Elder Enrique R. Falabella
O Le Au Fitugafulu

Ata

O Elder Enrique Rienzi Falabella Arellano e talitonu e leai se isi mea e sili atu ona taua nai lo se molimau patino ia Iesu Keriso ma pe faapefea ona aafia le olaga o se tagata i le Togiola.

Na vave ona aoaoina e Elder Falabella e faapea, o le mauaina o se molimau e amata i se naunautaiga ina ia iloa le upumoni ma se naunautai e ola ai.

Na soifua mai i le aso 9 o Me, 1950, ia Udine ma Leonor Falabella, ma e 12 tausaga o Elder Falabella ae tu’itu’i atu faifeautalai i le faitotoa o lo latou aiga i le Aai o Kuatemala, i le mea na soifua ai. O ia o le ulumatua o se fanau e toafa, ma na maliu lona tina ao lei oo i lena taimi, ma sa iloaina e Elder Falabella e i ai se mea e ese e uiga i faifeautalai. Na ia vaaia i le alofa sa la faaalia ma le mana sa la aoao atu ai.

“Sa ou fia iloa mea sa la iloa,” na ia tomanatu ai. O lena manao ma le naunautaiga e fai mea na talosaga atu ai faifeautalai, na oo ai ina liua o ia.

“I le popofou o lo’u olaga, sa ou aoaoina ai le talisapaia o upu a le Faaola: ‘A i ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u’ (Ioane 7:17). Afai tatou te ola i mataupu faavae o le talalelei, e mafai ona pa’i mai le Agaga i o tatou loto, ma o le a tatou iloaina ai e moni.”

Ina ua maea lana galuega i le Misiona a Amerika Tutotonu, sa faamauina o ia ma lona faletua, o Blanca Lidia Sanchez, i le aso 21 o Iuni, 1975 i le Malumalu o Mesa Arizona. Sa maua le tikeri o Elder Falabella i le suesuega o le faato’aina o le eleele ma le gaosiga o fua o faatoaga mai le Iunivesite o San Carlos i Kuatemala, ma sa aoga mulimuli ane i mea tau maketi i le Iunivesite o Costa Rica. Sa faigaluega o ia i se kamupani o kemikolo ma vailaau a o lei valaauina e faamisiona mo le taimi atoa i le Ekalesia.

A o tuputupu ae la la’ua fanau ma lona faletua, sa auauna atu Elder Falabella o se peresitene o le misiona, epikopo, sui risone, peresitene o le siteki, ma se Fitugafulu Eria, sa tautua i le Eria o Amerika Tutotonu mo tausaga e lua. Sa avea o ia ma peresitene o le paranesi i le Nofoaga Autu e Aoao ai Faifeautalai i le Aai o Kuatemala, i le taimi na valaauina ai o ia i le Korama Muamua a le Au Fitugafulu.