iVakaraitaki ni iValavala Dodonu

Ena bogi ni kua, au kila ni o kemuni na taciqu ko ni tiko rawa eke ena Vale ni Koniferedi kei na udolu vei kemuni ena veivanua tale eso, ko ni matataka tiko na ivavakoso levu duadua ni lewe ni matabete me soqoni vata. Eda sa tiki ni dua vei ira na mataveitacini levu e vuravura taucoko. Eda sa mai vinaka ka vakalougatataki ni da sa mai lewena tu na matabete ni Kalou.

Eda sa mai vakasalataki ka vakatataki cake ena noda sa mai rogoca na veitukutuku e veivakauqeti. Sa noqu masu meu na duavata kei na nomuni masu kei na vakabauta ena noqu mai wasea oqo vei kemuni na veika au kila kei na veika e tara tiko na noqu vakasama niu vakavakarau tiko meu mai vosa vei kemuni.

Me vaka ni da sa lewe ni matabete, e sa mai donumaki keda qo e vuravura na veigauna dredre. Eda bula donuya tu oqo e vuravura e dua na gauna ka rawa kina ni da kuitaki ena veika e rawa ni veivakaleqai ena veiyasana kecega. Sa mai veivakacacani na veika vakapolitiki ena noda veivanua, na kena kocovi na kaukauwa vakatamata, kei na veigacagaca ni bula vakaitikotiko sa vaka me torosobu tikoga, sa tauri vakaukauwa na veimadigi vinaka ka da biu tu ena vakanuinui kina bilo cicila.

Oi keda eda sa mai vakatikori ena matabete ni Kalou sa rawa meda veisautaka. Ni da sa kilikili meda vukei mai vua na Turaga, eda rawa ni susugi ira cake na gonetagane, sa rawa meda vakavinakataki ira na turaga, sa rawa meda vakayacora na veika mana eso ena Nona veiqaravi vakalou. Na noda veiqaravi e sega ni vakaiyalayala.

Sa qai noda cakacaka meda ivakaraitaki vinaka tiko. Eda sa vaqaqacotaki ena ka dina ni kaukauwa cecere duadua ena vuravura edaidai sa ikoya na kaukauwa ni Kalou ni sa cakacaka tiko ena kedra maliwa na tamata. Kevaka sa qai talai keda tiko na Turaga, sa kilikili kina vei keda na veitacini me noda na veivuke ni Turaga. Kakua ni guilecava na dina o ya. Na veivuke vakalou o ya, sa dina sara, sa vakayacori walega ena noda bula kilikili kaya. Meda qai dui taroga yadua: Sa savasava beka na ligaqu? Sa savasava beka na yaloqu? Au sa italai kilikili beka ni Turaga?

Sa vakavolivoliti keda tu oqo e vuqa na veika ena rawa ni vagolei keda tani mai na veika sa kilikili ka vinaka ka ni da sa temaki ena veika vaka o ya sa na rawa me vakavuna meda tawakilikili ka vakayagataka tikoga na matabete sa tu vei keda. Au sega ni vosa wale tikoga vei ira na cauravou ena Matabete i Eroni ia kivei kemuni kece na tamata ena veiyabaki ni bula. Na veitemaki e dau yaco mai ki na noda bula ena kena veimataqali.

Kemuni na veitacini, eda sa kilikili tiko beka me da vakayacora na veitavi tabu sa umanaki tu ena matabete eda sa lewena tiko? Ra cauravou—oi kemuni ka sa bete—sa savasava tiko beka na yagomuni kei na yalomuni ni ko ni dabe ena teveli ni sakaramede ena Sigatabu ka vakalougatataka na ivakatakarakara ni sakaramede? Oi kemuni na cauravou ko ni ivakavuvuli tiko, ko ni sa kilikili tiko beka mo ni vakarautaka na sakaramede? Kemuni na dikoni, ni ko ni vota yani na sakaramede kivei ira na lewe ni Lotu, ko ni sa vakayacora tiko beka ena nomuni kila ni ko ni sa kilikili tiko vakayalo mo ni vakayacora? O ni sa kila tiko beka ko ikemuni yadua na kedra bibi na itavi tabu kecega ko ni vakayacora tiko?

