O Tagata o le Uarota o se Faataitaiga o Faifeautalai Sauniuni

O Christopher Law e lei leva ona taliu mai le Misiona a Massachusetts Boston. “Ou te le manatua po o anafea na ou filifili ai e faia se misiona,” o lana tala lea. “Na ou iloaina lava o le a ou alu [i le misiona]. … O le alu i se misiona o se vaega lea o a matou talanoaga faaleaiga i aso taitasi.”

O aiga o e fesoasoani ia latou fanau e tulimatai atu i le galuega faamisiona a o laiti lava, ua fesoasoani i le fausia o ni autalavou naunautai ma tuuto.

Na saunoa mai Epikopo William Whatcott o le Uarota a Voyager: “Ou te talitonu o le faamamafa ua tuuina e o matou matua i le taua o le auauna atu ua matuai aoga lava. Ona o lena tulaga, ua matou iloa ai, e oo atu i le taimi e maua ai e o matou alii talavou le Perisitua Arona o ni tiakono, ua uma lava ona faia le filifiliga e auauna atu i se misiona, ma ua atili ai lo latou naunautai ia tumau le faamaoni ma pipii i le talalelei i o latou olaga faaletupulaga talavou.”

O aiga e aupito sili ona lelei i le faaauupegaina o se faifeautalai o le lumanai i mea o le a ia manaomia i le faaleagaga ma le faataunuuina [o le galuega talai]. O se tasi o meafaigaluega autu o loo i ai i se aiga mo le fesoasoani atu i le saunia o fanau e auauna atu o le afiafi faaleaiga.

O Frank Lang, o se faufautua i le korama a ositaulaga ma o se matua o se faifeautalai, na te uunaia ia matua e fai afiafi faaleaiga e tusa lava pe o i latou e fou pe ua leva i le ekalesia. “O iina e aoao ai a tatou fanau e uiga i le talalelei,” o lana tala lea. E ofoina atu ai foi e le aunoa ni avanoa e faamamafa atu ai le taua o le saunia ma le auauna atu faafaifeautalai.

Na taua e Brother Law o afiafi faaleaiga o se taimi lea mo lona aiga e fai ai le galuega faafaifeautalai o ni tagata o le ekalesia. “O le faia o le galuega faafaifeautalai o se vaega a le aiga e fesoasoani e atiina ae ai le naunautai e auauna atu,” na ia saunoa ai.

E ui o le aiga o le ki lea i le uunaia o sauniuniga i le faataunuuina [o le misiona] ma le faaleagaga, ae o faamalosiauga ma faataitaiga a taitai lelei o le Ekalesia e mafai ona lagolagoina ai faatonuga e tuuina atu i totonu o le aiga ma e mafai ona faia ai se eseesega tele i olaga o tagata o le aiga.

“Sa i ai ni o matou taitai sili ona lelei o e na avea o ni faataitaiga, faufautua, ma ni taiala maoae,” o le saunoaga lea a Epikopo Whatcott. “Mai le taimi na avea ai nei alii talavou ma ni tiakono seia oo mai i le taimi na latou o ese atu ai i a latou misiona, sa taulai atu lava o latou taitai i le fesoasoani atu ia i latou ia tumau le toaaga ma faatumauina lo latou naunau e faia se misiona.”

E faatasi i le masina ona potopoto faatasi ia alii talavou o le Uarota a Voyager e faalogologo i faifeautalai ua maea mai misiona a lo latou uarota, e aofia ai i latou o e na auauna i le tele o tausaga ua mavae, o faasoa mai a latou molimau ma aafiaga i le misiona ua suia ai olaga. Ua taua e Epikopo Whatcott lenei aafiaga faalemasina e “matuai taua tele.”

E au foi i ai ia Brother Lang. “Ua iloa e tamaiti le miti, o le taua o se misiona i o latou olaga—ua i ai ni aafiaga i nei alii e oo mai lava i le taimi nei,” o lana tala lea. “E tuuina mai e nei faifeautalai ua maea misiona ni molimau malolosi i le taua o le auauna atu i se misiona.”

Na manatu foi taitai o le Uarota a Voyager o se mea manaia foi i le latou uarota le potopoto faatasi o alii talavou i se afiafi o se Aso Sa a o lei malaga ese atu se tasi o i latou mo le nofoaga autu e aoao ai faifeautalai. A maea sina taumafataga laitiiti, ona fefaasoaai lea o alii talavou i le uiga ia i latou o le malaga ese atu o le alii faifeautalai. Ma e faasoa atu foi e le alii faifeautalai o le a malaga lana molimau.

Atonu o le a sili atu ona avea le tapenapena mo se misiona o se tulaga e ave i ai le faamuamua i olaga o alii talavou pe afai o le a avea o se mea e faamuamua i olaga o matua ma taitai.

E fai e taitai perisitua se taumafaiga e lagolago ai le aiga i tausaga a o lei taitai oo le matua o se alii talavou i le matua e avea ai ma se faifeautalai.

I vasega faalevaiaso o le saunia e avea ma se faifeautalai, e aoao atu ai taitai perisitua faatasi ai ma le fesoasoani a faifeautalai faatoa taliu mai. E faaaoga ai le tusi lesona Talai La’u Talalelei mo lesona ma talanoaga. O matua e taitasi i le masina ona auai atu i le vasega e avea o ni tagata sailiili ina ia mafai e tagata auai o le vasega ona faataitai ai le aoaoina atu o le talalelei.

O le auai atu foi i le seminare o se vaega taua lea o le fesoasoani atu e saunia alii talavou mo se misiona, o le saunoaga lea a Brother Law. “Ia toaga i le seminare,” na ia fai mai ai. “Sa matuai fesoasoani tele ia te au. O le taulotoina o mau e sili foi ona taua. Sa ou faaaogaina na mau i aso uma o la’u misiona.”

Ae ui i lea, e tusa lava pe o le a le maualuga o le faamuamua e tuuina i ai e matua ma taitai, ae o le filifiliga lava ina ia auauna atu ma le maelega ia saunia e ao lava ona faia e le faifeautalai lava ia.

“E leai se tasi e mafai ona tauanauina i latou e auauna atu pe a le pai atu le Agaga i o latou loto,” o le faamatalaga lea a Brother Lang. “E ao lava ona aoaoina ma faaliliuina i latou taitoatasi e le Agaga. E le mafai ona faia e i matou o taitai po o isi foi tamaiti.”

Fai mai Vee Hiapo, o le tina o ni faifeautalai se toalua o B. J. ma Kiana ua maea ni misiona, “E tatau lava ona i ai lo tatou faatuatua o le a fai e a tatou fanau le filifiliga sao ma tuu i latou e faaaoga lo latou faitalia.”

Ma i le iuga, afai e filifili se alii po o se tamaitai talavou e auauna atu, e oo lava ia i latou atonu o loo i ai ni faafitauli tautupe pe leai foi se lagolago a aiga, o le a latou maua lava se auala [e faataunuu ai se misiona]. “O le a saunia e le Alii se auala mo i latou e auauna atu ai pe afai latou te mulimuli ia te Ia i le faatuatua,” o le saunoaga lea a Lothaire Bluth, o le peresitene o le siteki a Val Vista.