Ia Faaputu Ai Fua

O uso pele, e maeu lava le faamanuiaina o i tatou e potopoto faatasi ma le Au Peresitene Sili ma Aposetolo e Toasefululua. O perisitua taitoatasi uma o loo faatasi mai, pe ua 12 pe 112 o ia, e mafai ona mautofi i le tulaga faaselesitila o le olaga ona o lo tatou Faaola o Iesu Keriso “e ala i le usiusitai i tulafono ma sauniga o le Talalelei.”¹ O se mea matagofie lenei e mafaufau i ai ma ou te iloa e moni. O oe lava e te faatonutonuina lou olaga!

Faatasi ai ma lenei vaaiga o loo i o tatou luma, mafaufau i le tala lenei. O se alii talavou, e tumu i faamoemoega ma le malosi, na lesitala i se iunivesite lelei lava. O le taimi lena, o loo avea o ia ma se ositaulaga i le Perisitua Arona. O lana sini sa maualuga lava—sa manao o ia ina ia avea ma se fomai. O lona faamoemoega sa mautu—na manao ina ia mauoa. Sa manao o ia e taalo lakapi faaAmerika, o lea sa ia feiloai ai ma faiaoga ma iu ai ina taliaina i le ‘au. Ua mafai nei ona ia maua ni faalauiloaga ma gugutu solo e tulaga ese lava i le lalolagi o taaloga a le iunivesite. O ona mafaufauga na sa i ai.

Ae sa le mafaufau tele i se mea e oo ina aveesea ai ona faamoemoega ma sini maualuluga—na te le’i faaputuina ni fua. Na te le’i amanaiaina le taua o le lava o tapenaga, o le manaomia o le auai e le aunoa i vasega ma le pulea lelei o le faiga o meaaoga, ma le vasega kemisi a le kolisi. Sa vave lava le taunuuga ma e faalemanuia. E le’i atoa se 90 aso. O le mea lenei na tupu:

O le aso na tu atu ai lona tino e 5-futu 8-inisi, 170 pauna e faafetaui se tagata tinoese sa la paga mai le ‘au a i latou e sili ona lelei le taaalo, sa ia iloaina ai e sese le taaloga lea e i ai.

O le le masani i le mamafa o suesuega, sa mumusu ai ona mata ma lona mafaufau e galulue pe a mavae sina taimi puupuu e suesue ai.

O le taualuga o le toilalo o le suega faaiu o le kemisi. E na ona ou faapea atu o ana tali taumatemate i fesili e te filifilia le tali sao e le’i taulalata i le averesi talafeagai o ni tali taumatemate. Na matuai leaga faia lona le pasi.

O le galue malosi, o se misiona na fesoasoani ia te ia ia toe sa’o ai lona malamalama i faamoemoega o le olaga, ma sauniuniga e le muta na iu ai ina faatoilaloina le taunuuga o lenei vaitau puupuu o le faavalevalea. Ae peitai, e oo mai lava i aso nei, o loo i ai pea ni mitivale ou te faia e uiga i lena vasega kemisi.

O le mea e lelei ai, ua faaali mai e le Alii ia i tatou le auala e aloese ai mai le faavalevalea ma le lototiga faapena. Na Ia fetalai:

“Ina faalogo mai ia, E outou tagata o la’u ekalesia… . Faalogo mai ia outou tagata mai mea mamao; ma outou o e o i luga o motu o le moana, faalogo faatasi mai ia… .

“Ina sauni ia outou, sauni ia outou mo mea a oo mai, aua ua latalata mai le Alii.²

O le aoaoga faavae o le Afio Mai Faalua o le Mesia o loo tuuina mai ai se tasi o mafuaaga e saunia ai ma ola sao. Ua silafia e le Tama Faalelagi o taui ua folafolaina mai e uunaia ai Lana fanau e faia galuega o le amiotonu ae o faasalaga ua folafolaina mai e faalotovaivai ai mai le faia o le leaga. E faapena faaaliga e faatatau i le Afio Mai Faalua o lo tatou Alii.³

O nei faaaliga o loo tautala i faailoga ma mea e ofo ai i le lalolagi ma le lagi. O loo faailoa mai ai taimi faigata ma mea eseese e tele o le a oo mai. Ae o le mea sili ona taua, ua tatou maua nei folafolaga faalelagi:

“E i ai le mana o le Alii i luga o lana au paia, ma o le a nofotupu i le lotolotoi o i latou.”⁴

