E Ao Ina Toe Fanau Mai Outou

O se piko o se kukama lea sa suia e tusa ai ma se fua patino ma le faagasologa o laasaga. O laasaga muamua i le faagasologa o le suia o se kukama e avea ma se piko, o le sauniaina ma le faamamaina. Ou te manatua le tele o itula e faaalu i le poletito i tua o le matou fale, e aveese ai ‘au ma olo ese le palapala mai kukama sa matou tauina. O lo’u tina, sa matuai auiliili lava le sauniaina ma le faamamaina o kukama. E maualuga tele lana faatulagaga o le mama ma na te asiasia i taimi uma a’u galuega, ina ia mautinoa ai e mae’a lelei lenei galuega taua.

O le isi laasaga o lenei faagasologa o le suia, o le faatofu lea ma soka kukama i le vaimasima mo se taimi umi. Ina ia saunia le vaimasima, e masani ona faaaoga e lo’u tina le fua sa ia aoaoina mai i lona tina—o se fua e i ai mea faapitoa e fai ai ma auala patino e fai ai. Faatoa mafai ona avea kukama ma piko pe afai e matuai faatofu atoatoa i le vaimasima mo le taimi atofaina. O le faagasologa o le faasaoina, e faasolosolo malie lava ona suia le foliga o le kukama ma maua mai ai foliga manino ma le tofo uiga ese o se piko. O se sausau po o se lolō i nisi taimi i le vaimasima, e le mafai ona maua ai le suiga e tatau ai. Ae, o le faato’ato’a lelei, ma tuu ai pea, ma faatofu mae’ae’a ai, e tatau ai mo le suiga moomia ina ia tupu.

O le toe laasaga i le faagasologa, e manaomia ai le faamau o fagu ua tuu ai piko ua uma ona faamama ma vaimama. E tuu piko i fagu e utu ai, ma faalilofia i le vaimasima vevela, ona faamagoto ai lea i se tapu taele vaivevela. E tatau ona aveesea uma ni mea faaletonu mai piko ma fagu ina ia mafai ai ona puipuia ma faasaoina le oa ua mae’a ona gaosi. A mulimulita’ia lelei lenei faiga, e mafai ona matuai umi se taimi e teuina ai piko ma faaaoga.

I se aotelega, e avea se kukama ma piko pe a saunia ma faamama, faatofu ma soka i le vaimasima, ma tuu i totonu o se fagu ma faamau ai. O lenei faiga e manaomia ai le taimi ma e le mafai ona faanatinatia, ma e leai se laasaga taua e mafai ona tuu pe le faia.

O loo saga aoao mai pea e auauna faamaonia a le Alii, o se tasi o faamoemoega autu o lo tatou i ai i lenei olaga, o le suia faaleagaga lea ma liua e ala i le Togiola a Iesu Keriso. Na tautino mai e Alema:

“Aua e te ofo, aua e ao ina toe fanauina tagata uma lava, ioe, o tane atoa ma fafine, o atunuu uma, ituaiga, ma gagana eseese, ma nuu; ioe, ia fanauina i la le Atua, ma ia liua mai le faaletino ma le pau i le amiotonu, ona ua togiolaina e le Atua, ma ua avea mona atalii ma afafine;

“Ua faapea foi ona avea i latou ma tagata fou; a latou le faia lenei mea, e le mafai ona fai mo latou tofi le malo o le Atua” (Mosaea 27:25–26).

Ua faatonuina i tatou ina “ia o mai ia Keriso, ina ia faaatoatoaina e ia, ma ia teena e [i tatou] le amioletonu uma” (Moronae 10:32), ina ia avea ma “tagata fou” ia Keriso (tagai 2 Korinito 5:17), ia tuu ese “le tagata o le agasala” (Mosaea 3:19), ma ia iloa ai “faaliliuina o a tatou amio ma o tatou loto, ua le toe i ai so tatou manatu e fai amio leaga, a e fia fai pea lava le amio lelei” (Mosaea 5:2). Faamolemole o le liua o loo ta’ua i nei fuaiupu, e maoae, e le laiti—o se toefanau mai faaleagaga ma le suiga e ala mai i le faavae o mea tatou te lagonaina ma naunau i ai, o mea tatou te mafaufau i ai ma fai, ma o tatou ituaiga o tagata. E moni, o le natura moni o le talalelei a Iesu Keriso e afua ai se suiga taua ma le mautu i o tatou lava natura, e mafai i lo tatou faalagolago i “taui, ma le alofa mutimutivale ma le alofa tunoa o le Mesia Paia” (2 Nifae 2:8). A tatou filifili e mulimuli i le Matai, ua tatou filifili ina ia suia—ia toefanauina faaleagaga.

E faapei ona tatau ona saunia ma faamama le kukama a o lei mafai ona suia e avea ma se piko, e mafai foi ona saunia oe ma a’u i “upu o le faatuatua ma le mataupu lelei” (1 Timoteo 4:6) ma muai faamamaina e ala i sauniga ma feagaiga e tuuina mai i le pule o le Perisitua Arona.