Kemuni na noqu itokani gone, ni yaloqaqa tiko. Era sa wavokiti keda tu na veivakavuvuli ni tamata. Na mata ni ivalavala ca era sa vakamatavulo tu ena yalo veivosoti. Kakua ni vakacalai; ena daku ni matavulo o ya sa tiko kina na mosi ni yalo, rarawa kei na vutugu. Ko ni kila na veika sa dodonu kei na ka cala, ka sega ni rawa me vunitaki rawa, se vakacava sara na kena totoka ena sega ga ni veisautaka rawa. Na ituvaki ni ivalavala ca ena dua tu ga. Kevaka era na vakauqeti iko na nomu itokani beka mo cakava e dua na ka ko kila ni cala o iko sara ga mo tutaka e kea na dodonu, ena gauna mada ga ko tu taudua kina. Mo dau yaloqaqa mo rarama vei ira na tani me ra muria mai. E sega ni dua na veitokani e talei duadua cake me vakataka na nomu lewa e loma, na nomu yalo savasava—ka sa dua na kila lagilagi duadua ni ko sa tu ena tikina ko sa lesi kina ko savasava tu ena yalonuidei ni ko sa kilkili mo vakayacora vakakina.

Kemuni na veitacini ena Matabete i Melikiseteki, ko ni sa sasaga vagumatua tiko beka ena veisiga mo ni bula dodonu tiko? Ko ni sa dau yalololoma tiko beka ka lomana na watimuni kei ira na luvemuni? Ko ni sa dina tiko beka ena nomuni veimaliwai kei ira era tiko wavokiti kemuni—ena veigauna kece kei na veidraki ni bula kecega?

Kevaka beka e dua vei kemuni e lutu laivi, era sa tiko o ira me ra vukei kemuni me yaco tale mo ni savasava ka bula kilkili. Sa maqusa tiko o nomuni bisopi se peresitedi ni tabana me vukei kemuni ka rau na vakayacora dina, ena yalo e kila kei na yalololoma, ka na cakava ena nona kaukauwa taucoko me vukei iko mo veivutuni mai ena kena sala, ka mo rawa ni na tucake tale ena ivalavala dodonu e mata ni Turaga.

E vuqa vei kemuni ko ni na nanumi Peresitedi N. Eldon Tanner, e a daunivakasala vei iratou e va na Peresitedi ni Lotu. E a vakaraitaka o koya e va na ivakaraitaki tudei ni ivalavala dodonu, ena nona cakacaka ena veikabani ni caka iyaya ena gauna a cakacaka tu mai kina ena matanitu o Kenada, ka gumatuataka tale tikoga ena nona bula. E a solia mai vei keda na ivakasala veivakauqeti oqo:

“Ena sega ni dua na ka ena kauta mai na marau levu cake me vakataka na noda bula ga ena ivakavuvuli ni kosipeli. Mo ivakaraitaki vinaka; mo dauveivakauqeti ena veika sa vinaka… .

“Oi keda yadua eda sa tabaki taumada tu mai me baleta e dua na cakacaka ni da sa tamata digitaki ni [Kalou] ka sa raica ni da kilikili kaya me soli kina na matabete kei na kaukauwa me da cakacaka ena yacana. Me dau nanuma tiko ni o ira na tamata era raici iko tiko yani mo veiliutaki ka veivakauqeti ki na nodra dui bula na tamata yadua ena veika sa vinaka se ca, ka na yaco me laki vakilai kivei ira na itabatamata sa bera mai.”¹