“E ui ina oo mai puapuaga i o outou luga, a ona o la’u taitaiga, … e mafai ai e le ekalesia ona tu saoloto i isi faiga uma i lalo ifo o le lalolagi selesitila.”⁵

Ma, “afai ua saunia outou, o le a outou le matatau ai lava.”⁶

O e umia le perisitua o loo taitaiina e nei folafolaga ina ia saunia ai i latou lava ma o latou aiga mo le faaali mai o le Alii.⁷ E leai se mea o le a popole ai fua i mea e tutupu e faatatau i le Afio Mai Faalua. Ae ia faatumulia i tatou i le loto faafetai mo le malamalama i mea o le a tutupu. Ia tatou talisapaia lo tatou puleaina o lo tatou lava lalolagi, i le avea ai ma sui o le Alii i mea ua Ia tuuina mai ia i tatou.⁸ O le fua e faigofie lava: Ia faamaoni. Faasaoloto lou olaga. Faaputu ni fua.

Ia faamaoni. I le avea ai ma e ua umia le perisitua, ia tatou totoina se pa’i malu ma se upu agalelei. O i tatou o alii o e tatalo, o e tausia ma faapaiaina le Aso Sapati, ma e ua iloa le afioga a le Atua. Tatou te totogi sefuluai, anapopogi, ma foai atu se taulaga anapogi matamau. Tatou te osia a tatou feagaiga ma faapaiaina i tatou lava i le fausiaina o le malo o le Atua.

Ma, uso e, ia tatou faaputu ni fua! O le faia o nei mea, “o le a i ai le mana o le Alii i luga o lana au paia, ma o le a nofotupu i lo [tatou] lotolotoi.”⁹

Faasaoloto lou olaga. I le avea ai ma tagata o le Atua, tatou te liliuese ai mai le tele o mea e maua i mea e atiina ae ai i tatou, aua “o mea foi e le faamanuiaina e le mai le Atua.”¹⁰ Afai o ni fegalegaleaiga po o ni mea e aafia ai po o ni sailiga po o fuafuaga o aso taitasi e taitaieseina ai i tatou mai le faamuamua o le Atua, e tatau ona tatou faasaolotoina o tatou olaga.¹¹ Afai o i ai ni a tatou aitalafu, ia totogi loa ma ola saoloto mai le aitalafu i le mea e gata ai.

Ma, uso e, ia tatou faaputu ni fua! Ma, “ona o le taitaiga a [le Alii], e ui lava i tofotofoga … e mafai ai e le ekalesia [ma ona tagata] ona tu saoloto.”¹²

Ia faaputu ai fua. O ava e matuai mataalia lava i lenei galuega, ae latou te manaomia ni tane o e taulamua i le saunia o le aiga. E manaomia e fanau ni tama ma ni tina o e totoina ia i latou lenei tu amiotonu. O le a faapena foi ona latou faia i a latou fanau, ma o le a le gaogao lava o latou faleteuoloa.

O se mataupu faavae autu o le talalelei o le saunia lea mo aso leaga. O le galue, limalima, ola faasoasoa o vaega ia o le faatulagaga mamalu o le olaga. Ia manatua upu nei a Paulo: “A e afai e le tausi e se tasi i lona aiga, afai foi e le sili ona tausi i ē mau ma ia, ua faafitia e ia le faatuatua, e sili foi lona leaga i le ua le faalogo.”¹³

O loo susū i o tatou luma ia faitaulaga sili pulefaamalumalu e toatolu o e ua fausia ai le Au Peresitene Sili o le Ekalesia.

Mai ia Peresitene James E. Faust, Fesoasoani Lua, ua tatou faalogo: “O tama ma tina taitoatasi o teu oloa ia o aiga. E tatau ona la teua soo se mea e fiafia i ai lo la’ua aiga pe a tupu mai se faalavelave faafuasei … [ma o le] a lagolagoina i tatou e le Atua i taimi o faigata.”¹⁴

Mai ia Peresitene Thomas S. Monson, Fesoasoani Muamua, ua tatou faalogo: “E mafai ona toatele atu tagata e mafai ona sao ese mai le faigata o mea tau tupe i o latou olaga pe ana i ai sa latou sapalai o meaai mo le tausaga … ma leai ni aitalafu. O aso nei ua tatou iloaina ai le toatele o e ua mulimuli i le itu faafeagai o lenei fautuaga: e le itiiti ifo ma le tasi le tausaga atoa le sapalai o aitalafu ma ua matuai leai ni meaai.”¹⁵

Mai ia Peresitene Gordon B. Hinckley, le perofeta a le Alii, ua tatou faalogo:

“O le nofoaga sili lava e teu ese ai ni nai meaai, o totonu lea o o tatou aiga… .

