Na Kosipeli i Jisu Karisito

E a vakaraitaka vakadoudou o Paula na iApositolo: “Niu sa sega ni maduataka na itukutuku vinaka kei Karisito: ni sai koya oqo na kaukauwa ni Kalou me vakabulai kina ko ira yadua era sa vakabauta” (Roma 1:16). Na yalodoudou vata vakaoqo era sa dau vakaraitaka tiko yani o ira na daukaulotu tudei me vaka ni ra veiqaravi tiko ena veiyasai vuravura.

Sa na tu gona kina ena kosipeli i Jisu Karisito e lima na isaluwaki ni vakavakarau ki na bula tawamudu. iMatai, meda raica mada na veika ena yaco vei keda kevaka eda na muria na vakavakarau oqo, ka sa qai rawa meda raica na kena isaluwaki yadudua.

Na cava beka eda sa kila tu me baleta na bula tawamudu? Eda vulica ena Mosese 1:39 ni inaki kei na lagilagi ni Turaga o ya me ra tucake tale mai ka bula tawamudu. E vakavulica vei keda ni tawa mate rawa kei na bula tawamudu erau duidui ka veiyawaki sara. Na isolisoli ni bula tawamudu, ka sa dau yalataki ga ena gauna e vakayacori kina na veika e lavaki tu, sa rui ka cecere sara mai na isolisoli ni tawa mate rawa.O koya gona e kaya kina o Elder Bruce R. McConkie: “Na bula tawamudu e sega ni vakatokai wale tu ga ki na gauna tawa cava rawa ni bula sa bera mai; na tawa mate rawa o ya meda bula tawa yalani ni da sa tucake tale, ia na loloma soli wale ni Kalou era na yaco kina na tamata kecega me ra rawata na tomani tiko ni bula tawa yalani rawa oqo. Ia o ira walega era na muria tiko na lawa ni taucoko ni kosipeli era na rawata na bula tawamudu… . Sai koya oqo ‘e cecere duadua ena isolisoli taucoko ni Kalou’… ? ni sa ikoya na mataqali, ituvaki, vakarau, kei na cecere ni bula e bulataka sara tikoga na Kalou. O ira era sa na rawata na bula tawamudu era na ciqoma na bula vakalou; ni ra sa luvena tagane na Kalou, ka itaukei vata kei Karisito, lewe ni Lotu nei Koya na Ulumatua; era sa vorata na veika kecega, era sa rawata na kaukauwa kecega, ka ciqoma na lagilagi taucoko nei Tamada” (Mormon Doctrine, 2nd ed.[1966], 237).

Sa nodra itavi na noda daukaulotu, me vaka e tukuni toka ena tabana e 1 ni Vunautaka na Noqu Kosipeli, me ra “sureti ira na tani me ra lako mai vei Karisito ena nomu vukei ira me ra ciqoma na kosipeli vakalesui mai, ena nodra vakabauti Jisu Karisito kei na Nona Veisorovaki, veivutuni, papitaiso, ciqoma na … Yalo Tabu, ka vosota me yacova na ivakataotioti” (2004).

Ena vuqa na ivola ni icakacaka ni kakana era sa tu kina na iyaloyalo ni veikakana totoka era caka ena kedra ivakavakarau—o ya na taucoko ni rekitaki ni vakasaqa. O ira na iyaloyalo oqo era sa ka bibi sara baleta ni ra vukea na noda raitayaloyalotaka ni sa caka oti kevaka eda vakamuria sara vakadodonu na kena idusidusi me vaka ka tukuni tiko ena kena ivakavakarau. Sa ka bibi meda tekivu ena noda raitayaloyalotaka tiko na kena icavacava, ia na kedra icavacava ka vakaraitaki tiko ena kedra iyaloyalo ena veivola ni icakacaka ni kakana sa icavacava ena rawati walega ke vakayacori vakadodonu na veika kecega. Kevaka ena sega ni vakamuri na idusidusi se dua na isaluwaki e guilecavi se vakarautaki cala, na kena ikanakana e vinakati kei na kena ituvaki ena dau rawati ga vagauna. Na iyaloyalo ni dua na kakana e uasivi dina, ia, e sa rawa ni yaco me veivakauqeti me tovolei tale mada me caka vou e dua me na kana vinaka ka totoka sara.

