Faaaogaina o le Meaalofa Faalelagi o le Tatalo

O le tatalo o se meaalofa faalelagi a lo tatou Tama o i le Lagi mo tagata uma. Mafaufau i ai: o le Atua Silisiliese, e silafia mea uma, e silasila i mea uma, o le peresona sili ona mamana, e uunaia oe ma au, po o le a lava lo tatou faatauvaa, e talanoa atu ia te Ia o lo tatou Tama. O le mea moni, talu ai Na te silafia lo tatou matua manaomia o Lana taitaiga, ua Ia poloai mai ai, “Ia e tatalo ma le leo, faapea foi i lou loto; ioe, i luma o le lalolagi, faapea foi i le mea lilo, i luma o tagata, faapea foi i le na o oe.”¹

E le afaina o tatou tulaga o loo i ai, pe tatou te lotomaulalo pe faasausili, matitiva pe mauoa, saoloto pe pologa, popoto pe valea, alofagia pe tuulafoaiina, e mafai lava ona tatou talanoa atu ia te Ia. E le manaomia ona tatou setiina se taimi. E mafai ona puupuu lava a tatou talosaga pe mafai foi ona alu ai le taimi atoa e manaomia. E mafai ona avea o se faailoa atu o le alofa ma le lotofaafetai po o se olega faanatinati foi mo se fesoasoani. Sa ia foafoaina ni atulaulau e le mafaitaulia ma faa’aināina i lalolagi, ae e mafai e oe ma a’u ona talanoa patino atu ia te Ia, ma o le a tali mai foi o Ia e le aunoa.

Tatou te tatalo atu i lo tatou Tama Faalelagi i le suafa paia o Lona Alo Pele, o Iesu Keriso. E aupito sili ona aanoa le tatalo pe a tatou taumafai e ola mama ma usiusitai, faatasi ai ma faamoemoega tauaogaina, ma o loo tatou naunautai e faia mea ua Ia poloai mai ai. O le tatalo faamaulalo, ma le faatuatua e aumaia ai le taitaiga ma le filemu.

Aua e te popole i ou lagona e le lelei ona faaupu. Tau lava o lou talanoa i lou Tama agalelei, ma le finagalo malamalama. O oe o Lona atalii/afafine faapelepele e alofa o Ia i ai ma le atoatoa ma e manao e fesoasoani mai. A o e tatalo, ia e iloa o loo latalata atu le Tama o i le Lagi ma o loo faafofoga mai o Ia.

O se ki e faaleleia ai le tatalo o le aoao lea e tuuina atu ia fesili sa’o. Mafaufau e suia mai le ole atu mo mea e te manao i ai i le saili atu ma le faamaoni po o a mea e finagalo i ai o Ia mo oe. A o e iloaina Lona finagalo, tatalo ina ia taitai oe ina ia maua le malosi e faataunuu ai.

Afai e i ai se taimi e lagona ai ua e mamao ese mai lo tatou Tama, e mafai ona tele ni mafuaaga. Po o le a lava le mafuaaga, a o e faaauau pea ona ole atu mo se fesoasoani, o le a Ia taialaina oe e faia le mea o le a toefuatai ai lou talitonuga o loo latalata mai o Ia. Ia tatalo e tusa lava pe leai sou manao e tatalo. O nisi taimi, e pei ai o se tamaitiiti, atonu e te ulavale ma ua e manatu ua le mafai ona e faalatalata atu i lou Tama ma se faafitauli. O le taimi lena e te matua manaomia ai lava ona e tatalo. Ia aua lava nei e manatu ua e matua le agavaa lava e tatalo.

Ou te leiloa pe mafai ona tatou malamalama moni i le mana maoae o le tatalo seiloga tatou te feagai ma se faafitauli tuga ma faafuaseia, ma iloa ai e leai so tatou mana e foia ai. Ona tatou liliu atu loa lea i lo tatou Tama ma le iloaina ma le lotomaulalo o lo tatou matua faalagolago lava ia te Ia. E fesoasoani tatou te sailia ai se nofoaga lilo e mafai ai ona faaleo atu ou lagona i le umi ma le loloto e tatau ai.