“E mafai ona tatou amata i nai mea iti. E mafai ona tatou amata teu ni meaai mo le vaiaso ma faasolosolo malie atu ai lava ona teu mo se masina, ona sosoo ai lea ma le tolu masina… . Ou te popole ona e toatele naua ua manatu, o le teuina o ni meaai mo se taimi umi e le mafai ona oo i ai se malosi ona latou le faia ai lava lea o se taumafaiga e fai ai.

“Amata i sina mea itiiti, … ona faasolosolo malie ai lava lea ona faaputu seia paia le faamoemoega talafeagai.”¹⁶

O sauniuniga musuia o loo taoto lea i luga o le faavae o le faatuatua ia Iesu Keriso, usiusitai, ma se olaga faautauta. E le tatau i tagata o le Ekalesia ona latou soona faia foi, ae e tatau ona latou amata.

Matou te valaau atu i e uma ua umia le perisitua ina ia faaputu ni mea ia lava ina ia mafai e oe ma lou aiga ona taulimaina mea e le’i mafaufauina e tulai mai i le olaga. Faamolemole ia mautinoa ua maua e i latou o loo i lalo o la outou vaavaaiga ia nei tamaitusi e lua ua faaigoaina O Loo Saogalemu Ona Faapotopotoina Uma i Totonu. Ia apoapoai atu ia i latou ina ia saunia nei mo aso leaga o loo lumanai.

Taitai perisitua, ia faaauai le Aualofa i le faalauiloaina o le saunia o le aiga ma le tausiaiga. E manaomia e tamaitai o le Ekalesia la outou lagolago ma o le a tali atu i la outou taitaiga.

Ia uunaia o outou tagata ina ia teuina e le aunoa i le fale ni meaai e paleni atoatoa, ma masani ai ma ni nai vai e saogalemu mo le inuina. E tatau ona latou teuina sina tupe, na o ni nai siliva i vaiaso taitasi. O lenei auala faigofie o le a le umi ae mafaia e i latou ona i ai se faapolopolo mo ni masina se tele. E le umi se taimi ae mafai ona latou faateleina nei taumafaiga faigofie i se sapalai mo se taimi umi e ala lea i le faaopoopoina i ai o ni nai mea talafeagai e pei o fatu, laau e aina o latou fatu, ma isi meaai e maua ai le ola lea o le a tausia ai i latou ina ne’i tei ua leai nisi mea latou te aai ai.¹⁷

A o tatou faia le mea sili tatou te mafaia, e mafai ona tatou mautinoa o le “a le uma le kate falaoa, e le faaitiitia le suauu i le fagu.”¹⁸ E ao ona tatou olioli i le faautauta sili atu, saogalemu, filemu o le mafaufau, ma le soifua laulelei o le tagata lava ia. E tatau ona tatou saunia, ma ona ua tatou saunia, o le a tatou “le matatau ai lava.”¹⁹

I le faaiuga, ou te faailoa atu ia te outou le aiga o Luca na Patrizia Vaccarono. E nonofo i latou i se tamai nuu e latalata i Roma, Italia. I se tusi talu ai nei na latou tusi mai ai:

“Na matou fuafuaina ina ua mavae se faataitaiga e faapea e taua le teuina o meaai matou te faaaogaina. O nisi taimi matou te fesuiaia ai lo matou aai i nisi o ituaiga meaai… .

“O le lagona o le filemu ma le naunau ina ia faamaoni i le poloaiga ua tuuina mai e le Alii e ala mai i le perofeta o ona po nei ua fesoasoani ai ia i matou ia lagonaina le Agaga Paia, … aua le fefefe, ma o le vaai i faailoga o le taimi mo le Afio Mai Faalua o le Alii o se faamanuiaga, ae le o se mea e fefefe ai. Matou te fiafia i ai… . E maua ai e i matou le uunaiga ina ia faamaoni ma tumau e oo i le iuga ma ina ia faasaoina ma maua ai le ola faavavau.”²⁰

O se manatu mulimuli, na tusia e Uso Vaccarono: “Ou te faamalie atu i la’u faaPeretania, ou te faamoemoe ua e malamalama i le mea o loo o’u taumafai e faamatala atu ia te oe.” Uso e ma Tuafafine Vaccarono, ua matou malamalama, aua o loo tusia i tusitusiga paia: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.”²¹ I le suafa o Iesu Keriso, amene.