Kemuni na taciqu, meu tokaruataka tale me vaka ni da sa lewe ni matabete ni Kalou, sa noda itavi meda bulataka ena noda bula e dua na kena ivakarau meda rawa kina ni ivakaraitaki ni ivalavala dodonu kivei ira na tani me ra vakamuria. Niu vakasamataka vakatitobu na sala meda rawa ni ivakaraitaki vinaka sara kina, au nanuma sara e dua na ka au a sotava ena vica na yabaki sa oti ena noqu a tiko ena dua na koniferedi ni iteki. Ena soqoni raraba, au raica sara e dua na gonetagane lailai ni dabe tiko kei nona matavuvale ena iyatu e liu ni valenilotu ni iteki. Au a dabe tiko e cake. Ni sa vakacagau na soqoni, au sa raica sara ni kevaka au na biuta na yavaqu me veilatai ena cakava vakakina na gonetagane lailai oqo. Kevaka au na vakasuka ka veisautaka me veilatai na yavaqu tale ka dua, ena cakava vakatalega kina o koya. Au a vakataqara na ligaqu e sagaqu, ka vakayacora talega o koya. Au a tabea toka na galegalequ ena ligaqu, a cakava talega vakakina o koya. Na veika cava ga au a kitaka, ena vakatotomuria o koya. A yaco tiko na ka oqo me yacova na gauna meu sa vosa kina vei ira na ivavakoso. Au sa nakita sara meu vakatovolei koya mada. Au a raica sara na matana, ka kila na ka ena vakayacora, kau a kurea na daligaqu. A saga sara vakaukauwa o koya me vakayacora talega! Sa sega ni rawa vua me kurea na daligana. A rai vei tamana, ka dabe toka e yasana, ka vakasolokakanataka vua e dua na ka. A dusia na daligana ka dusi au. Ni sa raici au mai o tamana, ni raica niu kurea tiko na daligaqu, au a dabe sobu vakamalua ka roqo liga, ka sega tale ni yavala. Sa rai sara ena lomatarotaro o tamana vei luvena tagane, ka rai yani ni vaka sa druka. Sa vaka me madua ni sa rai mai ka dulaka na tabana.

Au nanuma sara na veika au sotava o ya ena vuqa na yabaki niu mai vakasamataka tiko na gauna eda se lalai kina, eda dau vakatotomuria na nodra ivakarau na noda itubutubu, noda iliuliu, noda itokani. E kaya o Brigham Young na parofita: “Me da kakua ni vakatara meda vakayacora e dua na ka eda sega ni vinakata me ra laki cakava na luveda. E dodonu meda ivakaraitaki vinaka vei ira me ra na laki vakatotomuria.”²

Kivei kemuni ko ni tamadra na gonetagane lalai se nodra iliuliu na gonetagane, au kaya oqo, mo ni saga mo ni ivakaraitaki era gadreva tu na gonetagane. Na tama, e dina sara, ni dodonu ga me ivakaraitaki vinaka taumada tiko, kei na gonetagane sa vakalougatataki mai na dua na tama sa bula kilikili sa kalougata dina sara. Na matavuvale ivakaraitaki vinaka mada ga, ia, ena dua na tina kei na tama yalodina, sa rawa me rau taurivaka na veivuke kecega erau rawata rawa mai vei ira na tamata vinaka era sa dau veikauwaitaki dina. Sa tiko talega na gonetagane e sega na tamana se o tamana e sega ni vakaraitaka tiko e dua na ivakaraitaki vinaka e gadrevi. Kivei koya na gonetagane o ya, sa vakarautaka tu na Turaga e dua na sala tudei ni dauveivukei ena loma ni Lotu—o ira na bisopi, daunivakasala, qasenivuli, iliuliu ni Sikauti, dauveituberi ni matavuvale. Ena gauna sa mana tiko kina na parokaramu ni Turaga ka cakacaka vinaka tiko, e sega ni dodonu ki na dua na cauravou ena loma ni Lotu me sega tiko ni vakauqeti ena nodra cakacaka vinaka na tamata vinaka ena nona bula.

Na qaqa ni dua na bisopi vakauqeti, o ira na daunivakasala se na qasenivuli sa vakauqeti vakayalo ena lailai sara na nodra rawai mai na veika kaukauwa mai taudaku se ena veika vakaiyau ni vuravura oqo. O ira na iliuliu era sa tudei tu ena veivakauqeti vakaoqo sai ira era sa dau maqusa na yalodra ena gugumatua ena ka dina, era vakayacora na talairawarawa me sa ilesilesi ki na gacagaca ni bula ni uabula, ka ra veisautaka na veika sa vakawasomataki me yaco me ra vakataka na tamata era sa dau diva me ra ucuya.

