E haere na te maramarama
I te mau mahana atoa e fatata i te mau hora atoa, te rave nei outou i te mau ma‘itiraa o te tura‘i ia outou ia haere noa na te maramarama e aore ra, ia haere atu i roto i te po‘iri.
No tatou tata‘itahi ua riro te oraraa nei mai te hoê tere. Na te Metua i te Ao ra i faanaho i te reira no tatou no To’na here ia tatou. E mea taa‘e to te tahi ite i to te tahi, tera râ, ua haamata to tatou tere i te hoê â vahi hou a fanauhia mai ai tatou i te fenua nei.
Tatou paatoa i te haapii-raa-hia e Elohima, te Metua o to tatou mau varua. Ua here tatou Ia’na e ua hinaaro tatou ia riro mai Ia’na te huru e ia parahi i pihai iho Ia’na e a muri noa’tu. Ua faaite papû mai Oia ia tatou i te mea e titauhia ia tatou no te farii i taua oaoa ra. E farii tatou i te hoê tino tahuti e tae noa’tu i te mau tamataraa taatoa ta te reira e hopoi mai. E roohia tatou i te ma‘i e i te pae hopea ra, e pohe to tatou tino.
Ua haamaramarama mai te Metua i te Ao ra ia tatou i te mea e titauhia no te ratere mai te haamataraa e haere atu ai e parahi i pihai iho Ia’na e a muri noa’tu, e ia ora i te oraraa e orahia ra e A’na. E tere tatou i roto i te oraraa nei ma te haamana‘o ore i te tau a parahi ai tatou i pihai iho Ia’na i roto i te ao varua. E te rave‘a hoê roa no te ho‘i faahou Ia’na ra maori râ, o te upooti‘araa ïa i ni‘a i te pohe tino e i ni‘a i te faaheporaa a te hara o te tae mai i ni‘a ia tatou na roto i to tatou ofatiraa i te mau faaueraa. Ua parau mai Oia ia tatou e, eita tatou e upooti‘a i ni‘a i te faaheporaa a te pohe e aore ra a te hara na roto i to tatou iho puai – ma te Faaora ore, inaha, Na’na e ofati i te tape‘a o te pohe e a horo‘a mai ai ia tatou i te rave‘a no te tama ia tatou i te hara ta tatou e rave.
Ua ite outou na roto i te mau papa‘iraa mo‘a ta te Atua i heheu mai na roto i te mau peropheta e, i tupu na te hoê tama‘i i roto i te ao varua i te taime a hohorahia mai ai i mua ia tatou te faanahonahoraa no to tatou tere. Te feia tei orure i te hau, aita ratou i hinaaro e farii i te hoê Faaora e ia farii e Na’na e faaora ia ratou, e te pe‘ape‘a atoa ra hoi ratou o te ore ratou e ho‘i faahou i pihai iho i te Metua i te Ao ra. Ua ti‘a outou tata‘itahi i te pae o te feia itoito, e te faaroo e te parau ti‘a i roto i te aroraa. Ua farii outou i te Faaora e i te faanahonahoraa no teie tere no te ho‘i i roto i te oaoa o te aro o to tatou Metua i te Ao ra.
E mea faahiahia mau outou i rotopu i te feia tei ma‘iti i te parau ti‘a i roto i taua tamataraa ra i roto i te ao varua. Ua fariihia outou no te haere mai i te tahuti nei, e ia ratere i roto i teie tere, i roto i te hoê tau a vai ai te evanelia a Iesu Mesia i ni‘a i te fenua nei. E i roto i te rahiraa milia tamarii a te Metua i te Ao ra e ora nei i teie nei, ua fana‘o outou i te mea e, ua itehia te evanelia a Iesu Mesia ia outou e tae noa’tu i Ta’na Ekalesia mau. Hau roa’tu i te reira, te faaroo mai nei outou i teie pô, e tapa‘o faaite te reira e, ua ma‘iti outou ia ratere i roto i te oraraa nei ma te haere na te maramarama.
