Mo Le Au Perisitua Arona: Sauniuni mo le Vaitau o Faaiuga

Ata

Oka se fiafia i lo tatou mafuta ai uso e, a o outou potopoto ai i le salafa o le lalolagi. Ua faamanatu mai ai ia te au ia upu o le viiga: “Faauta! O se autau tupu, ua savavali atu e faatoilalo le fili i le malae o le taua i le olaga. I le fu’a, pelu, ma le talita.”¹ Ioe, o outou o le autau tupu a le Atua, e faatuatua ma faamaoni.

O le po nei, ou te fia tautala atu ai i uso aupito laiti o lenei autau tautupu—o le Perisitua Arona: tiakono, aoao, ma ositaulaga ua agai atu e feagai ma tauiviga o le olaga. E ui ina tou te le manatuaina, na outou ioe e faia lenei galuega ma se faaiuga tutasi, ua leva ona faia i le muai olaga. O iina, i le Fono Sili i le Lagi, na tonu ai ia te outou e usitai i le finagalo o le Tama Faalelagi ma Lona Alo o Iesu Keriso. Manatua le mea lenei: o oe o se atalii o le Atua o lē na tonu e mulimuli i le Faaola ina ua matua manaomia, ma o iina na avea moni ai oe ma se alii maoae.

Talu ai o lena faaiuga faalelagi e fuafua ai lou alualu i luma e faavavau, sa e mauaina ai se tino faaletino, maua ai le saolotoga e filifili ai le lelei mai le leaga, ma o lea ua outou ola nei ma sauniuni e tauave i o outou lava luga uiga o lo tatou Faaola. Ua papatisoina outou ma ua maua le Agaga Paia. O loo outou aoaoina pe o ai outou, aisea ua outou i ai iinei, ma pe o fea tou te agai i ai. Ma o lenei ua outou mauaina le Perisitua Arona!

O le Perisitua Arona o le perisitua sauniuni lea, ua tuuina mai i lenei taimi sauniuni o lou olaga. O le auala e te tauaveina ai lena perisitua i le taimi nei o le a saunia ai oe e faia faaiuga e aupito sili ona taua i le lumanai. O nei faaiuga e aofia ai le mauaina o le Perisitua Mekisateko, alu i le malumalu, ia a’oga, filifili se galuega, ma filifili se soa ma faamau ai mo le olaga nei ma mo le faavavau atoa i le malumalu paia. E i ai se taimi ma se vaitau mo a tatou faaiuga uma lava. Ia mautinoa ua e faia faaiuga i le taimi ma le vaitau sa’o. O nei faaiuga uma e fetuunai ai le olaga, o le a faia i se taimi o le pisi tele, ma le matua puupuu lava i le 20 ma ona tupu o outou tausaga—o le taimi ou te faaigoaina o le “Vaitau o Faaiuga.”

Ao ou aoga faataitai e avea ma se pailate avevaalele tau, sa ou sauniuni e faia na faaiuga taua i se masini e faataitai ai le aveina o se vaalele. Mo se faataitaiga, sa faataitai ona ou filifili po o le a le taimi ou te oso ai i fafo o se vaalele pe a mumu mai le moli lapata’i o se afi ma ua amata ona taavilivili le vaalele ma ua le mafai ona taofiofi. Ou te manatua se tasi o uo pele na te lei faia nei sauniuniga. Na te sailia lava se auala e ‘alo ai mai aoga faataitai nei ona sola lea e tapolo pe alu e ‘au’au. Na te lei aoaoina lava auala nei mo faalavelave faafuasei! I ni nai masina mulimuli ane, sa sasao se afi i lana vaalele ma sa taavilivili mai ai agai i lalo a o mumu. Ina ua vaaia le moli lapata’i o le afi, sa iloa e lana soa talavou ona tali atu i le faailoilo, ma oso i fafo o le vaalele ma faapau ifo ai ma le saogalemu i se faamalu. Peitai la’u uo e lei saunia e faia lena faaiuga, sa nofo ai lava i le vaalele ma maliu ai i le faalavelave.

I le vaitau o le a oo mai o lou olaga, o le a utiuti lou taimi mo sauniuniga. Ona o outou ua umia le Perisitua Arona, e taua lo outou sauniuni nei loa. E tatau ona e atiina ae ou lava tomai e tali atu ai i faaiuga taua o le a e faia i le isi vaitau o lou olaga. E tatau ona e iloa po o le a le mea e fai, ma le taimi e fai ai pe a oo i le taimi e fai ai faaiuga taitasi. Manatua o le leai o se faaiuga e fai, e leai se mea e ese ai ma le faia o le faaiuga sese. O le tele o faaiuga e te faia pe le faia foi o le a i ai taunuuga e faavavau.

