Na iVola Ka Tiko na Kena Yalayala
Sa noqu masu ni da na tomana tikoga na noda vakayagataka na iVola i Momani: E Dua Tale na iVakadinadina kei Jisu Karisito me wasei kina na itukutuku ni kosipeli ki na matavuvale kei ira na itokani.
Kemuni na taciqu kei na ganequ lomani, sa dua dina na madigi vakalou ena noqu a duavata kei kemuni ena nona tokoni o Peresitedi Thomas S. Monson, kei rau na nona daunivakasala ena Mataveiliutaki Taumada, kei ira na iApositolo Le Tinikarua me ra parofita, daurairai, ka dauvakatakila. Au sa vakadinadinataka ni o ira na parofita era “tukuna ga na ka sa vakauqeti ira kina na Yalo Tabu.
“Ia na ka kecega era sa tukuna ena veivakauqeti ni Yalo Tabu, sa ivunau, io sa ivakaro ni Turaga, … ia sa kaukauwa ni Kalou me ia kina na veivakabulai” (V&V 68:3–4).
Me vaka ni da lewe ni Lotu i Jisu Karisito ni Yalododonu Edaidai sa tu vei keda na veika yaga kei na veivakalougatataki ni kena bulataki tiko na ivolanikalou me vaka era sa vosa kina o ira sa tokoni me ra parofita, ka vakakina na ivolanikalou vakarautaki ena iVolatabu, na iVola i Momani, na Vunau kei na Veiyalayalati, kei na Mataniciva Talei. A vola vakaoqo o Nifai na parofita, “Au sa dau taleitaka na i volatabu ka vakananuma e lomaqu, kau sa vola me ivakavuvuli me ra vinaka kina na noqu kawa” (2 Nifai 4:15). Na ivolanikalou sa volai tu, vakabibi na iVola i Momani, e kauti keda me da vakabauta na Kalou ka “veivinakati kei Koya ena vuku ni isoro i Karisito na Luvena e Duabauga” (Jekope 4: 11).
Ena vica na vula sa oti oi au kei na dua na noqu itokani keirau a solia e dua na ivolanikalou e taucoko ki na dua tale na itokani e sega ni lewe ni Lotu. Ena nona sa kila ni o ya sa na rawa ni veisautaka kina na nona bula taucoko—ka vakakina vei keirau— keirau sa maqusa sara ka vola na yacana ena ivolanikalou yadua o ya. Ni keirau sa solia vua na itukutuku volai vakalou oqo, keirau raica rawa ni sa vakauqeti sara na yalona ena neirau cau yaga oqo kei na yalodina. Ena vica na miniti a vakadeuca kina o koya na ivola yadua oqo ka sega ni vosa, ka vakamasia na waqana ka cega sara eso na drauna.
Ena neirau sa kidava rawa na bibi ni gauna donu o ya, keirau a vukei koya me raici na ulu ni ivakamacala ni iVola i Momani ka keirau tekivu vakamacalataka ni iVola i Momani sa dua tale na veiyalayalati se, ivakadinadina kei Jisu Karisito. E a qai taroga o koya e dua na taro ka ra dau via rogoca o ira na lewenilotu daukaulotu: “Na cava na vuna e gadrevi kina me dua tale na ikuri ni ivakadinadina kei Jisu Karisito ni sa tu oqo na iVolatabu?” Keirau a sega ni sauma vakatotolo, ka keirau a tarogi koya na vuna ena bibi kina na ka oqo. Na isau ni nona taro sa vaka me veivakauqeti vakalevu cake mai na nona taro. A kaya o koya me vaka ni sa levu sara na kena duidui na iVolatabu kei na kena ivakavuvuli, sa na gadrevi e dua na domo me veivakadeitaki, oqo me na vukei keda me da kila vakavinaka cake kina na iVolatabu. Na nona vakadidike oqo a dolava kina na gauna donu me keirau wasea na neirau nanuma kei na ivakadinadina me baleta na iVolatabu kei na iVola i Momani.
