Elder Rafael E. Pino

No Elder Rafael Eduardo Pino, te puai o to’na iteraa papû e te mana no to’na faaroo e o Iesu te Mesia, e hi‘o ti‘a ïa i na ohipa e piti tei tupu. Hoê o te reira maori râ, te tai‘oraa i te Buka a Moromona no te taime matamua i te ahuru ma hituraa o te matahiti.

« Ua ani mai te mau misionare ia‘u ia tai‘o i te tahi noa mau irava iti », teie ta’na i parau, « area râ, aita vau e nehenehe ia faaea i te tai‘o. E ta‘ita‘i au i te reira na muri ia‘u i te mau vahi atoa o ta‘u e haere. I te mau taime a tai‘o ai au i te reira, e ite au i taua mau oaoa ra e te hau. Ua riro vau ei ite no teie faanahoraa o ta te Atua i faati‘a no te faaite papû i te parau mau o te mau ohipa a te Buka a Moromona, mai tei parauhia i roto i te Moroni 10. Ua farii au i te hoê iteraa papû e e parau mau te Buka a Moromona na roto i te mana o te Varua Maitai ».

Te taviri piti a Elder Pino o te taviniraa ïa ei misionare rave tamau i Venezuela misioni no Maracaibo. Noa’tu â ua tavini na Elder Pino i roto e rave rahi mau piiraa i roto i te Ekalesia hou oia a paturuhia’i i roto i te pŭpŭ matamua no te Hitu Ahuru, oia ïa ei episekopo, ei melo apooraa teitei, ei peresideni tĭtĭ, ei peresideni misioni e ei Hitu Ahuru Area, e mea vitiviti roa ïa oia i te haapapû i te faufaa no ta’na taviniraa misionare. « E tauturu te piiraa tata‘itahi ia outou ia faaineine no ta outou taviniraa o ananahi, » o ta’na ïa i parau, « area râ, te mau mea faufaa‘e ia‘u tei roto ïa i te mau a‘a o te aua misioni. Te farii noa nei â vau i te mau haamaitairaa no to‘u taviniraa ei misionare rave tamau ».

Ua fanauhia Elder Pino i Valencia, Venezuela i te 27 no atopa 1955 ia Arturo Pino e ia Josefina Gimenez de Pino. Ua roaa ta’na parau tuite no te ohipa faatereraa i Caracas, i Venezuela. Ua rave na Elder Pino i te ohipa na te Ekalesia i roto e rave rahi mau ohipa mai te matahiti 1980 mai â. Ua ta‘atihia raua ta’na vahine o Patricia Monica Villa Dassler i roto i te hiero no Washington D.C. i te 31 no mati 1981. E toru a raua mau tamarii.