“Ae sa tumau pea le perisitua maulalo, o lea perisitua o loo taofia le ki o asiasiga ma galuega a agelu ma le talalelei sauniuni;

“O le talalelei lea o le talalelei o le salamo ma le papatisoga, ma le faamagaloina o agasala” (MFF 84: 26–27).

Ma ua uma ona faavae e le Alii se tulaga maualuga o le mama.

“O lea, ia e aoao atu i lau fanau e ao ina salamo tagata uma lava, a le o lea, e le mafai ona latou maua le malo o le Atua, aua e le mafai ona i ai se mea le mama iina, po o Ona luma” (Mose 6:57).

O le sauniaina lelei ma le faamamaina, o laasaga muamua ia i le faagasologa o le toe fanauina.

E faapei lava ona liua le kukama e avea ma se piko pe a faatofu ma soka i le vaimasima, e faapena foi ona toe fanauina oe ma au pe a mitiia i tatou i le talalelei a Iesu Keriso. A tatou faamamaluina ma “tausia feagaiga” (MFF 42:13) ia na tatou ulufale atu i ai, a tatou “fiafia i afioga a Keriso” (2 Nifae 32:3), a tatou “tatalo atu i le Tama ma le malosi uma o le loto” (Moronae 7:48), ma a tatou “auauna atu i le [Atua] ma o [tatou] loto atoa, ma mafaufau atoa, manatu atoa ma le malosi atoa,” (MFF 4:2), ona:

“O le feagaiga na outou faia, e ta’ua outou o le fanau a Keriso, o ona atalii ma ona afafine, aua faauta, o le aso nei ua fanaua ai outou e ia i le faaleagaga; aua ua outou fai mai ua liua o outou loto ona o le faatuatua i lona suafa; o le mea lea ua fanauina ai outou ia te ia, ua avea ai outou mona atalii ma ona afafine” (Mosaea 5:7).

O le toe fanauina faaleagaga o loo faamatala mai i lenei fuaiupu, e le vave ona tupu pe tupu foi i le taimi e tasi; o se faagasologa faifai pea—e le o se mea e tupu i se taimi e tasi. O lea upu ma lea upu ma lea mataupu ma lea mataupu, e faasolosolo malie ma e toetoe lava ina a le iloa, o o tatou faamoemoega, o o tatou mafaufauga, o a tatou upu, ma a tatou amioga e amata ona ogatasi ma le finagalo o le Atua. O lenei itu o le faagasologa o le liua, e manaomia ai le taimi, finafinau, ma le onosai.

E faatoa avea se kukama ma se piko e ala i le faatofuina faato’ato’a, ma tuu ai pea, ma ia mae’ae’a i le vaimasima. O le tele lava, o le masima o le elemene autu lea i le fua. O loo faatele ona faaaoga le masima i tusitusiga paia o se faatusa o se feagaiga ma se nuu o le feagaiga. E pei foi ona taua le masima i le faaliliuina o se kukama e avea ai ma se piko, e faapena foi ona totonugalemu ia feagaiga i lo tatou toefanauina faaleagaga.

Tatou te amataina le faagasologa o le toefanauina e ala i le faatuatua ia Keriso, salamo i a tatou agasala, ma papatisoina e ala i le faatofuina mo le faamagaloga o agasala, e se tasi o i ai le pule o le perisitua.

“O lenei, ua tatanu faatasi i tatou ma ia i le papatisoga i lona maliu: pei ona toe faatuina mai o Keriso nai e ua oti, ina ia tatou savavali i le ola toefuataiina, pei ona toe faatuina mai o Keriso nai e ua oti” (Roma 6:4).

A mavae ona tatou o a’e mai i le vai o le papatisoga; e manaomia e o tatou agaga ona faatofu ai pea lava pea ma faatumu ai pea lava i le upumoni ma le malamalama o le talalelei a le Faaola. O se loiloi i nisi taimi ma le papa’u i aoaoga faavae a Keriso ma le auai faaafaafa i Lana Ekalesia toefuataiina, e le mafai ona fua mai ai le liua faaleagaga lea e mafai ai ona tatou savavali i le ola toefuataiina. Ae, o le faamaoni i feagaiga, tumau i tautinoga, ma le ofoina atu o o tatou agaga atoatoa i le Atua e manaomia pe afai tatou te fia mauaina faamanuiaga o le faavavau.

“Ou te loto ina ia o mai outou ia Keriso, o Le Paia o Isaraelu, ina ia tofusia outou i lana faaolataga. Ioe, ina o mai ia ia te ia, ma tuu mai o outou agaga atoa e fai ma taulaga ia te ia, ma ia tutumau i le anapogi ma le tatalo, ma ia tutumau e oo i le iuga; o soifua lava le Atua, e faaolaina outou” (Ominae 1:26).

