Na iVakadinadina

E yaco na vakatataro ni da rogoci ira eso era wasea na nodra ivakadinadina se ena noda dau nanuma me da wasea na noda ivakadinadina vakataki keda.

1. Ena dua na soqoni ni soli ivakadinadina a kaya kina e dua na lewenilotu, “Au kila ni Tamana kei na Luvena Rau a rairai vua na Parofita o Josefa Simici.” Ena taroga beka e dua na vulagi, “Na cava beka na ibalebale ni nona kaya au kila ni vaka o ya?”

2. E dua na cauravou sa vakavakarau tiko me laki kaulotu e vakataroga se sa qaqaco vinaka tiko na nona ivakadinadina me rawa kina ni laki kaulotu.

3. E dua na tamata gone e a rogoca na ivakadinadina ni dua na itubutubu se qasenivuli. Ena vukea vakacava e dua na tamata na ivakadinadina vakaoqo ena gauna e rogoca kina?

Na cava na ibalebale ni da vakadinadinataka ka kaya ni da kila ni dina na kosipeli? Veidutaitaka na mataqali kila o ya vata kei na “Au kila ni batabata na tautuba” se “Au kila niu lomana na watiqu.” Oqo e tolu na mataqali kila ka, e kilai ena sala e duidui. Na kila ni ituvaki ni draki e tautuba sa rawa me vakadeitaki ena veika e vakadikevi vakavuku. Na kila ni da lomana na watida e ka ni tamata yadua ka nona ga. E dina ni sega ni rawa ni vakadikevi vakavuku, sa ka bibi tikoga. Na vakasama ni veikila ka bibi era vakayavutaki ena ivakadinadina ni vakadidike vakavuku e sega ni ka dina.

Ena kena sa tiko eso na “ivakadinadina” me baleta na dina ni kosipeli (kena ivakaraitaki, raica Same 19:1; Ilamani 8:24), na cakacaka ni vakadidike vakavuku ena sega ni vakasucuma mai na kila ka vakayalo. Oqo na ka a vakavulica o Jisu ni a kaya o Saimoni Pita ni sa vakadinadinataka ni o Koya na Karisito: “O sa kalougata, Saimoni Pita: ni sa sega ni vakatakila vei iko na lewe kei na dra, na Tamaqu ga sa tiko mai lomalagi” (Maciu 16:17). E a vakamacalataka vakaoqo o Paula na iApositolo. Ena dua na nona ivola vei ira na Yalododonu mai Korinica, a kaya kina o koya “Na veika ni Kalou sa sega e dua sa kila, sa kila ga [e]na Yalo ni Kalou.” (1 Korinica 2:11; raica talega Joni 14:17).

Ni veidutaitaki, eda sa kila na veika ni tamata ena nodra sala na tamata, ia “na tamata sa vakayago sa sega ni vakabauta na veika ni Yalo ni Kalou: ni sa ka lialai vua: a sa sega ni kila rawa ko koya, ni ra sa kilai vakayalo ga” (1 Korinica 2:14).

Na iVola i Momani e vakavulica ni Kalou ena vakaraitaka mai na veika dina vakayalo kivei keda ena kaukauwa ni Yalo Tabu (raica Moronai 10:4–5). Ena ivakatakila ena gauna oqo sa yalataka tu kina vei keda na Kalou ni da na ciqoma na “kila” ena Nona tukuna vei keda ki na noda vakasama kei na lomada “na Yalo Tabu” (V&V 8:1–2).

E dua vei ira na ka cecere me baleta na ituvatuva nei Tamada Vakalomalagi me baleti ira na Luvena o ya ni oi keda yadua eda sa rawa ni kila vakataki keda ga na dina ni ituvatuva o ya. Na kila sa vakatakilai mai oqo e sega ni volai mai ena dua na ivola, mai na dua na vakadidike vakavuku, se mai na dua ga na vakasama ni tamata. Me vakataki Pita na iApositolo, sa rawa me da ciqoma na kila oqo mai vua sara ga na Tamada Vakalomalagi ena ivakadinadina ni Yalo Tabu.

Ena gauna eda sa kila kina na dina vakayalo mai na sala vakayalo, sa qai rawa me da kila ka vakadeitaka kina na kila o ya me vakataki ira na tamata vuli se dauvakadidike vakavuku ni ra sa vakavukui vakalevu mai na veimataqali sala era rawata mai kina.

