Kena iVakarau Dodonu

Sa dede mai na noqu se nanuma tu ga oqo, na nona a dara toka o tamaqu ena ligana imawi e dua na mama rupi damudamu totoka. E a qai solia vua na ganequ e le duabau ga. Au nanuma ni sa na yaco me dua na kena ivakarau ena neitou matavuvale—e dua na ivotavota ka vakadewataki mai na dua na itabatamata ki na dua tale. E sa na dua na ivakarau vinaka, ni salavata kei na veivakanananu kamikamica.

O ikeda vakayadua e sa tu na ivakarau ni noda veimatavuvale. Eso vei ira e veika vakayago. Eso vei ira e titobu sara na kena ibalebale. Na ivakarau bibi duadua e semati rau vata na sala ni noda bulataka na noda bula, ka na vakauqeta ka rokataka na nodra bula na noda isolisoli ni sa mai cava na noda bula vakavuravura. Ena iVola i Momani, eda wilika me baleti ira na Leimani, ena kena tarai ira vakatitobu na nodra ivakarau na tamadra. E kaya o Penijamini na Tui ni o ira e dua na ilawalawa tamata, ka ra lecava tu na veika e baleta na ivakavuvuli ni kosipeli: “ka ra sega talega ni vakabauta kevaka era vakavulici kina, ena vuku ni nodra ivakavuvuli tawa dodonu na nodra qase” (Mosaia 1:5).

Na veimataqali ivakarau vakacava e tu vei keda? Eso vei ira e rawa me ra lako mai vei ira na noda qase e liu, ka da sa vakadewataka sobu sara tiko kivei ira na luveda. Sa ikoya beka oqori na ka eda gadreva vei ira? Era yavutaki li ena vakayacori ni veika e dodonu kei na vakabauta? Era veika vakavuravura li, se era tawamudu? Eda vakasamataka tiko li me da bulia tikoga na veivakarau dodonu, se eda sa ciqoma tiko ga na veika sa yaco tiko vei keda ena noda bula? Era buli tu beka ga na noda ivakarau ena noda sauma lesu na itukutuku rogolevu vakavuravura, se era vakauqeti mai na domo ni Yalotabu sa rogo malua ka vinaka? Era na vakarawarawataka li vei ira na luveda, ena nodra vakamuri ira tiko na noda veiparofita bula, na veivakarau eda bulia tiko ena noda dui veimatavuvale? se sa na qai dredre vei ira.

Me da na vakadeitaka rawa li vakacava na noda ivakarau? Na ivolanikalou e solia vei keda e dua na ituvatuva uasivi. Ena Mosaia 5:15 e kaya kina: “Ia mo dou tudei sara, ka kakua ni yavala; mo dou uasivi cake ena cakacaka vinaka ena gauna kecega.”

Au taleitaka na ka oqo baleta ni da kila ni ra dau bucini vakamalua na ivakarau ena noda dau tokaruataka tiko na kena vakayacori ena veigauna. Mai na noda tudei tu ka sega ni veisau ena kena vakayacori tiko na veika oqori e sa daumaka, sa na yaco na noda ivakarau me yavutaki tu ena dodonu. Ia e dua noqu taro. Eda vakadeitaka vakacava na ka e vinaka se e bibi cake sara, na cava e vakarauta ga na kena vinaka? E dua tale na ivolanikalou ka solia vei keda e levu cake na ivakamacala e kunei ena 3 Nifai 6:14. E tukuni ira na tamata “era sa saumaki mai ki na ivakavuvuli dina; era sa sega ni via gole tani mai kina, ia era sa tudei sara ka yalodina, ka sega ni yavalati rawa; ia era sa gadreva sara me ra muria tikoga na vunau ni Turaga.”

Eda vulica ni noda saumaki ki na“vakabauta dina” e tosoya noda rawata me da yalodina, tudei sara, ka kakua ni yavalati ena kena muri na ivunau. Na saumaki oqo sa ikoya e dua na ivakadei ni vakabauti Jisu Kakrisito me noda Dauveivueti. E dua na ivakadinadina ni ka oqo e kunei ena iVola iMomani, ka sa ikoya e dua tale na ivakadinadina i Jisu Karisito. Erau salavata vakavoleka sara kei na iVolatabu ena kena vunautaki na va-Kalou kei na veiqaravi i Jisu Karisito ka vakatalega kina na dina ni bula tiko e dua na Tamada mai Lomalagi. Na veiparofita vakayadua ka volaitukutukutaki tu ena veivola vakalou oqo e solia na nona ivakadinadina vakaikoya ena veika oqo, e vakatalega kina na veivakavuvuli e gadrevi me da bulataka me rawa ni da vakaivotavota ena Veisorovaki, ka kunea mai kina vakayadudua na vakacegu kei na marau.

