E Dua e maliwai Ira na Lewevuqa

Ena ivola i Luke eda wilika kina e dua na marama ka tauvi koya tu na turidra balavu ena loma ni 12 na yabaki. E a vakaotia vakavinaka na nona ilavo nona vakasaqara e dua na ivurevure ni kena iwali vakavuniwai, ia e sega ga ni kunea rawa e dua. Ena kedra maliwa na lewevuqa e a raica mai muri na marama oqo na iVakabula ka tara na tutu ni Nona isulu. E a gadreva o Jisu me kila se o cei e tarai Koya baleta ni vakila o Koya ni sa lako tani mai vei Koya na kaukauwa o ya. Eratou sega ni kila rawa na iApositolo na taro ka ratou taroga, “Kemuni na Turaga, sa vakaosoosoi kemuni [o ira] na lewevuqa era sa veidrigidrigiti[taki], ia ko ni sa taroga, O cei sa tarai au?”¹ E a vakatusai koya na marama oqo ena levu ni nona rere kei na sautanini ni sa ikoya e a lako mai Vua ka sa vakabulai vakatotolo sara. E a vakalesui koya na iVakabula ena vakacegu, ka kaya vua ni sa vakabulai koya na nona vakabauta.

E vuqa sara na ka eda vulica ka tugana ena italanoa lailai ka taleitaki oqo.

Au rawa ni raitayaloyalotaki ira na lewevuqa. E rairai me ra sa lewe levu sara ga, me vaka ni o ira na tamata oqo era sa cikevi Jisu. E vuqa beka era vakosakosa, me vaka ni ra veibilibili tu yani me rawa ni ra raici Koya vakavinaka cake. Au lomatarotarotaka tiko se cava na vuna era tiko kina e kea. E vuqa vei ira, au nanuma, era lako mai ena vakatataro. Ena veivanua cava ga e vakalakova o Koya era sa liu taumada yani na kena itukutuku ni Nona yaco yani kei na italanoa ni Nona veivakurabuitaki. E rairai era namaka me ra raica eso na ka e sega ni matau vei ira, e dua na ka era sega ni via calata. E dina ni sega ni cavuti, era sa lewevuqa na Farisi, ka ra dau voleka vakawasoma e veigauna ena kena namaki na gauna donu ni veivesu, veivakamaduataki, se me laurai e dua na ka me rawa ni ra vakacacani Jisu kina. E rawa beka me so vei ira na lewevuqa oqori era lako mai me ra mai veivakalialiai?

E dua na marama e a tiko ena kedra maliwa na lewevuqa. Au raica e dua na marama yalomalua, kena irairai ni dua na marama dau ririko, toso tiko yani e dakui koya na iVakabula ka qai vakatutusa ena madua ni a tara na tutu ni Nona isulu. O koya e dua na marama e sa oca ka sa vakamalumalumutaki mai na veidredre e sotava. E gadreva vakalevu na veivuke. Ena kena irairai, e dredre sara ga na nona kilai tani mai vua e dua tale na tamata ena kedra maliwa na lewevuqa o ya. E sega ni dua e tovolea me tarovi koya mai na nona toso tiko yani vei Jisu. E dina, era sega ni raici koya na iApositolo se era saga me ra tarovi koya. Ia e dua na ka e a kilai tani kina o koya mai vei ira taucoko na lewevuqa ena siga o ya. E dina ga ni yali se vunitaki ena kedra maliwa na lewevuqa o ya, e yalodei ka toso ki liu ena vakadirorogo vata kei na duabau na inaki ni nona vakasama: me lako mai kivua na iVakabula, ena vakabauta ni tu vei Koya na kaukauwa me vakabulai koya kina, ni o Koya e kauwaitaki koya ka na vakalesuya vua na nona gagadre. Ena ka oqo e a duatani kina o koya mai vei ira na lewevuqa o ya. O ira na lewevuqa era lako mai me ra mai raica, ia na marama oqo e lako mai me mai vakabulai.

E tiko tale eso na itukutuku taleitaki ena ivolanikalou me baleta e dua na tamata vakabauta ena kedra maliwa na lewevuqa. O Alama e a maliwai ira na bete ivalavala ca nei Noa na Tui. O ira na tamata oqo e vakamacalataki me ra laveti cake ena dokadoka ni yalodra, vucesa ka qaravi Kalou lasu, ka ra dau tauca na vosa lasu ka veicavilaki.² Era sa vukica vakatani na inaki ni Turaga baleta ni ra sega ni vakasaqara me ra kila.³ Ena nona tukuna na itukutuku ni veivutuni o Apinatai, era vakalialiai koya ka kena itinitini era qai vakamatei koya. Oqo sa dua dina na lewevuqa ivalavala ca. Ia me vaka e dusimaka na ivolanikalou, “a sa dua vei ira”⁴ e vakabauta. O Alama duadua ga e ciqoma ka vakabauta na ka e vakatavulica o Apinatai. Mai na nona yalodei e muduka kina nona vakamuri ira na lewevuqa ka muria na Turaga. Na veivakauqeti ni dua na tamata oqo ena kedra maliwa na lewevuqa me baleta na kedra itukutuku makawa na Nifai e sa rui vakaitamera.

