Pe Na Ou Iloa Moni Ea?
Ina ua uma se afiafi malie i Ausetalia i le 1998, na fai mai la’u uo lelei lava pe mafai ona ma o atu i la’u taavale. A o ma o atu i lona fale, na liliu atu le ma talanoaga i o maua talitonuga faavae. O ia o se tagata sa le talitonu i se Atua, ae o au o se tagata o le Au Paia o Aso e Gata Ai. Sa ou iloaina lava sa i ai se Atua; ae sa talitonu lava foi o ia na leai se Atua.
O lena afiafi, sa ou faia ai se mea ou te lei faia muamua lava. Ae ou te lei tuua la’u uo, na ou tau atu ia te ia, ou te iloa o loo soifua le Atua, ma o Iesu o lo tatou Faaola, ma na vaai Iosefa Samita ia i Laua i se faaaliga.
Sa masani ona ma talanoa e uiga i nei mea, ae ou te lei fai lava i ai na ou iloaina e moni ia mea. Ae peitai, na ou iloaina, afai o le a ou tuua ia te ia se lagona tumau, e tatau ona ou tuua ia te ia la’u molimau e uiga i nei mea.
A o ia tatalaina le faitotoa o le taavale, sa ia luluina lo’u lima ma fai mai, “Ei, sole, manaia lena. E tatau ona ta mausali i o ta’ua talitonuga.”
Ae peitai, o le faafitauli, ou te lei iloaina—ou te lei iloa moni. O le taimi lena, na pei lava e sa’o le fai atu o na upu, ae ou te lei maua lava se faamautinoaga faaleagaga i lo latou moni a’ia’i.
E 20 minute na ou tietie atu ai i le fale. O lena 20 minute na suia ai lou olaga. A o ou toe iloiloina le ma talanoaga, na amata ona ou mafaufau i lo’u olaga ma le itu na ou agai i ai. A o ou mafaufau, na oo mai i lo’u mafaufau le viiga “Ua Ou Iloa Lo’u Faaola” ma na ootia ai lo’u agaga. Na amata ona ou pese leotele:
A o ou pese, na maligi ou loimata a o molimau mai e le Agaga ia te au le faamaoni o na upu ma faamautinoa mai na moni la’u molimau. Na faapea ona ou iloaina ai, o se molimau e mafai ona maua i le tuuina atu.2
O le a le galo lava ia te au le molimau mai a le Agaga i le moni o la’u molimau. Ua ou iloa o loo soifua lo’u Faaola aua ua molimau mai ai le Agaga i lo’u agaga—o se molimau sa ou fiafia e faasoa atu i se taimi mulimuli ane a o avea [au] ma se faifeautalai faamisiona.