Ua ou faia lena mea. Sa i ai se taimi na oo ai ia te au le matuai atuatuvale lava. E le ona o se le usitai po o se solitulafono, ae o se sootaga faaletagata e matua taua lava. Sa umi se taimi na ou sasaa atu ai lo’u loto i se tatalo faanatinati. Peitai, po o le a lava le tele o lo’u taumafai, sa le mafai ona ou maua se tali, leai se toafilemu o le lagona malosi sa ia te au. Sa ou ole atu mo se fesoasoani mai lena Tama Faavavau ua ou iloa ma ou faatuatuaina ma le atoatoa. Sa le mafai ona ou vaaia se ala e maua ai le toafilemu sa ou manaomia. Sa oo ina ou moe. Ina ua ou ala a’e, sa ou matua toafilemu lava. Sa ou toe tootuli e tatalo ma le loto atoa ma ole atu, “Le Alii e, e faapefea ea ona fai?” I lo’u loto, sa ou iloaina o le tali o Lona alofa ma Lona popolega mo au. O le mana lena o le tatalo faamaoni atu i se Tama agaalofa.

Ua tele mea ua ou aoaoina e uiga i le tatalo e ala i le faalogologo ia Peresitene Hinckley o fofogaina talosaga i a matou fonotaga. E mafai foi ona e aoaoina mai ia te ia e ala i le suesue ma le faaeteete o le tatalo tulagaese mo tagata lautele lea na ia fofogaina i le faaiuga o le konafesi ia Oketopa 2001 mo fanau a le Tama i le lalolagi atoa. Sa ia tatalo mai lona loto, ae le o se pepa tusitusia na saunia. (Mo le tulaga talafeagai o lena tatalo o loo tuuina atu i le faaiuga o lenei savali.)²

Suesue i lena tatalo, ona e iloa lea e leai ni upu tautu, leai ni foliga faamalualii e faagaeetia ai isi, e pei ona tupu i nisi taimi. Sa ia tuufaatasia ma le mamana upu faigofie. E tatalo o ia e pei o se atalii lotomaulalo ma le faatuatuaina, o sē e iloaina lelei lona Tama pele o i le Lagi. Na ia talanoa atu i le mautinoa atoatoa o le a oo mai Lana tali i le taimi e sili ona moomia ai. E fetaui lelei lava tatalo taitasi ma lona faamoemoega, e i ai se faaupuga manino o mea e manaomia ai se tali, faapea foi ona lava ma totoe le faaali atu o le lotofaafetai mo faamanuiaga patino, ua iloa. O ana tatalo e le fuafuaina e pei o ni maataua ua tofiina ma le faaeteete, o se molimau le leoa i le nofoaga faavae ua nofoia e le tatalo i lona olaga mo le tele, ma le tele o tausaga.

O nisi upumoni e faatatau i le auala o loo taliina ai tatalo e ono fesoasoani ia te oe.

E masani pe afai tatou te tatalo mo se fesoasoani mo se mataupu taua, o le a tuuina mai e le Tama Faalelagi ia i tatou ni uunaiga malie e manaomia ai ona tatou mafaufau, faaaoga le faatuatua, galulue, o nisi taimi e tauivi ai, ona faatino ai lea. O se faiga e faaaoga ai lea laasaga ma lea laasaga e mafai ai ona tatou iloatino ai tali musuia.

Ua ou iloaina o nisi taimi e foliga mai ai o se papupuni i fesootaiga o se laasaga tele lea e ao ona uia i le faatuatuaina. E seasea ona e mauaina se tali atoa i le taimi e tasi. O le a oo mai o ni fasimea i lea taimi ma lea taimi, e oo mai i ni vaega, ina ia faateleina ai lou mana. A mulimulita’ia fasimea taitasi i le faatuatua, o le a taitai atu ai oe i isi vaega seia oo ina e maua atoa le tali. O lena mamanu e manaomia ai lou faaaogaina o le faatuatua i le mana o lo tatou Tama e tali mai ai. E ui o nisi taimi e matuai faigata lava, ae e taunuu i le matuai tuputupu a’e o le tagata lava ia.