Me da kakua ni guilecava—ni sa dina sara, sa noda daunivakaraitaki taumada—na noda iVakabula, o Jisu Karisito. Era a parofisaitaka tu mai na parofita na Nona sucu; era vakalagilagia na agilosi na kena tukuni yani na Nona cakacaka ena vuravura oqo. Sa “tubu cake na gone, a sa yalomatua mai, sa sinai ena vuku: a sa tu vei koya na loloma ni Kalou.”³

A papitaisotaki mai vei Joni ena uciwai na Joritani, sa tekivuna kina na Nona cakacaka ena vukudra na tamata. Ena vosa vaqaseqasea nei Setani, a vukitani mai kina o Jisu. Ki na ilesilesi sa solia Vua na Tamana, sa rai yani kina o Koya, vakadeitaka e Yalona, ka solia na Nona bula. Sa qai dua dina na bula sega ni duka, dauloloma, vakaturaga, ka vakalou. E a cakacaka vakaukauwa o Jisu. E a loloma o Jisu. E a veiqaravi o Jisu. E a ivakadinadina o Jisu. Sa qai dua dina na ivakaraitaki cecere meda vakatotomuria? Meda sa tekivu sara ga oqo, ena bogi sara ga nikua, meda vakayacora vakakina. Biuta laivi vakadua na noda veika makawa kei na kena druka, luluqa, lomalomarua, kei na tawa vakabauta. Meda sa dua na tama vou koi keda—e dua na bula ni vakabauta, inuinui, yaloqaqa kei na reki. Sa sega tale na itavi me ka levu: sa sega tale na ilesilesi me rui bibi, sa sega tale na itavi me veivakaocai. Sa rawarawa na veika kecega.

Ena vuqa na yabaki sa oti au a vosa ena vukuna e dua a vakatotomuria na ivakaraitaki ni iVakabula, e dua e tudei ka dina, yaloqaqa ka kilikili ena draki taucoko ni bula oqo. E a yaloqaqataka na nona vakarabailevutaka na nona itutu vakamatabete. Sa vakarautaka o koya e dua na ivakaraitaki kivei keda yadua. Na yacana o Thomas Michael Wilson, na luvedrau o Willie kei Julia Wilson mai Lafayette e Alabama.

Ena gauna se itabagone kina ka ratou se bera kina ni lewe ni Lotu o koya kei na nona matavuvale, a tauvi koya na kenisa, ka lakovata na nona qaravi vakavuniwai ena cina katakata, ka vakalougatataki kina. Na mate oqo e vakavuna me ratou raica rawa kina na nona matavuvale ni sega walega ni ka talei na bula oqo ia sa rawa me lekaleka talega. Eratou sa tekivu vakasaqara na lotu me vukei iratou ki na gauna dredre oqo. Sa laki yaco sara me ratou sa rogoca kina na Lotu, ka ratou sa mani papitaiso kece sara ka vakavo ga o tamana. Ni oti na kena ciqomi na kosipeli, sa gadreva sara o Baraca Wilson me sa laki kaulotu, ka dina ga ni sa qase cake sara mai vei ira tale eso na cauravou ena gauna era na tekivu kaulotu kina. Ni sa yabaki 23, sa yaco mai na veikacivi ni kaulotu me laki veiqaravi ki na Tabana ni Kaulotu e Utah Salt Lake City.

O ira na itokani daukaulotu nei Elder Wilson era kaya ni nona ivakarau ni vakabauta e sega ni vakamelei rawa, sega ni yavalati rawa ka tudei tu ga. Sa dua na ivakaraitaki vinaka o koya kivei ira kece. Ia, ni oti ga e 11 na vula ni kaulotu, sa lesu mai na mate o ya. Na kenisa ni sui sa gadrevi kina oqo me sa na musu kina na ligana kei na tabana. Ia e gumatutaka ga o koya na nona cakacaka ni kaulotu.