O le faatofuina atoatoa ma faatumu ai i le talalelei a le Faaola, o laasaga taua ia o le toefanauina.

O kukama e faasaoina, e tuu i totonu o fagu ua uma ona faavailaau mama ma tuu i le vaivevela ina ia aveesea ai ni faaletonu ma faamauina koneteina mai ni mea mai fafo e faaleagaina ai. O le faiga e faamagoto ai i le tapu vaitaele vevela, e mafai ai ona puipuia ma faasaoina le piko mo se taimi umi lava. I se auala foi faapena, e agaigai ai i luma lo tatou faamamaina ma le faapaiaina a o fufuluina oe ma au i le toto o le Tamai Mamoe, ma toe fanauina ai, ma maua ia sauniga ma faamamaluina feagaiga o loo tuuina mai i le pule o le Perisitua Mekisateko.

“E ui lava i lea, ua latou anapogi ma tatalo soo, ma ua tauau ina faamaulalo atili ai i latou, ma ua tauau ina mausali atili i le faatuatua ia Keriso, e oo i le faatumuina o latou loto i le olioli ma ua faamafanafanaina, ioe, e oo i le faamamaina ma le faapaiaina o latou loto; ua oo mai lea faapaiaina ona ua latou tuuina atu o latou loto i le Atua” (Helamana 3:35).

O le upu “faamauina” i la’u savali e le o faasino a’ia’i atu i le sauniga o le faaipoipoga e faavavau e faia i le maota o le Alii. Ae, o loo ou faaaogaina lenei upu patino, e pei ona faamatala mai i le vaega lona 76 o le Mataupu Faavae ma Feagaiga.

“O le molimau lenei o le talalelei a Keriso e faasino ia i latou o le a oo mai i le toe tutu o e amiotonu—

“O i latou ia o i latou lava na talia le mau ia Iesu, ma talitonu i lona suafa ma papatisoina e pei ona tanumia o ia, ina ua tanumia i latou i le vai i lona suafa, ma o nei mea ua faia e tusa i le poloaiga na ia tuuina mai—

“Ina ia fufuluina ma faamamaina i latou i a latou agasala uma i le tausia o poloaiga, ma maua le Agaga Paia i le faaee atu o lima o le ua faauuina ma faamaufaailogaina i lenei mana;

“Atoa ma e ua manumalo i le faatuatua, ma faamaufaailogaina e le Agaga paia o le folafolaga, e liligi atu e le Tama i luga o i latou uma o e amiotonu ma faamaoni” (ff. 76:50–53).

O le Agaga Paia o Folafolaga o le mana faamaonia lea o le Agaga Paia (MFF 132:7). A oo ina faamaufaailogaina e le Agaga Paia o Folafolaga, e faamauina se sauniga, o se tautoga, po o se feagaiga i le lalolagi faapea foi ma le lagi. (Tagai MFF 132:7.) O le mauaina o lenei “faailoga o le faamaoniga” mai le Agaga Paia, o le taunuuga lea o le faamaoni, amiosa’o, ma le tumau mausali i le faamamaluina o feagaiga o le talalelei “i [le] taimi ua tatau ai” (Mose 7:21). Peitai, e mafai ona faaleaogaina lenei faamaufaailoga e ala i le amioletonu ma le solitulafono.

O le faamamaina ma le faamaufaailogaina e le Agaga Paia o Folafolaga, e tutupu mai ai laasaga e faavae ai laasaga tupito i le faagasologa o le toefanauina.

O’u uso e ma tuafafine pele, ou te tatalo ina ia fesoasoani lenei faataoto i le piko tatou te iloiloina ai o tatou olaga, ma ia malamalama atili ai i le taua e faavavau o le toefanauina faaleagaga. Faatasi ma Alema, “Ou te tautala atu i le malosi o lo’u agaga” (Alema 5:43).

“Ou te fai atu ia te outou, o le tofiga lenei ua valaauina ai a’u, e talai atu i o’u uso pele, atoa ma tagata uma ua nonofo i le nuu, ioe, e talai atu i tagata uma, o e matutua ma e iti, o e pologa ma e saoloto; ioe, ou te fai atu ia te outou, o toeaina, atoa ma outou o matuā tagata, i le ma le tupulaga; ioe, e alaga atu ia te i latou e ao ina latou salamo ma toe fanauina” (Alema 5:49).

Ou te molimau atu i le moni ma le paia o se Faaola soifua, o lē o loo valaauliaina i tatou ina ia o mai ia te Ia ma ia liua ai. Ou te molimau atu ua toefuataiina mai Lana Ekalesia ma le pule o le perisitua e ala mai i le Perofeta o Iosefa Samita. O le faatuatua ia Keriso, e mafai ai ona tatou saunia faaleagaga ma faamamaina ai mai agasala, faatofuina ma matua faatumuina i Lana talalelei, ma faamama ai ma faamaufaailogaina e le Agaga Paia o Folafolaga—ma toefanauina ai. I le suafa paia o Iesu Keriso, amene.