O le taimi lenei e avea ai ma se soo o Iesu Keriso, o lona uiga o le talia lea o Lana valaaulia ina ia e “sau, ma mulimuli mai ia te au.”² O le faaiuga lenei sa tatou faia i le muai olaga. O lea foi e tatau ona tatou toe faia i le olaga nei, i aso uma, i tulaga uma e ala i lo tatou tauaveina o le suafa o le Faaola i o tatou luga, ma manatua Lana taulaga togiola, ma tausi Ana poloaiga. Sa tatou osi feagaiga e faia lenei mea ina ua tatou papatiso, ma ua tatou maua le avanoa e toe faafou ai na feagaiga i vaiaso taitasi a o tatou aai ma feinu i le faamanatuga.

O le taimi lenei e faatulaga ai ma saunia i tatou lava e avea le Agaga Paia ma a tatou soa tumau. O lona uiga, o le faia o mea e aoao ai outou e o outou matua ma taitai e fai—suesue i tusitusiga paia; tatalo i taeao ma po; ia tausisia ou foliga mama ma le tauagafau; mulimuli i se faatulagaga; faatutu ma ausia sini; ia faamaoni ia outou fegalegaleaiga; tausisia tautinoga; ma ia agavaa mo le perisitua o loo outou umia. Ia ola pea lava pea i tulaga faatonuina, na faaalia mai e perofeta, i le tamaitusi o le Mo Le Malosi o le Autalavou.

O le taimi lenei e fai ai lau faaiuga po o ai au uo ma ia agavaa mo se soa amiotonu e faavavau. E faigofie lava, uso e. E pei ona sa aoao mai e lo’u tina, “E miō faatasi lava manulele o le ituaiga.” E mafai e lau tupulaga ona musuia oe e faia mea silisili pe faaosoosoina foi oe i ala ese ma le matautia. O uo moni latou te faafaigofieina ona ola ai i le talalelei. Latou te le faaosoina lava i tatou e filifili pe o o latou ala po o ala o le Alii. Latou te fesoasoani ia avea i tatou ma ituaiga o tagata e tosina mai ai isi uo moni. Latou te fesoasoani foi ia avea i tatou ma ituaiga o tagata e mafai e se soa amiotonu ona filifili la te mafuta e faavavau. Afai e te manao i na ituaiga o uo, fesili ifo ia te oe lava: “Pe o au ea o le ituaiga uo lena i isi? Pe o au ea o le ituaiga o tagata ou te manao e avea ai la’u soa e faavavau?”

O le taimi lenei e sauniuni ai mo lau misiona. E faalagolago lava i lou tulaga patino, e mafai ona e auauna atu i se misiona tala’i. E ui e taua lenei mea, ae ia manatua e taua atu lou alu i le malumalu a o e sauniuni mo lau misiona. O se misiona, o se avanoa e le mafuatiaina e tausisia ai feagaiga o le malumalu e ala i le ola ai i tulafono o le faapaiaga—tuuina atu o lou taimi atoa, meaalofa, ma taleni i le Alii ma auauna atu ia te Ia ma lou loto atoa, manatu atoa, mafaufau atoa, ma le malosi atoa. Ou te lagonaina lava i taimi uma, o le lua tausaga e te auauna atu ai o se sefuluai o le taimi i uluai tausaga e 20 o lou olaga. Peitai, tusa lava foi pe le mafai ona e faamisiona tala’i, e mafai lava ona e sauniuni aua e i ai se aso i le lumanai, pe a sa’o le taimi, e alu ai i le malumalu e osia feagaiga paia ina ia mafai ai ona e maua ou faamanuiaga e faavavau.