Na parofita o Josefa Simici e a dua na ivakaraitaki vinaka ni ka oqo. Ena gauna sa vakacacani kina mai vei ira na tamata ena nona vakaraitaka vei ira na nona raivotu, a vakatauvatataka o koya na ka o ya kivei Paula na iApositolo, e a vakasewasewani ka vosacataki ena gauna sa tusanaka kina vei Tui Akaripa (raica Cakacaka 26). “Ia a sega ni vakalasui rawa na nona raivotu ena veika kece oqori,” a kaya o Josefa. “A raica ko koya na raivotu, ka kila ni a yaco dina, raica a sega ni veisautaka na ka oqori na veivakacacani kecega ka vakayacori vua e vuravura… . E vaka tale ga kina ko i au,” a tomana o Josefa. “Au a raica dina e dua na rarama ka rau sikavotu mai kina e rua na Tamata, io erau a vosa vakaidina vei au… . Au a raica dina e dua na raivotu; Au sa kila na ka oqori, kau sa kila ni sa kila talega na Kalou, sa dredre sara meu cakitaka, au sega mada ga ni doudou.” (Josefa Simici—Ai Tukutuku 1:24–25

Oqori na ivakadinadina i Josefa Simici. E vakacava beka na noda? Eda na rawata beka vakacava me da kila ka vakadinadinataka ni veika e kaya o koya sa ka dina? Ena rawata vakacava e dua na tamata na ka eda vakatoka tiko na ivakadinadina?

Na imatai ni ikalawa ni noda rawata e dua na mataqali kila vaka o ya me sa yaloda dina me da kila. Me baleta na kila vakayalo, na ikarua ni ikalawa o ya me kerei vua na Kalou ena masu ena yalodina. Me vaka ni da wilika ena ivakatakila ni gauna oqo,

“Ia kevaka ko sa gumatua ena masu, ena vakatakilai vei iko e vuqa na ka; io ena soli vei iko na vuku ni matanitu vakalomalagi—io na veika me yaco kina na marau kei na sala me rawati kina na bula tawamudu” (V&V 42:61).

Oqo na veika a vola o Alama ena veika a cakava: “Au a lolo ka masu ena vica na siga me vakatakilai kina vei au na veika oqo. Ia au sa kila ni sa dina, ni sa vakatakila vei au na Turaga na Kalou ena kaukauwa ni nona Yalo Tabu” (Alama 5:46).

Ni da gadreva ka vakasaqara, e dodonu me da kila tiko ni kena rawati e dua na ivakadinadina e sega ni soli wale mai ia sa dua na cakacaka eda sa namaki kina me da vakayacora kina e dua na ka. E vakavulica o Jisu, “Kevaka e dua na tamata sa via cakava na lomai koya, ena kila se sa ka mai vua na Kalou na ivakavuvuli, seu vosa vakai au ga” (Joni 7:17).

E dua tale na sala ni kena vakasaqarai na ivakadinadina e vaka me veivakurabuitaki toka ni vakatauvatani kei na sala e rawati kina na kila tale eso. Eda na rawata se vaqaqacotaka e dua na ivakadinadina ni da wasea yani. E dua a vakatututaka ni ivakadinadina eso era na rawati vakavinaka kevaka me ra wasea yani ka sega ni laki masulaki tale tiko me ra yaco mai.

Na noda ivakadinadina yadua sa ka bibi ki na noda vakabauta. Ena yaco kina, na veika me da cakava me da rawata kina, vaqaqacotaka, ka maroroya tikoga na ivakadinadina sa ka bibi ki na noda bula vakayalo. Me ikuri ni veika sa tukuni oti toka, sa dodonu me da laki vakaivotavota ena sakaramede ena veimacawa (raica V&V 59:9) me da rawata kina na yalayala cecere “me tikoga kei [keda] na nona Yalo Tabu” (V&V 20:77). Sa dina sara, na Yalotabu o ya sa ivurevure ni noda ivakadinadina.

Kivei ira sa tiko na nodra ivakadinadina me baleta na kosipeli vakalesui mai, sa nodra itavi talega me ra wasea yani. Na iVola i Momani e vakavulica ni dodonu me da “vakadinadinataka na Kalou ena veigauna kecega, ena veika kecega kei na veivanua kecega [eda] sa tiko kina” (Mosaia 18:9).

