Tupe Faaagaga mo Aoga o se Vavega Tuputupu Pea

Na faalauiloa mai e Peresitene Gordon B. Hinckley le TFA i le konafesi aoao ia Mati 2001. O le polokalama na fuafuaina e fesoasoani ai i tagata talavou ia maua ni tomai e mafai ai e i latou ma o latou aiga ona o ese mai le mativa ma faia ai ni saofaga aoga i alaalafaga ma le Ekalesia.

O le tele o atunuu i le lalolagi atoa, o loo auauna atu ai ma le faamaoni i le Alii ia ni faifeautalai talavou e matitiva o latou aiga. I lana saunoaga, na saunoa ai Peresitene Hinckley e uiga i luitau e feagai ma nei tagata talavou pe a latou taliu atu i le aiga:

“E maualuluga o latou faamoemoega. Peitai, e toatele i latou e matua faigata ona maua ni galuega ona e leai ni o latou tomai. Ona latou toe foi ifo ai lea i le mativa lea foi na latou o mai ai” (“O Le Tupe Faaagaga mo Aoga,” Liahona, Iulai 2001, 60).

E faavae i le mataupu faavae lava e tasi o le Tupe Faaagaga mo Femalagaaiga, lea na mafai ai e le Au Paia ona malaga atu i le Vanu o Sate Leki i le vaitaimi o le 1800, ua faamoemoe taitai o le Ekalesia o le a fesoasoani le polokalama o le TFA e faamuta ai le tulai mai pea o le mativa.

O le tuuina atu o nonogatupe mo aoaoga i matata eseese, faatekinolosi, ma faapolofesa, i se tului maualalo, e tuuina atu ai e le polokalama i tagata auai sogasoga o le vaitausaga o le 18 ma le 30 ia se avanoa e aoao ai ni tomai faalegaluega faapea foi ma le faalagolago o le tagata ia te ia lava ma le tutoatasi e aunoa ma le faia o ni aitalafu tetele.

Na saunoa le susuga a Elder John K. Carmack, o se sui ua faamalolo faamamaluina o le Korama a Fitugafulu ma o le Pule Faatonu lea o le TFA e faapea, o le polokalama ua faigofie ai ona aoaoina ma alualu i luma ia tagata talavou o e manaomia na o se avanoa ma se taiala.

“Tatou te fesoasoani i tagata talavou e fai ni a latou miti, tatou te fesoasoani ia i latou e fuafua a latou matata, ma tatou te fesoasoani ia i latou ia ausia,” na saunoa ai Elder Carmack.

E ui ina sa fuafua o ia i taimi uma e aoga i le kolisi, ae sa leai ni tupe a Brother Xozwa ma lona tina e totogi ai lana aoga. Na pau lava le avanoa sa i ai o se nonogatupe i se faletupe masani, e ui o le maualuluga o tupe tului o le a matuai taugata ai ma o le a umi atu foi se taimi e totogi uma ai. Nai lo lena, na faalogo ia Brother Xozwa i le TFA mai se ulugalii o le Ofisa o Aoga a le Ekalesia i totonu o lana eria. Sa talosaga i ai o ia ma maua ai se nonogatupe e $1,150 mai le TFA ma lesitala ai loa i vasega enisinia o komepiuta i le Kolisi o Damelin i Port Elizabeth.

Ina ua mavae se taimi pe tusa ma se tausaga o a’oga, na faapea ona ofo atu ia Brother Xozwa se galuega i se kamupani faufautua o IT [Faamatalaga i Tekinolosi]. Sa faatalitali le kamupani mo ia seia maea le tausaga aoga ma fesoasoani ia te ia i le faaauauina o ana aoaoga. O lana galuega, na mafai ai ona ia totogiina uma lana nonogatupe i le tausaga na sosoo ai, ma totogi ai e le kamupani le faaauauina o ana aoaoga mo le fa tausaga ua tuanai i mataupu e pei o le vafealoai faalegaluega, taitaiga o tagata faigaluega, taitaiga ma le puleaina o pisinisi, ma pulega maualuluga atu o galuega faatino.

“O le polokalama o le TFA na tuuina mai ia te au le fesoasoani amata na ou moomia, ae o isi mea uma na mafai lava ona ou faia,” o lana tala lea. “Na tuuina mai [e le TFA] ia te au le uunaiga amata, ma na faapea ona matala mai ai isi mea uma.”

Talu mai lava ona faalauiloa mai e Peresitene Hinckley le polokalama i le fitu tausaga talu ai, e tusa ma le 28,000 tagata talavou, o le afa tonu lava [o le fuainumera] o alii ae o le isi afa o tamaitai, na maua ni nonogatupe TFA. O le polokalama na amata muamua i Mekisiko, Peru, ma Sili, ma ua faalautele atu nei e fesoasoani i tagata o atunuu e 40 i le lalolagi atoa, e aofia ai Monokolia, Kemupotia, Kenya, Ghana, Aferika i Saute, ma nisi o Atumotu o le Pasefika, ma toeitiiti lava o Amerika Latina atoa.