O le taimi lenei e sauniuni ai mo aoaoga faamasani, a’oga, ma se galuega. I le avea ai o ni alii talavou o le Perisitua Arona, ua outou i ai i le sauniuniga mo le olaga. O lou ma’elega i le aoga i le taimi nei o le a e agavaa ai e tausia le fautuaga a Peresitene i le lumanai—ia puepue mai a’oa’oga uma e te mafaia.³ Ia fai nei le tonu e fai le mea sili e te mafaia i le aoga ma le galuega. A oo ai ina tulai mai avanoa, o le a e saunia e tatala le faitotoa ma faaaoga tatau. E ao ona tatou manatua uma: “E tuuina atu se meaalofa i tagata taitoatasi.”⁴ Ia atiina ae au meaalofa ma taleni. Alii talavou, ia filifili ma le agaga tatalo vasega, polokalama o aoaoga faamasani, ma galuega o le a saunia ai outou mo avanoa sili atu ma isi tiutetauave i le lumanai.

O le taimi lenei e usitai ai. I le muai olaga, tatou te lei filifili e usitai na o se vaega o le finagalo o le Atua. Tatou te lei pikiina ma filifili pe o fea vaega o le fuafuaga faavavau e mulimuli ai. Sa ou aoaoina lena lesona i le po muamua lava sa matou felelei ai i le aoaoga faapailate ina ua tuuina mai ia i matou uma se faatonuga: “Aua nei felelei i ni mamanu faafegifegi i le po. O outou o pailate faatoa amata e aunoa ma ni masini aoao avevaalele.” E i ai se taimi mulimuli ane, sa filifili ai e se pailate ua tele lava ina lelei ma sana uo lelei lava, e le usitai i lena faatonuga. A o lele a’e o ia i se li’o ma faataamilo ai faatu i luga i le ao pogisa i luga a’e o Texas, sa tilotilo atu o ia i le faataumata o le potu o le pailate ma sa mafaufau o la e vaai i fetu i luga a’e o ia, peitai o la e vaai atu i moli o mea e eli ai le suauu i lalo. Sa ia faalogoina lona niniva: o le malosi o le kalave i luga o lana vaalele sa foliga ai o la e sagatonu i luga, ae o la ua u i lalo lona ulu. A o ia suiina le kia e lele ai i luga i le pogisa o le po, sa tofu ifo o ia i le eleele ma pau atu ai i moli emoemo o le fanua o le suauu.

A e aveina se vaalele, afai e suia lou tulaga i se tikeri lava se tasi i se taimi, e le mafai ona iloa e lou taliga i totonu le suiga. Uso talavou faapea foi e ua matutua, a tatou faataitai e filifili na o ni poloaiga e usitai i ai, ua tatou suia lo tatou sootaga ma le Alii—ma e masani lava e na o sina mea itiiti i le taimi. A o galulue le au taufaasese ia i tatou, e le mafai ona tatou iloa, ma tatou te lagonaina le niniva faaleagaga. E ui ina foliga faapei o loo tatou o i se itu e saogalemu, o le mea moni o la tatou te aga atu i le faalavelave. I le muai olaga, o la tatou faaiuga e mulimuli i le Alii sa atoa lelei. O le mulimuli ai i lena mamanu [o le usitai atoatoa i le Alii] i lo tatou olaga faataitai i la le tino, o le a toe foi atu ai i tatou taitoatasi i lo tatou Tama Faalelagi.

O le taimi lenei e faaaoga tatau ai lo tatou taimi. “E tatau i tagata ona sauniuni i lenei olaga e fetaiai ma le Atua.”⁵ Ou te molimau atu o le a lava lou taimi i le fogaeleele, pe afai e te aoao e faaaogaina ma le poto i lou talavou. “Ioe, ia manatua, lo’u atalii e, ma ia e aoao i le poto ina o e taulealea; ioe, a o e taulealea, ia e aoao e tausi i poloaiga a le Atua.”⁶

O le taimi lenei e puipui malu ai lou tofi. Ina ua latalata i le iuga o lona soifua, sa tuuina atu ai e le perofeta o Iakopo i le Feagaiga Tuai se faamanuiaga i ona atalii taitoatasi. O Reupena o le ulumatua ma sa i ai le tofi—o faamanuiaga faapitoa sa faamoemoe mo ia. Peitai o lana faamanuiaga ia Reupena, sa fai atu ai lona tama, “O oe ua … osovale e pei o le vai, e le faasili lava oe.”⁷ Mafaufau mo sina minute po o le a le uiga o le fuaitau osovale e pei o le vai? A vevela le vai, e mitiia. Pe a malulu le vai, e malo. A leai se alavai, ona afua ai lea o tafega ma faatamaia ai soo se mea e i lona ala.