E dua vei ira na ivakavuvuli veivakauqeti dina ena nodrau sema na isolisoli ni ivakadinadina kei na ilesilesi me wasei yani e volai tiko ena wase 46 ni Vunau kei na Veiyalayalati. Ena kena vakamacalataki tiko na veimataqali isolisoli vakayalo e vakaraitaka na ivakatakila oqo:

“Raica sa soli vei ira eso ena cakacaka ni Yalo Tabu, me ra kila ni sa i Jisu Karisito na Luve ni Kalou, o koya sa vakoti ki na kauveilatai ena vuku ni nodra ivalavala ca na kai vuravura.

“Sa soli vei ira eso tale, me ra vakabauta na nodra vunau ; raica era na rawata na bula tawamudu kevaka era sa yalodina tikoga” (tt. 46:13–14; raica talega Joni 20:29).

Kivei ira sa tu vei ira na isolisoli me ra kila sa tu na nodra itavi dina me ra wasea na nodra ivakadinadina me rawa kina kivei ira e tiko na nodra isolisoli me ra vakabauta na nodra vunau me ra rawata talega na bula tawamudu.

Sa qai tu oqo na kena sa gadrevi vakalevu sara kivei keda me da tutaka na noda vakabauta, ki na veitamata yadua kei na tamata kece sara (raica V&V 60:2). E dina ni so era kaya ni sega na Kalou, e vuqa sara era dolava na yalodra ki na veika dina tale eso ni Kalou. Kivei ira era vakasaqaqara matua tiko oqo e dodonu me da tukuna kina ni sa bula dina tiko na Kalou na Tamada Tawamudu, na ilesilesi vakalou ni noda Turaga ka iVakabula o Jisu Karisito, kei na kena yaco dina na Veivakalesui mai. E dodonu me da yaloqaqa tiko ena noda vakadinadinataki Jisu tiko. Sa soli vei keda yadua e levu sara na galala me da cauraka yani na noda sa solibula vakayalo kivei ira na wekada kei na noda itokani, vei ira eda cakacaka vata, kei ira eda sotava ena veivanua. E dodonu me da taura na veigauna ni galala vakaoqo me da vakaraitaka kina na noda lomana na noda iVakabula, na noda ivakadinadina ni sa vakalou na Nona ilesilesi, kei na noda kakavaki tiko me da qaravi Koya.² Sa dodonu talega me ra dau rogoca na luveda ni da wasea vakawasoma na noda ivakadinadina. E dodonu talega me da vakaqaqacotaki ira na luveda ena noda vakayaloqaqataki ira me ra vakamacalataki ira mai na nodra ivakadinadina sa qaqaco tiko, ka sega walega ena veika ni vuli, qito se itavi e koronivuli.

Eda sa bula donuya tiko na gauna era sa vakatanitaka tiko kina eso na nodra vakabauta o ira era vakatokai na Momani ka ra sa vakasewasewani keda tiko baleti ira oqo. Ena gauna eda sotava kina na veivakatanitaki vakaoqo, sa noda itavi me da tu ka veivakadodonutaki ena vuku ni noda vunau kei na veika eda vakabauta. Sai keda sara ga eda na tukuna yani na noda vakabauta ka sega ni vakalaivi ira tale eso me ra laki vakadeitaka ena veika me vakatanitaki kina. Oqo e gadrevi kina na ivakadinadina, ka rawa ni cauraki ki na tamata yadua o kila se ki na lewevuqa raraba ena dua na soqoni lailai se levu. Ni da vakaraitaka yani na dina oqo eda sa kila tu, sa dodonu me da muria ena yalodina ka vosa ena “yalomalua kei na yalololoma” (V&V 38:41). Me da kakua ni veivakasaurarataki, vosa karakara, se vakalelewa. Me vaka e vakavulica o Paula na iApositolo, e dodonu me da tukuna na dina ena loloma (raica Efeso 4:15). Eso era na vakacala na noda ivakadinadina, ia e sega ni rawa vua e dua me vakadinadinataka na nona vakacala.

Me itinitini, au tukuna tiko oqo na veisemati ni talairawarawa kei na kila. O ira na lewenilotu e tiko na nodra ivakadinadina ka cakacakataka ena nodra veidusimaki na nodra iliuliu ni Lotu ena so na gauna era dau beitaki ni ra tamata talairawarawa mataboko.