O le polokalama o loo faatupeina e tagata o le ekalesia, o e ua tuueseina ni tupe mo le polokalama i a latou lisiti o sefuluai ma taulaga, faapea ma paaga a le Ekalesia o e ua talitonu i le faamoemoega o le polokalama. O le tupe na aoina (o le tupe faavae) e le faaaogaina lava, ae o nonogatupe e na o le tului lava o loo maua mai le tupe faavae e faaaoga ai.

“Ua matuai tele le agalelei o tagata ma uo [o le Ekalesia],” o le saunoaga lea a Elder Carmack, ma faaopoopo mai ai e pei ona taua uma e Peresitene Hinckley ma Peresitene Monson le faamanuiaina o le polokalama “o se vavega.”

“Ua tatou tuputupu ae,” o le saunoaga lea a Elder Carmack, ma ua faamoemoe o ia o le a vaaia e le Ekalesia “le faateleina o le tuputupu ae i le lumanai.”

O le iloaina o le mea na maua mai ai lana nonogatupe, na avea ma mea na tuuto atoa ai e Brother Xozwa o ia lava ia lelei ana taumafaiga i le aoga ma le totogiina uma o lana nonogatupe. Sa manao o ia e faaaoga ia foai agalelei i le auala sili e mafai ona ia faaaogaina ai.

“Na ou iloaina o nei tupe o tupe paia. Na faia e isi se saofaga i au aoaoga, o lea la o lou tiute ia faaali atu le agaga talisapaia e ala i le suesue malosi,” o lana faamatalaga lea. “O le tupe na faamatuu mai mo au sa le o sa’u tupe ou te taaloalo ai. Sa tuuina mai ia te au le avanoa e faia ai se mea i lou olaga, e amatalia ai se lumanai lelei, ma o lou tiute le opogi mai o le avanoa ma ia le toilalo.”

E faaopoopo atu i le tuuina atu i le autalavou matutua o avanoa i tulaga tautupe, o le TFA e mafai foi ona latou tuputupu ae ai i le talalelei ma faamalolosia ai o latou atunuu ma isi tagata o le ekalesia o loo manaomia se avanoa mo aoaoga. O nisi o tagata ua faauu mai le polokalama ua oo ina avea o ni taitai o le Ekalesia, o le saunoaga lea a Elder Carmack, ma faamautuina ai le Ekalesia i o latou atunuu.

Na saunoa Peresitene Hinckley, “O le avea ai ma tagata faamaoni o le Ekalesia, o le a latou totogiina a latou sefuluai ma taulaga, ma o le a sili atu ona malosi le Ekalesia ona o lo latou i ai i mea o soifua ma ola ai” (Liahona, Iulai 2001, 60).

A o totogi e tagata aooga a latou nonogatupe, e toe foi atu le tupe i le faaputugatupe e fesoasoani ai i isi tagata taitasi o e e manaomia le fesoasoani tautupe i a latou aoaoga, e avea ai o se tupe “faaagaga.”

Sa malamalama Brother Xozwa i lenei mataupu faavae ma sa uunaia o ia e fesoasoani atu i isi ia maua lea lava avanoa e tasi na ia mauaina.

“Ua tuuina mai e le Alii ia te oe le avanoa e alualu ai i luma, ae ia fesoasoani ai foi i le isi tagata e sosoo ai,” o lana tala lea. “O lo’u tiute le toe totogiina o le tupe i le vave ou te mafaia, ina ia mafai foi e le isi tagata e sosoo ai ona maua le avanoa lelei e aoga ma alualu ai i luma. Mafaufau la pe toafia ni tagata e mafai ona e faia i ai se faatosinaga pe afai e te faaaogaina tatau ia tupe. E mafai ona e faia mea e ofo ai e le gata mo oe lava ae faapea foi i isi tagata.”

O lona aafiaga ua aoaoina ai o ia i tomai faaletaitai ma le tutoatasi e faaopoopo atu i le faalagolago o le tagata ia te ia lava ma le gafatia e tausia ai ia tautinoga.

“E le na o ni aoaoga. E le na o le mauaina o se tipiloma po o le mauaina o se tikeri. E le na o se matata. E sili atu le tele nai lo lena. E matala ai faitotoa mo oe e tuputupu ae ai faaletagata lava ia,” o lana tala mai lea.

Fai mai Brother Xozwa e faavavau pea ona ia faafetai mo le agalelei na faasafua atu ia te ia ua mafai ai ona faia se eseesega tele i lona olaga.

“Ou te fia feiloai lava i se aso i le tagata po o tagata o e na fai saofaga i lenei polokalama, i le vaega amata na ona ou faapea atu faafetai tele lava,” na ia fai mai ai. “Atonu o ni tupe ia sa totoe i a latou taga, ae ua suia ai augatupulaga. Ua suia ai lou aiga.”