Ni da vakasamataka na bula tawamudu, na iyaloyalo cava e votu mai vei keda? Au vakabauta kevaka meda bulia ena noda vakasama e dua na iyaloyalo e matata ka dina ni bula tawamudu eda na tekivu meda veisautaki keda. Eda na sega ni gadrevi meda na vakayaloqaqataki meda vakayacora e vuqa na ka e umani tiko ki na vosota ki na ivakataotioti, me vakataka na laki veituberi ki na matavuvale se siko vuvale, tiko ena noda veisoqoni, gole ki na valetabu, bula savasava tiko, dau masu, se wilika na ivolanikalou. Eda na via vakayacora na veika kece oqo, ka vakalevu sara baleta ni da sa kila ni ra na vakarautaki keda, meda gole ki na dua na vanua sa yaloda dina tiko meda lako kina.

Na cava me inaki kina ni dua na daukaulotu, me tekivu ena nona vukei ira na tani me ra ciqoma tauamada na vakabauti Jisu Karisito kei na Nona Veisorovaki? Ena kena gadrevi me ciqomi na kosipeli i Jisu Karisito, o ira na tamata me ra na ciqomi Koya taumada e liu ni sa Nona kosipeli o ya. E dodonu me ra nuitaka na iVakabula kei na veika sa vakatavulica vei keda. E dodonu me ra vakabauta ni sa tu Vua na kaukauwa me rokova na Nona yalayala vei keda ena dodonu ni Veisorovaki. Ni ra sa vakabauti Jisu Karisito na tamata era sa na ciqoma ka bulataka na Nona Veisorovaki kei na Nona ivakavuvuli.

Na iVakabula a vakatavulici iratou na Nona tisaipeli, me vaka e volai tiko ena wase 27 ni 3 Nifai, na kena tu vakataki koya ga na Nona kosipeli kei na Nona cakacaka e vuravura oqo kei na Veisorovaki ni a kaya o Koya:

“Raica, au sa [solia] vei kemudou na noqu ivakavuvuli, ia oqo na noqu ivakavuvuli—au sa lako mai ki vuravura meu kitaka na loma i Tamaqu, ni sa talai au mai ko Koya… .

“Ia ko koya yadua sa veivutuni ka papitaisotaki ena yacaqu, ena vakasinaiti ena Yalo Tabu; ia kevaka sa vosota me yacova na i vakataotioti, au na kunea ni sa savasava ko koya ena mata i Tamaqu ena siga au sa tu kina meu lewai ira na kai vuravura” (tt.13, 16).

Na vakabauti Jisu Karisito kei na Nona Veisorovaki ena muataki keda Vua. E vakatavulica na vuravura ni da raica eda na vakabauta, ia na noda vakabauta tiko na noda Turaga ena muataki keda meda vakabauta ni da sa rawa ni raici Koya kei na nona ituvatuva na Tamada me baleti keda.

Na noda vakabauta talega ena muataki keda meda cakacakataka—ena veimuataki ki na kena gumatuataki kei na ilesilesi e salavata kei na veivutuni dina. Me vaka ga e vakavulica tiko o Amuleki ena wase 34 ni Alama:

“Ia ko ira sa vakabauta ka veivutuni, era na vakabulai.

“Oi kemudou na wekaqu; me vakalougatataki kemudou na Kalou ka vakadeitaka na nomudou vakabauta; ia mo dou veivutuni ka masuta na yacana tabu me vosoti kemudou.

“Io dou masuti Koya me lomani kemudou; raica sa kaukauwa sara ko Koya me ia na veivakabulai” (tt. 16–18).

Na cava me ra veivutuni kina na tamata yadua ni bera ni ra papitaiso ka ciqoma na Yalo Tabu? Na domo i Karisito sa vakaraitaki yani vei ira na Nifai me sa oti kina na lawa ni vakacabo isoro, ka sa kaya kina o Koya: “Ia mo dou cabora ga me isoro vei au na yalo sa raramusumusu kei na yalo sa bibivoro. Ia ko koya yadua sa lako mai vei au ena yalo raramusumusu kei na yalo bibivoro, au na papitaisotaki koya ena bukawaqa kei na Yalo Tabu” (3 Nifai 9:20).