I te mau tamarii atoa a te Metua i te Ao ra tei fanauhia mai i te ao nei, ua horo‘ahia ia ratou, i te fanauraa ra, ei tao‘a horo‘a noa, te Maramarama o te Mesia. Ua farii outou i te reira. O te iteraa ïa e, eaha te parau ti‘a e eaha te parau ti‘a ore, e eaha te parau mau e eaha te parau hape. Tei roto tera ia outou mai te taime a haamata ai outou i to outou tere i roto i te oraraa nei. I to outou bapetizo-raa-hia e to outou fariiraa i te Varua Maitai, e tapa‘o faaite te reira e, ua ma‘iti outou ia haere na roto i te Maramarama o te Mesia.
I to outou haamau-raa-hia ei melo no te Ekalesia ua horo‘ahia ia outou te mana no te farii i te Varua Maitai ei hoa no outou. Te Varua Maitai te tumu rahi no te maramarama no te iteraa i te parau mau, no te pee e no te here i te Fatu ia Iesu Mesia, e no te ite i to outou e‘a no te ho‘i atu i te Atua ra i muri a‘e i teie nei oraraa.
Tera râ, te varua tei arata‘i i te orureraa hau i roto i te ao varua, te pato‘i noa nei â oia i te faanahonahoraa e te hinaaro nei oia ia ati roa outou. Ua hinaaro oia eiaha roa’tu ia itehia ia outou te e‘a no te ho‘i faahou i te fare. Ua ite maitai te enemi o to outou varua ia outou e i to outou maitai. Ua ite oia e, mai te mea e, e manuïa oia i te faafariu ê ia outou i te e‘a o te maramarama, e nehenehe ïa ta’na e haru ia outou e e tape‘a ia outou eiaha outou ia tauturu ia vetahi ê i roto i te reira tere. Ua ite oia i to outou maitai e i to outou mana no te haapii e no te faauru i te rahiraa hanere tamarii a te Metua i te Ao ra i roto i teie oraraa, e e rave rahi tauatini i roto i te mau u‘i o te pee mai i to outou haere‘a. Mai te mea e, e manuïa oia i te ruri ê ia outou i te maramarama, e nehenehe ïa ta’na e faatupu i te ino e te ati rahi i ni‘a i te mau taata e rave rahi.
Te faaroo mai nei outou i teie nei, e tapa‘o faaite te reira e, ua ite te Atua i to outou faufaa rahi e ua ma‘iti outou ia haere na te maramarama Ta’na i ho mai ia outou na. E ere i te mea ohie i te mau taime atoa ia ite maramarama i te reira mau ma‘itiraa. I te mau mahana atoa e fatata i te mau hora atoa, te rave nei outou i te mau ma‘itiraa o te tura‘i ia outou ia haere noa na te maramarama e aore ra, ia haere atu i roto i te po‘iri. Te tahi o te mau ma‘itiraa faufaa roa a‘e no ni‘a ïa i te mau mea i reira outou e haamau ai i to outou aau.
Ua rau te mau mea o ta outou e faariro ei mau mea au roa. Ei hi‘oraa, te titau nei tatou paatoa i te mana‘o farii o te tahi atu mau taata. Te hinaaro nei tatou pauroa i te hoa. Te imi nei tatou paatoa i te haapapûraa e, e taata faufaa anei tatou. Te rave nei tatou i te mau ma‘itiraa tei niuhia i ni‘a i taua mau hinaaro no tatou ra. E riro te tahi o te reira mau ma‘itiraa i te faaatea ê ia tatou i te maramarama ta te Atua i ho mai no te arata‘i ia tatou. E nehenehe te tahi i te faaanaana i te reira maramarama i reira hoi e ti‘a ai ia tatou ia ite i to tatou haere‘a.
Ia hi‘o ana‘e au i muri, te ite nei au e, aita vau i ite papû i te faufaa o te tahi o te reira mau hinaaro e te reira mau ma‘itiraa. Ua hinaaro vau ia ô vau i roto i te mau pŭpŭ tuaro. Ua hinaaro vau ia haapa‘o maitai i te haapiiraa. Ua hinaaro vau ia itehia ia‘u te mau hoa maitai e te parau ti‘a. E i to‘u raveraa i te mau faaotiraa na roto mai i taua mau hinaaro ra, ua rahi te taime to‘u iteraa e, te faaatea ra vau i te maramarama e aore ra, te haere ti‘a ra vau i roto i taua maramarama ra.
