Fausiaina o se Aiga e Faavavau

A o ou tuputupu ae, o lo’u tama o se alii pisi tele ona sa i ai sana galuega pisi o se ave loli mo galuega o le fauina o fale. Ae na ia faaavanoaina e le aunoa lona taimi mo au. A o ou aoga i le aoga maualuga, e fesili lo’u tama i ou tuafafine e toalima pe a sau i le fale mai le galuega, “O fea o i ai Benjamín?”

E o mai ou tuafafine ia te au ma fai mai, “O loo manao tama ia te oe.”

Ou te tuua a matou taaloga ma a’u uo ae ou tamoe atu ia te ia ma fesili atu, “O le a se mea e te manao i ai, Tama?”

E faapea mai o ia, “Aumai au tusitusiga paia, ma sau ta o.”

A le faalua pe faatolu i le vaiaso ona ma faitauina faatasi faapena a ma tusitusiga paia. O ia o se matai faiaoga o tusitusiga paia. O l e taimi lena, sa leai ni a matou seminare na faia i Mekisiko. O le taimi lenei, ou te mafaufau i na taimi na o a’u lava lau vasega seminare faatasi ma lo’u tama o le faiaoga.

A o faitauina ia tusitusiga paia ma faalogo atu i le faamalamalamaina mai e lo’u tama ia te au, sa ou aoaoina ai mo au lava le lagona o le Agaga i lou loto ma lou mafaufau. O le tele o taimi e matuai malosi ai lava le Agaga a o ia faamalamalamaina mai ia mau.

O nei ituaiga aafiaga faatasi ma lou tama o le amataga lea o lau lava molimau i le Tama Faalelagi ma le Ekalesia. Sa ou mafaufau lava e moni le Ekalesia, ae e le lava le na o le mafaufau i ai. Na taitai e lo’u tama lo’u lima ma tuu i luga o le ai uamea. O le auala na ia tausia ai a’u o le ki lea mo lau molimau ma lou maumaututu faaleagaga i totonu o le talalelei.

I na faatasiga, e le gata ina ou aoaoina ai mai ia te ia le tele o mea e uiga i tusitusiga paia, ae na ou iloa ai foi na alofa lo’u tama ia te au i se itu ou te lei malamalama lelei i ai i lena taimi. O le tele o isi taimi na te valaaulia ai au i se tifaga pe ma te aai, ma ou te iloa sa puipuia a’u e le alofa o lo’u tama ia te au. O le taimi lenei ua avea au ma se tama, ua ou iloa ai sa ia alofaina au i se auala faapitoa lava.

Ina ua 16 ou tausaga, o le toatele lava o a’u uo i le aoga sa le o ni tagata o le Ekalesia, ae sa latou iloaina o au o se tagata o le Ekalesia. Sa amata ona latou ulaula ma fai isi mea ou te le faia. O lea na amata ai ona sui a matou mea na fai; o a matou ituaiga talanoaga sa matuai eseese lava, ma sa le tutusa foi o matou manatu ma gaoioiga.

O se tasi aso na fesili mai ai lo’u tama, “Aisea e te le mafaufau ai i aafiaga a au uo ia te oe?” Sa ia fautuaina au ina ia ou faaeteete lelei ma mafaufau e tatau ona sui au uo.

Ina ua amata ona ou aoga i le iunivesite, sa amata ona ou pisi tele ma sa tau leai so’u taimi na faaalu i a’u uo, ae i se tasi taimi ina ua matou faatasitasi, na latou filifili ai e fai se mea le lelei. Na matou i ai i totonu o se taavale, ma na matuai saosaoa le alu a le matou taavale. Na taofi i matou e se leoleo, ma sa matuai ou fefe lava. Na ou manatua upu a lou tama e faapea e tatau ona ou popole i lo’u lumanai. O lena aafiaga na fesoasoani ou te faia ai se faaiuga e uiga i le ituaiga uo ou te manao i ai.

Sa ou matuai aafia i gaoioiga a le Ekalesia. O le auai i le Mutuale sa manaia aua sa ou filifili ia maua au ituaiga uo faapena. Na ou iloaina ai na sa’o lava lo’u tama—e tatau ona ou taumafai ia ou maua ni uo lelei. Sa ou manaomia ni uo o e o le a fesoasoani e saunia au mo se misiona.

E pei ona sa faia e lo’u tama ia te au, sa patino foi le tausia o a’u e lo’u Tama Faalelagi. Ou te iloa e alofa le Tama Faalelagi ia te au. E tele itu ma e tele tulaga Na te tausia ai i tatou taitoatasi. O nisi taimi tatou te le lagonaina ai ma tatou te le naunau foi e faalogo ona atonu e sili atu ona tatou tosina atu ia tatou uo nai lo Ia. Ae ou te iloa e alofa le Tama Faalelagi ia i tatou, ma o le a Ia tuuina mai ia i tatou le avanoa e iloa ai i o tatou loto o le a faatasi pea o Ia ia i tatou pe a tatou ole atu mo Lana fesoasoani.

E faapitoa ona ou manatua le lagonaina o le alofa o le Tama Faalelagi a o avea ai au o se talavou na auai i le faamanatuga. O le matou uarota sa toalaiti lava ni alii talavou sa i ai, ma o Aso Sa uma lava ou te tufaina ai le faamanatuga. Ina ua ou auauna atu o se aoao, o Aso Sa uma lava ou te saunia ai le falaoa ma le vai. O le taimi lena, sa matou faaaogaina ai ipu tioata, lea sa ou fufuluina taitasi.

A o ou tufaina atu le faamanatuga, na mafai ona ou vaai atu i foliga o tagata. O tagata matutua, tagata talavou, tamaiti—e tofu ma se lagona faapitoa a o tufaina atu le falaoa ma le vai. Na ou iloa atu sa latou lagonaina le alofa o le Tama Faalelagi mo i latou lava. O na aafiaga i le faamanatuga na matauina ai lou olaga e faavavau. O vaiaso uma lava ou te manatua ai le Alii, o le na maliu mo i tatou. Ou te manatua afai tatou te agavaa, o le a tatou toe faatasi o se aiga e faavavau.

Ina ua toeaina lava lo’u tama, sa ma talanoa e uiga i le tulaga o lona maliu. Sa leai sona popole; na ia lagonaina le filemu. Ina ua talanoa mai e uiga i le oti, na ia iloaina o le a toe faatasi o ia ma lona aiga. Ona o le Togiola ma le Toetu, na ma tau fai maua ai se lagona maoae o le saogalemu. Sa ma faafetai e le aunoa i le Alii ona o le vavega o le Toetu.

Ona o aoaoga a lo’u tama, na ou iloa ai a o ou laitiiti e moni le talalelei a Iesu Keriso—e le na o totonu o lo’u mafaufau ae faapena foi i totonu o lo’u loto. E tele taimi ua faailoa mai ai e le Agaga ia te au e moni le Tusi a Mamona, o Iosefa Samita o se perofeta, ma o loo i ai sa tatou perofeta i aso nei o Peresitene Thomas S. Monson. O le iloaina ua ou maua le talalelei ou te lagona ai lava le fiafia. Ma ou te iloa ma le mautinoa e alofa ma e silafia e le Alii i tatou. O le mea lea, ua i ai lo’u lava malamalama patino e uiga i le Alii o Iesu Keriso, ma ona o Lana taulaga, ua ou iloa ai e mafai ona ma toe faatasi ma lo’u tama faapea ma lo’u aiga atoa.