Keirau a tekivu ena neirau a vakaraitaka na neirau gugumatua kei na kila deivaki titobu ni vunau kei na ivakavuvuli ni iVolatabu, vakabibi na Veiyalayalati Vou. Ena kena wiliki rawa e vuqa na vosa ni iVakabula ena Nona vakavulica na kosipeli ena gauna ni Nona veiqaravi e vuravura a vaqaqacotaki keirau sara, vukea me keirau kilai Koya, ka vakavulica vei keda ni da rawa ni laki vakataki Koya. Keirau a qai vakaraitaka me vaka ga na iVolatabu, ni iVola i Momani sa ikuri ni ivakadinadina ni Kalou sa lomani keda kece na luvena ka sa vakarautaka vei keda e dua na sala me da lesu ka laki bula vata tale kei Koya. Ena dua vakacaca na auwa ka tarava keitou a raicalesu kina na veitukutuku me baleta na iVola i Momani, ka oka kina na kena itukutuku makawa kei na kena itekitekivu vakalou. Au kerea meu wasea mada e vica na ka keitou a veivosakitaka.
Na iVola Ka Tiko na Kena Yalayala
Taumada keirau a vakamacalataka ni iVola i Momani e dua na ivola ka tiko na kena yalayala. E dina ga ni kena itukutuku makawa e veivakauqeti sara, sai koya e dua na ivola sa ivolanikalou vakaibalebale e dodonu me ciqomi ka wiliki ena veivakauqeti ni Yalo Tabu. O ira kece era na vulica ka tugana na kena ivakavuvuli sa soli vei ira e dua na yalayala e tiko ena iotioti ni wase ni Moronai (raica Moronai 10:3–4) ka vakakina ena ivakamacala taumada ni iVola i Momani, ka da wilika kina: “Keimami sa sureti ira na tagane [kei na yalewa] kecega ena veivanua me ra wilika na iVola i Momani, ka me ra tugana ki lomadra na itukutuku sa volai kina, ka me ra masuta na Kalou, na Tamada Tawamudu, ena yaca i Karisito ke sa dina na ivola oqo. O ira era na gumatuataka na ituvatuva oqo ka kerea ena vakabauta era na rawata e dua na kena ivakadinadina ni sa ka dina ka sa vakalou ena kaukauwa ni Yalo Tabu.” Keirau a qai vakayagataka e vica na miniti ena kena vakavulici na veika e baleta na masu kei na sala e dau rawa ni vosa mai kina ki yaloda na Yalo Tabu ka vakadeitaka mai ni sa dina na iVola i Momani.
Na iVola ka Tiko na Kena iNaki
Tarava sara na neirau vakaraitaka ni iVola i Momani sa dua na ivola ka tiko na kena inaki. Mai na ulu ni ivakamacala eda wilika kina ni iVola i Momani a “volai me sa ivakaro” kei na “yalo ni parofisai kei na yalo ni ivakatakila” me “lako mai na isolisoli kei na kaukauwa ni Kalou” ki na noda vakauqeti yadudua “ni ko Jisu sa Karisito, na Kalou Tawamudu.” Ena nona ivakamacala me baleta na inaki oqo, a vola kina o Nifai, ni sa dua vei ira e vola na iVola i Momani, ni “Sa lomaqu dina sara meu vakauqeti ira na tamata me ra lako mai vua na Kalou i Eparaama, na Kalou i Aisake kei na Kalou i Jekope me ra bula kina” (1 Nifai 6:4).
Na iVola Ka Vakatavulica Na Ka sa Navuci Tu Me Rawati Kina na Bula
Me kena ikuri, keirau a vakamacalataka ni iVola i Momani sa ivola e vakavulica “na ka sa navuci tu me rawati kina na bula” (Alama 42:8: raica talega tt. 5, 13, 31; 2 Nifai 9). Ena kena veivosa e bibi ka kilai vakavinaka, na iVola i Momani e vakavulica na inaki ni bula, na vanua eda a tadu mai kina, kei na cava ena yaco ni da sa mate. Eda vulica me da vakabauti Jisu Karisito kei na Nona solibula veisorovaki, ena veivutuni, me baleta na bibi ni papitaiso ena tabadromuci e wai, kei na isolisoli kei na kaukauwa ni Yalo Tabu. Ena kena vulici ka tugani na vunau mai na iVola i Momani, ena “vakanuinui taucoko sara, mo dou lomana na Kalou kei na tamata kecega,” kei na gagadre me da “vosota me yacova na ivakataotioti” me da “rawata kina na bula tawamudu” (2 Nifai 31:20).
