tetee i soo se ituaiga o sauaina po o le faatautala tau feusuaiga. O le aso, ou te talanoa atu iinei e tetee i le sauaina o soo se tagata e soo se isi i upu ma lagona, ae faapitoa lava i tane e faasaga i ava. Uso e, e le tatau ona tutupu nei mea.

I le agaga lava lea e tasi, matou te talanoa atu foi i tuafafine, aua e le na o se itupa e tasi e faia le agasala o le sauaina i upu. Faletua ma tausi, pe ua outou mafaufau ea i le laulaufaiva ua le faagutuina i lou fofoga o le mana mo le lelei po o le leaga i au upu? E mafai faapefea e se leo matagofie lea i lona natura paia e pei o se agelu, e faaleagaga naua, e maeu le malu ma agalelei lava ia ona faafuasei ona mateletele, ma’ati’ati, ma matuitui ma le taofiofia? E mafai e upu a se tamaitai ona sili atu ona maamaai nai lo se pelu e gaosia, ma e mafai ona faatupu ai i loto o tagata latou te alolofa i ai ni lagona tiga ma se tete’aga faalelagona nai lo se isi lava mea i le amataga o lena talanoaga. Tuafafine, e leai se avanoa o i ai i lena agaga matagofie o oe mo uiga matautia maamaai po o soo se uiga e faatiga ai, e aofia ai le faitala, po o le faatuaupua po o upu e oona matuitui. Ia aua lava nei faapea i o tatou aiga po o la tatou uarota po o tuaoi “le laulaufaiva o se afi, o se lalolagi o le amioleaga … [o loo mumu] i o tatou tagata.”

Sei ou faalauteleina atu lenei fautuaga ina ia avea o se mataupu mo le aiga atoa. E tatau ona tatou tautala ma le matua faaeteete lava i se tamaitiiti. O mea tatou te tautala atu ai pe le ta’ua foi, pe faapefea ona fai atu, ma pe o le a le taimi e matua taua lava i le faafoligaina o le vaaiga a se tamaitiiti ia te ia lava. Peitai e sili atu ona taua le faafoligaina o le faatuatua o lena tamaitiiti ia i tatou ma lo latou faatuatua i le Atua. Ia i ai se faamoemoega lelei i au tala i se tamaitiiti—i taimi uma. Aua lava ne’i e fai atu ia i latou, tusa lava pe faatalasua, faapea e puta pe faavalevalea pe paie pe le aulelei foi. O le a e le faia lava lena mea ma se faamoemoe e faataumaoia ai, ae latou te manatua [upu na e fai atu ai] ma ono tauivi ai mo ni tausaga e taumafai e faagalo—ma faamagalo. Aua foi nei e faatusatusaina lau fanau, tusa lava pe e te manatu e te matuai tomai i ai. Atonu e te fai atu i se auala e sili ona logolelei faapea “E aulelei Susana ae atamai Senara,” ae pau lava le mea o le a manatua e Susana e le atamai o ia ae manatua e Senara o ia e le aulelei. Ia faaviivii taitoatasi tamaiti i o latou lava tulaga, ma fesoasoani i ai ina ia faasēloa o tatou mafaufauga masani o le faatusatusa, faatautava, ma le lagona “e le o lava” [le aulelei, atamai ma isi].

O nei mea uma ua ou tautala atu ai, ou te manatu ua malamalama tagata uma o le tautala le lelei lea e tele ina tafe mai i mafaufauga le lelei, e aofia ai le mafaufau le lelei ia i tatou lava. Tatou te vaai i o tatou lava faaletonu, tatou te tautala—pe mafaufau foi—mamafa ia i tatou lava ma e le umi ae ua faapena foi ona tatou vaai atu i tagata uma ma mea uma. E oo ina le mafai ona tatou vaai atu i mea mananaia o le olaga e pei o le la susulu, o rosa, o folafolaga o le faamoemoe po o le fiafia. E le umi foi a ua tatou faasiasia faapea foi tagata uma e siomia ai i tatou.

Ou te fiafia lava i se mea na ta’ua e Elder Orson F. Whitney: “O le agaga o le talalelei e i ai le faamoemoe; e faalagolago i le Atua ma vaavaai atu i le itu lelei o mea. O le faafeagai po o le agaga e leai se faamoemoe na te tosoina tagata i lalo ma toso ese mai le Atua, e vaai o ia i itu e leaga, e muimui, e tomumu, ma e tuai foi ona usitai.”⁶ E tatau ona tatou talitonuina le tautinoga a le Faaola ina “ia outou lototetele.”⁷ (Ioe, e foliga mai ia te au atonu e sili atu lo tatou ta’usalaina i le solia o lena poloaiga nai lo se isi lava!) Tautala ma le faamoemoe. Tautala e faamalosiau, e aofia ai ma oe lava ia. Taumafai e aua nei tomumu pe faitio soo. E pei ona fai mai se tasi, “Po o le a lava le lelei o le olaga i le taimi ua alu, e i ai lava se tagata o loo faitio ai pea.”