I le avea ai ma ē tauaveina le perisitua Arona, ua i ai foi ia te outou le tofi. Ou te tuuina atu se lu’i ina ia e usitai ma ia e malosi. Ou te tuuina atu se lu’i ia aua nei faavaivaia pe mitiia lau faaiuga ma lau tautinoga e mulimuli i le Faaola. Ia mausali e pei o se papa i lou ola ai i le talalelei. E leai se tasi o i tatou e iloaina uma faamanuiaga o loo faatalitali mai mo i tatou. Na pau le auala tatou te le maua ai na faamanuiaga, o le lafoaia lea e ala i le le usitai. Aua nei e lafoaia lou tofi e faavavau mo mea o lenei lalolagi. Ia tatou usiusitai ma sauniuni nei e faamamalu, puipuia, ma maua lo tatou tofi mamalu.

Alii talavou, o outou o le malosiaga taua o le autau a le Alii, le autau talavou o nei aso e gata ai.⁸ “O le mea tou te lulu, o le mea lava lea tou te seleseleina.”⁹ Pe a mafaufau i le seleselega mamalu o loo loma, ou te valaaulia outou ina ia mafaufau pe faapefea ona e faia faaiuga i le vaitau o lumanai.

O le tulafono o le seleselega o loo ofoina mai ai se mamanu mo le faiga o faaiuga. Sauniuni le palapala e ala i le tatalo, ma le iloa o oe o se atalii o le Atua. Ia toto fatu e ala i le fefautuaai ma i latou o le a aumaia ai fautuaga lelei; ona saili lea o le taitaiga a le Agaga Paia. Tuu ia ola fatu o musumusuga. O manatu faatoa fotua’i mai e manaomia le tausiga. Latou te manaomia le taimi e matutua ai. O le a aumaia e le malamalama o le musumusuga le seleselega faaleagaga lea e oo mai pe a tatou ole atu i lo tatou Tama Faalelagi i le tatalo pe ua tatou faia se faaiuga sa’o. A tatou mulimuli i le malamalama, o le a mou atu le pogisa ae “tuputupu pea le pupula o lea malamalama seia oo mai le aso atoatoa”¹⁰—lea aso pe a tatou i ai i le afioaga o lo tatou Tama oi le Lagi.

Ao le mea mulimuli, ia e i ai iina. O i tatou uma lava sa i ai iina i le Fono Sili i le Lagi e filifili ai le ata sili o le fiafia lea ua tatou olioli ai nei. Alii talavou, pe a e faia se tautinoga ia te oe lava, o lou aiga, o lou epikopo, o lou falefaigaluega, ia e i ai iina. A oo i le taimi e tatau ona i ai i le lotu, i le Mutuale, po o le faataunuuina o se tofiga o le perisitua, ia e i ai iina. A oo i le taimi e te faauu ai mai le aoga po o ni polokalama o aoaoga faamasani, ia e i ai iina. A oo i le taimi e auauna atu ai i se misiona, ia e i ai iina. Pe a tootuli i le fatafaitaulaga o le malumalu paia o le Atua le tamaitai talavou ua sili ona e alofa i ai, ia e i ai iina (ae ia le o se molimau). A potopoto lou aiga i le malo selesitila, ia e i ai iina. A faatalitali mai le Faaola e faafeiloai i lou toe foi atu ma le mamalu mai lou olaga i lenei lalolagi ma e finagalo lou Tama Faalelagi e opo atu oe i aao o Lona alofa, ia e i ai iina.

A maea lou vaitau o faaiuga, ia agai i luga ma luma. “Tulai ia, [outou] atalii o le Atua!”¹¹ Ia avea ma ni tane ma ni tama faamaoni. Ia amio sa’o. Ia tutulai ma ia agavaa mo afafine agavaa o le Atua, o e e fesoasoani ma lagolagoina i tatou. Ia tatou faamamaluina i latou e pei ona tatou faamamaluina le Alii.

Ou te molimau atu e silafia e lou Tama Faalelagi o loo e i ai iinei i le po nei. O oe o se vaega o Lana autau tautupu maoae “o fitafita latou, ua tasi ma totoa, tausi i le Ta’ita’i ma pese fiafia: Tau mālo, tau mālo, mo le na togiola mai! Tau mālo, tau mālo, mo Iesu le Alii!”¹² O loo i ai o Ia iina, e finagalo o Ia ia tatou faatasi ma Ia, Na te taitai i tatou, ma o ia te Ia lo tatou manumalo, ou te molimau atu ai i le suafa o Iesu Keriso, amene.