Ua riro te tahi o te mau ohipa i ravehia e au e te tahi mau hoa to‘u ei mau tumu rahi no to‘u iteraa i te maramarama. Area te tahi ra, mai to‘u ite ore rahi i taua taime ra, ua faaatea märû noa ïa te reira ia‘u i te maramarama. I te mau rave‘a faufaa e e vai i te vairaa, te mau ma‘itiraa ta‘u i rave no te haamaharaa i to‘u mau hinaaro i te auhoaraa e ia itehia vau, ua haafatata e aore ra, ua faaatea te reira ia‘u i te maramarama e arata‘i i to‘u haere‘a.
I mutaa iho ra, ua horo‘a mai te Metua i te Ao ra ia tatou nei, na roto i Ta’na mau peropheta, i te hoê rave‘a e ite ai tatou e, eaha te mau ma‘itiraa faufaa a‘e, e no te aha – e nahea ia rave i te reira.
Te haapotoraa maitai a‘e ta‘u i ite tei roto ïa i te mau parau a Moroni a faahiti ai oia i te mau parau a to’na metua tane o Moromona. Ua hinaaro vau ia rahi atu to‘u maramarama i te reira mau parau i to‘u apîraa mai ia outou, e te pure nei au ia tuu te Fatu i te reira mau parau i roto i to outou mafatu i teie aru‘i.
« Inaha râ, o ta te Atua, o te parau maira ïa e te faaitoito noa maira ïa i te rave tuutuu ore i tei maitai ; no reira, o te mau mea atoa te parau mai e te faaitoito mai ia rave i tei maitai, e ia hinaaro i te Atua, e ia tavini ia’na, o tei faatupuhia ïa e te Atua ra.
« No reira, a ara maite… ia ore outou ia mana‘o i te mea ino mai te mea ra e, no ô mai ïa i te Atua, e ia ore hoi outou ia mana‘o i te mea maitai e te mea no te Atua ra mai te mea ra e no ô mai ïa i te diabolo ra.
« Inaha hoi, e au mau taea‘e, ua roaa ia outou te mana e ite ai outou i te maitai e te ino ; e mea papû roa te rave‘a e itea-maitai-hia’i te maitai e te ino ; e au ïa i te papû ra o te rave‘a e ite ai te maramarama mahana e te pô pouri ra ».1
Na te mau papa‘iraa mo‘a e faaite mai ia tatou i te puai e te vahi no reira mai te maramarama.
« Inaha hoi, ua horo‘a-noa-hia mai te Varua o te Mesia i te mau taata atoa ra ia ite ratou i te maitai e te ino ; no reira te faaite atu nei au ia outou i te rave‘a e taa ê ai ; o te mau mea atoa hoi te titau mai ia rave i te maitai, e te titau hoi ia faaroo i te Mesia, ua haaponohia mai ïa i te mana e te hamani maitai a te Mesia ; no reira e ti‘a ai outou i te ite papû roa e, no ô mai ïa i te Atua ra.
« O te mea râ i titauhia’i te taata ia rave oia i te mea ino, eiaha oia e faaroo i te Mesia, e ia huna ia’na, e i tape‘ahia’i eiaha e tavini i te Atua, ei reira e ite papû roa’i outou e, no te diabolo ïa, ua na reira hoi te diabolo i te rave i te ohipa, aita roa hoi oia i titau ia rave te hoê taata i te maitai, aita’tu ïa e hoê iti a‘e ; aita atoa ta’na ra mau merahi ; aita atoa tei auraro ia’na ra ».2
Te ite nei au i teie nei, hau atu i te maitai i ta‘u i ite i to‘u apîraa e, e mea nahea e ti‘a ai ia‘u ia faaohipa i taua arata‘iraa ra. Te vai ra te mau pŭpŭ tuaro e mau taata hauti e e mau taata faaineine o tei ume ia‘u ia rave i te maitai. Te vai ra aita i na reira mai. Te vai ra te mau hoa, te tahi pae o ratou e ere i te melo no te Ekalesia a Iesu Mesia, na roto i to ratou hi‘oraa, ua ume mai ratou ia‘u ia rave i te ohipa maitai e ia haamana‘o i te Faaora.
Te vai ra te mau hoa no te fare haapiiraa e te mau orometua haapii ua titau vau i to ratou mana‘o farii e to ratou auhoaraa, ua faatupu ratou i roto ia‘u i te hinaaro ia rave i te ohipa maitai, e ua haamaitai i to‘u mau mana‘o no ni‘a i te Faaora. Ua haamaitaihia vau i te imiraa i to‘u haere‘a. Tera râ, e hau roa’tu i te reira i te maitai ahiri au i maramarama i te faufaa no ta‘u mau ma‘itiraa e i te haere‘a e ma‘iti.