E dua walega na sala e rawa me yaco mo saumaki mai kina vakai iko. Sa ikoya e yaco mai ena dua na ivakadinadina ni Yalotabu ena noda vulica na veivolanikalou sara ga oqo ni vakadinadinataki Jisu Karisito. E lako mai ena noda masu kei na noda lolo. E lako walega mai ena noda gadreva vakatitobu me da kila na dina. E dodonu me liutaki keda na noda vakasaqara vakararaba na dina, ka kakua, ni vakadonui keda mai na noda vakacala na ivolanikalou, na nodra ivakavuvuli na veiparofita, se na Lotu vakaikoya. Na noda sasaga e dodonu me vakatabakidua ena kena rogoci na vakamacalataki ni Yalotabu ka sega mai na kena kauwaitaki na veika e kila tu o vuravura. E dodonu me da yalosavu ka dolava na lomada kei na noda vakasama, ciqoma na sala ni Turaga, ka ni, kevaka e gadrevi vakakina, veisautaka na noda bula. Na noda saumaki vakaikeda e lako mai ena noda tekivu bulataka na bula e gadreva vei keda na Turaga me da bulataka —tudei sara ka kakua ni yavalati rawa—ena kena vakamuri na veivunau taucoko, ka sega ni kena ga e rawarawa. Sa na qai yaco oqo me dua na cakacaka ni veivakasavasavataki ena noda saga na kena cakacakataki e dua na siga me daumaka cake mai na siga sa oti. Sa qai yaco kina oqo na noda ivakarau me ivakarau dodonu.

Au sa na sureti keda vakayadua taucoko sara me da taura e dua na gauna ka raitayaloyalotaka na ivakarau ni noda bula ka vakakina na veika era na rawa ni vakayacora ki na noda veimatavuvale. Na noda ivakarau ni vakarokorokotaka na siga ni Vakacecegu, masu vakamatavuvale, vulici ni ivolanikalou vakamatavuvale, veiqaravi kei na itaviqaravi ena Lotu, vakakina na ituvatuva ni veidokai kei na yalodina e vale, sa na rawa ni mana sara vakalevu vei ira na luveda kei na nodra veisiga sa tu ki liu. Kevaka eda yavutaka tiko na noda veisusugi ena veivakavuvuli ni veivolanikalou kei ira na veiparofita ni yalododonu, e sega ni rawa me da na lako sese. Kevaka me da dau vagolea taumada na lomada ka vakawasoma kivua na Tamada mai Lomalagi me dusimaki keda ni dau yaco mai na bolebole ni veigauna, eda na tu ena dua na vanua e taqomaki vinaka. Kevaka era kila na luveda na dei ni noda vakabauta kei na noda tu vata kei na Turaga e veigauna, eda kila na vanua e gadrevi me da tu kina.

Ena gauna oqo, na ka bibi duadua sa ikoya me da cakacakataka sara vakavinaka na kena vakayacori na veika oqo. Ena sega beka ni taucoko sara noda cakava, ka wasoma nodra sega ni dau veitokoni vinaka mai na noda veimatavuvale, ia eda sa na tara cake e dua na yavu ni ivakarau dodonu ka rawa me ra vakararavi tu kina na luveda. E rawa me ra taura tu na yavu o ya ena veigauna dredre, ka na rawa me ra lesu tale ki na yavu o ya kevaka mada ga era lako sese tu ena dua na gauna.

Ni sa mai cava na bula nei tamaqu, e a vakadewataka e levu cake sara na ka kivei keitou, na luvena, me vakatautauvatataki kei na dua na mama rupi damudamu. Sa malumu sara mai na yagona, ia na ka dina, e a dua na ivurevure uasivi ni veivakaukauwataki kivei keitou, e dua na ivakaraitaki ni dodonu kei na dina. Na nona bula sara ga e tu kina na ivakarau ka vaqaqacotaki keitou tu edaidai, e dina ga ni sa yali ena keitou maliwa. E a “tudei sara ka yalodina ka sega ni yavalati rawa, ia era sa gadreva sara me ra muria tiko ga na vunau ni Turaga.”

E rawa li me da vakayacora oqo kivei ira na luveda? Na ivotavota cava eda solia vei ira nikua? Sa na qai vakacava ni mataka? Sa rawa me da na tekivutaka sara ga oi keda. Ena vakasinaiti tu beka na lomadra kei na nodra bula ena ivakarau ka rawa me vakarawarawataka vei ira me ra ciqoma ka vakamuria na Turaga kei na veiparofita ni yalododonu? Ena rawa li kivei keda vakamatavuvale me da taroga na veivakalougatataki yalataki,“ko Karisito na Turaga na Kalou Kaukauwa Sara mo dou nona; ia dou na kau cake ki lomalagi me nomudou na bula kei na veivakalougatataki e sega ni mudu” (Mosaia 5:15)?

Kemuni na taciqu kei na ganequ, au kila ni da rawata! Au kila ni Kalou e lomani keda ka wawa tu me vukei keda me da lako mai Vua. O ikeda vakayadua eda kila ni veika oqo ni ra ka dina. Au kila ni vakakina! Au kila ni bula tiko na Kalou; O Jisu Karisito na Luvena ka noda Dauveivueti. E dina na kosipeli i Jisu Karisito; na veivolanikalou e tiko kina era vakadinadinataka. E dua tiko noda parofita dina ka bula tiko edaidai —Peresitedi Thomas S. Monson. E a sa vakarautaki koya tu ka kau mai ena siga edaidai me mai liutaka na Lotu ni Turaga.

Ni sa yaco meda “tudei ka sega ni yavalati rawa” ena kena muri tiko ga na vunau ni Turaga, eda na vakadeitaki mai na veivakalougatataki ni lomalagi me baleti keda kei ira na noda veimatavuvale.

Sa noqu masu ni da na vakila vakatitobu e lomada kei na noda bula na veika oqo, ena yaca i Jisu Karisito, emeni.