Elder Eduardo Gavarret

Ena nona vakananuma tiko na nona sa kacivi ki na iMatai Kuoramu ni Vitusagavulu, e a vakadinadinataka kina o Elder Eduardo Gavarret, “Ena so na gauna na veika e yaco e vaka me ra sega ni bibi sara era cokocokovata mai me vaka e dua na iba me ra vakarautaki iko.”

E a sucu o Elder Gavarret ena ika 11 ni Me, 1956, e Minas mai Uruguay, kivei rau o Juan Gavarret kei Elsa Inzaurralde Gavarret. E a laki kaulotu e Paraguay kei Uruguay mai na 1975 ki na 1977 ka lesu mai a mai vakamautaki Norma Beatriz Gorgoroso ena ika 20 ni Okotova, 1978. Erau a qai laki vauci vata ena Valetabu e São Paulo Brazil.

E a qeretueti o Elder Gavarret ena liutaki ni bisinisi mai na Escuela Superior de Administracion Empresas ena 1986. Ena 2000 a taura kina o koya na nona diqiri ni masta ni liutaki ni bisinisi ena veivoli mai na INPG (Instituto Nacional de Pos-graduacão) e Brazil.

“Niu railesu, au sa rawa ni raica na liga ni Turaga ki na noqu bula, kauti au mai na dua na vanua ki na dua tale, mai na dua na veikacivi ki na kena e tarava me rawa niu qaravi Koya sara vakavinaka,” a kaya o Elder Gavarret.

Ena nona a se bisopi tiko e Paraguay, a laki cakacaka o koya ki na dua na kabani ni caka wainimate ka vakauti koya sara ki Bolivia me laki tauyavutaka kina e dua na kena tabana vou. Mai kea a kacivi kina me peresitedi ni dua na iteki vou, ka yaco sara me laki mata ni iwasewase levu. Ena gauna sa vakauti iratou kina vakamatavuvale na kabani o ya ki Peru me laki tauyavutaki kina e dua na tabana vou, e a kacivi me Vakaitutu ni iWasewase. A lesi iratou tale na kabani, ena gauna oqo ki Brazil, na vanua a laki veiqaravi kina vaka-Vitusagavulu ni iWasewase. E muri e a laki veiqaravi sara me peresitedi ni tabana ni kaulotu

“Na veikacivi e sega ni baleta na tauri itutu,” a kaya o Elder Gavarett. “Na veikacivi e vukei keda me da voleka yani vua na Karisito. Era vakainaki na icavacava ni ka, e sega ni icavacava. E kea eda na vakasaqara na veivakauqeti, vulica na masumasu, ka daunanumi ira na tamata ka sega ni o keda ga.”

Ena gauna a kacivi kina, e a manidia levu tiko kina ni dua na kabani ni caka wainimate e Lima, Peru. E tolu tiko na luvedrau na veiwatini oqo.

“Ena gauna sa iusutu kina ni noda bula o Karisito, era sa na vinaka na veika kecega,” a kaya o Elder Gavarret. “Sa lewa tu o Koya na veika kecega.”