Ua ite o Moromona i te reira. Ahiri au i tai‘o maitai i ta’na ra mau parau i roto i te Buka a Moromona e i te tahi atu mau parau mai te reira, ua rahi roa’tu ïa to‘u haamaitai-raa-hia e te paruru-raa-hia. Teie te mau parau a Moromona:
« Te ite nei outou i te maramarama e ti‘a’i ia outou i te ite ti‘a, e no te Mesia taua maramarama ra, e haapa‘o maitai eiaha e hapa noa’tu i te faataa-ê-raa i tei maitai e tei ino ; o ta outou hoi e faaino ia vetahi ê ra, e faa’ino-atoa-hia ïa outou i te reira.
« No reira… ia titau maite i te maramarama no te Mesia ma te tuutuu ore, ia ite outou i te maitai e te ino ; e e tape‘a mai outou i te mau mea maitata‘i atoa, aore e faahaparaa’tu ta outou i te reira, ua riro mau outou ei tamarii a te Mesia ra ».
« E teie nei… e nahea e ti‘a ai ia outou te tape‘a i te mau mea maitata‘i atoa ra ? »3
Na roto ïa i te faaroo e ti‘a ai ia outou ia tape‘a i te mau mea maitata‘i atoa ra. Te pure nei au ma to‘u aau atoa ia faarahihia to outou faaroo e tamahine outou na te hoê Atua here. Te faaite papû nei au e, i riro na outou ei mau tamahine itoito i roaa ai ia outou te faito ta outou e ti‘a nei i teie nei i roto i teie tere o te oraraa nei. Mai ia outou i tapa‘ohia e te enemi o te parau ti‘a, ua paruru-atoa-hia outou e ua tia’ihia e to outou Metua i te Ao ra e na te Fatu o Iesu Mesia. Ua ite Raua ia outou. Ua ite Raua i te mau puai e i te mau taata e haati ra ia outou. Ua ite Raua eaha te mau mea i mua ia outou. E no reira, ua ite Raua eaha te mau ma‘itiraa ta outou e rave, eaha te mau hinaaro ta outou e pahono, e eaha te mau huru e faaati ra ia outou e faatupu i te taa-ê-raa rahi no te tape‘a noa ia outou i ni‘a i te haere‘a o te maramarama. Te faaite papû nei au e, na roto i te Varua o te Mesia e na roto i te Varua Maitai, e haere outou ma te papû, noa’tu te huru o te mau fifi e tupu mai. No te mea hoi e, e faufaa rahi to outou, e riro te tahi mau tamataraa to outou ei mau tamataraa teimaha roa. Eiaha roa’tu outou e haaparuparu e aore ra e mata‘u. Ua faaineine tamauhia to outou haere‘a na roto i te fifi, e iteahia te reira ia outou mai te mea e, e faaohipa outou i te faaroo.
Ei faaroo to outou no te pure. Ei faaroo to outou no te feruri maite i te parau na te Atua. Ei faaroo to outou no te rave i te mau mea e no te haere i te mau vahi i reira te Varua o te Mesia e te Varua Maitai e tae mai ai.
Te fafau atu nei au ia outou e, i roto noa i nau mahana rii i muri nei, e ite outou i te maramarama o te Varua o te Mesia e o te Varua Maitai i roto i to outou oraraa i te mau mahana atoa. Ia haere ana‘e outou na te maramarama, e ite outou i taua taime ra i te tahi mahanahana e te tahi oaoa o te roaa ia outou ia farii-poupou-hia outou i te fare, apitihia mai e te rahiraa hanere e penei a‘e, tauatini paha o te tahi atu mau taata ta outou e arata‘i mai na muri iho ia outou tei haere atoa na te maramarama no te mea ua na reira outou.
E Ekalesia mau teie na Iesu Mesia. Te vai nei hoê peropheta ora, o Thomas S. Monson. E te vai ra te mau tavini e te mau melahi no te tauturu ia outou i ni‘a i te haere‘a maramarama. Te faaite papû nei au i te reira na roto i te i‘oa o Iesu Mesia ra, amene.