E masani ona ou mafaufau ia Nifae a o saisaia i maea ma sasaina ma uamea atonu na sili atu ona ia onosaia nai lo le faalogologo atu i le muimui pea lava pea o Lamana ma Lemuelu.⁸ Ou te iloa atonu ai lava na fai atu i ai, pe tasi lava, “Toe ta tasi lava a’u. O lea lava ou te lagona atu outou.” Ioe, e i ai lava faafitauli o le olaga, ma e sa’o e i ai foi mea lē lelei tatou te feagai, peitai faamolemole ia talia se faamatalaga se tasi o upumoni masani a Elder Holland e ola ai—e mafai ona tatou matua faaleagaina lava se mea i lo tatou tomumumu.

Sa faaupuina mai ma le faamaoni e Paulo, ae sa i ai le faamoemoe tele. Fai mai a ia ia i tatou uma lava: “Aua nei alu atu se upu leaga ai o outou gutu, [na o le] upu lelei … [ma] e ati ae ai i mea e aoga, e tupu ai le lelei i e faalogologo i ai.

“Aua foi tou te faatiga i le Agaga Paia o le Atua, …

“Ia te’a ma outou upu faafiufiu uma lava, ma le lotoa, ma le ita, ma le leotele, atoa ma le upu leaga, …

“A ia outou feagaleleiai, ia femutimutivaleai lo outou alofa, ia fefaamagaloai outou, faapei ona faamagaloina outou e le Atua ia Keriso.”⁹

I lana molimau loloto ma le faaootia loto, na valaauina ai i tatou ina ia “mulimuli i le Alo [o le Atua] ma le loto atoa,” ma folafola mai ai “a uma ona outou … maua le papatisoga i le afi ma le Agaga Paia, ona mafai ai lea ona [outou] tautala i le gagana a agelu… . Ma … e mafai faapefea ona outou tautala i le gagana a agelu sei iloga o le Agaga Paia? E tautala mai agelu i le mana o le Agaga Paia; o le mea lea ua latou fetalai mai ai le afioga a Keriso.”¹⁰ E moni lava o Keriso sa i ai ma o loo i ai, “o le Upu” e tusa ma la Ioane le Soo Pele,¹¹ e tumu i le alofa tunoa ma le upumoni, e tumu i le alofa mutimutivale ma le agalelei.

O le mea lea, uso e ma tuafafine, i lenei sailiga umi e faavavau ina ia avea atili e faapei o lo tatou Faaola, ia tatou taumafai ina ia avea o ni alii ma ni tamaitai “atoatoa” a itiiti i le ala lenei e tasi i le taimi nei—ia le faatiga lava i se upu po o i se isi tulaga lelei e faaupu ai, e ala i se gagana fou, le gagana lea a agelu. O a tatou upu, e faapei foi o a tatou amioga, e ao ina tumu i le faatuatua ma le faamoemoe ma le alofa, mataupu faavae sili faaKerisiano e matua manaomia lava i le lalolagi i ona po nei. Faatasi ai ma na upu, e tautalagia i le uunaiga a le Agaga, e mafai ai ona faamatu loimata, e mafai ona faamaloloina loto, e mafai ona siitia olaga, e mafai ona toe foi mai le faamoemoe, e mafai ona manumalo le mautinoa. Ou te tatalo ina ia faamalosiau a’u upu e uiga i lenei mataupu faigata, ia te oe, ia le faavaivaia ai, e mafai ona e lagona mai lo’u leo ou te alofa ia te oe, aua e sa’o. E sili atu ona taua, faamolemole ia e iloa e alofa lou Tama oi le Lagi ia te oe ma e faapena foi Lona Alo Pele e Toatasi. A talanoa mai i la’ua ia te oe—ma o le a La talanoa mai lava—o le a le i ai i le matagi, po o le mafuie, po o le afi, ae o le leo filemu ma le itiiti, o se leo malu ma le agalelei.¹² O le a talanoa mai i le gagana a agelu. Ia tatou taufai olioli i le mafaufau a tatou tautala atu i mea e faagaeetia, o mea e faamalosiau i se tasi e aupito itiiti o o tatou uso ma tuafafine ma fanau iti, o i La’ua lava ia ua tatou fai atu i ai.¹³ I le suafa o Iesu Keriso, amene.