Na iVola Ka Vakadinadinataka Ni ko Jisu na Karisito
E bibi cake sara, na neirau a vakaraitaka ni iVola i Momani sa dua na ivola e vakadinadinataka ni ko Jisu na Karisito, na iVakabula kei vuravura. O ira na parofita cecere ena iVola i Momani era sa vakadinadinataka vakalou ni ko Jisu Karisito na Dauniveibuli kei vuravura (raica Mosaia 3:8), na Dauveivueti ni kawatamata (raica Ilamani 5:9–12), na Luvena Duabau na Tamana (raica 1 Nifai 11:18–21; Jekope 4:11). O ira na parofita oqo ni iVola i Momani era kilai Koya, me vakataki rau o Eparaama kei Mosese, ka ra ciqoma ka vakavulica na Nona kosipeli tawamudu. Ni da wilika ka vulica na nodra vosa, eda na rawata kina e dua na kila titobu me baleta na loloma sega ni vakatauvatanitaki rawa ni iVakabula, na Nona bula kei na ivakaraitaki uasivi duadua, kei na veivakalougatataki ni Nona solibula veisorovaki cecere.
Na iVola Ka Tukuna na Dina ni iLesilesi Vakaparofita nei Josefa Simici
Keirau a qai vakadinadinataka ni iVola i Momani sa ivakadinadina bula ni ko Josefa Simici a digitaki koya sara ga na Turaga me vakalesuya mai ki vuravura na Lotu i Jisu Karisito ni Yalododonu Edaidai ena itabagauna oqo. Me vaka ga a tukuni toka ena ivakamacala taumada ni iVola i Momani, ni “Ko ira era sa rawata [e dua ] na ivakadinadina vakalou mai vua na Yalo Tabu [me baleta ni sa vakalou na iVola i Momani] era na kila talega ena kaukauwa vata ga o ya ni ko Jisu Karisito sa iVakabula kei vuravura, ni ko Josefa Simici sa nona dauvakatakila ka parofita ni iotioti ni gauna oqo, ni sa mai tauyavutaki tale e vuravura na Lotu i Jisu Karisito ni Yalododonu Edaidai, ka sai koya na matanitu ni Turaga.”
Vakatekivu mai na gauna a gole yani kina o Samuel Smith me kaburaka na kosipeli vata kei na so na imatai ni kena ilavelave, sa vakalougatataka rawa e milioni na bula ni tamata e vuravura taucoko na iVola i Momani. Sa noqu masu ni da tomana tikoga na noda vakayagataka na iVola i Momani: e Dua Tale na iVakadinadina kei Jisu Karisito me wasei kina na itukutuku ni kosipeli ki na noqu matavuvale kei ira na itokani. Ni da vakayacora na ka oqo, me vaka ga kivei koya na noda itokani vinaka o ya, e vuqa era na toso mai ena gagadre dina me ra kila vakavinaka cake na bula kei na ilesilesi ni iVakabula kei na Nona sa navuci tu na veika me rawati kina na bula ena vukuda yadua.
Au vakaraitaka eke na noqu ivakadinadina vakalou ni iVola i Momani sa ka dina sara. Sai koya na ivola sa vakayacora e dua na veisau levu ki na noqu bula. Au kila ni bula tiko na Kalou. O Jisu na Karisito. Na Nona kosipeli sa vakalesui tale mai ki vuravura. O Peresitedi Thomas S. Monson sa Nona parofita ka italai bula ena gauna oqo. Na Yalotabu au sa dau vakila e veisiga ena noqu dau wilika, tugana, ka masulaka na iVola i Momani e vaqaqacotaka na noqu kila kei na ivakadinadina ni veika oqo ka vakadeitaka vei au ni ra sa ka dina sara. Au mai wasea tiko ena yalomalumalumu na noqu veivakadeitaki oqo ka sa noqu ivakadinadina kivei kemuni, ena yaca i Jisu Karisito, emeni.