O le a ia faafofogaina e le aunoa au tatalo ma o le a tali mai lava e le aunoa. Peitai, o Ana tali o le a seasea lava oo mai ao e i ai i ou tulivae ma tatalo, e tusa foi pe e te ole atu mo se tali i le taimi lava lena. Ae, o le a Ia uunaia oe i taimi filemu pe a mafai e le Agaga ona pa’i lelei atu i lou mafaufau ma lou loto. O lea la, e tatau ona e sailia ni taimi paganoa ina ia iloa ai pe a aoaoina ma faamalosia oe. O Lana mamanu e afua ai ona e tuputupu a’e.

Na tautino mai e Peresitene Tavita O. MaKei, “E moni o tali i a tatou tatalo e le mafai ona oo mai sao i le taimi lena, po o le tulaga lena tatou te mananao i ai; ae e oo mai lava, i se taimi ma i se tulaga e sili atu ona lelei ia te ia o le na ofoina atu le olega.”³ Ia faafetai i nisi taimi ona o le tuuina atu e le Atua o oe ina ia e tauivi mo se taimi umi a o lei oo mai lena tali. O le a tuputupu a’e lou tagata; o le a faateleina lou faatuatua. E i ai le sootaga o na mea e lua: o le tele o lou faatuatua, o le malosi foi lena o lou tagata; ma o le faateleina o lou tagata o le faalauteleina foi lena o lou tomai e faaaoga ai le faatuatua e sili atu.

E i ai taimi, o le a tuu mai ai e le Alii se tali ia te oe ae te lei ole atu. E mafai ona tupu lenei mea ae te lei malamalama i lona matautia po o le faia foi o se mea sese, ma ua sese le talitonuga faapea e sao.

E matua faigata lava pe afai e le tali maia se tatalo faamaoni mo se mea e te matuai manao lava i ai i le ala e te manao ai. E faigata ona malamalama pe aisea e le tuuina mai ai le tali manaomia o le faatinoina o lou faatuatua moni ma le faamaoni mai se olaga usiusitai. Sa aoao mai e le Faaola, “Soo se mea e tatau ia te outou, tou te ole ai i le Tama i lo’u igoa o le a foaiina atu ia te outou.”⁴ E i ai taimi e faigata ai ona iloa le mea e sili po o le tatau mo oe i nisi taimi. O le a faigofie atu lou olaga pe a e taliaina faapea, o mea e faia e le Atua i lou olaga e mo lou lelei e faavavau.

Ua poloaiina oe e saili mo se tali i au tatalo.⁵ Usitai i le apoapoaiga a le Matai ia “filifili mae’a ai i lou mafaufau.”⁶ E tele taimi o le a e mafaufau ai i se tali; a o e sailia se faamaoniga e sa’o lau tali, o le a oo mai le fesoasoani. Atonu e ala mai i au tatalo, po o se uunaiga a le Agaga Paia, ma o isi foi taimi e ala mai i le faasalavei mai o isi.⁷

E mafai foi ona fesoasoani ia te oe lenei taiala e uiga i le tatalo na tuuina atu ia Oliva Kaotui: “Faauta, … fa te oe ou te tuuina atu ia te oe, i le na o lou ole mai a e te le’i mafaufau i ai.

“… E ao ina e filifili mae’a ai i lou mafaufau; ona … e ole mai lea ia te au po ua sa’o, ma afai ua sa’o … e mu lou loto i totonu ia te oe … o lea la, o le a e lagona ai ua tonu.”⁸

Ona oo mai lea o le tali e pei o se lagona faatasi ai ma se talitonuga maumaututu. Ua faamaoti mai e le Faaola auala eseese e lua: “O le a ou faaali atu ia te oe i lou mafaufau ma lou loto i le Agaga Paia.”⁹

O tali i le mafaufau ma le loto o savali ia mai le Agaga Paia i o tatou agaga. Ia te a’u lava ia, o tali i le mafaufau e matua patino lava e pei o ni upu e faalau mai, a o le tali i le loto e lautele, e pei o se lagona e toe saga tatalo.¹⁰

Ona faamanino mai ai lea e le Alii, “Ae peitai afai [o le mea sa e fautuaina mai] e le sa’o … o le a e maua le pogisa i le mafaufau e te faagaloina.”¹¹ Ia te a’u lava ia o se lagona le mautonu, ma le manuia lena mea.