Na yaloqaqa kei na gagadre kaukauwa nei Elder Wilson me kaulotu tikoga a vakavuna na vakauqeti nei tamana sega ni lewenilotu me vakadikeva na ivakavuvuli ni Lotu ka sa yaco talega me lewenilotu.

Au a qai kila ni dua na dauvakatataro ka a vakavulica o Elder Wilson a papitaisotaki ia a gadreva me vakadeitaki koya o Elder Wilson, ka dau dokai koya sara vakalevu. Na marama oqo kei na so tale era a gole yani ki na idavodavo nei Elder Wilson e valenibula. E kea, ena ligana ga e dua sa vo tiko a tabaka na uluna, e a vakadeitaki koya o Elder Wilson me sa lewe ni Lotu i Jisu Karisito ni Yalododonu Edaidai.

Sa tomana tikoga o Elder Wilson ena veivula ka veitaravi mai na nona cakacaka ni kaulotu talei ia ena rarawa talega. Sa vakayacori na vosa ni veivakalougatataki; vakayacori na veimasulaki. Ena vuku ga ni nona ivakaraitaki ni yalodina, era sa yaco me ra bula volekata yani na Kalou na nona itokani daukaulotu.

Sa kaukauwa sara na mate vei Elder Wilson. Sa voleka mai na gauna me sa lesu kina ki vale o koya. A kerea o koya me toso tale ena dua na vula na nona kaulotu, a vakadonui mai na nona kerekere. Sa vakabauta ga o koya na Kalou, kei Koya ka sa vakanuinui vuni tu kina o Thomas Michael Wilson a tadolava na katuba ni lomalagi ka a vakalougatataki koya vakalevu sara. Na nona itubutubu, o Willie kei Julia Wilson, kei Tony na tacina eratou a gole mai ki Salt Lake City me ratou mai vukei luvena kei na tacina ki na itikotiko mai Alabama. Ia, sa qai vo ga me vakatikori e dua na veivakalougatataki sa dau masulaki ka gadrevi vakawasoma sara. Eratou a sureti au na matavuvale oqo meu gole vata kei iratou ki na valetabu e Jordan River, na vanua me vakayacori kina na cakacakatabu vakalotu oqori me vauca kina na matavuvale me tawamudu, ka vakakina ena gauna oqo.

Au vakamoce ki na matavuvale na Wilson. Au sa rawa ni raici Elder Wilson ni vakavinavinakataki au ena noqu a tiko vata kei koya kei ira na nona daulomani. A kaya o koya, “E veitalia ga na cava e dau yaco kivei keda ena bula oqo e bibi ga me tikoga vei keda na kosipeli i Jisu Karisito ka da bulataka tiko. E sega ni dua na ka keu vakavulica na kosipeli eke se ki na tai ka dua ni ilati, meu na vakavulica rawa ga.” Oqo na yaloqaqa. Oqo na yalonuidei. Oqo na loloma. E a balavu na ilakolako lesu ni matavuvale na Wilson ki Lafayette, na vanua a laki biubiu kina o Elder Thomas Michael Wilson ki na bula tawamudu. E a bulu koto mai kea kei na nona ivakatakilakila ni daukaulotu.

Kemuni na taciqu, ni da sa vakarau biuta oqo na soqoni raraba ni matabete, meda sa laki kakavaki vagumatua yani ki na noda gauna donu meda rokova kina na matabete eda sa lewena tiko ena kena veiqaravi eda na vakayacora, na tamata eda na vakalougatataka, kei na yalo ni tamata sa noda madigi meda vukea me vakabulai. Sa ikemuni “na itabatamata digitaki, a matabete vakaturaga, a matanitu yalosavasava”⁴ ka sa rawa mo ni vakavinakataka cake. Au sa vakadinadinataka na veika dina oqo ena yaca i Jisu Karisito, na noda iVakabula, emeni.