Na ilalavaki vata ga oqo e vakamacalataki tiko ena wase 20 ni Vunau kei na Veiyalayalati ena dua na tikina eda dau vakayagataka vakalevu me vakamacalataki kina na veika e dau lavaki ena papitaiso. Na tikina e 37 e tukuna, “Sa kilikili me ra papitaiso ka curu me lewe ni lotu, ko ira kecega era sa vakamalumalumutaki ira vua na Kalou, io ko ira sa lomadra me ra papitaiso, ka lako mai ena yalo e raramusumusu kei na yalo e bibivoro; ia ko ira sa tusanaka ni ra sa veivutunitaka vakaidina na nodra ivalavala ca kecega.”

Na veitiki ni ivolanikalou oqo era vakavulica na lesoni e yaga sara me baleta na ivakarau ni veivutuni me vakavakarau ki na papitaiso kei na ciqomi ni Yalo Tabu. iMatai, na veivutuni e gadrevi kina na itovo e yalomalumalumu. Ena kena gadrevi meda vakarautaki meda papitaiso ka taura na yaca i Karisito sa dodonu meda vakamalumalumutaki keda vua na Kalou—ka cabora e dua na isoro ni yalo sa raramusumusu kei na yalo sa bibivoro ka ciqoma na Nona lewa. iKarua, eda vulica ni dodonu vei ira na tamata me ra vakadinadinataka ki na Lotu, se ki vua e dua na vakailesilesi ni Lotu, ni ra sa veivutunitaka na nodra i valavala ca. Kena iotioti, eda na kila na veivutuni o ya, ni sa dua na cakacaka ni veivakasavasavataki, ni bera na papitaiso, sai koya na cakacakatabu vakalotu e veivakasavasavataki, ena kena gadrevi me vakarautaki kina e dua na tamata me ciqoma na Yalo Tabu. Na Yalo Tabu sa ikatolu ni ni Lewetolu Vakalou. Na isolisoli ni Yalo Tabu ena soli walega kivei ira era sa vakasavasavataki ena veivutuni ni ivalavala ca kei vuravura.

Na cava na vuna e gadrevi kina na papitaiso me na qai ciqomi kina na Yalo Tabu? E vakatavulica vakaoqo o Orson F. Whitney: “E wase rua tiko na papitaiso, ka rua tiko na kena ilesilesi me vakayacori. E sega walega ni veivakasavasavataki—e [vakararamataka] na yalo, ka vakatakila mai na veika ni Kalou, na gauna sa sivi, gauna oqo, kei na gauna mai muri, ka vakatikora e dua na ivakadinadina veivakadeitaki ni Dina. Na yalo, sa vakasavasavataki ena ivalavala ca, sa tu ena dua na kena ituvaki me marautaka kina na veivakauqeti veitokoni ni Yalo Tabu, ka ni ‘sega ni dau tiko ena vale sa dukadukali.’ Na papitaiso ena wai sa tekivutaki kina na cakacaka ni veivakasavasavataki kei na veivakararamataki. Ena vakataucokotaka na papitaiso na Yalotabu.” (Baptism—The Birth of Water and of Spirit [n.d.],10).

Na cakacakatabu vakalotu ni papitaiso ena wai kei na bukawaqa e vakamacalataka o Nifai ni sa dua na matamata (raica 2 Nifai 31:17). Na cava e dua kina na matamata na papitaiso? Baleta ni oqo e dua na cakacakatabu vakalotu e vakatakarakarataka e dua na icurucuru ki na dua na veiyalayalati tabu ka veivauci ena kedrau maliwa na Kalou kei na tamata. Era sa yalataka na tamata me ra biuta na veika vakavuravura, me ra lomana ka qaravi ira na wekadra, sikovi ira na luveniyali kei ira na yada ena nodra rarawa, tukuna na veivakacegui, vunautaka na kosipeli, qarava na Turaga, ka muria na Nona ivunau. Sa yalataka kina na Turaga me “sovaraka mai kina vei [keda] na Nona Yalo Tabu,” (Mosaia 18: 10), vakabulai ira na Nona Yalododonu ena veika vakayago kei na veika vakayalo, okati kemudou vata kei ira ena iMatai ni Tucaketale, ka solia na bula tawamudu. Na papitaiso kei na ciqomi ni Yalo Tabu sai rau na sala sa vakarautaki tu me curumi kina na sala sa dodonu ka rabailailai ki na bula tawamudu.