E dina, ni ra sa tiko na iliuliu, ka vakakina, ni da sa umani ena nodra vakatulewa kei na veidusimaki ena kena qaravi na Lotu kei na kena cakacakataki na cakacakatabu vakalotu ni matabete. Ia ena gauna me da vukica ka kila kina na dina ni kosipeli—na noda ivakadinadina yadua—sa tu yadua vei keda e dua na veiwekani dina kei na Kalou, na Tamada Vakalomalagi, kei na Luvena, o Jisu Karisito, ena ivakadinadina kaukauwa ni Yalo Tabu. Oqo na veika era sega tu ni kila o ira na vakacacani keda tiko. Era lomatarotaro tiko ni sa rawa me da duavata ena noda vakamuri ira na noda iliuliu ia sa dui tu na noda kila vakaikeda ga.

E rairai ni rawa ni vakamacalataki na lomatarotaro vakaoqo ena veika dina ni oi keda yadua sa rua tiko na noda sala ni veiwekani vua na Kalou. Sa dua tiko na noda sala ni veiwekani ni veitaqomaki mai vei ira na noda parofita kei ira na iliuliu tale eso. Na sala ni veiwekani oqo, o ya na veika ni vunau, cakacakatabu vakalotu, kei na ivakaro, e laurai ena talairawarawa. Sa tiko talega e dua na noda sala ni veiwekani ena noda ivakadinadina, ka sa vakatabakidua vua na Kalou. Oqo na veika e baleta na Nona sa bula tiko, na noda veimaliwai kei Koya, kei na dina ni Nona kosipeli vakalesui mai. Na sala e rua oqo e kune kina na kila. Na sala e rua oqo erau semati vakaukauwa: Na kila e vakauqeta na talairawarawa (raica Vakarua. 5:27; Mosese 5:11), ia na talairawarawa e vakalevutaka na kila (raica Joni 7:17; V&V 93:1).

Eda na cakacaka se talairawarawa ki na veika eda kila. Ena vakadidike vakavuku se lotu, e sega ni mataboko na noda talairawarawa ni da cakacakataka na kila e veiganiti ki na veika me da vakayacora. E dua na daunivakadidike e ciqoma ka na cakacaka ena dua na ivola ni veivakadeitaki se ituvaki ni dua na vakadidike. Me baleta na veika vakalotu, na ivurevure ni kila e dua e vakabauta sa vakayalo, ia na kena ivakarau e tautauvata. Me baleti ira na Yalododonu Edaidai, ena gauna sa vakatikora kina ki yaloda na Yalo Tabu e dua na ivakadinadina ni dina ni kosipeli sa vakalesui mai kei na nona sa mai kacivi e dua na parofita ena gauna oqo, na noda digitaka me da muria na veivakavuvuli oqori e sega ni talairawarawa mataboko.

Ena gauna taucoko ni soli ivakadinadina me da kakua ni veivakasaurarataki se dokadoka. E dodonu me da nanuma tiko na veivakasalataki ni iVola i Momani kivei ira na lewevuqa era tamata yalodokadoka ni sa vakalevutaka na nodra iyau na Kalou ka ra laki vakalolomataki ira kina na wekadra (raica Jekope 2:20). E kaya o Jekope ni “sa ka vakasisila na veika oqo vei Koya sa bulia na tamata kecega” baleta “sa ka talei e matana na tamata kecega” (Jekope 2:21). E muri, a qai vakasalataka o Alama ni “dou kakua ni nanuma ni sa uasivi cake e dua mai vua tale e dua, se me dua e nanuma ni sa uasivi cake ko koya mai vua tale ka dua” (Mosaia 23:7).

Au sa mai tinia ena noqu ivakadinadina. Au kila ni sa tiko e dua na Tamada Vakalomalagi, a tuvanaka me kauti keda mai ki vuravura ka vakarautaka na veika e lavaki kei na icavacava ni noda ilakolako tawamudu. Au kila ni sa tiko e dua na noda iVakabula, o Jisu Karisito, na nona ivakavuvuli e vakayavutaka na ituvatuva kei na nona Veisorovaki e solia mai na veivakadeitaki ni tawa mate rawa kei na madigi ni bula tawamudu. Au kila ni a rairai na Tamana kei na Luvena vua na Parofita o Josefa Simici me vakalesui mai kina na taucoko ni kosipeli ena iotioti ni gauna oqo. Kau sa kila ni da sa liutaki tiko mai vua e dua na parofita, o Peresitedi Thomas S. Monson, ka sa tu vua na idola me vakadonui ira kina na lewe ni matabete me ra vakayacora na cakacakatabu vakalotu sa virikotori tu me baleta na noda rawata yani na bula tawamudu. Ena yaca i Jisu Karisito, emeni.