O Uso Taitoatasi O Se Afafine Alofaina o ni Matua Faalelagi ma Ua i Ai se Taunuuga Paia

Julie B. Beck, peresitene aoao o le Aualofa: “O outou moni lava o ni afafine agaga o le Atua, o ni ‘fanau a ni matua ua faaeaina’ ua i ai se natura paia ma se taunuuga e faavavau. Na outou mauaina la outou uluai lesona i le lalolagi o agaga mai o outou matua faalelagi. Sa auina mai outou i le lalolagi e ‘faataitai’ ai outou lava. …

“O outou o fanau faapelepele o le folafolaga. Afai tou te tausia tulafono ma poloaiga a le Alii ma usitai atu i Lona siufofoga, ua Ia folafola mai o le a Ia faasilisiliina outou i nuu uma lava i le viiga ma le mamalu ma le faaneetaga” (“E I Ai Sou Tofi Tamalii,” Liahona, Me 2006, 106, 107–08).

Peresitene James E. Faust (1920–2007), Fesoasoani Lua i le Au Peresitene Sili: “O se talitonuga o oe o se afafine o le Atua e tuuina atu ai ia te oe se lagona o le mafanafana i lou ta’uagavaaina. O lona uiga e mafai ona e sailia le malosi i le mana faamalolo o Keriso. O le a fesoasoani ai ia te oe e faafetaiaia ai lototiga ma luitau i le faatuatua ma le filemu” (“O Le Uiga o le Avea ma se Afafine o le Atua,” Liahona, Ian. 2000, 123).

Peresitene Lorenzo Snow (1814– 1901): “Matou te talitonu o i tatou o le fanau a lo tatou Tama oi le Lagi, ma ua tatou umia i o tatou tulaga faaleagaga ia na lava gafatia, mana, ma mea alofa e tasi o loo i ai i lo tatou Tama, e ui lava ina tatou i ai i se tulaga le atoatoa, lea e manaomia ai lo tatou ui atu i se ala faapitoa po o se aafiaga e faapea ona atiina ae ai ma alualu ai i luma e tusa ai ma lo tatou usiusitai i mataupu faavae ua tatou mauaina” (“Discourse,” Deseret News, Ian. 24, 1872, 597).

Peresitene Spencer W. Kimball (1895–1985): “E tatau ia te outou uma ona matuai feinu i upumoni o le talalelei e uiga i le natura e faavavau o lou lava faasinomaga ma le tulaga ese o lou lava tagata. E manaomia pea lava pea ona outou lagonaina le alofa atoatoa o lo tatou Tama oi le Lagi mo oe ma lagona le taua ua ia tuuina i ou luga i le avea ai o se tagata toatasi. Ia mafaufau loloto i nei upumoni sili, aemaise lava i na taimi a o (i ai i le filemu o se naunautaiga faapena, e te ono oo i ai i le avea o se tagata toatasi) e te tau manatunatu ai ma le le mautonu” (Aoaoga a Peresitene o le Ekalesia: Spencer W. Kimball [2006], 247).

Roma 8:16–17: “O loo molimau mai lea lava Agaga i o tatou agaga, o fanau i tatou a le Atua: afai foi o fanau i tatou, o suli foi; o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.”

Elder Russell M. Nelson o le Korama a Aposetolo e Toasefululua: “E tatau ona avea i tatou ma foafoa i o tatou lava ala—o tufuga aao o se faatuatua maoti i le Atua, faatuatua i le Alii o Iesu Keriso, ma faatuatua i Lana Ekalesia. E ao ona tatou fausia aiga ma faamauina i totonu o malumalu paia. E ao ona tatou galueaiina le Ekalesia ma le malo o le Atua i luga o le fogaeleele. E ao ina tatou sauniuni mo o tatou lava taunuuga paia—mamalu, tino ola pea, ma le ola faavavau. O nei faamanuiaga faalelagi e mafai ona tatou maua uma, e ala i lo tatou faamaoni” (“O Le Foafoaga,” Liahona, Iulai 2000, 104–5).