Sa aoaoina Oliva Kaotui i se isi auala e oo mai ai tali sa’o: “Na ou le avatua ea le toafilemu i lou mafaufau e uiga i lea mataupu?”¹² O le lagona o le toafilemu o le molimau masani faamautu lea ua ou ou iloaina. Pe a oo ina ou matua popole lava e uiga i se mataupu taua, ma tauivi e foia e aunoa ma le faamanuiaina, ou te faaauau pea lava na taumafaiga i le faatuatua. Mulimuli ane, ona oo mai lea o se toafilemu e faatumulia ai au, ma foia o’u atugaluga, e pei lava ona sa Ia folafola mai.

O nisi le femalamalamaa’i e uiga i le tatalo e mafai ona faamaninoina e ala i le iloaina lea o loo faamanino mai e tusitusiga paia ia mataupu faavae o le tatalo aanoa, ae latou te le o faamautinoa maia po o afea o le a tuuina mai ai se tali. O le mea moni, o le a Ia tali mai i se tasi o auala e tolu. Muamua, e mafai ona e lagonaina le toafilemu, mafanafana, ma le faamautinoaga e faamautu ai e sa’o lau faaiuga. Po o le lona lua, e mafai ona e lagonaina lena lagona faaletonu, o le pogisa o le mafaufau, e ta’u mai ai e sese lau filifiliga. Po o le lona tolu—ma o le auala faigata lea—e te le mafai ona lagonaina se tali.

O le a lau mea e fai pe a ua uma ona e saunia ma le faaeteete, ua tatalo faatauanau, faatalitali mo se taimi umi mo se tali, ae e te le o lagonaina lava se tali? E mafai ona e manao e faaali atu le faafetai pe a tupu mai lena mea, aua o se faamaoniga lena o Lona talitonuina. Afai e te ola agavaa ma o loo ogatusa lau filifiliga ma aoaoga a le Faaola ma e manaomia ona e gaoioi, ia faia loa ma le faatuatuaina. A o e mataalia i uunaiga a le Agaga, e tasi lava pe lua ni mea o le a tulai moni mai i le taimi talafeagai: a le o le oo mai o le pogisa o le mafaufau, e ta’u mai ai o se filifiliga e le lelei, po o le toafilemu po o le mu o le loto o le a lagonaina, e faamautu ai e sa’o lau filifiliga. Afai e te ola amiotonu ma o loo e faatinoina ma le faatuatuaina, o le a le tuuina lava oe e le Atua e te alu mamao ese atu e aunoa ma se uunaiga lapata’i pe afai e sese lau faaiuga ua fai.

O se vaega taua o le tatalo o le lotofaafetai lea. Na folafola mai e Iesu, “E leai se mea e faia e tagata e tausuai ai le Atua … tau lava o e le tautino atu e i ai lana pule i mea uma, ma le le usiusitai i ana poloaiga.”¹³A tatou mafaufau loloto i le meaalofa e le mafaatusalia o le tatalo ma faamanuiaga e leai se tuaoi o loo tafe mai ai, e faatumulia o tatou mafaufau ma loto e le talisapaia faamaoni seia oo ina taumasuasua i le faafetai. O le mea lea, pe le tatau ea ona tatou matua faaali atu pea lava pea i lo tatou Tama pele, i le mea sili tatou te mafaia, lo tatou lotofaafetai e le faatuaoia, mo lana meaalofa faalelagi o le tatalo ma Ana tali e tali a’i o tatou manaoga a o faaosofia foi i tatou ina ia tuputupu a’e?

Ou te molimau atu o le a tali mai pea lava lo tatou Tama i au tatalo, i le ala ma le taimi sili mo lou lelei e faavavau. I le suafa o Iesu Keriso, amene.