Elder Kevin W. Pearson

E vakabauta o Elder Kevin Wayne Pearson ni kevaka eda sa kila tiko vakavinaka na ivakavuvuli ni vakabauta, sa rawa me caka mana ki na noda bula na Turaga.

“Au a tubu cake ka vakasamataka tiko ni kevaka meu na tamata vuku sara se kaukauwa sara se totolo cake se daucakacaka sara vakaukauwa, ena yaco meu lewa rawa na veituvaki kecega,” a kaya o koya. “Na kena dina o ya, eda na sega ni rawa ni lewa rawa na veituvaki kece ni noda bula. Sa dodonu ga me da vakararavi tikoga vua na Turaga ka vulica me da vakabauti Koya tiko ni na vinaka mai na veika kecega. Ni ko vakayacora na veika kece oqori, na Turaga ena vakayacora mo gugumatua.”

Ni se peresitedi tiko ni kaulotu, e dau vakavulica o Elder Pearson vei ira na nona daukaulotu e lima na bolebole ena rawa me dau ulabaleta se vakamalumalumutaka na vakabauta kevaka ena sega ni vaqaqacotaki tiko na vakabauta. E kaya o koya, “Sa dodonu mo ni biuta laivi na lomalomarua, veivakataotaki, talaidredre, yalolailai, kei na lecaika me rawa kina ni mana na nomuni vakabauta.”

E a sucu o Elder Pearson e Salt Lake City, Utah e Amerika, ena ika 10 ni Epereli, 1957, kivei rau o Wayne F. Pearson kei Velda Labrum Pearson. E a qai taura na nona diqiri ni bejala ni vuku ni veika vakailavo mai na Univesiti e Utah kei na diqiri ni masta ena liutaki ni bisinisi mai na Harvard Univesiti. Ni bera na nona kacivi me peresitedi ni kaulotu, e a cakacaka tiko vaka–CEO ena dua na kabani ni vakasavu itukutuku ni veika ni bula.

Ena gauna a kacivi kina ki na iMatai ni Kuoramu ni Vitusagavulu, e a peresitedi tiko kina ni Tabana ni Kaulotu e Washington Tacoma. Sa mai yaga vakalevu sara na nona ilesilesi taumada vaka-Lotu ki na nona vakarautaki ena nona veikacivi edaidai. E a veiqaravi taumada vakadaukaulotu e Finiladi, peresitedi ni Cauravou ena tabanalevu, peresitedi ni kuoramu ni italatala qase, lewe ni matabose e cake, ka bisopi. E a vakamau o Elder Pearson kei June Langeland ena ika 24 ni June, 1980, ena Valetabu e Salt Lake. E ono na luvedrau.