O Le Isi Taimi O Le A Ou Faalogo!

“Toeitiiti lava uma,” o le musumusu lea a Manuele. Na tepa ifo i le atigipusa o loo i lalo o lona ogalima. Toeitiiti lava a uma lole ona faatau atu. Ae ua i ai nei i lana atigipusa se teutusi ua tumu i tupe.

A o susulu ifo le la i luga o le ulu o Manuele, sa mafaufau o ia i le fale i lona tina ma lona tinamatua o loo faatali mai ai. Sa ataata o ia i le mafaufau atu i lo latou fiafia lata mai nei. Sa lagona foi e Manuele lena fiafia, ma sa ia iloaina le mafuaaga—o le a papatisoina uma i latou i le Aso Sa o le a sosoo ai.

“Aluese ma le auala!” o le ee faafuasei atu lea a se tasi mai tua o Manuele. E toafa ni tama na mili atu i uila a o oso i tua Manuele i totonu o se vaivai.

Sa vaai muamua Manuele i na tama, na tietie ane i le isi itu o le auala savali. Na oo ane se manatu i lona mafaufau: ia aloese mai le aualii le la. Ae a o vili ese atu a latou uila, na toe toafilemu Manuele ma galo atu ai i latou. Ae ua toe foi mai foi lena lagona ae ua malosi atu. Ae, sa manao lava ia faauma ona faatau atu ia lole, o lea sa ia faaauau ai lava.

E fetaui lava le uma ona faatau atu e Manuele o le lole mulimuli, ae toe foi mai loa le aualii. Na mau se tasi o i latou i lona tauau a o pasi ane lana uila. Na pau ese le atigipusa mai lima o Manuele, ae masau ane le isi tama ma sei atu. “Leai!” o le tagi lea a Manuele. Sa tilotilo atu o ia ma le faanoanoa ao latou aveina lana atigipusa o tupe sa ia galue malosi ai ina ia maua.

O lena afiafi, na faalogoina ai e Manuele se tuitui i le faitotoa o lona potumoe. “Manuele! Faamolemole sau i fafo!” Sa popole lava le leo o lona tina.

“Na ou fai atu foi ia te oe Mama, ua ou faamaimai.”

“Ae o lea ua o mai faifeautalai ia i tatou.”

Na tu ae i luga Manuele, ma manava loloa i totonu, ma faapaleni ona tauau.

“Talofa, Manuele,” o le tala lea a Sister Santos a o faatasi atu Manuele i lona aiga i le potu malolo.

E masani lava, ona faalogologo ma le totoa ia Manuele i faifeautalai. Ae o le afiafi lenei sa mafaufau o ia i tama ma le atigipusa tupe. Na moomoo lava maimau pe ana sola ese o ia i le taimi muamua na ia vaaia ai i latou. Ia ae faapefea ona ia iloaina le mea e fai? Mata na te lagonaina le saogalemu pe a toe savali atu i lena auala? Sa faauu ona foliga ma amata ona faalogo atu i le lesona.

“O le Agaga Paia o se avefeau lea mai le Tamai Faalelagi,” o le tala lea a Sister Santos. “E mafai ona ia taialaina ma musuia o tatou mafaufau. E mafai ona fesoasoani o ia ina ia tatou faia ia filifiliga lelei ma lapatai i tatou e uiga i mea matautia.”

Na tepa ae i luga Manuele. “O le a le uiga o lau tala?”

“Ia, pe na oo atu i lou ulu se mafaufauga malosi lava?” o le fesili lea a Sister Santos. “Atonu o se musumusuga lena e fai se mea. Atonu sa na ona foliga lava o se manatu lelei tele.”

Na faapupu tetele ia mata o Manuele ao ia manatuaina ia lagona malolosi na ia maua muamua ina ia aluese mai tama tietie uila. “Ou te manatu na tupu ananei,” na ia fai atu lemu ai.

Na tilotilo atu faifeautalai ia te ia ma le fia iloa. Na faapena foi i le tina ma le tinamatua o Manuele. Sa ia faamatala atu ia i latou e uiga i tama ma le atigipusa ua gaoia.

“Talofa e, Manuele, ou te faamalie atu lava,” o le musumusu atu lea a lona tina. “O le mea la lena na e le fiafia ai lava i lenei afiafi. A uma, ona e faamatala atili mai lea e uiga i le aualii lena. Atonu e mafai ona tatou toe aumaia lau tupe.”

“Ou te faamalie atu foi,” na fai mai ai Sister Santos. “Ae ou te lagona e sa’o oe. Atonu o le Agaga Paia lena na e lagonaina i totonu.” Sa le toe tautala o ia. “O le a e maua le meaalofa o le Agaga Paia pe a uma ona e papatiso ma faamauina oe. O lona uiga la, o le a faatele atu ona e mauaina ma lagona na savali. A tumau lou agavaa, e mafai ona avea le Agaga Paia ma au soa tumau. O le a sou manatu i lena mea?”

Na oso ane se ataata toafilemu i foliga o Manuele. “Manaia tele!” o lana tala lea. “Sa amata ona ou tau mafaufau o le a ou fefe i taimi uma ou te savali ai i fafo. Ae afai o le a toe lapataia au e le Agaga Paia, e pei ona sa Ia faia ananei, o le a ou le afaina.” Na ataata atu o ia i lona tina. “Aua o le isi taimi e toe talanoa mai ai le Agaga Paia ia te au, o le a ou faalogo!”