Ann M. Dibb

Ena gauna a tarogi kina ena veika cava a sotava e a vakarautaki koya vakavinaka sara ena nona sa mai kacivi me ikarua ni daunivakasala ena mataveiliutaki raraba ni Goneyalewa, a sauma mai ena matadedredre kei na dua na dredre totoka, “Maramatina! Ka dua na luvena yalewa!” E tomana vakatotolo mai, “Kei na kena bulataki tiko na ivakavuvuli ni iVakabula ki na noqu bula.”

E a sucu e Salt Lake City, Utah e Amerika, ena ika 30 ni June, 1954, kivei rau o Thomas S. Monson kei Frances J. Monson, ka sa vakavukui tu o Sisita Dibb ena vuqa na veika vivinaka e a sotava mai ena nona bula ka “sa kila vakavinaka tu na Tamaqu Vakalomalagi na noqu gagadre dina” ia o ya “e dodonu me da vakararavi tikoga vua na Turaga kei na Nona ituvatuva.”

Sa vakabauta tiko o koya ni o ira na goneyalewa era na laki bulataka e dua vei ira na nona tiki ni ivolanikalou talei, Vakaibalebale 3:5–7: “Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua. Mo vakarogotaka vua na nomu sala kecega, ia ena vakadodonutaka na nomui lakolako ko koya.”

Ena nona a vuli tiko mai Brigham Young Univesiti, a sotava kina o Sisita Dibb na cauravou me na watina e muri, o Roger Dibb, ka a vakamautaki koya sara ena Valetabu e Salt Lake ena ika 5 ni Maji, 1974. Erau itubutubu ni va na gone. E solia kece na nona gauna o Sisita Dibb ena qaravi ni vuvale. Ia, ena gauna eratou sa lelevu mai kina na gone ka sa kila o koya ni sa kena gauna donu, sa tekivu me tauri kalasi tale tiko o koya ena veiyabaki, ka laki taura sara na nona diqiri ena veika vakavuli taumada.

Sa veiqaravi oti mai o Sisita Dibb ena vica na veikacivi ena Lotu ena kedra veimataisoqosoqo. E a veiqaravi tiko ena matabose raraba ni Goneyalewa ni bera ni mai kacivi ki na mataveiliutaki raraba ni Goneyalewa.

E vakabauta o koya ni veika dina ena dau kilai vei ira na tamata kecega, ka rawa me da vakila taucoko na Yalotabu mai na nodra ivakavuvuli na noda iliuliu. “Au a vulica niu se goneyalewa ni sa rawa me da ququmi matua tiko ki na nodra ivakadinadina na parofita ni ko ni sasagataka mo ni taukena na nomuni,” e kaya o koya. “Na tamata yadua ena rawata rawa na ka o ya kevaka mo ni dolava na yalomuni ka gadreva dina mo ni vakavulici mai vua na Yalotabu.”