E dua vei ira na lewevuqa kilai-levu duadua ena iVola i Momani sa ikoya na kena ka vakatawana na vale vakaitamera ena raivotu i Liai me baleta na vunikau ni bula. Na vale era sa sinai kina na tamata, qase kei na itabagone, na tagane kei na yalewa, ia era sa dusi ira mai ka vakalialiai ira era sa kania na vuanikau.⁵ Ia, eso vei ira era sa kania oti na vuanikau era vakarorogo kivei ira na lewevuqa “era sa muria na sala tani ka ra sa lako sese kina.”⁶ Eso talega vei ira, era sa kania na vuanikau ka sega ni kauwaitaki ira.⁷ Sai ira oqo era a marautaka na taucoko ni veivakalougatataki ni vunikau ni bula.

Na ka dina ni italanoa oqo e sega ni baleta na lewevuqa, ia na tamata vakayadua ena kedra maliwa na lewevuqa oqori. E baleti iko vakaidina kei au. Oi keda taucoko eda maliwai ira tu na lewevuqa ni vuravura oqo. E voleka ni o keda taucoko eda tautauvata kei na marama o ya, veitalia ga na lewevuqa, e lako ga mai vua na iVakabula. E tu taucoko vei keda na vakabauta ni dua ga na itara ena kauta mai na veivakabulai ki na mosi ni yaloda kei na vakacegu ki na gagadre ni lomada.⁸ O ira na lewe ni Lotu vou ena vuqa na vanua e veigauna era tautauvata kei Alama. Era rogoca na ivakavuvuli ni bula ena gauna e sega sara ga ni dua na nodra matavuvale se o ira na itokani era tu vakavolivoliti ira me ra rogoca. Ia e tu vei ira na yalodei ni ciqoma na kosipeli kei na nodra vaqara nodra dui gaunisala me curubasikati ira na lewevuqa. Au kila ni o ikeda vakayadudua eda kila na ibalebale ni kena vakayacori na laukana ni vuanikau ni vunikau ni bula me ra raica ka rogoca ko ira era dau veivakalialiai, kei na ibalebale ni kena vakayagataki vakayadua na sasaga ena yalodei me da kakua ni kauwaitaki ira.

Na sotavi ni veika dredre ena vuravura ni lewevuqa e rawa me galili ka dredre. Na nodra veivakayarayarataki kei na veika ena yaco ena veitamata yadua ka gadreva me kauti koya ki na veika e daumaka cake e rawa me kaukauwa sara ka dredre vakalevu me valuti.

O cei e vinaka cake mai vua na iVakabula me rawa ni yacova, tokona, ka kena itinitini me vakabula e dua ka maliwai ira na lewevuqa? E kila na veika me taqomaki ena kedra maliwa e dua na lewevuqa sega ni veidokai ka se dina tu ga. O ira na lewevuqa vakavuravura era sega ni kilai Koya, ka ra kaya “sa sega ni vinaka na matana ka sa sega ni vatukai vinaka na yagona” ka sa “sega ni matavinaka ko koya me da qoroi koya kina.”⁹ E kaya o Penijamini na Tui ni vuravura “era na okati koya ga me tamata wale.”¹⁰ O Aisea e tosoya tale nona vakamacalataka na vanua i Karisito ena kedra maliwa na lewevuqa kei vuravura ena veivosa oqo:

“Sa beci koya ka biuta ko ira na tamata, sa tamata e daurarawa na lomana, ka sa daukila ka rarawa … ; sa beci, ka da a sega ni dokai koya.

“E dina sa colata ko koya na noda rarawa, ka sa colata na rarawa ni lomada: ia eda a vakalewa vua ni sa yaviti ka cudruvi mai vua na Kalou, ka vakararawataki. ”¹¹

E vola ko Nifai ni “ko ira na kai vuravura, ni ra sa tamata ivalavala ca, era na vakanakuitataki Koya ka na vosota ga.”¹²

Ia na kena itinitini na Ulumatua ka Luve ni Kalou oqo e sa dau vakalewai ka sega ni kilai, ena basika cake mai me dua o koya ena kedra maliwa na lewevuqa me o Koya sa Lumuti, na iVakabula ka Dauveivueti ni vuravura. Na kena basika mai oqo e tukuni ena yalomalua mai na nona itukutuku ni iVakabula kivei ira eso na bete levu kei na qase ni lotu ni, “na vatu era sa cata ko ira na matai ni vale, sa yaco me kena ivakadei ena tutu-ni-vale.”¹³

Kemuni na taciqu kei na ganequ lomani, sa noqu masu ni oi keda vakayadua sa rawa me da lako siviti ira yani vakarawarawa na lewevuqa vakavuravura oqo. Ena noda ituvaki ni bula taucoko sara me da toso lo yani ena nuidei ki liu kivua na iVakabula ena vakabauta ni kauwaitaki keda o Koya ka sa tu vua na kaukauwa me vakabulai keda ka maroroi keda. Me da vakarorogo ena Nona vosa ni bula ka tugana taucoko, e veigauna, ka vakayaloqaqataki keda ena vuanikau ka lako mai kina. Ena yaca i Jisu Karisito, emeni.