Elder Jorge F. Zeballos

Ni oti toka ga vakalailai e 12 na yabaki mai na siga a sucu kina o Elder Jorge Fernando Zeballos ena ika 19 ni Julai, 1955, eratou a tadu yani ki nona taoni vakaitikotiko e Ovalle, mai Chile, ena 1967 o iratou na isevu ni daukaulotu ni Yalododonu Edaidai.

E a vakayavalata na nona vakasama o iratou na lewe va na kai Vualiku kei Amerika eratou sa mai veilakoyaki voli tiko oqo e taoni, ka vakakina na nodratou a vakatarogi tiko ena dua na niusipepa e kea. Ena gauna eratou sa tekivu qito basiketepolo kina na daukaulotu ena dua na veisisivi, sa tekivu taleitaka me sarava o Jorge, e dau taleitaka na basiketepolo, ka dau vakamuri iratou ena nodratou iqitoqito. E dua na gauna a lako vuni yani e daku ni nodra teveli na vakailesilesi me ilova na yacadra na lewe ni nodratou timi. E veivakurabuitaki, ni yacadratou kece o “Elder.”

Ena gauna a tukuna kina vei Jorge e dua na nona itokani ena kalasi ni ratou sa laki lewena na nodratou lotu na daukaulotu, sa kerea talega o Jorge ke rawa ni lako talega. E a yalodina sara ena nona laki soqoni ena vitu na vula ni bera ni ratou qai raica rawa na daukaulotu ni se bera tu ni vakavulici se papitaiso o Jorge. Mai na nodrau veivakadonui na nona itubutubu, o Alberto Zeballos kei Ines Zeballos, sa mai vakadodonutaki kece na veika o ya.

E muri, ni sa mai vuli tiko e Santa Maria Univesiti e Valparaiso, a sotavi Carmen Gloria Valenzuela kina o Jorge. “Ena imatai ni gauna au a raici koya kina, au sa kila tu niu na vakamautaki koya,” e nanuma lesu o koya. “E a duatani sara, baleta niu sa taura tu na ivola ni noqu laki kaulotu, ka se bera tu ni lewenilotu o koya.” Ena loma ni vica na macawa ka tarava sa tekivu tauri lesoni ni lotu, ka a papitaisotaki koya ni bera ni qai gole yani ki na veiqaravi ni kaulotu ena Tabana ni Kaulotu e Chile Concepción.

Erau a qai veivolavolai tiko o Jorge kei Carmen ena gauna ni nona kaulotu, ka yaco e muri me rau sa laki veitau sara, ka rau vakamau sara ena ika 26 ni June, 1982, ena Valetabu e São Paulo Brazil. Erau itubutubu ni lima na gone.

E a taura o Elder Zeballos na nona diqiri ni veiika vaka-idinia ena Santa Maria Univesiti kei na nona diqiri ni masta ena liutaki ni bisinisi mai na Brigham Young Univesiti. Ni bera na nona kacivi me peresitedi ni Tabana ni Kaulotu e Chile Concepción South ena 2005, e a manidia tiko ni veika vaka-kabani cokovata ni dua na kabani ni keli vatutalei e Chile. Sa mai kacivi vou oqo o Elder Zeballos, ki na iMatai ni Kuoramu ni Vitusagavulu, sa veiqaravi oti talega vaka- bisopi, peresitedi ni iteki, mata ni iwasewase levu, kei na Vitusagavulu ni iWasewase.