Me vaka e tukuna o Paula na iApositolo, ni papitaiso e vakatakarakarataka talega na noda sobuta yani e dua na ibulubulu wai ka da na vakaturi cake mai kina kei na dua “na bula vou” (Roma 6:4) vei Karisito. Na cakacakatabu vakalotu ni papitaiso e vakatakarakarataka na mate kei na Tucaketale nei Karisito—eda sa mate vata kei Koya meda rawa ni laki bula vata tale kina kei Koya. Ena vakasama oqo na papitaiso sa isevu ni cakacakatabu vakalotu ni veivakabulai kei na noda ciqoma na Yalo Tabu ena vukei keda yadudua meda toso tikoga ki liu ka vosota me yacova na ivakataotioti.

Eda na vosota vakacava me yacova na ivakataotioti? Na vosota me yacova na ivakataotioti sa gadrevi kina na yalodina tiko ki na iotioti ni gauna, ia kivei Paula, a kaya kina vei Timoci: “Au sa vala oti ena ivalu vinaka, au sa ciciva oti na cere, au sa taura matua na vakabauta” (2 Timoci 4:7). Sa dina sara, e sega ni cakacaka rawarawa. Sa kena inaki me na dredre, veibolei, ka yaco me veivakasavasavataki ni da vakavakarau meda lesu ka laki bula vata kei na Tamada mai Lomalagi ka ciqoma na veivakalougatataki tawamudu.

Na vosota me yacova na ivakataotioti e sega dina ni dua na cakacaka e nomu duadua ga. iMatai, e gadrevi kina na kaukauwa ni veivueti ni iVakabula. Eda na sega ni rawa ni lesu ki na itikotiko nei Tamada Vakalomalagi vakavo ga ke da sa savasava, sa dodonu gona kina meda tomana tikoga na noda veivutuni. Kena ibalebale, meda veivutuni ena veitiki ni gauna yadua, ia meda laki tiko talega ena soqoni ni sakaramede ena veimacawa meda vakaivotavota kina ena sakaramede ka vakavouya na noda veiyalayalati ni papitaiso. iKarua, na vosota me yacova na ivakataotioti e gadrevi kina na Yalo Tabu, ena dusimaka ka vakatabui keda talega. iKatolu, e dodonu meda tiki ni dua na itikotiko ni Yalododonu, meda qarava ka ciqoma na nodra veiqaravi mai na tacida kei na ganeda ena kosipeli. Ena papitaiso eda sa tiki kina ni yago i Karisito (raica 1 Korinica 12: 11–13) ka sa tiko na noda itavi yadudua, oi keda yadua eda sa ka cecere, ia ena kena gadrevi meda rawata rawa sa dodonu kina meda vakaduavatataki kei na noda iVakabula. iKava, e dodonu meda wasea yani na kosipeli kivei ira na tani. Na yalayala me kau mada ga mai e dua na tamata vua na Turaga e sa rui cecere ka tawamudu (raica V&V 18: 15). Me kena ikuri, na kosipeli e dau vakadeitaki vakalevu sara vei ira era dau wasea vakawasoma. Kena iotioti, sa dodonu meda dei tiko ena noda vakabauti kei na nuitaki Karisito ka vosota me yacova na ivakataotioti, kei na maliwa ni vuqa na sala eda vakayacora kina na ka oqo o ya meda daumasu, lolo, ka wilika na ivolanikalou. Na ivakarau vakaoqo ena vaqaqacotaki keda meda sabaya na cakacaka qaseqase kei na gasau vidi nei koya na meca.

Au lomana na kosipeli i Jisu Karisito, ni sa vakamatatataka tu na sala meda na kania kina na vuata ni kosipeli, ka vakila na “vuabale ni [noda] marau” (1 Nifai 8:12) ka sa rawati duadua ga kina, ka vosota me yacova na ivakataotioti ena loma ni veibolebole kece sara ni bula vakayago oqo. Na kosipeli sa vakavulica vei keda na veika kece e dodonu meda kila meda lesu ka laki bula vata kei na Tamada mai Lomalagi ni da tamata ka sa tucake tale ka vakalagilagi. Meda sa dau raivotutaka tiko ena noda vakasama na bula tawamudu, ka meda sa gugumatua yani ena kena vakamuri na vakavakarau ni bula tawamudu o ya na kosipeli iJisu Karisito. Meda sa vosota tiko mada ga me yacova na ivakataotioti. Ena yaca i Jisu Karisito, emeni.